Iai aani kakoauaan raoi Iesu irouia taan rabakau bwa e a bon tia ni maiu. E taekinaki n te Encyclopædia Britannica, ae bwain 2002 ibukini kakoauaan rongorongon Iesu ao Kristian ake rimoa, ae reke man aia rongorongo taani kororongorongo ake n te moan ao n te kauoua n tienture ae kangai: “Rongorongo aikai a kakoauaa ae taani kakaaitaraia Kristian n taai ake rimoa, a bon aki nanououa n te koaua are e a bon tia ni maiu Iesu. E moani kauntaekaaki aio n akea bukina ae riai n tokin te ka-18 n tienture, i nanon te ka-19 n tienture, ao ni moan te ka-20 n tienture.”

 N 2006 ao e taekinaki n te boki ae Jesus and Archaeology ae kangai: “Akea te tia rabakau ae kona n onimakinaki ni boong aikai ae e na nanououa bwa e a bon tia ni maiu te I-Iutaia ae Iesu ae natin Ioteba ke e tuai, ao angiina a taekinna bwa ti a atai ngkai ana mwakuri aika bati ao ana reirei.”

 E kabwarabwaraaki Iesu n te Baibara bwa te aomata raoi ni koaua. A koreaki iai araia ana bakatibu ao kaain ana utu. (Mataio 1:1; 13:55) E taekinaki naba iai araia taan tautaeka ake a kakannato ake a maiu n ana tai Iesu. (Ruka 3:1, 2) A konaa taani kakaae n nenera raoi etin taian rongorongo aika n te Baibara man taiani kabwarabwara aikai.