47 NU GÈ NÒ
É Kọọ̀ O Kpenà Ló Gè Dììa Múú?
O nó gã́bug nu ea kil ló Jìhóvà tení dú ló gè nó Kpá Káí. Be à sẹlẹ o nyááná bá ló sìgà nu kọbé ò láá tú nú eo ni nó siimá tóm. Sõò, àé láá ié nú ea gé oomà ni lọl ló gè kìn lóó nè Jìhóvà vaá dììa múú. Nakà nu gè nòí é ló bel boo sìgà nú ea é láá òòmà nen lọl ló gè dììa múú nè bé eo é láá bé èlbá naa.
1. É kọ àé dú bíi kọ ó zẹ́ẹ́ nyimá dénè nu besĩ́ ò kálá dììa múú?
Kọbé ò láá dììa múú, àé dú bíi kọ ó zẹ́ẹ́ “nyimá ló kà kà bel.” (1 Tímotì 2:4) Níí náa tõó dọ̀ kọọ̀ òó zẹ́ẹ́ nyimá ààla kọ̀láá kà bíb ea di mm̀ Kpá Káí besĩ́ ò kálá dììa múú. Bã̀àna gbò níí Kráìst e ba beè dììa múú kpã́á dee ólò kilsĩ́ gè nó nu. (Kọ́lọsì 1:9, 10) Sõò, à dú bíi kọ ó dã́ ból ló túá kpãà nòòmànù ea di mm̀ Kpá Káí. Gbò kànen mm̀ bõ̀ònatõ̀ò é nveè bá nè ni kọ ó nyimá be o sim tùlà ge dììa múú.
2. Gbò éé ní ea dú bíi kọ ó naa besĩ́ ò kálá dììa múú ẽ́?
Besĩ́ ò kálá dììa múú, òé íè ge zẹ́ẹ́ ‘ọgá ló o pọ́lọ́ vaá ò kiìa kẽ.’ (Bugi Tóm 3:19.) Níí tõó dọ̀ kọọ̀ òé bãagã boo gbò pọ́lọ́ eo beè sì vaá bàn Jìhóvà kọ á iàẹ̀ ló neè ni. Àé dú nágé bíi kọ ó beeláfùl ge òòà aa ló pọ́lọ́ láb vaá tõó dùm ea é léémá Bàrì. Gbá ló vó, òó gbóó dààmà togó gè sí nònù vaá gbaaá ló bõ̀ònatõ̀ò kọ́ kpẹ̀a dì belí neǹ kọ̀ kpẹ̀a ea gáà dììa múú.
3. Éé ní ea náa vaá nóo é zigà kọọ̀ síìà pọ̀ á òòmà ni ẽ́?
Pọ̀ ólò sii sìgà gbò kọọ̀ bà náa é láá naanìè nú e ba beè zigàẹ̀ neè Jìhóvà. À dú kà kà kọọ̀ sìgà tṍó òó láá ié lọ̀, bã̀àna gbò gbálà nè gbò bia e bà bọ́ló dẹ̀lẹ̀ nyíé boo e Kpá Káí kọ́ nú ea kil vá ló beè ié nágé lọ̀. Sõò Jìhóvà náa ẹbmà dẽe kọọ̀ pá a gyóòlo á gbõoma. (Bugi Psalm 103:13, 14.) Nyíée ólò ẹẹ tṍó eo náà nú eo kpóó sim tùlà. Àé nveè bá nè ni. Kàsĩ́, Jìhóvà náa kọ é àgala boo kọọ̀, “tọ́ọ̀ kà nu náa é láá kpòòlà beele lọl ló a vulà súú dẽe ló.”—Bugi Róm̀ 8:38, 39.
KPÁÁ NÓ BỌ̀Ọ̀VẸ̀
Nó bé eo é láá bé èlbá gbò nú ea é láá kpègà ní deè kọ ó gá dììa múú naa, tení dú ló gè nyimá ló Jìhóvà vaá tú nvèè bá ea aàẹ́ bá.
4. Kpáá nó gã́bug nú ea kil ló Jìhóvà
À bọ́ló kọ ó nyimá ló Jìhóvà naa vàẹ besĩ́ ò kálá dììa múú ẽ́? À bọ́ló kọ ó palàge nyimáe ló naa ní eo é láá vùlèe vaá gbĩ́ gè naa nú ea é léémáe. Bìlà VÍDIÒÍ kọbé ò mon bé e gbò e bà ólò nó Kpá Káí beeá ló bàlà booí ni láá naa níí naa. Tṍóá ò gbóó aalai gbò bíb ea nyoone.
-
Mm̀ vídiòá, éé ní ea beè nvèè bá nè sìgà gbò kọ bàá láá sìm tùlà ge dììa múú ẽ́?
Bugi Róm̀ 12:2, vaá ò gbóó aalai gbò bíbví:
-
É kọọ̀ ò íè bàà-bàà bùlà kilma ló gbò nú e Kpá Káí nóòmà àbèè kọọ̀ nú e Gbò Neǹ Ditõ̀ò Jìhóvà nóòmà náa dú kà kà ẹ?
-
Beè vó, éé ní eo é láá naa ẽ́?
5. Bé èlbá gbò nú ea é láá kpègà ní deè kọ ó gá dììa múú
È ólò kpeesĩ́ ló gã́bug nu ànà-ànà tṍó e béèlàfùl ge kìn lóó nè Jìhóvà vaá dììa múú. Kọbé ò mon ene kà nu dòòmà bá, bìlà VÍDIÒÍ, vaá ò gbóó aalai gbò bíb ea nyoone.
