Te taeka ae te “Ierutarem ae Boou” ae kaoti uatai n te Baibara, bon te kaawa ni kaikonaki ae tei ibukin te kurubu ae kaainaki irouia taan rimwin Iesu, aika a na nako karawa n tautaeka ma ngaia n Ana Tautaeka n Uea te Atua. (Te Kaotioti 3:​12; 21:2) E taekinaki n te Baibara bwa e kona naba n aranaki te kurubu aei bwa buuni Kristo.

1.   E tei i karawa te Ierutarem ae Boou. Ni katoatai ae e taekinaki iai Ierutarem ae Boou n te Baibara, ao e oti bwa e na ruo mai karawa, ao a tantani iai anera ni mataroan nako oona. (Te Kaotioti 3:​12; 21:​2, 10, 12) E oti naba ni buburan te kaawa aei bwa e bon aki kona n tei n te aonnaba. Titeboo raababana ma abwakina ae “12,000 te titeitia,” ni katobibi. a (Te Kaotioti 21:16; King James Version) E kaania 560 te kiromita (350 te maire) rietana, ae rokoroko i tinanikun te aonnaba.

2.   E kaainaki te Ierutarem ae Boou irouia taan rimwin Iesu, aika aranaki bwa buuni Kristo. E aranaki te Ierutarem ae Boou bwa “te tia mare te aine ae buun te Tiibutetei.” (Te Kaotioti 21:9, 10) N te kaikonaki aei ao e kaineti te Tiibutetei nakon Iesu Kristo. (Ioane 1:29; Te Kaotioti 5:12) E tei “buun te Tiibutetei,” are buuni Kristo, ibukia Kristian ake a na raona Iesu i karawa. E kabotaua te Baibara reitakin Iesu ma Kristian aikai, ma te reitaki i marenan te buu te mwaane ao te buu te aine. (2 I-Korinto 11:2; I-Ebeto 5:23-25) Irarikin anne, iai atibu aika aana te kaawa ae te Ierutarem ae Boou aei, ao a koreaki “aara aika 12 i aoia, ake araia ana abotoro te Tiibutetei ake 12.” (Te Kaotioti 21:14) E ibuobuoki te rongorongo aei ni kaotia bwa tera raoi te Ierutarem ae boou, kioina ngkai Kristian ake a weteaki nakon te maiu i karawa, a “kateaki i aon aan te kateitei ae taekaia abotoro ma burabeti.”​—I-Ebeto 2:20.

3.   Te Ierutarem ae Boou bon iteran te tautaeka. Ierutarem rimoa boni kautun te aba ae Iteraera, ae te tabo are e tautaeka mai iai te Uea are Tawita, natina are Toromon, ao kanoaia nako, n “ana kaintokanuea Iehova.” (1 Rongorongo 29:23) E aranaki Ierutarem bwa “te kaawa ae tabu,” ngaia are e tei ibukin Ana Tautaeka n Uea te Atua are a uea iai kanoan Tawita. (Neemia 11:1) E aranaki naba te Ierutarem ae Boou bwa “te kaawa ae tabu,” ae kaainaki irouia naake a na raona Iesu i karawa ake “a na kairiri bwa ueea n tautaekana te aonnaba.”​—Te Kaotioti 5:9, 10; 21:2.

4.   E uotii kakabwaia nakoia kaain te aonnaba te Ierutarem ae Boou. E taekinaki te Ierutarem ae Boou bwa e “ruo mai karawa mairoun te Atua,” ae oti iai bwa e kabongana te Atua ibukini baika aki irekereke ma karawa. (Te Kaotioti 21:2) E kairekerekeaki n taeka aikai te Ierutarem ae Boou ma Ana Tautaeka n Uea te Atua, are e kabongana te Atua ibukini kakororaoan nanona “i karawa ao n te aonnaba naba.” (Mataio 6:10) Aikai naba kakabwaia aika e kantaningai te Atua ibukia kaain te aonnaba:

   •   Kamaunaan te bure. E raanga “te ran ni kamaiu” man te Ierutarem ae Boou ao n teboki “kaai ni kamaiu” aika taiani “bwainnaoraki nakoia natannaomata.” (Te Kaotioti 22:1, 2) Te kamarurung aei n te aro n rabwata ao n te onimaki, e kamauna te bure ao e karekea te maiu ae kororaoi nakoia aomata, n aron ana moani kantaninga te Atua.​—I-Rom 8:21.

   •   Te reitaki ae nakoraoi i marenan te Atua ao aomata. E a tia te bure ni karaurenakoia aomata mairoun te Atua. (Itaia 59:2) Ngkana e a kamaunaaki te bure, ao e nang kona ni koro ngkanne bukin te taetae ni burabeti ae kangai: “E a mena ana umwanrianna te Atua irouia aomata, ao e na maeka ma ngaiia ao a na riki bwa ana aomata. Ao te Atua e na boni memena irouia.”​—Te Kaotioti 21:3.

   •   Tokin te rawawata ao te mate. Rinanon ana Tautaeka n Uea aei, ao te Atua “e na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki.”​—Te Kaotioti 21:4.