E kariaia te mare te Atua i marenan te mwaane ao te aine ae a kaokoro aia reeti ibukina bwa tii te tikina reeti nako i matana. E kangai te Baibara: “E butimwaeia aomata nako te Atua ni katitebooia . . . , n aki ongeia bwa kaain te reeti raa.”—Mwakuri 10:34, 35, Good News Translation.

 Iangoi booto n reirei riki tabeua man te Baibara aika irekereke ma boraoin te reeti ao te mare.

 A bane n riki aomata mairoun te moani mwaane ae Atam ao buuna ae Ewa, are e aranaki n te Baibara bwa “tinaia aomata aika maiu ni kabane.” (Karikani Bwaai 3:20) Aei bukina ae e kangai iai te Baibara ibukin te Atua: “E karaoiia natannaomata nako mairoun te aomata ae tii temanna.” (Mwakuri 17:26) N aki ongea kakaokoron aia reeti, ma a bane ni kaaina te utu ae tii teuana. Ma tera arom ngkana ko maeka n te tabo ae e korakora iai te inanonano n te reeti ao kakaokoroan rineia aomata?

 E ngae ngke e rangi ni butimwaea te mare te Atua i marenaia akana kakaokoro aia reeti, ma a aki katitebooaki n iango i aon aei aomata nako. (Itaia 55:8, 9) Ngkana ko iangoa te mare ma te aomata ae kaokoro am reeti ma ngkoe, ko riai ni maroroakini baikai ma raom anne:

•   Ko na kangaa ni kekeiaki ma taiani karawawata ake ko na kaaitarai mairouia kaain rarikim ke am utu?

•   Ko na kangaa ni buokiia natim bwa a na kekeiaki ma te kairiribai ni kaineti ma te inanonano?

 ‘Ukoukoran te taeka n reirei’ i aon aei, e kona ni buokiko ni kanakoraoa tekatekam.—Taeka N Rabakau 13:10; 21:5.