A karinei taian tautaeka ma banna ake a tei ibukin te aba Ana Tia Kakoaua Iehova. Ti butimwaea te koaua ae a kona tabeman n taetae ni bau, n tiaruuti nakon te buraeki, ke n anenea kunan te aba.

 Ma e ngae n anne, a rineia Ana Tia Kakoaua bwa a na aki irii bukamaru akanne, ibukina bwa ti kakoauaa ae a kauntaba ma ana reirei te Baibara. Ti kakaitau ngkana a karinei ara koaua aomata n arora ngkai ti karinei naba aia koaua.

Kanoan te kaongora aei

•  Baikara ana reirei te Baibara aika irekereke iai?

•  Ao ngkana iai n ana tua te tautaeka ae e riai n iraki?

•  A kataia Ana Tia Kakoaua Iehova ni kaotii aia iango ibukia aomata ke ibukin te tautaeka?

 Ana reirei te Baibara aika uoua aika kakawaki aika boto iai ara motinnano:

•   Bon tii te Atua ae tau n taromauriaki. E kangai te Baibara: “Ko riai n taromauria Iehova ae Atuam, ao ko riai n toro irouna n tii ngaia.” (Ruka 4:8) N angiin te tai, taian taetae ni bau ma kunan te aba, a kaotia ae ko berita bwa ko na karimoaa abam nakoni bwaai riki tabeua. Ngaia are a iangoia Ana Tia Kakoaua Iehova bwa e kairua irouia ae a na irii bukamaru aikai.

   A iangoia Ana Tia Kakoaua Iehova bwa te tiaruuti nakon te buraeki bon iteran naba te taromauri, ke taromauriani bouannanti, ae tabuaki karaoana n te Baibara. (1 I-Korinto 10:14) A kakoauaa tabeman taani korea rongorongon rimoa bwa buraekin te aba bon te banna n aia taromauri Aaro. E korea ae kangai te tia korea rongorongon rimoa ae Carlton J.H.Hayes: a “Te buraeki bon te banna ae kakawaki ni kaineti ma te nanonnaba, ao bon nibwan te taromauri.” Ni kaineti ma Kristian rimoa, ao e taku te tia koro rongorongo temanna ae Daniel P. Mannix: “A rawa Kristian n... anga te karea nakon te embera [n Rom] are kangaa aongkoa te atua—ao ai arona naba ni boong aikai ma te aki tiaruuti nakon te buraeki.” b

  E ngae ngke a aki tiaruuti nakon te buraeki Ana Tia Kakoaua Iehova ma ti aki raeuaia ke ni kabuekia, ma ti kaota te karinerine n arora n aki kabuakakaa n ikotaki naba ma banna riki tabeua ake a tei ibukin te aba.

•   Tii te arona aroia aomata ni kabane i matan te Atua. (Mwakuri 10:34, 35) E taekinaki n te Baibara bwa te Atua e “karaoiia natannaomata nako mairoun te aomata ae tii temanna.” (Mwakuri 17:26) Ibukin aei, a kakoauaa Ana Tia Kakoaua Iehova bwa e kairua ae a na karietataa riki te reeti ke te natannaomata teuana nakon ake tabeua. Ti karineia aomata nako, n aki ongeia bwa kaain ia ke a mena ia.—1 Betero 2:17.

 Bon tiaki taani kaitaraa te tautaeka Ana Tia Kakoaua Iehova. Ti kakoauaa bwa taian tautaeka bon iteran naba “ana babaire te Atua” ae e kariaia bwa a na tei. (I-Rom 13:1-7) Ao ti kakoauaa naba bwa a riai Kristian n ongeaba irouia taani kairiri n te tautaeka.—Ruka 20:25.

 Ao ngkana iai tuua tabeua n te aba ae a kauntaba ma ana tua te Atua? N tabetai, a kona ni karinaki bubutii nakon te tautaeka ibukin rinanoani bitakin tuua tabeua. c Ma ngkana e aki kariaiakaki, a motinnanoia Ana Tia Kakoaua Iehova ma te karinerine bwa a na “ongeaba iroun te Atua bwa te tia tautaeka, nakon ae [a na] ongeaba irouia aomata.”—Mwakuri 5:29.

 A aki. A aki tei Ana Tia Kakoaua Iehova n itera ake iai irekerekeia ma baika a kakaraoaki irouia aomata ke te tautaeka. Ngkana ti rawa n taetae ni bau, n tiaruuti nakon te buraeki, ke n anenea kunan te aba, tiaki nanona bwa ti a kaitaraa iai te tautaeka. Ma ti bon irii ara koaua aika boto man te Baibara ibukini bukamaru akanne.