E na bon aki kona ni mauna te buraneti ae te Aonnaba, ni bue n te ai, ke n oneaki mwina. E angareirei te Baibara bwa te Atua e karika te aonnaba bwa e na maekanaki n aki toki.

•   “A na abana te aonnaba akana raoiroi, ao a na maeka i aona n aki toki.”​—Taian Areru 37:29.

•   “E kamatoaa te aonnaba [te Atua] i aon aana, e na aki kaingingaki mani nnena n aki totoki.”​—Taian Areru 104:5.

•   “E teimatoa n aki toki te aonnaba.”​—Te Minita 1:4.

•   “Teuare karaoa te aonnaba, ae te tia Karaoia ae e kateia ni kamatoaa, . . . e aki karaoia bwa e na matebuaka, ma e karaoia bwa e na maekanaki.”​—Itaia 45:18.

 E na aki kariaia te Atua bwa a na urua raoi te aonnaba aomata n aroia ni kabarekaa te otabwanin, n te buaka, ke n aia bwai riki tabeua. Ma e na ‘kamaunaia te koraki ake a urua te aonnaba.’ (Te Kaotioti 11:18) E na kangaa ni kakororaoa anne?

 E na onei mwin aia tautaeka aomata te Atua ake a aki kona ni kamanoa te aonnaba, n te Tautaeka n Uea ae kororaoi ae bwaini kawara. (Taniera 2:​44; Mataio 6:​9, 10) E na kairiri n te Tautaeka n Uea aei, Natin te Atua ae Iesu Kristo. (Itaia 9:​6, 7) Ni menan Iesu n te aonnaba, ao e kaotiota mwaakana ni karaoi kakai, n arona n taua aron te ang ma taari. (Mareko 4:​35-​41) Ngkai Iesu bon te Uea n te Tautaeka n Uea, e na taua raoi aron te aonnaba ma baika a riiriki iai. E na manga kaoka ke ni kabooua aron te aonnaba, ni katitebooa ma te onnaroka are i Eten ngkoa.​—Mataio 19:28; Ruka 23:43.

 E aki. Te aeka n iango ae kairua aei e aki toki n reke man te aki ota raoi n 2 Betero 3:​7, ae kangai: “E kawakinaki karawa ma te aonnaba ae ngkai ibukin te ai.” Iangoi baika uoua aika kakawaki aika a na buokira n ota n nanon taeka akanne:

1.   E kakabonganai taeka aika “karawa,” “te aonnaba,” ao “te ai” te Baibara n nanoni baika bati. N te katoto, e kangai Karikani Bwaai 11:1: “Tii teuana aia taetae ao tein aia taeka kaain te aonnaba ni kabane.” E kaineti ikai te “aonnaba” nakon te botannaomata.

2.   E oti n 2 Betero 3:7 nanon taeka aika karawa, te aonnaba, ao te ai. Ni kibuna 5 ao 6 ao e kairekerekeaki ma te Ieka are n ana bong Noa. N te tai anne ao a kamaunaaki aomata rimoa n te aonnaba, ma e aki mauna ara buraneti aei. Ma a maunanako n te Ieka aomata aika iowawa ma n tiritiri, ke “te aonnaba.” (Karikani Bwaai 6:​11) E mauna naba “karawa” ae taekaia taan tautaeka i aoia aomata aika buakaka ma n tiritiri. Ngaia are a kamaunaaki aomata ake a buakaka, ma tiaki ara buraneti. A reke maiuia Noa ma ana utu ngke a kamaunaaki aomata akekei ao a riki bwa kaain te aonnaba imwin te Ieka.​—Karikani Bwaai 8:15-18.

 N aron te Ieka, te kamaunanakoaki, ke “te ai” are n 2 Betero 3:​7, e na roko naba tokia aomata aika buakaka, ma tiaki tokin te buraneti ae te Aonnaba. E beritana “karawa ae boou ao te aonnaba ae boou [te Atua], ae e na mena iai te raoiroi.” (2 Betero 3:​13) Te “aonnaba ae boou,” ke te botannaomata ae boou, e na tautaekanaki irouni “karawa ae boou,” ke te tautaeka ae boou ae taekan Ana Tautaeka n Uea te Atua. I aan ana kairiri te Tautaeka n Uea anne ao e nang riki te aonnaba aei bwa te bwaretaiti ae rau.​—Te Kaotioti 21:​1-4.