I bungiaki i Acul ae te kaawa ae raroanako ae mena n taabo aika maungaunga n te itera maeao i Guatemala. Boni kaain te baronga ae te Ixil au utu ae te reeti teuana man te Maya. I bon ikawairake ni kamanenaan taetaen abau irarikin te taetae n Tibein. Ni moan au ririki ni maiu ao e riki naba te buaka i marenaia kaain Guatemala ike e a korakora iai te tiritiri i nanon 36 te ririki. A bati kaain te baronga ae te Ixil ake a a mate n te tai anne.

Ngke aua au ririki, e takaakaro tariu ae itua ana ririki ma te bwaura are e a karina naba n rebwetaua. E kananokawaki bwa e mate tariu ao ngai I a mataki. Imwin anne, I a mena n te tabo are a kawakinaki iai mataki i Guatemala City ike I a reiakina iai te Braille ae te taetae ibukia mataki. I aki ataia raoi bwa e aera ngkai a katabuakaki taani mwakuri ni maroro ma ataei tabeman ao a rarawa naba ni mamaroro ma ngai raou n reirei. Bon akea raoraou ae I mamaroro mangaia, ngaia are I tangiria bwa e na waekoa n roko te tai are N na okira mwengau n tiku iai uoua namwakaina ni katoa ririki, irarikin tinau are e akoai ao n tabeakinai n taai nako. Ma e kananokawaki bwa e mate tinau ngke tebwina au ririki. I namakinna bwa ai bon akea te aomata ae tangirai n te aonnaba aei ao e a rangi n uruaki nanou.

Ngke 11 au ririki, I a okira au kaawa ao ni maeka iroun ai tariu ma ana utu. A bon tabeakini baike I kainnanoi ma bon akea ae kona ni karaua nanou. N taai tabetai I bon tang ao ni bunra nanou nakon te Atua ni kangai: Tera bukina ngkai e mate tinau? E aera ngkai I mataki? A tuangai aomata bwa bon nanon te Atua bwa a na riki kangaanga aikai. I a kakoauaa bwa e aki tabeakinia aomata te Atua ao e bangaomata. Iai bukina ae I aki kani bakabureai bwa bon akea nanou ni kani karaoia.

Ngkai I a mataki ai bon akea te bae I kona ni karaoia. Ngke te teinimwaane ngai ao e kakaraoaki nakoiu te mwakuri ni kammaira n taai aika bati. Ma I aki ribootini baikai ibukina bwa akea ae kona n tabe iai. E burenibwai bwa a na taetae aomata nakoiu, ao bon akea raou ni mamaroro. Bon akea ae I kona n onimakinna.

Ngke te roro n rikirake ngai, a kawarai taanga aika kaain Ana Tia Kakoaua Iehova n tain te motirawa ae uarereke n te reirei. E ataa au kangaanga te tia reirei temanna ngaia are e a tuangia bwa a na kawarai. A taekini berita man te Baibara ibukini mangautiia maate ao te tai teuana are a na noraaba  iai mataki. (Itaia 35:5; Ioane 5:28, 29) E anaaki nanou n te baere a reiakinai iai, ma e kangaanga bwa N na maroro mangaia kioina ngkai I aki taneiai ni mamaroro. N aki ongea anne, a boni kaota te akoi ao te taotaonakinnano n aroia n teimatoa n reiakinai. A riaon te maunga n te raroa ae 10 te kiromita taanga aikai ni kakawarai n au kaawa.

E kabwarabwarai aroia naakai ai tariu bwa a kunnikainia n te aro ae taraaraoi, ma bon aomata aika karako kaubwaia. E ngae n anne, a boni kaotiota tabeakinau ao a uouotii nakoiu aia bwaintangira aika bon tau. Bon tii Kristian ni koaua aika kaotiota te anganano ae aron aei.

