Fẹ́ẹ́-fẹẹ̀ ló beè di Ízrẹẹ̀l tṍó e Sólomòn géè fã̀ Jìhóvà. Sõò Sólomòn beè ilí gã́bug va lọl dõona kà gbò dó, vaá gbò pábiaí ólò fã̀ gbò ńbàlì e bà náàmà bá. Bé e tṍó gé téní naa, níà bé e Sólomòn beè nyaaá naa ẽ́, vaá a beè gbóó dààmà togó gè fã̀ gbò ńbàlì e bà náàmà bá. Jìhóvà beè nvèè súng naa ní ea kọ́ nè Sólomòn kọọ̀: ‘M̀ é baa boǹ méné Ízrẹẹ̀l lọl o tọ, vaá m̀ é baa naamá bàà kà. M̀ é tú pọ̀b ketõ̀ò ea di ló nè ene kà o gyóòlo, vaá m̀ tú ní ea dú ńkem nè pá o tọ.’

Jìhóvà beè naa kọọ̀ béèlàfùlí á dọ̀ nàgé bàlà kẽ mm̀ dõona sĩ́deè. Ene kà gyóòlo Sólomòn ea kọlà Jèròbóàm, beè zọ̀ Àháíjà ea dú neǹ kọ́ọ̀ bùlà Bàrì nyòònà gbẹá èèlè. Àháíjà à gbóó baa ńlẹ́ẹ̀ pọ̀b kọ̀là ló naamá 12 báà vaá kọ́ nè Jèròbóàm kọọ̀: ‘Jìhóvà é tú boǹ méné Ízrẹẹ̀l lọl tọọ̀ Sólomòn, vaá baa naamá bàà báà. Tú òb báà kọ̀là lóí, boo béè kọọ̀ olo é dú méné boo òb tẽ́ gãà Ízrẹẹ̀l.’ Tṍó e Méné Sólomòn dã́ nú ea kil ló belí, à gbóó gbĩ́ gè fẹ́ Jèròbóàm! Vó beè naa kọọ̀ Jèròbóàm á teelá kil Íjìpt. Tṍó e tṍó téní, Sólomòn beè ù vaá a nvín Rèhòbóàm beè gbóó dú méné. Tṍóá, Jèròbóàm beè gbóó nyimá kọọ̀ be à ooàẹ̀ kilìè Ízrẹẹ̀l, tọ́ọ̀ nen náa é fẹ́nàèe.

 Gbò kànen e bà dú Ízrẹẹ̀l beè kọ́ nè Rèhòbóàm kọọ̀: ‘Be ò tú lé bá faamá gbòí, bà é bọ́ló dẹ̀lẹ̀ nyíé boo nè ni.’ Sõò pa kóò Rèhòbóàm e bà di mm̀ ba deè ãa beè kọ́ nèe kọọ̀: ‘Tú pọ́lọ́ bá sẹ̀ẹ̀mà gbòí! Nè va tóm ea agà èl ní e bà géè sì!’ Rèhòbóàm beè naa nú e pá a kóò kọ́ nèeí. A beè tú pọ́lọ́ bá sẹ̀ẹ̀mà gbòa, vaá ba beè gbóó lọ̀liè togó kèbá. Ba beè tú Jèròbóàm naamá méné boo òb tẽ́ gã ea di dóá, vaá ba beè kolí kĩée ea géè bẹ̀l kolíe boǹ méné Ízrẹẹ̀l. Sõò ba beè kolí nakà bàà tẽ́ gãá kolíe boǹ méné Júdà, vaá gbòí beè kilsĩ́ gè bọ́lọ́ dẹ̀lẹ̀ nyíé boo nè Rèhòbóàm. 12 tẽ́ gãà Ízrẹẹ̀l beè gbóó pòòà.

Náa beè tàn Jèròbóàm kọọ̀ pá a gbò á kil Jèrúselẹ̀m gé fã̀ Bàrì, boo béè kọọ̀ Jèrúselẹ̀m beè dũunà kĩée e Rèhòbóàm géè bẹ̀l. É kọ ò nyímà nú ea náa vaá náa beè tànie? Pọ̀ beè sii Jèròbóàm kọ bà é ooà aalìèé nvée vaá nyoone nvéè Rèhòbóàm. Vóà naa, a beè tú nóò kpé dèmà bàà kà nvín láo vaá kọ́ nè pá a gbò kọọ̀: ‘Jèrúselẹ̀m di kà kpã́á aa ló kĩí. Ò é láá fãi Bàrì gbẹaí kĩí.’ Gbòí beè gbóó dààmà togó gè fã̀ bàà kà nvín láo e bà náàmà nóò kpéá, naa ní e Jíhóvà kpáá tá vá nyíe.