ATUN TE MAEKATIN: ANTAI MOTE?
Antai Mote?
Tera ae reke n am iango ngkana ko ongo te ara ae Mote? Ko iangoia bwa . . .
-
te teei are e kabetinakoaki i nanon te bwaene n te Karaanga are te Naire iroun tinana?
-
te teinimwaane are e kaikawaaki iroun natini Barao te aine n aia tabo kaubwai i aon Aikubita ma e aki roko n te mwaninga ae te I-Iteraera ngaia?
-
te mwaane are te tia kawakintiibu i Mirian i nanon 40 te ririki?
-
te mwaane are e taetae ni kawai ma Iehova * i matan te aroka are urarake?
-
te mwaane are e tei i matan uean Aikubita, ao n ninikoria n tuatua kainaomataakia tibun Iteraera man te tautoronaki?
-
te mwaane are e ongeaba nakon ana kaetieti te Atua ma ni katanoataa rokoni Baika Kamamate Ake Tebwina i aon Aikubita, ngke e karitei te uea nakon te Atua ae koaua?
-
te mwaane are e kaotinakoia tibun Iteraera ma te kukurei mai Aikubita?
-
te mwaane are e kamanenaaki bwa e na katabwenaa Taari ae Uraura?
-
te mwaane are e angania tibun Iteraera Tuua Ake Tebwina mairoun te Atua?
E BANE n rinanoni baikanne Mote ao a a bati riki. Maroaka ae e a rangi ni korakora karinean te mwaane ae kakaonimaki aei irouia Kristian, I-Iutaia ao Mutirim ni kabane!
Akea te nanououa bwa bon te burabeti Mote are e kaotiota “te bwai ni kakamaku are ababaki, [ke “te mwaaka ae kamimi,” NW].” (Te Tua-Kaua 34:10-12, BG) E kariaia bwa e na kamanenaaki iroun te Atua n te aro ae kamimi. Ma e ngae n anne, bon te aomata n ai arora naba Mote. Bon akea okorona ma te burabeti are Eria are e kaoti irarikini Mote n te Miitara n ana tai Iesu ni mwakuri ni minita i aon te aba, ai uana naba ma Mote bwa bon “te aomata n ai arora.” (Iakobo 5:17; Mataio 17:1-9) E kaaitara naba Mote ma kangaanga ake ti aitara ma ngaai, ao e tokanikai i aoia.
Ko kan ataia bwa e kanga ni karaoa anne? Iangoi tenua aroaroni Mote aika raraoi ake e kaotiotii ao te bwai ae ti kona n reiakinna man ana katoto.
^ Iehova bon aran te Atua ae kaotaki n te Baibara.
