TE MARORO MA TE AOMATA TEMANNA
E Tabeakin Rawawatara te Atua?
E kaotaki mai nano aron raoi te maroro ma te aomata temanna iroun temanna Ana Tia Kakoaua Iehova. Ti na iangoia bwa aongkoa e roko te tia Kakoaua temanna ae arana Michelle n ana auti Nei Sophia.
E NA KANGA NI KARIAIA TE ATUA BWA E NA RIKI AEI?
Michelle: I tibwatibwaa ngkai te turaeki aei nakoia aomata ni kabane n am aono. E kangai taekana: Ko Kan Ataa te Koaua? Aio am turaeki.
Sophia: Taekan te Aro kanoana?
Michelle: Eng. Nori titiraki aika onoua akana karinanaki i tinanikuna. E nga mai buakon titiraki aika—
Sophia: Taua moa ikanne. E banebuaka am tai ni kataetaeai.
Michelle: Bukin tera bwa ko taekina anne?
Sophia: Ni koauana, I aki kakoauaa bwa iai te Atua.
Michelle: I karabwako ngkai ko kaota raoi nanom nakoiu. Ma I kona n titirakiniko, Ko iaiangoa anne n taai nako?
Sophia: I aki, bwa I ikawairake n irirakin te taromauri, ma I a rangi ni maan ngkai n aki iriri.
Michelle: I ota n anne. Ma N na kaotai moa. Arau Michelle.
Sophia: Arau Sophia.
Michelle: I kukurei ni kaitiboo ma ngkoe Sophia.
Sophia: Ao ngai naba.
Michelle: I aki roko bwa N na kairoroko nakoni baika I kakoauai Sophia, ma I kan ongora iroum. Iai te bwai teuana ae kairiko bwa ko na nanououa bwa iai te Atua ke akea?
Sophia: Eng, bwa e okinakoaki n te ka tinau 17 te ririki n nako.
Michelle: I rangi n nanokawaki n ongo anne, ao e ikoaki?
Sophia: Eng, ao e a boni mwauku naba man te tai anne.
Michelle: Ai kananokawakira anne. E bae n rangi n uruaki nanom.
Sophia: E bon eti anne, ao aei bukina ngkai I iangoia bwa ngkana ngaia bwa iai te Atua, e na kanga ni kariaia bwa e na riki aei? Bukin tera bwa e aki katoka rawawatara ae ai aron aei?
E BURE NGKANA TI TITIRAKI BWA BUKIN TERA?
Michelle: Akea buren am iango ao am titiraki akanne. Ngkana ti rawawata, ti boni bae n iangoia bwa bukin tera ngkai e riki aei. Ni koauana, a iango naba n aron anne tabeman mwaane ma aine ake a kakaonimaki n taai ake a karakinaki n te Baibara!
Sophia: Ko boni koaua?
Michelle: Eng. Ko kukurei ngkana I kaota te katoto teuana man te Baibara?
Sophia: I kukurei.
Michelle: Nora ana titiraki te burabeti ae kakaonimaki are Abakuka nakon te Atua n Abakuka mwakoro 1, kibuna 2 ao 3 (BG) ae kangai: “Iehova, ai ti maan ra tangu, ao Ko aki kan ongo? I tang nako Im n taekina te tiritiri, ao ane Ko aki kani kamaiua te aba. Bukin tera ngkai Ko kaota te buakaka nako iu?” Titeboo titiraki aikai ma ake ko tabeki?
Sophia: Eng.
Michelle: E aki takuaki Abakuka iroun te Atua ibukin ana titiraki akanne, ao e aki naba tuangnga bwa e riai ni kakorakoraa riki ana onimaki.
Sophia: Ai kaungananora anne.
E AKI KUKUREI IEHOVA N TE RAWAWATA
Michelle: E reiakinaki n te Baibara bwa e nori rawawatara te Atua ao e tabeakinira.
Sophia: Tera ae ko nanonna?
Michelle: N na kaota te katoto teuana n Te Otinako 3:7, (BG). Ko kukurei ni wareka te kibu anne?
Sophia: Eng. E kangai: “Ao E taku Iehova, ‘I bon nori rawawataia au aomata ake a mena i Aikubita, ao I ongo tangia i bukiia tan teinia; ba I atai raraomaia.’”
