N te tai ae waekoa ke n are imwina riki ao a nang kaaitara natim ma te mwakuri teuana are a na kabwaka ke n tibanako iai. Tera arom ni buokiia bwa e na oki kukureia?

•  Te bwai ae ko riai n ataia

•  Te bwai ae ko kona ni karaoia

 A bane n iai nako kabwakara. E taku te Baibara bwa “ti bane n titibanako.” (Iakobo 3:2) A titibanako naba ataei. Ma iai raoiroin te tibanako bwa e reke iai angaia ataei ni karikirakea rabakauia n tokanikai i aona. A aki bungiaki ataei ma te konabwai aei, ma a riai ni karikirakea. E taku te tina ae arana Laura: “I noria ma buu bwa a nakoraoi riki aroia natira ngkana a bwaati ni kaitaraa kabwakaia, nakon are a na iangoia bwa aongkoa akea te bwai ae riki. A kona n rabakau iai aroia n nanomwaaka ngkana a riki baika aki kantaningaaki.”

 A mwaiti ataei aika tuai ni bwaati aroia ni kaitaraa kabwakaia. Iai tabeman ataei aika tuai ni bwaati aroia ni kaitaraa kabwakaia ibukina bwa aia karo a tetei ibukia. N te katoto, tabeman kaaro, a bukina te tia reirei ngkana e buakaka ana bwi natiia. Ngkana e unraa natiia ma raoraona, a a boni bukina naba raoraon natiia bwa e bure.

 Ma ni koauana, a na kangaa ataei ni bwaati aroia ni kaitaraa kabwakaia ngkana a aki toki kaaro ni kamanoia man uaan aia mwakuri ake a karaoi?

•   Reireinia natim bwa a na ataia ae iai uaan aia mwakuri ake a karaoi.

   E taku te Baibara: “Te baere e unikia te aomata, e na manga taia naba uaana.”​—I-Karatia 6:7.

   Iai uaani mwakuri nako aika ti karaoi. Ti na kaboomwi ngkana iai te bwai ae ti urua. Ngkana ti karaoi mwakuri aika kairua, e na bon iai mwina. A riai ataei n ataa kakawakini bukin rikin te bwai ao mwini karaoana ao a riai ni butimwaea bukinaia n te bwai are a karaoia. Mangaia are tai bukina temanna n ana kairua natim ke n irantangaia natim ngkana a kairua. Ma kariaia bwa a na rinanoni katuuaaeaia ae bon riai ni kaineti ma roroia. Ni koauana, e riai te teei n ataa raoi irekerekeni mwakuri aika kairua ao mwini karaoaia.

•   Buokiia natim bwa a na bwaati aroia ni kakaaea angan tokin aia kangaanga.

   Ana boto n reirei te Baibara: “E kona ni bwaka te aomata ae raoiroi itiua te tai ao e na manga teirake.”​—Taeka N Rabakau 24:16.

   Ti kona n rawawata ngkana ti kabwaka n te bwai teuana ma tiaki nanona bwa ai anne tokin te kawai. Buokiia natim bwa a na rabakau aroia ni kakaaea aron tokin te kangaanga, nakon are a na ngurengure n taku bwa e aki riai katuuaaeaia n te bwai ae riki. N te katoto, ngkana e aki bwaati ana bwi natim n te ukeuke n te reirei, buokia bwa e na ataia ae ngkana e taningamarau ni kakamatebwai, e na kona n nakoraoi riki ngkanne ana bwi. (Taeka N Rabakau 20:4) Ngkana iai unin natim te aine ma raoraona, buokia bwa e na rabakau ni biririmoa ni karekea te raoi, e ngae ngke tao tiaki ngaia ae e bure.​—I-Rom 12:18; 2 Timoteo 2:24.

•   Reireinia natim bwa a na nanorinano.

   Ana boto n reirei te Baibara: “I tuangia aomata n tatabemania nako akana i buakomi, bwa e na aki iango temanna ni kamoamoaa i bon irouna n ae riaon ae riai.”​—I-Rom 12:3.

   Ngkana ko tutuanga natim ae tao te aine ke te mwaane bwa aongkoa e “rangi n tamaroa riki” arona nakoia ataei ake tabeman, e bon aki eti anne ke n ibuobuoki. Ni koauana, a aki kakarekea n taai nako te bwi ae raoiroi ataei ake a niniwana n te reirei. Ao a aki naba totokanikai n taai nako ataei ake a rangi n rabakau n te takaakaro teuana. Ataei aika nanorinano, a bwaati riki aroia ni kaitaraa kabwakaia ao tibanakoia.

   E taekinaki n te Baibara bwa e kona te kataaki teuana ni karina i nanora te korakora ma te nanomwaaka. (Iakobo 1:​2-4) Mangaia are ko kona ni buokiia natim bwa a na aki rawawata nanoia ngkana a kabwaka ke n tibanako n te bwai teuana.

   Reiakinaia ataei bwa a na bwaati aroia ni kaaitarai kabwakaia​—kaanga aron ae ko reiakin rabakau riki tabeua​—are e kainnanoa te tai ma te kakorakora. Ma ko na nora uaana ngkana a a ikawai riki natim ao a a bwaati riki aroia ngkanne ni kaaitarai kabwakaia. “Rooro aika tebwi tabun aia ririki aika bwaati aroia ni kaaitarai kangaanga, e na bae ni karako irouia karaoani mwakuri aika karuanikai ngkana a taonakinako ni kangaanga aika bati,” anne ae e taekinaki n te boki ae Letting Go With Love and Confidence. “A na bae ni bwaati aroia ngkana a kaaitara ma te kangaanga teuana ae boou ke ngkana a karina n riki baika aki kantaningaaki.” Ni koauana, ngkana a bwaati aroia ni kaaitarai kangaanga mangkai ao ane a na buokaki iai ni karokoa ae a a ikawai.

 Te taeka n ibuobuoki: Katea te katoto. Uringnga are arom ni kaitaraa korakain te maiu aei, e na buokiia natim bwa a na bwaati aroia ni kaaitarai oin aia kangaanga.