I bungiaki n te kaawa ae uarereke i Texcoco. N te tai anne a tuai karaoaki raoi angiini kawaina ao a bubu. A taneiai n nonoraki aomata mani kaawa ake a uakaan ni kairiria aia aati nakon te kaawa ma uotaia aika rangi ni bati aika a na kabooakinako. Ti maiu ni kainnano n ara utu ao bon ruaman ataei iai ao ngai bon te kaitiman. E kakaraoi kauniwae aika uruaki aika taian guaraches tamau ni boutokaa iai maiuia ara utu. Ao e mate ngke itua au ririki. Man te tai anne, e mwakuri korakora tinau ibukini maiura.

E rabakau ni katangitangi ma te violin tibuu te unimwaane ao e kakaira naba katangani bwaai ni katangitangi aika kakaokoro mani kakaongora tangia ake a kaineti ma kunan te Aro. A kuri ni bane kaain au utu n rabakau ni kabonganai bwaai ni katangitang. E anene tinau ni kuaean te Aro n te umwantabu ao ai tamau bon te tia biaano ao te tia anene n taiani kaotioti. Ti rangi n taua te Aro bwa I riki bwa te tia uota te karea ao I miiakinna bwa N na riki bwa te mitinare n te Aro ni Katorika. N te tai naba anne, I rangi ni babaeakini birim ni karate. E ririkirake karaoani mwakuri n iowawa ngke I a kabatiaa matakuakinani birim akanne.

I rin n reirein te Aro ae ai aron te kuura n tama i Puebla. Tiau ae I iangoia bon te mitinare n te Aro ni Katorika. Ma i nanon au kabanea n ririki n reirei, I a moanna ni ribaa te Aro ni Katorika. E kataia temanna te tina ae te roro n rikirake n te Aro anne ni karaoi mwakuri ni kabwakabwaka nakoiu. I rawa nakon te kariri anne ma e a tabe n ririkirake irou tangiran te kan iein. Irarikin anne, I noria bwa a bati mitinare ake a mwamwanaa te aba n aroaroni maiuia. N tokina, I a kakeaa tiau are N na riki bwa te mitinare.

I a motinnanoia bwa N n reiakina te anene n te tabo n anene  ae te National Conservatory of Music ni Kawani Mexico. Ngke e a reke au beeba n te anene, I a mare ao imwina a a riki natira aika aman. I boutoka maiuia kaain au utu n te anenene n te Tutia n te Aro ni Katorika.

E rotaki n te kangaanga ara mare ngke ti moan taanga. I aki toki n un n te aro ae iowawa ma kaainnabau ibukina bwa ti karabai nanora ni kokoo. N te moan tai, ti aki toki ni kakauntaeka ma imwina riki ti a boni kaai n oro. N tokina, imwin 13 te ririki ti a iangoa te maenako ao imwin anne ti a buuraure.

Au moantai ni kaitiboo ma Ana Tia Kakoaua Iehova bon imwain raureu ma kaainnabau. A karebwerebwe uoman taani Kakoaua n ara mataroa ao ni waakina kabwarabwaraan te Baibara. N au iango I taku bwa I rangi ni mwaatai i aon taekan te Aro, ngaia are I kataia ni karaoi mwakuri ake N na kakoauaa iai nakoia bwa a bure. I tabeki titiraki aika kangaanga ake I taku bwa akea kaekaaia. Ma I boni mimi, bwa a aki toki n anganai kaekaaia aika eti ake a boto man te Baibara. I a moanna n ataia bwa e rangi n uarereke au atatai. Ma e ngae n anne, bon akea ana katei kaainnabau nakoia taani Kakoaua, ao I rangi n tatabetabe naba ngaia are a aikoa kakawarira.

Nimaua te ririki imwina, I a manga maeka ma temanna te aine ae arana Elvira ike I a manga kaitiboo iai ma Ana Tia Kakoaua Iehova. E bon aki kaaitaraia taani Kakoaua Elivira, ngaia are I a kunea bwa e bebete riki reiakinan te Baibara ni katoatai. E ngae n anne, I kataia ni bita maiu i nanon ririki aika bati.

I a ataia bwa ngkana I kan taromauria Iehova ma nanou ni koaua, I riai ni karaoi bitaki aika korakora tabeua. Te moan, I riai ni kitana au mwakuri n anene n tain te Tutia n te Aro ni Katorika, are nanona ngkanne bwa N na kakaaea riki au anga ni kareketianti. (Te Kaotioti 18:4) I riai naba ni mare n te tua ma Elvira.

Te bitaki teuana ae rangi ni kangaanga irou ngkanne bon reiakinan te aki kakai urarake n un. A buokai riki kibun te Baibara aika uoua ae Taian Areru 11:​5, bwa e kaotaki iai aron Iehova n ribaa te iowawa ao 1 Betero 3:​7, e reireinai bwa ngkana I tangira Iehova bwa e na ongo au tataro, I riai ni karinea buu. Ngke I tabe ni kananoi au iango i aoni kiibu akanne ao n tataroa buokau mairoun Iehova, I a kona iai n taotaona nanou ni kakerikaaka te kakaiun teutana imwin teuana.

I a namakina ngkai te kukurei n au utu. I a kataia ni kanakoraoa au reitaki ma natiu mwaane ake man au moannei ao ni buoka au utu ae boou bwa a na korakora n te onimaki.

Ngke te ataei ngai ao I miiakinna bwa N na riki bwa te mitinare ao ni buokiia aomata. I a namakinna ngkai bwa e a manena maiu. I boutokai maiuia au utu bwa I riki bwa te tia reirei n te anene. I rangi ni kakaitaua Iehova bwa e taotaona nanona nakoiu n anganai au tai ae N na bitaki iai nakon te aomata ae raoiroi riki!