Ti aki toki ni kamanena te Baibara bwa e na kaira ara koaua, ngaia are ti riai ni kaetii ara koaua ni kaineti ma otara n te Baibara ake a a tia ni manga kaetaki. a

 E boraoi aei ma ana boto n reirei te Baibara are n Taeka N Rabakau 4:​18, ae kangai: “Kawaia akana raoiroi kaanga ai aron ootan te ingabong ae otamwaaka, ae ririkirake n oota ni karokoa ae tawanou.” N aron otin taai ae tabe ni kaotaa tein te aba, e kaotiota naba te Atua otan te koaua teutana imwin teutana, n te tai are e baireia. (1 Betero 1:​10-​12) E a kaman taekinaki n te Baibara bwa e na kawaekoaa karaoan aei n “tain te toki.”​​—Taniera 12:4.

 Ti aki riai ni kubanako ke n tabeaianga ni bitaki aikai ni kaineti ma otara iai. A kairua naba aia iango ma baike a kantaningai taan taromauria te Atua rimoa, ao a riai naba ni kaetietii aia iango.

•   E anga ngaia Mote bwa te tia kamaiuia te natannaomata are Iteraera, 40 te ririki imwain te tai are e boni baireia te Atua.​​—Mwa 7:​23-​25, 30, 35.

•   A aki ota abotoro n te taetae ni burabeti are e a kaman taekina maten ao mangautin te Mesia.​​—Itaia 53:​8-​12; Mataio 16:​21-​23.

•   E kairua aia iango tabeman Kristian rimoa ni kaineti ma tain “ana bong Iehova.”​​—2 I-Tetaronike 2:​1, 2.

 E kaetii otaia te Atua imwina riki, ao ti tataro bwa e na karaoa naba anne nakoira.​​—Iakobo 1:5.