Aia Titiraki Taani Wareware . . .

E na reke te amwarake ae tau n taai nako n te aonnaba ao kaubwaina ibukini kateimatoaan te maiu?

▪ E mwaiti kurikuri kanoan ara buraneti ae tikauarerei ae te Aonnaba ibukini kateimatoaan te maiu. Ma ibukin rikiraken te botannaomata ao waekoani kamanenaani kaubwain te aonnaba aika mwaiti kurikuri, tao ko na iango ni kangai: ‘E kona n riki aei? E na tau n taai nako te amwarake ao kaubwaina?’

E kona ni kabebeteaki nanora n iaiangoan te titiraki aei, n ana berita te Atua are e karaoia ma te botannaomata n te maan ae raka i aon 4,000 te ririki n nako ae kangai: “Ngkai iai aonaba, ao a na aki toki bong n ununiki ma n tai, ma ni kamariri ma ni kabuebue, ma moanibong ma taenibong, ma ngaina ma boong.” (Karikani Bwaai 8:​22, BG) Ngkanne, n aron ae ti ataia bwa e na anga ootana taai ni katoabong, ti kona naba n onimaki bwa a na bon rereke baika ti kainnanoi ibukini kateimatoaan te maiu n te aonnaba.

N te ribooti teuana n 2004 ae atuna “E Kona ni Kaamwarakeira te Aonnaba?” ao e taekina iai ae kangai te tia kororongorongo ibukin te otabwanin ae Alex Kirby: “E tau te amwarake ibukia aomata n tatabemania nako n te aonnaba. Ma e aki toki te amwarake ni mena n te tabo ae aki kainnanoaki, ke e rangi ni bobuaka, ke e aki kawakinaki raoi ibukin te tai ae maan. Ngaia are e irekereke riki katoakia aomata n te amwarake ae tau ma aia waaki tautaeka nakon te rabakau n te ununiki.” E na bon akea bukini maakan aki tauni kaubwain te aonnaba ngkana e tararuaaki raoi te aonnaba ao ni baireaki raoi kamanenaani kaubwaina nako. N te katoto, n aia bong I-Iteraera ngkoa, ao e anga te kairiri ae mataata te Atua ni kaineti ma kamanenaan raoi te aba. E tuangia I-Iteraera te Atua n aron ae koreaki n Nakoaia Ibonga 25:4 (BK) ni kangai: “E na motirawa aontano n te kaitiua n ririki . . . Ko na aki unika abam.” E ngae ngke a aki mwakuria aontano ni katoa iti ririki, ma e berita te Atua bwa e na taraia raoi bwa a na kimwareirei aomata ni baika raraoi aika rangi ni mwaiti ao a na aki reke kaia bwa a na raraomaeakin aki tauni baika kainnanoaki.​—Nakoaia Ibonga 26:3-5.

E ngae ngke a a tia tabeman ni kakorakoraia ni boong aikai ni karaoa mwin uruakin te aonnaba ma kaubwaina nako, ma a mwaiti aika a iangoi aeka ni kakorakora akanne bwa a rangi n uarereke ao n oimwi. E noraki te aro ae e tii kona n teimaan iai katokana n Te Kaotioti 11:​18, ike e taekinaki n te Baibara bwa Iehova e ‘na kamaunaia te koraki ake a urua te aonnaba.’ E na aki tii kamaunaia aomata aika aki tarabwai nakon te aonnaba ao bwaina nako Iehova, ma e na taraia raoi naba bwa a na rereke baika rangi ni bati n te aonnaba ibukia kaaina. E na bane n toki te imanono ni kakeaa bongan ana kantaninga te Atua ao uruakan te aonnaba irouia aomata aika nanonrang ibukin tangiran te bwai ae a tangiria. N te itera are teuana, te koraki ake a rangi ni kukurei ni boutokaa ana tautaeka Iehova a na rinanon are taekinaki n Taian Areru 72:16 (BK) ae kangai: “Ke e kebo aon te aba n te uita, ke a rabunaki iai aoni maunga.”

E kairaki Iehova ni korakoran ana tangira ma wanawanana bwa e na kamaekaia aomata n te aonnaba ao bwa a na tararuaa naba mwengaia ae te bwaretaiti. (Karikani Bwaai 1:28) A na reiakinaki aomata ake a ongeaba i aan ana tautaeka, aroia ni kamanenai kaubwain te aba ma te wanawana n aki kakerikaaki bwaina nako ake a kawakinaki n te aonnaba. Ai kakaitaura ngaira ibukin ana tangira te tia Katauraoi are e nang katoki kainnanoia akana maiu ni kabaneia!​—Taian Areru 145:16.

 [Kabwarabwaraan n iteraniba 22]

“E irekereke riki katoakia aomata n te amwarake ae tau ma aia waaki tautaeka nakon te rabakau n te ununiki”