E Aera Ngkai A Teimatoa n Uarongorongo Ana Tia Kakoaua Iehova Nakoia Naake A Kangai Ngkoa “I Aki Kan Ongora”?
A kaungaaki Ana Tia Kakoaua Iehova n tangiran te Atua ao n tangiraia raoia n aomata, bwa a na kukurei n tibwaa te rongorongo are mena n te Baibara nakoia aomata nako, n ikotaki ma naake a kangai ngkoa “I aki kan ongora.” (Mataio 22:37-39) E kairira tangiran te Atua bwa ti na ongeaba n ana tua Natina are ti na “kakororaoa kaotiotan” te rongorongo ae raoiroi. (Mwakuri 10:42; 1 Ioane 5:3) Ngkana ti karaoa aei, ti a tataekina iai ana rongorongo te Atua n taai aika bati, n aron are a karaoia ana burabeti te Atua. (Ieremia 25:4) Ibukina bwa ti tangiriia raora n aomata, ti a kan tibwaa “te rongorongo ae raoiroi ae taekan te Tautaeka n Uea” ae karekea te maiu nakoia aomata nako, n ikotaki ma naake a aki kan ongora n te moantai.—Mataio 24:14.
Ti nonoria bwa a a manga kan ongora kaain te auti ake a aki kan ongora n te moantai. Iangoi bukina aika tenua aikai:
A mwamwaing aomata.
A kan ongora kaain te auti ake tabemwaang.
A bibitaki aomata. A kona baika riiriki n te aonnaba ke ni maiun temanna, ni kairiia tabeman bwa a na “ataia bwa a kainnanoa te Atua” ao ni kan ongora n te rongorongo are mena n te Baibara. (Mataio 5:3) A kona naba naake a kaaitaraira ngkoa ni manga bitaki nanoia, n aron are e riki iroun te abotoro Bauro.—1 Timoteo 1:13.
E ngae n anne ti aki taumatoaia aomata nakon ara rongorongo. (1 Betero 3:15) Ti kakoauaa bwa e bon nakon temanna ma temanna ana motinnano ibukin te taromauri.—Te Tua-Kaua 30:19, 20.