Teuare E Bitii Maiuia Aomata

A a tia birion ma birion aomata ni maiu ao ni mate n te aonnaba aei. A mwanuokinaki taekaia angia aomata kioina ngkai akea te bwai ae tanoata taekana ae a a tia ni karaoia are a na uringaki iai. E a tia n rotaki te waaki i aon te aonnaba ma ngkoangkoa ni karokoa ngkai irouia tabeman, ao tao e rota naba aroni maium ni katoabong.

KO UTI n te ingabong ao ni katauraoiko nakon te mwakuri. Ko kaurai taura ngkai ko katauraoiko. Ko anaa te boki ke te maekatin bwa am bwai ni wareware i aon te bwati. Ko uringa uotakin am bwatin are e na buoka tiringan te maninnaoraki. Ko a tibwa moana am bong, ao ko a kamani kakabwaiaaki mani mwin aia mwakuri tabeman mwaane aika tanoata taekaia.

Michael Faraday E bungiaki n 1791 ao kaain Engiran ae te tia rabakau ni karaoa te intin ae buti n te iti ao te dynamo ae te mitiin ae reke mai iai te iti. E ibuobuoki ana kukune aei ni kabonganaan riki te iti irouia aomata.

Ts’ai Lun E kamoamoaaki te mataniwi aei n ana tabo ni boowi te embwaea n Tiaina ibukini karikirakean te rabakau ni karaoan te beeba tao n 105 C.E. ike e a waakinaki iai karaoan te beeba ae mwaitikurikuri.

Johannes Gutenberg Tao n 1450, are e moani kunea iai karaoan te mitiin ni boreeti ae kabonganai manin koroboki aika kona ni kamwaingingaki. E reke angani baika boreetiaki aika bobete n te aro are e a reke iai butanakon ataakin rongorongo i aoni baika bati.

Alexander Fleming N 1928, e a kunea te bwainnaoraki ae e aranna bwa te penicillin te tia kakaae ae te I-Tikaoteran. A taabangaki ngkai kabonganaakini bwainnaoraki aikai ibukin tiringani maninnaoraki.

Akea te nanououa bwa kukune ma aanga aika boou mairouia mwaane tabeman, a a tia ni buokiia aomata aika birion ma birion mwaitiia ni karekei baika raraoi riki, ke ni buokiia bwa a na marurung riki.

Ma e ngae n anne, iai teuare e rangi ni kaokoro ma aomata nako. E aki rangi n ataaki ibukin ana kukune ni kaineti ma rabakaun aonnaba teuana ke kukune i aoni bwainnaoraki. N oneani mwin anne, e nako teuaei man te utu ae mangori ao e mate tao e kaania 2,000 te ririki n nako. Ma e katuka te rongorongo ae kabebetei ao n rotii naano n te kantaninga ae raoiroi. Ngkana e iangoaki bwa tera aroni korakoran rotakin nanoia aomata ni katobibia te aonnaba, a bati aika a na kakoauaa bwa bon teuare e bitii maiuia aomata.

Teuanne bon Iesu Kristo. Tera te rongorongo are e tataekinna? Ao tera aron rotakini maium n te rongorongo anne?