E irekereke te nanorinano ma te kainaomataaki man te kamoamoa ke te kainikatonga. E aki iangoia te aomata ae nanorinano bwa a mangori riki aomata nakoina. E ururingnga te aomata ae nanorinano bwa e aki kororaoi ao e ataia bwa iai tian ana konabwai.

E aki karikirakea te kamoamoa ngke e anganaki mwaakana. N angiin te tai, e waekoa n oti bwa e nanorinano ke e kamoamoa te aomata ngkana e reke mwaakana teutana. E taekina ae kangai te tia kororongorongo n te katebwi ma ruaiwa n tienture ae Robert G. Ingersoll: “A kona angiia aomata n nanomwaaka i aani kangaanga. Te anga ae te kabanea n tamaroa are e na oti iai te aomata bwa e nanorinano ke e aki, boni mani kamanenaani mwaakana.” Ni kaineti ma anne, e katea te katoto ibukin te nanorinano ae moan te tamaroa Mote. N te aro raa?

E anganaki Mote mwaakana ae korakora iroun Iehova ao e mwiokoia bwa e na kairiia tibun Iteraera. Ma e ngae n anne, e bon aki roko n te kamoamoa Mote n te mwaaka anne. N te katoto, iangoa arona ae te kabanea n nimamannei ngke e kaekaa te titiraki ae kakawaki ibukin riaini karekean te tibwanga mairouia kaaro. (Warekaia Iteraera 27:​1-11) Bon te titiraki ae kakawaki bwa e na reke iai te babaire ae eti i aan te tua, tiaki tii bukia aine akanne ma ibukia naba rooro nako.

E kanga ni kaeka Mote? E iangoia bwa e ataa raoi ana motinnano ae e riai ni karaoia ngkai te tia kairiia tibun Iteraera ngaia? E na onimakina oin ana konabwai, mwaataina ngkai e a bati ana ririki ni mwakuri ke ibukina bwa e atai raoi ana iango Iehova?

E na bae ni karaoa anne te aomata ae kamoamoa. Ma e bon aki karaoa anne Mote. Ti tuangaki ae kangai n te Baibara: “Ao Mote e uota kaotan taekan aroia nako matan Iehova.” (Warekaia Iteraera 27:​5, BG) Iangoa aei! E ngae ngke e kairiia te natannaomata ae Iteraera Mote i nanon 40 tabun te ririki, ma e aki onimakinna i bon irouna ma e onimakina Iehova. E teretere nakoira bwa e rangi n nanorinano Mote.

E aki iangoia Mote bwa bon tii ngaia ae riai n anganaki te mwaaka. E kimwareirei ngke a kariaiakaki tibun Iteraera ake tabeman iroun Iehova bwa a na riki bwa burabeti naba. (Warekaia Iteraera 11:​24-29) Ngke e kaota ana iango tamani buuna bwa e riai n tibwai mwiokoana tabeua, e nanorinano ni karaoa anne. (Te Otinako 18:​13-24) Ao ngke e nang toki maiuni Mote, e a butiia Iehova bwa e na rinea te tia onea mwina e ngae ngke e rangi ni marurung. Ngke e a rineaki Iotua iroun Iehova, e kabanea nanona Mote ni boutokaa te rorobuaka anne ao e kaumakiia aomata bwa a na ongeaba nakon Iotua ngkana e kairiia nakon te Aba ni Berita. (Warekaia Iteraera 27:​15-18; Te Tua-Kaua 31:​3-6; 34:7) Ni koauana, e iangoia Mote bwa bon te kakabwaia kairan aia taromauri tibun Iteraera. Ma e aki karimoaa mwaakana nakoni mweraoia aomata.

Ti aki tangiria bwa ti na rikirake ni kamoamoa ngkai ti anganaki te mwaaka teutana ke ibukin ara konabwai. Uringnga: e rangi ni kakawaki riki te nanorinano nakon ara konabwai, ngkana ti kani karaoa te mwakuri ibukin Iehova n ara kabanea n tamaroa. (1 Tamuera 15:17) Ngkana ti nanorinano ma nanora ni koaua, ti a kakorakoraira iai ni maiuakina te taeka n reirei ae n te Baibara ae kangai: “Ko na onimakina Iehova n nanom ni kabane, Ao tai mwiokoa oin am ataibwai.”​—Taeka N Rabakau 3:​5, 6, BG.

Ti reireiaki naba n ana katoto Mote bwa e na aki rangi ni kakawaki iroura te nakoa ke te mwaaka.

Ti kakabwaiaaki ngkana ti kakairi n ana katoto Mote ibukin te nanorinano? Akea te nanououa bwa ti boni kakabwaiaaki! Ti kabebetea riki maiuia aomata aika ti maeka i buakoia n te aro ae ti a tatangiraki irouia, ngkana ti karikirakea te nanorinano ni koaua. Ma ae kakawaki riki, ti a tatangiraki iroun Iehova ae te Atua are boni ngaia ae kaotiota te aroaro ae tamaroa aei. (Taian Areru 18:35) E taekinaki ae kangai n te Baibara: “E kaaitaraia akana kainikatonga te Atua, ma e anga te akoi ae rianako nakoia akana nanorinano.” (1 Betero 5:5) Ai kakawakira bwa ti na kakairi n ana katoto Mote ibukin te nanorinano!