I buokaki n reiakina te Baibara mani booki ake a karaoaki n te taetae ae te Braille ibukia mataki. E ngae ngke I kona n ota n te baere I reiakinna, ma iai naba baike a kangaanga butimwaeaia irou. Te katoto, I kakorakoraai ni kakoauaa bwa e bon tabeakinai te Atua, ao iai naba tabeman ake a kona n tibwaa te koaua anne nakoiu. I a ataa bukina ngkai e aki katoka te rawawata Iehova, ma e kangaanga kakoauaan ae N na kinaa bwa bon te Tama ae tatangira ni koaua. *

I buokaki ni bita au iango teutana imwin teutana n te baere I reiakinna man te Baibara. Te katoto, I reiakinna bwa e korakora ana nanoanga te Atua ibukia ake a karawawataaki. E taekinia taan taromauria ake a bwainikirinaki ni kangai: “I bon nori rawawataia au aomata . . . ba I atai raraomaia.” (Te Otinako 3:7, BG) Ngke I a kona ni kakoauai aroaron Iehova aika raraoi, I a kairaki iai bwa N na katabua maiu nakoina. I bwabetitoaki bwa temanna Ana Tia Kakoaua Iehova n 1998.

Tao teuana te ririki imwini bwabetitoau, I a kaea te reirei ibukia mataki n te tabo ae kaan ma Escuintla. E ataa au kangaanga te unimwaane n te ekaretia n te aono anne are I aki kona ni kaakaei bobotaki n te ekaretia, ngke I mena n au kaawa. Eng, e mena n taabo aika maungaunga te ekaretia ae uakaan ake a mwamwananga mai iai taanga ake taani Kakoaua bwa a na reirei ma ngai, ao e boni kangaanga mwamwanangau n te kawai anne. E buokai te unimwaane anne ni karekea te utu aika taani Kakoaua ake a kukurei ni butimwaeai nakoni mwengaia ao a buokai bwa N na kaakaei bobotaki n te ekaretia. A tabeakinai kaanga boni kaain aia utu ni karokoa te bong aei.

I kona n taekini katoto aika mwaiti ni kaineti ma aia tangira ni koaua kaain te ekaretia ibukiu. Mani baikai ni kabane, I a kakoauaa raoi bwa I a mena i buakoia Kristian ni koaua ngkai I a riki bwa temanna Ana Tia Kakoaua Iehova.—Ioane 13:34, 35.

E a toki iangoan are ai akea uaau ao au kantaninga. A a bati baike I kona ni kantaningai ni maiu. Ngkai I a kabwanina au tai n angareirei i aon te Baibara ae te mwakuri ae a kakaraoia Ana Tia Kakoaua Iehova, I a kaatuua riki au iango n reiakinia aomata koaua aika kakawaki man te Baibara, n oneani mwin are N na kaatuua iangoan are I aki noraaba. I mwiokoaki bwa N na riki bwa te unimwaane n te ekaretia, are I a kakaraoi iai kabwarabwara ibukia aomata nako n ekaretia ake a mena n au aono. I mwiokoaki naba bwa N na anga te kabwarabwara aika boto man te Baibara ni bwabwaro ake a kaeaki irouia aomata aika nga ma nga mwaitiia.

N 2010, I a angabeeba man Te Kuura Ibukini Kataneiaakia Minita (ae aranaki ngkai bwa Te Kuura Ibukia Taan Uarongorongoa te Tautaeka n Uea) are e karaoaki i El Salvador. I a kataubobongaaki man te reirei aei ni kakororaoa raoi mwiokoau n te ekaretia, ao I a namakinna bwa I a rangi ni manena ao n tangiraki iroun Iehova are e kona ni katauraoia aomata nako ibukin ana mwakuri.

E taku Iesu: “E kakukurei riki te anga nakon te anganaki.” (Mwakuri 20:35) Ni boong aikai, I a kakoauaa raoi bwa e a reke irou te kukurei, e ngae ngke I iangoia ngkoa bwa e aki kona n reke, ao I a ataia bwa I kona ni buokiia aomata.