À íe ene kà gbálà ea géè fã̀ Jìhóvà ea beè di boǹ Ọ́ọ̀z. A bée kọlà Jóòb. A beè palàge ié gyọ́, vaá pá a tọ beè bọọ́ tõ̀ò. A beè dú neǹ gbọ́ọ́-gbọọ̀ ló vaá à ólò nvèè bá nè gbò tãa, gbò e ba dóm beè ù, nè gbò pá nvín e bà náa íe tẹ̀ nè kà. Sõò, é kọọ̀ Jóòb náa beè ié tọ́ọ̀ kà tã̀àgã̀ ea beè dìé ló boo béè kọ a beè olòó naa nú ea lelà?

Sétàn ea dú Pọ́lọ́ Nyómá géè ẹ̀bviè, sõò Jóòb náa beè nyimá. Jìhóvà beè gbóó kọ́ nè Sétàn kọọ̀: ‘É kọ o nveè kpíi ló Jóòb ea dú ńdáà gyóòlo? Tọ́ọ̀ nen ea bélíe á gé boo kunukẽ̀í. À ólò pãaném tṍ ló vaá naa nú ea lelà.’ Sétàn à gbóó kọọ̀: ‘À dú kà-kà kọọ̀ Jóòb ólò pãané ni tṍ ló. Ò kpenàe vaá tãanèe dee bá. Ò náà kọ á ié kunukẽ̀ nè gã́bug nom. Tú kọ̀láá kà nu lọ̀líé bá, mè à é ooà aa ló gè fã̀ ni.’ Jìhóvà à gbóó kọọ̀: Ò é láá ẹ̀bmà Jóòb, sõò ó gá fẹ́ẹ.’ Éé ní ea náa Jìhóvà à sọ̀tọ́ deè kọọ̀ Sétàn á ẹ̀bmà Jóòb e? A beè àgala boo kọọ̀ Jóòb é bọ́ló dẹ̀lẹ̀ nyíé boo.

Sétàn beè gbóó dààmà togó gè ẹ̀bmà Jóòb tení dú ló gè tú kele-kele íb tã̀àgã̀ tẹlẹ̀ẹ́ boo. Túá kà, a beè lẹ̀ẹ̀là pá Sébìà kọ bàá zìb gbò a námà nè nom̀ tóòmà tò. Tṍóá, sã́ beè gbóó kyọ̀sĩ́ dénè a naanà ból. Dõona gbò e bà dú Káádìà à zìb gbò a Kámẹẹ̀l. Bà fẹ́ gbò gyóòlo e bà géè ẹ̀b nú ea kil ló gbò nomí. Dõona kà kyọ̀àsĩ́ ea dú pọ́lọ́ lọ̀l vaá à lee à gbóó naaá. Tọ beè dọ boo pá nvín Jóòb gbẹá kĩée e bà géè dé nu vaá fẹ́ dénè ọ̀và. Níí beè palàge biile nyíè Jóòb, soò náa beè òòà aa ló gè fã̀ Jìhóvà.

Sétàn beè gbĩ́ kọọ̀ Jóòb á mòn tã̀àgã̀ èlmà vó, vó beè naa kọ á naa kọọ̀ kom á m-má dénè kpáló Jóòb. Jóòb beè di kèbá agẹ bá nyaa ló. Náa beè nyimá nú ea náa gbò nuí à naaáé ló.  Sõò, Jóòb beè kilsĩ́ gè fã̀ Jìhóvà. Bàrì géè mòn dénè nui, vaá nyíée beè palàge ẹẹ́ ló Jóòb.

Sétàn beè gbóó lẹ̀ẹ̀là taà nen kọ bàá gé ẹ̀bmà Jóòb. Ba beè kọ́ nè Jóòb kọọ̀: ‘À é dú kọọ̀ o beè sí pọ́lọ́ vaá gbĩ́ gè gõ̀. Bàrì gé né ni kpọ̀té.’ Jóòb à aalá nè va kọọ̀: ‘M̀ gáà si tọ́ọ̀ kà pọ́lọ́.’ Sõò à beè gbóó dààmà togó gè bugi togó kọọ̀ Jìhóvà ní ea géè naa kọọ̀ gbò tã̀àgã̀í á dọẹ̀ẹ́ boo é, naa ní e a beè kọọ̀ Bàrì tú pọ́lọ́ bá sẹẹmàè ẽ.

Ene kà nvín ãa gbálà ea kọlà Èláíhù beè di pĩ́í ea géè pãane tṍ ló bel e bà géè loáá. Tṍóá, Èláíhù à gbóó kọọ̀: ‘Bel e dénè bọ̀ì géè loiá dú kyáá. Jìhóvà bọọ èl bé e beele é láá dã́ ból ló nu naa. Náa é láá naa tọ́ọ̀ kà nú ea dú pọ́lọ́. À mòn kọ̀láá kà nu vaá à ólò nvèè bá nè gbò e bà di kèbá tã̀àgã̀.’

Tṍóá, Jìhóvà à gbóó ló bel nè Jóòb kọọ̀: ‘Ãàe ní eo beè dì tṍó em beè dèm káála nè kunukẽ̀ ẽ? Éé ní ea náa ò kọọ̀ m̀ túù pọ́lọ́ bá sẹẹmà ni ẽ́? Ò dì eo gé ló bel, sõò nóo nyímà ló nú ea náa gbò nuí à naaá.’ Jóòb beè gbóó zìgà kọ à lọẹ̀ vaá kọọ̀: ‘M beè lọ̀. M beè dã́ nú ea kil ní ló, sõò kátogóí m palàge nyimá ni ló. Náa íe nú e nóo é láá naa. Gbẹẹ vó ló bel em beè lòa.’

Tṍó e dò ẹ̀bva ni íná kùbmà, Jìhóvà beè gbóó naa kọọ̀ kpáló Jóòb á kpáá valí, vaá a beè nèe gã́bug gyọ́ èlmà bé ea beè zẹ́ẹ́ ié naa. Jóòb beè tõo begè dẽè dùm vaá ié ẹ́ẹ́-ẹẹ̀ nyíe. Jìhóvà beè tãanè dee bá Jóòb boo béè kọọ̀ à gbanìèe tṍ ló bã̀àna tṍó ea beè tàvàlà ge naa vó. É kọọ̀ à é léémá ni gè belí Jóòb vaá kilsĩ́ gè fã̀ Jìhóvà kọ̀láá bé e nu meà naa?