Naake a tia ni bwabetitoaki ao n riki bwa Ana Tia Kakoaua Iehova ma aikoa manga uarongorongo nakoia aomata, ke tao a aikoa bobotaki ma tariia n te onimaki, a bon aki katinanikuaki. Ni koauana, ti buokiia ao ni kataia ni manga kakorakoraa aia onimaki.

Tiaki nanona bwa ti a boni kamwawaa naba te aomata ae karaoa te bure ae kakaiaki. Ma ngkana te tia Kakoaua ae e a tia ni bwabetitoaki e karaoi waaki aika e urua iai te aroaro ni maiu ae kaineti ma te Baibara ao e aki raira nanona, e na katinanikuaki ngkanne ke ni kamwawaaki man te ekaretia. E katerea ni kangai te Baibara: “Kanakoa te aomata ae buakaka mai buakomi.”​—1 I-Korinto 5:13.

Ma tera aron te mwaane ae kamwawaaki ao buuna ke natina a bon teimatoa n riki bwa Ana Tia Kakoaua Iehova? E bitaki reitakia kaain te utu anne ni kaineti ma te onimaki, ma akea bitakin reitakia n aia utu. E teimatoa te reitaki n aia mare ao e reitinako aroia n tangiriia n aia utu.

A kona ni kaei ara botaki n taromauri naake a kamwawaaki man te ekaretia. Ngkana a tangiria, a kona naba n anganaki te reirei ni kairiri ni kaineti ma te onimaki irouia unimwaanen te ekaretia. Tiara bwa ti na buokiia aomata n tatabemania nako bwa a na tau n riki bwa Ana Tia Kakoaua Iehova. Ngkana a a manga rarawa nakon aroaro aika aki riai naake a kamwawaaki man te ekaretia, ao a kaotiotia raoi bwa a maiuakin ana kaetieti te Baibara, a kona ni manga butimwaeaki bwa a na manga kaaina te ekaretia.