Pá vígà e íè tẽ̀ènè kà zígà:

Dì belí bé e nyímà naa, Kpá Káí dú enè kà kpá e mm̀ pọ́b ketõ̀ò à ló bel kĩlma ló gbò nen. Gã́bug ọ̀và bebèè gbò gbálà nè gbò bia e baẹ bọ́ló dẹ̀lẹ̀ nyíé boo vaá baẹ̀ kpee sĩ́ ló tẽ̀ènè íb gbò nu ànà ànà ea bélí nágé ḿ bèéleí. Baala beè ie nagé “tọaló belí na gé beele.” (Jém̀z 5:17) Gbò tã̀àgã̀ nè gbele kpóó bùlà beè sivè sìgà ọ̀và. Boo tṍó e sìgà ọ̀và beè dọ kèbá bììla nyíe ea aa bá gbò e bà dúùnà pá ba tọ àbèè gbò e bà gá gbà nèfã̀. Vaá gã́bug ọ̀và beè dọ kèbá bẽ̀gẽbel ea aa ló áá baálà gbò lọ̀nù.

É kọ nagbò é není beè gboó aa deè aaló é Jìhóvà? Ẽ́èe. Gã́bug ọ̀và beè belí nen ọ́lì lésọ́l eaè bàn kọọ̀: “M kyãà pè belí naanàból ea pe. Gbĩ́ o gyóòlo, boobéè kọ o gbò o log náa táḿ nyíe.” (Psalm 119:176) É kọ ò dã́à leèvè na gbò kpéè mon sọ́lá?

Pá a gbò e bà gé née fã̀ e bà kyãà pè aa zẹ̀ẹ̀ gònò naanàból náa ólò tányíè Jìhóvà. Tãavó, ẹlẹ ólò gbĩ́ va—lọl tṍó tẹlẹ tṍó ten má bá pá ba gbò kóò e bà gbá ié tẽ̀ènè kà zìgà. Dì belí nu dòòmà bá, ni bugi togó kilma ló, bée Jìhóvà beè nvèèbá nè a gyóòlo Jóòb naa, ea beè mònmà dẽè gbele tṍó tã́ágã̀-dìgà belí tãa kpègè, ú pá a nen eaẹ̀ vulè, nè kà àgẹbà zọ̀ kpáló. Jóòb beè ie nagé ĩ̀ìmà kèbá pọ́lọ́ pọ́lọ́ mon bel aa gã́ gbò e bà gáẹ̀ beè dúé ló gé nvèèbá nèe. Sõò ẹlẹ náa beè kììlà nvéée kpee Jìhóvà, náa kaló béè kọ ẹlẹ beè kyã̀à pè mm̀ a bugtogó mm̀ sìgà tṍó. (Job 1:22; 2:10) Mósĩ́ deè ní e Jìhóvà beè nvèèbá nè Jóòb kọ á kpaá di mm̀ àgẹ lóé?

Enè sĩ́deè e Jìhóvà beè nvèèbá nè Jóòb aè bèè tenmá bá a kóò e bà gbá ié tẽ̀ènè kà zìgà eaẹ̀ kọ̀là Èláihù. Tṍó e Jóòb géè kọgá gi a gbò biibíi, Èláihù géè pãane tṍ vaá à gboó ló bel tẹlẹ dẽe. Éé ní e ẹlẹ ń kọ́é? É kọ ẹlẹ ḿ kọ́ bel Jóòb sẹ̀ à ḿ bẽ́gẽ̀e bel àbèè ge òn nee sĩìmàe kéẹẹ́? É kọ Èláihù ẹb a lóó kọ à bọọ̀ lẹẹ kpãa elèè Jóòb? Náè naa vó! Nyómá Bàrì tọ́báló Èláihù vaá à kọọ̀: “Ẹ̀b, bé ólò di kèsĩ́ kà kà Bàrì naa, bé nda dì nàgé naaé; mè sãa ní baẹ̀ dèmà nàgè ndaẹ́.” Tṍóá à gboó nèe àgẹ nyíe kọọ̀: “Ẹ̀b tọ́ọ̀ kà pọ̀ á gá kene ní kĩlma ló nda, vaá tọ́ọ̀ kà nà bíi náá nyie èl ni kói.” (Job 33:6, 7) Tãa ea kpáá bọ̀ọ̀vẹ̀ tã̀àgã̀ Jóòb, mm̀ vulè ní Èláihù duùlaẹ bá tṍé vaá tú sìà kpóó ló e Jóòb gbĩ́ nèeé.

Sóo sóo nyimá kọ mm̀ nyómá ea dú gbọ́ọ́ gbọọ̀ló ní e beele kpóòmà dee ló nakà brokyọ̀íé. Túá ke tõ̀ò eè zẹ́ẹ́ pãane tṍ ló kẽ, tú òẹ̀ dẽe ẹ̀bmà gbò nu ea ni náá á gi nè gbò bel ea agi gã́ gã́bug gbò e bà niè òòà àà. (Proverbs 18:13) Tṍóá ẹ̀b gi Kpá Káí, vaá mm̀ bàn bàn nu eè gbóò ẹ̀b gi gbò nòòtẽ́ ea kil ló bé e Jìhóvà beè nvèè bá nè pá a gbò gyóòlo mm̀ tṍó eaẹ̀ kil nvéeá naa, é tṍó e baẹ̀ kpee nagé sĩ́ ló tẽ̀ènè íb gbò dìtõ̀òá. M̀m a deè deè nvée, eè gboó tú gbò ketõ̀ò Kpá Káí í ẹ̀bmà gbò nu ea gé nááá gi deè nieí vaá ẽmá nakà brokyọ̀í. Mm̀ beélè àlà àlàsã́ vulè è kólìi kọ ó ẹbvii nakà nu e émìí. Sóo sóo tui bẹẹ kà kà vulè e beele íè kĩ́lmàí lóí.

Gbò Ge Tulè Tóm gbò Nenditõ̀ò Jìhóvà