Michelle: Ko rabwa. N iangoan te kibu aei, e koaua bwa e noriia ana aomata te Atua ngkana a rawawata?
Sophia: Eng, e taraa n ae e noriia.
Michelle: Ao e aki n ae e tii nora te bwai ae riki. Bwa nora riki kabanean te kibu anne. E taku te Atua: “I atai raraomaia.” N ongoraam n taeka akanne, antai ana taeka, te Atua ae aki tatangira ke ae aki mutiakinira?
Sophia: Bon tiaki ngaia anne.
Michelle: E aki tii nori ara kangaanga te Atua ma e nanokawaki naba ngkana iai ara kangaanga.
Sophia: E koaua anne.
Michelle: Ngkai ko iangoa anne, ti na wareka te rongorongo riki teuana ngke a karawawataaki ana aomata te Atua. E koreaki n Itaia 63:9, (NW). E kangai moan iteran te kibu anne: “E bon rawawata naba n aia tai n rawawata ni kabane.” N am iango, e rotaki te Atua n rawawataia ana aomata?
Sophia: Eng, e bae n rotaki.
Michelle: Ni koauana Sophia, e rangi n tabeakinira te Atua ao e aki kukurei n norira n rawawata. Ngkana ti maraki ao e maraki naba.
BUKIN TERA BWA E BAENIKAI?
Michelle: Imwain ae I kitaniko, iai te bwai riki teuana ae I kani maroroakinna ma ngkoe.
Sophia: Uotiko.
Michelle: Iangoa reireiara n te Baibara ibukini mwaakan te Atua. I ururinga te kibu ae n Ieremia 10:12, (BG). Ko kona ni warekia riki taiaoka?
Sophia: Eng. E kangai: “E karaoi aonaba ni mwakana, E kateimatoai aaba nako n rabakauna, ao E bairei taiani karawa n ana ataibwai.”
Michelle: Ko rabwa. Ti na iangoa te kibu aei i nanon tabeua te tai. E kainnanoa te mwaaka ae bati te Atua ni karikan te iuniweeti ae totoakaei ao bwaai ni kabane aika i nanona?
Sophia: Eng, e kainnanoia.
Michelle: Ngkai iai mwaakan te Atua ni kariki bwaai ni kabane aika otabwaninira, tiaki ti kantaningaia naba bwa iai mwaakana ni katoki rawawatara?
Sophia: Eng. Eti anne.
Michelle: Kaoka am iango ngkanne nakon tinam. E aera bwa ko tabeaianga ngkai ko noria bwa e rawawata?
Sophia: Ibukina bwa I tangiria, ao bon tinau.
Michelle: Ao ngke arona bwa iai ngkai mwaakam ko na katoka aorakina?
Sophia: Boni ngaia raoi anne.
Michelle: Iangoia bwa tera ae nanonaki n anne. Ti reiakinaki n te Baibara bwa e nori rawawatara te Atua, e rawawata naba ao e rangi ni korakora mwaakana. Ko kona n iangoa aroni korakoran ana taotaonakinnano te Atua n arona n aki waekoa ni katoki rawawatara ngkai naba?
Sophia: I tuai man iaiangoa anne mai mwaina.
Michelle: Tiaki bwa iai bukina ae riai ngkai e tuai ni karaoa te bwai teuana ni katoki ara kangaanga? *
Sophia: Aa, n au iango e boni bae.
Michelle: I a kona n ongo tangin am tareboon, mangaia are I kona ni manga oki n te tai teuana ni maroroakina riki aei.
Sophia: Ko rabwa. I kukurei n anne. *
Iai te reirei teuana man te Baibara ae ko nanououa iai? Iai aia koaua ke aia waaki n taromauri Ana Tia Kakoaua Iehova ae ko rangi ni kani kaotako iai? Ngkana iai, tai tabwara n titirakina Ana Tia Kakoaua Iehova temanna. E na boni kukurei ni maroroakini baikanne ma ngkoe.
^ Ibukin rongorongona riki, nora mwakoro 11 n te boki ae Tera Ana Reirei ni Koaua te Baibara? ae boreetiaki irouia Ana Tia Kakoaua Iehova.
^ E na maroroakinaki n rongorongo aika teuana imwin teuana n te kaongora ae na roko bwa bukin tera ngkai e aki katoka te rawawata te Atua.