-
Mm̀ vídiòá, mókà gbò nu ànà-ànà ní ea beè dú bíi kọọ̀ Narangerel á bé èlbá kọbé à láá fã̀ Jìhóvà ẹ?
-
Mósĩ́ deè ní e vulè ea íe kilma ló Jìhóvà beè naa kọ á láá bé èlbá gbò ànà-ànàí ẽ́?
Bugi Próvẹẹ̀b 29:25 nè 2 Tímotì 1:7, vaá ò gbóó aalai nakà bíbví:
-
Éé ní ea ólò nèi agẹ ló kọ é bé èlbá ànà-ànà ẽ?
6. Dẹlẹ nyíé boo nvèè bá ea aa bá Jìhóvà
Jìhóvà é nveè bá nè ni kọ ó láá naa nú ea léémáe. Bìlà VÍDIÒÍ, vaá ò gbóó aalai gbò bíb ea nyoone.
-
Mm̀ vídiòá, éé ní ea beè naa kọọ̀ nen ea géè nó Kpá Káíá á gá gbĩ́ gè dììa múú ẽ́?
-
Éé ní ea beè nvèè bá nèe kọ á láá dẹlẹ nyíé boo Jìhóvà ẹ?
Bugi Àìzáíà 41:10, 13, vaá ò gbóó aalai nakà bíbví:
-
Éé ní ea náa vaá òó láá àgala boo kọọ̀ òé ḿm̀-mèè nú eo beè zìgà nè Jìhóvà tṍó eo beè kìn lóó nèe ẽ́?
7. Kpáá palàge zààva ló vulè e Jìhóvà íe kìlmà ní ló
Buù bé eo gé bugi togó boo bé e Jìhóvà vulè ni naa, níà bé e nyíé ni é kpáá ẹẹẹ́ ló naaé, vaá naa kọ ó gbĩ́ gè fã̀e dọ̀ọ̀mà dè-dè e. Bugi Psalm 40:5, vaá ò gbóó aalai nakà bíbví:
-
Mókà gbò tã́áná dee bá ea aa bá Jìhóvà ní ea palàge leemá ni ẽ́?
Neǹ kọ́ọ̀ bùlà Bàrì Jèrèmáíà beè vùlè Jìhóvà nè a moǹ bel, vaá a beè nvèè ka ló nèà dee kọọ̀ béè Jìhóvà kólàẹ̀ẹ́ ló. A beè kọ́ọ̀: “O moǹ bel beè naa kọ ḿ ié zààvà vaá naa kọọ̀ nyíém á ẹẹ, boo béè kọọ̀ o bée kóla ḿ ló, e Jìhóvà Bàrì.” (Jèrèmáíà 15:16) Aalai gbò bíbví:
-
Éé ní ea náa vaá gè dú enè Nen Ditõ̀ò Jìhóvà à dú kele íb nèà deè e?
-
É kọọ̀ ò gbĩ́ gè dììa múú vaá dú enè Neǹ Ditõ̀ò Jìhóvà?
-
É kọọ̀ à íe nú ea kpeg ni lọl ló gè naa vó?
-
Éé ní eo bulà kọọ̀ à bọ́ló kọ ó naa kọbé ò láá sìm tùlà ge dììa múú ẽ́?
SÌGÀ GBÒ KỌ́Ọ̀: “Pọ̀ síím kọ be m̀ diia múú, ním é láá naa dénè nú em beè zìgà.”
-
É kọọ̀ níà bé ea tõó ló olo naa ẽ́?
NÚ E NI NÓ
Tení dú ló nvèè bá ea aa bá Jìhóvà, òó láá bé èlbá kọ̀láá kà ànà-ànà ea é láá naa kọ ó gá dììa múú.
Ge Òòa Boo
-
É kọọ̀ à dú bíi kọ ó zẹ́ẹ́ nyimá dénè nú ea di mm̀ Kpá Káí besĩ́ ò kálá dììa múú?
-
Gbò éé ní ea bọ́ló kọ ó nyaaná bá ló besĩ́ ò kálá dììa múú ẽ́?
-
Éé ní ea náa vaá nóo é sọtọ́ deè kọọ̀ pọ̀ á òòmà ni lọl ló gè naa vó é?
KPÁÁ GBĨ́ TẼ́ LÓ
Bugi togó boo nú ea bọ́ló kọọ̀ o béèlàfùl ge dììa múú á dẹ̀ẹ̀a boo.
“É Kọ O Sim Tùlà Ge Dììa Múú?” (Kpá Tọ Kùdẽe Ló, March 2020)
Nyimá bé eo é láá bé èlbá gbò ànà-ànà ea é láá òòmà ni lọl ló gè dììa múú naa.
“What Prevents Me From Getting Baptized?” (Kpá Tọ Kùdẽe Ló, March 2019)
Ẹ̀b bé e ene kà gbálà beè láá bé èlbá agẹbá ànà-ànà kọbé à láá dììa múú naa.
Túá ból, ene kà gbálà ea kọlà Ataa beè ié bàà-bàà bùlà ló gè dììa múú. Nó nu ea beè nvèè bá nèe kọ à láá tú nakà láb tọ ea palàge dú bíií.
