Te karioiango: Bukina ngkai a aki bukamarua te Itita ke te Bwakate Ana Tia Kakoaua Iehova, bwa tiaki ngaiia Kristian.

 Te koaua: Ti kakoauaa Iesu Kristo bwa ara tia Kamaiu, ao ti karaoa ara kabanea n tamaroa n “toua raoi mwini mwanekana.”​—1 Betero 2:21; Ruka 2:11.

Te karioiango: Kam aki kakoauaa ae e kautaki Iesu man te mate.

 Te koaua: Ti kakoauaa ae e kautaki Iesu. Ti ataia ae bon anne te bae e aana te onimaki ni Kristian ao e kateretereaki n ara uarongorongo.​—1 I-Korinto 15:​3, 4, 12-15.

Te karioiango: Kam aki tabe ma ae a aikoa boo natimi ma kakukurein te bong ni motirawa ae te Itita ke te Bwakate.

 Te koaua: Ti tangiriia natira, ao ti karaoi bwaai ni kabane aika ti na kataneiaia iai ao ni kukurei iai.​—Tito 2:4.

•   E aki boto i aon te Baibara te bongi ni motirawa ae te Itita ke te Bwakate.

•   E tua Iesu bwa ti na kauringa matena, ma tiaki utina. Ti kakaraoa kauringaani matena ni katoa ririki ni kaineti ma ana karenta te Baibara.​—Ruka 22:​19, 20.

•   Ti kakoauaa ae e riki te Itita man te katei rimoa ae e reitaki ma te kakariki, ike e a aki butimwaeaki iai iroun te Atua. E tua te Atua bwa e na “taromauriaki n tii ngaia,” ao e ribaa te taromauri ae irekereke ma waaki aika e ribai.​—Te Otinako 20:5; 1 Uea 18:21.

 Ti kakoauaa ae ara motinnano ae te rarawa nakoni bukamaruan te Itita ke te Bwakate, e boboto man te Baibara, ae kaungaaki iai kamanenaan “te wanawana ao te konabwai n iaiango raoi,” n oneani mwin ae ti a tii kakairi naba n te katei n aomata. (Taeka N Rabakau 3:21; Mataio 15:3) E ngae ngke ti taekina ara koaua aei nakoia aomata ngkana a titirakinira, ma ti aki kairoroa te aomata bwa e na kakoauaa ara koaua ke e na aki.​—1 Betero 3:15.