Jìhóvà beè íbá ló gbò bèèla kọ bàá tulè pá Ízrẹẹ̀l, sõò ba beè bĩiná méné ea é bẹl va. Ba beè kọ́ nè Sámuẹ̀l kọọ̀: ‘Dénè dó ea bééá teníí ló íe méné ea gé bẹl va. Beele íè nàgé bíi ló méné ea é bẹlíi.’ Sámuẹ̀l beè ẹ̀b kọ bà lọ, vó beè naa kọ á kọ́ nè Jìhóvà mm̀ tã̀àgã ló. Jìhóvà beè gbóó aalá nèe kọọ̀: ‘Bà náa kin olo, nda ní e bà kin ẽ́. Kọ́ nè va kọ bà é láá ié méné ea é bẹl va, sõò ménéá é bĩ́íná gã́bug nu lọ̀l vá bá.’ Bã̀àna tṍó e bà dã́ naa vó, ba beè kọọ̀: ‘Níá náa bọọí ló. È íè bíi ló méné!’

Jìhóvà à gbóó kọ́ nè Sámuẹ̀l kọọ̀ ene kà gbálà ea kọlà Sọ́ọ̀l, ní ea é dú túá kà méné ea é bẹl va ẹ́. Tṍó e Sọ́ọ̀l kãa Sámuẹ̀l gbẹá Rémà, Sámuẹ̀l beè gbóó tṍe nóo ból naamá méné.

Tṍó e tṍó téní, Sámuẹ̀l beè kolí pá Ízrẹẹ̀l bõonè kọbé à tú ba ãa méné zogè va. Sõò ba beè gbĩ́e vaá bà náa beè mònie. É kọ ò nyímà nú ea náa vaá bà náa beè mònie? Boo béè kọ a beè gũá gbàà gbò bẹ̀lẹ̀ e ba beè bõone kẽ. Dee deè nvée, ba beè gbóó mònie vaá túe ele èèlè nyíè zẹ̀ẹ̀ gbòa. Sọ́ọ̀l beè bọọ́ gãboo èl kọ̀láá nen vaá lé gbálà beè palàge dìé dẽe. Sámuẹ̀l à gbóó kọọ̀: ‘Neenii neń e Jìhóvà ni saí.’ Pá Ízrẹẹ̀l à aalá kọọ̀: ‘Tõó begè dẽè dùm e méné!’

Túá ból, Méné Sọ́ọ̀l beè pãane tṍ ló Sámuẹ̀l vaá gbàntṍ ló Jìhóvà. Sõò tṍó e tṍó téní, a beè nyaaá. Dì belí nu dòòmà bá, náa lela ló méné kọ á vaalá gyọ́ọ. À íe tṍó e Sámuẹ̀l beè kọ́ nè Sọ́ọ̀l kọ á elàẹ̀ banàèe, sõò Sámuẹ̀l náa beè vàlẹ̀ bá dù. Vó beè naa kọọ̀ Sọ́ọ̀l á vaalá gyọ́ọá. Sámuẹ̀l beè labví láb naa và nyòòmà nú ea náaí ẽ́? A beè kọ́ nèe kọọ̀: ‘Nóo gáẹ̀ beè lọ̀l togó kèbá Jìhóvà.’ É kọọ̀ Sọ́ọ̀l é nó nu lọl ló a lọ̀í?

Tṍó e tṍó téní, e Sọ́ọ̀l sí gé bé pá Ámalẹ̀k, Sámuẹ̀l beè kọ́ nèe kọ á fẹ́ dénè ọ̀và. Sõò, Sọ́ọ̀l náa beè zìgà ge fẹ́ Méné Égàg. Jìhọ́và à gbóó kọ́ nè Sámuẹ̀l kọọ̀: ‘Sọ́ọ̀l a aàḿ ló, vaá náa gbaním tṍ ló.’ Nyíè Sámuẹ̀l beè palàge bììlà naa ní ea kọ́ nè Sọ́ọ̀l kọọ̀: ‘Boo béè kọ nóo gbanì tṍ ló Jìhóvà, à é sa dõona kà méné.’ Tṍó e Sámuẹ̀l kiìa ló kẽ kọbé à aà, Sọ́ọ̀l  à gbóó dùùlà gbṍó gã́ a pọ̀b kọ̀là ló naa ní ea baalà gbẹáẹ́ bá. Tṍóá, Sámuẹ̀l à gbóó kọ́ nèe kọọ̀: ‘Jìhóvà a baa boǹ ménéí lọ̀l ní bá.’ Vóà naa, Jìhóvà é tú boǹ ménéí nè dõona nèn ea é vulèe vaá gbànie tṍ ló.