Te Koaua Bwa Ti Kona ni Kakukureia te Atua?
Ko a tia ni wareka taekaia aomata aika kamoamoaaki n te Baibara ao ko taekina aei: ‘I a bon aki kona ni katotongia! Ko bae ni kangai: ‘Te aomata ngai ae I buakaka ke I aki raoiroi ao I aki toki ni kakaraoa ae kairua.’
Iobi bon ‘te aomata ae moan te raoiroi ao eti arona.’
E kabwarabwaraaki te baatua ae Iobi bwa ‘te aomata ae moan te raoiroi ao eti arona.’ (Iobi 1:1, BG) E aranaki Rota bwa “te aomata ae raoiroi.” (2 Betero 2:8) E taekinaki naba Tawita bwa “e kakaraoa ti te bae e riai” i matan te Atua. (1 Uea 14:8, BG) Ma e ngae n anne, ti na rinanoi raoi ngkai maiuia te koraki akanne ake a taekinaki rongorongoia n te Baibara. Ti na noria bwa (1) a karaoa ae kairua (2) ti kona ni karekei reireiara aika bati man aia katoto ao (3) a kona ni kakukureia te Atua aomata aika aki kororaoi.
A KARAOI KAIRUA
“E kamaiua Rota ae te aomata ae raoiroi [te Atua], are e rangi n rawawata n aroia aomata n akiako ni kakaraoa ae kammaira.”
E karawawataaki Iobi ni kangaanga aika mwaiti ike e a taraa n iangoaki bwa bon te ribuaka anne. E boni kairua ana iango ngke e iangoia bwa e aki tabeakinna te Atua, e ngae ngke e teimatoa n onimakinna ke e aki. (Iobi 9:20-22) E kakoauaa raoi bwa e raoiroi nakoia tabemwaang ao e taekinna naba bwa e raoiroi riki nakon te Atua.—Iobi 32:1, 2; 35:1, 2.
E baenikai Rota ni karaoa te motinnano ae rangi ni bebete ao ni mataata. E rangi ni karawawataaki n aroaroia aika aki riai kaain Totom ma Komora ao e ‘kammarakaki naba’ n aia mwakuri aika bubuaka. (2 Betero 2:8) E taekinna te Atua bwa e na kamaunai kaawa aika buakaka akanne ao e karekea angan Rota bwa e na kamaiuaki ma ana utu. Ko bae n iangoa aron tabeaiangan Rota ngkai ngaia ae e na moani kitana ikanne. Ma e ngae n anne, e boni waeremwe Rota n tain te karuanikai anne. A taua baina anera ake a kanakoaki bwa a na kamaiua ma ana utu ao ni kaotinakoia man te kaawa ni kamanoia.—Karikani Bwaai 19:15, 16.
‘E ira nanon te Atua n nanona ni kabanea Tawita, ma ni kakaraoa tii te bwai ae riai i matana.’
E kaotiota te aki taotaonakinnano Tawita n te tai teuana ao e a karaoa te wene ni kimoa ma te aine ae buun te mwaane temanna. E kairaki bwa e na tiringa buun te aine anne ibukini karabaan te baere e karaoia. (2 Tamuera, mwakoro 11) E taekinaki n te Baibara bwa “e buakaka te baere e karaoia Tawita i matan Iehova.”—2 Tamuera 11:27, BG.
A karaoi kairua Iobi, Rota ao Tawita ao a rangi ni kakaiaki aia kairua tabeua. N aron ae ti noria, a boni kabanea nanoia ni beku iroun te Atua ma n ongeaba. A tauraoi ni kaotia bwa a rangi n raraoma ao ni bitii maiuia ae kainnanoaki. Ngaia are e kukurei te Atua irouia ao a taekinaki n te Baibara bwa mwaane aika kakaonimaki.
TERA REIREIARA MAI IAI?
Ti aki toki ni karaoa ae kairua kioina ngkai ti aki kororaoi. (I-Rom 3:23) Ma ngkana e riki anne, ti riai ni kaotiota te raraoma ao ni karaoa ara kabanea ni kona ni kaetii arora.
A kangaa Iobi, Rota ao Tawita ni kaeta te baere a karaoia ae kairua? Iobi bon te aomata ae raoiroi nanona. Imwini kaetakina iroun te Atua e a bita ana iango ao n raraoma ibukin te bwai are e a tia n taekinna. (Iobi 42:6) E kaboraoa ana iango Rota ma ana iango te Atua ibukin aroaroia aomata ake a mena i Totom ma Komora. Ana kangaanga te mwaane anne bwa akea irouna te nano n umaki. E boni birinako mani kaawa ake a tia ni motikaki taekaia ao ni kamanoaki man ana motikitaeka te Atua. E ongeaba bwa e aki tanrikaaki n tarai baike e kitan. E ngae ngke e karaoa te bure ae rangi ni kakaiaki Tawita n uruakan ana tua te Atua, ma e bunra nanona ni koaua n arona n rairannano ao ni bubutiia te Atua bwa e na nanoangaia.—Taian Areru 51.
E kaineti ana iango te Atua ibukin akoaia mwaane akanne ma ana kantaninga aika raoiroi ibukia aomata aika aki kororaoi. “E atai arora ni karaoaki [te Atua]; E uringira ba taano ngaira.” (Taian Areru 103:14, BG) Ngaia are e a kaman ataia te Atua bwa ti aki kona n rarawa nakon te bure ma tera are E kantaningaia mairoura?
“E atai arora ni karaoaki [te Atua]; E uringira ba taano ngaira.”—Taian Areru 103:14, BG
A NA KANGAA AOMATA AIKA AKI KORORAOI NI KAKUKUREIA TE ATUA?
Ni kauringaan natin Tawita are Toromon irouna, ti a karekea iai te kawai ibukin arora ni kakukureia te Atua. “Ao ngkoe, natiu ae Toromon, ko riai n ata Atuan Tamam. Ko na toro irouna ma nanom ni kabanea.” (1 Rongorongo 28:9, BK) Tera ae nanonaki n te nano ni kabanea? Bon te nano ae tangira te Atua ma n ingainga ni kan ataa ana kantaninga ao ni karaoa nanona. E bon aki kororaoi ma e korakora nanona ni kani beku ibukin te Atua ma te ongeaba ao n tauraoi ni kaetaki naba. Ibukina bwa a tangira te Atua ao a ongeaba irouna, e a iangoa Iobi te Atua bwa ‘te aomata ae moan te raoiroi,’ Rota bwa “te aomata ae raoiroi” ao Tawita bwa “e kakaraoa ti te bae e riai” i matan te Atua. E ngae ngke a karaoa ae kairua ma a kona ni kakukureia te Atua.
E ingainga ni kan ataa ana kantaninga te Atua te nano ni kabanea ao ni kairaki rinanoni korakoran tangiran te beku iroun Iehova ma te ongeaba
Ngaia are ti bia kakorakoraira ni kakairi ni katoto ake a tibwa tia ni maroroakinaki, ngkana ti kabwaka ao ni karekea te iango ae buakaka n arora ni maamaa ni karaoan ae bure ke te mwakuri ae kairua are ti uringaaba iai. E ataia te Atua bwa e riaoni korakorara te aki kororaoi n te tai aei moa. E ngae n anne, e kantaningaira te Atua bwa ti na tangiria ao ni kakorakoraira n ongeaba irouna. Ngkana ti kabanea nanora ni kaineti ma anne, ti a kakoauaa raoi bwa ti kona ni kakukureia te Atua.
