KPÁ KÁÍ fáálá gã́bug nòòtẽ́ ea kil ló gbò e “nu beè tọá ló belina gé beele.” (Jém̀z. 5:17) Di belí nu dòòmà bá, èé láá dã́tẽ́ ló nú e Pọ́ọ̀l géè kọ̀ tṍó ea kọ́ gbò moǹ bel ea ẽ́á mm̀ kpá Róm̀ 7:​21-24 ea kọ́ọ̀: “Tṍó e m gbĩ́ ge naa lé nu, áá pọ́lọ́ ní e m láá sà e. . . . Nda dú kà ńsàn!” Tṍó e gé bé uú boo bẹẹ nom̀ kpáló e bè náa gbõoma, àé nveèi nyíé gbàà ge nyimá kọọ̀ nu beè tọá nágé ló bã̀àna ló Pọ́ọ̀l ea beè bọ́ló dẹ̀lẹ̀ nyíé booá.

Pọ́ọ̀l beè kọ nágé dõòna kà bé e nu beè tọáé ló naa. Mm̀ kpá Gàlésìà 2:​20, à kọ́ à agàlàẹ boo kọọ̀: Jíízọ̀s ‘vulè vaá úḿ boo,’ a beè palàge àgala boo! É kọọ̀ níá baatẽ́ bé e nu ólò tọá nágé ló ‘beele’ naa? Beà sẹlẹ níì dénè tṍó nì.

Be à gá náa vaá pọ́lọ́ e beè sí tṍó ea kil nvéeá dì ea gé kpáá tãagẽ́i vaá naa kọọ̀ á tõoí ló belí kọ é gé ló tọ́ọ̀ nu, àé náa kọ á tàvàlàí ló sìgà tṍó gè zìgà kọọ̀ Jìhóvà vulèi vaá a beè ia ló nèi, vaá naa kọ á àgàí ló ge zìgà kọọ̀ Jíízọ̀s beè vaaá gyọ́ọ́ boo buù bẹ̀ì. É kọọ̀ níà bé e Jíízọ̀s gbĩ́ kọ é ẹ̀b nu ààaá naa ẽ́? Beè vó, éé ní ea é láá nvèè bá nèi kọ é tú lé bá ẹ̀bmà bẹẹ báẹ́? Naanii mè é ló sọ́l boo baà kà bíb vá.

Ẽei, Jíízọ̀s gbĩ́ kọ é ẹ̀b a vààa gyọ́ọ naamá dõ̀ònù ea neà buù bẹ̀ì. Mósĩ́ deè ní eé láá àgala boo níí ẽ́? Ni doomà dẽe ló nòòtẽ́ ea ẽ́á mm̀ kpá Lúùk 23:​39-43. Ba beè gbóó tú enè kà gbálà ká kú té kukpàn Jíízọ̀s. A beè zìgà kọọ̀ a beè siè pọ́lọ́ tṍó ea kil nvéeá. A beè iè ge dú gè kọọ̀ a beè sí agẹbá pọ́lọ́ boo béè kọọ̀ íb kpọ̀té e bà beè nèe beè dú ní e bà ólò nè nen ea sí agẹbá pọ́lọ́. Níí beè palàge tãagẽ gbálàí naa ní ea ban Jíízọ̀s kọọ̀: “Kẽ̀èà boo, tṍó e o é dú dì belí Méné.”

Jíízọ̀s beè labví láb naa vàẹ? Ni doomà dẽe ló kọ ò gé monìè Jíízọ̀s tṍó ea gé mááná menée mm̀ nyaaló kọbé à láá ẹ̀b sĩ́ gbálàa. Náa kal ló béè nu géè nyãaé ló, a beè sẹlẹ sĩ́ mang vaá nvèè nyíé gbàà gbálàa tṍó ea kọ́ nèe kọ́ọ̀: ‘M̀ ló kà kà bel nèni nieí kọ, ò é zọ́ bã mm̀ Páladaìs.’ Jíízọ̀s gáẹ̀ láá dõogẽ kẽeé nyíè gbálàa kọọ̀, “Sã́áná nen beè dù . . . ló ge tú [a] dùm aamá gbele tõ̀ò nen.” (Máát. 20:28) Sõò tãa vó, Jíízọ̀s kọ́ nè gbálàa kọ a beè duè gé vaaàẹ̀ gyọ́ọ boo ẹlẹ. À lóe belí bé e nen gé ló bel nè a kóò tṍó ea kọ́ọ̀ “olo” nè “nda.” Vaá a beè kọ́ nè gbálàa kọọ̀ à íé ẹ̀b dẽesĩ́ gè bã mm̀ páladaìs boo kunukẽ̀í.

Tṍó e bàà-bàà bùlà á gé ló, Jíízọ̀s géè gbĩ́ kọọ̀ gbálàí á dã́tẽ́ ló kọọ̀ vààa gyọ́ọ̀ Jíízọ̀s ea é gé naaá gbálà ńkem̀ tṍó aa ló tṍóá é dọ bélè nèe. Beè Jíízọ̀s láá ié íb gbò tọa lóí kilma ló neǹ pọ́lọ́ ea gáà beè ié nèà deè ge fã̀ Bàrì, àé íè ge ié tọa ló ea bọọ èl vó kilma ló neǹ Kráìst ea beè dììa múú ea gé fã Bàrì. Beè vó éé ní ea é láá nvèè bá nèi kọ é palàge àgala boo kọọ̀ ú vààa gyọ́ọ̀ Kráìst é dọ bélè nè buù bẹ̀i náa kal ló béè gbò pọ́lọ́ e beè sì tṍó ea kil nvéeá ẽ́?

Pọ́ọ̀l beè dã́tẽ́ ló kọọ̀ Jíízọ̀s beè uèé boo, boo béè kọọ̀ Jíízọ̀s beè nè tóm kọ á siè. À náà và à dì naa vóé? À baatẽ́ kọọ̀: “M̀ ṍà Kráìst Jíìzọ̀s, e a dú bẹẹ Dõò, zaa e a né kói kọ ḿ láá sí tómí. M̀ ṍàe zaa kọ à láá bugí kọ m̀ bọ́ ló dẹ̀lẹ̀ nyíe boo, vaá gboó sà kọ ḿ siè tóm neèe, náa kal ló bée kọ tṍó e a kil nvéeá m géè gbẹ́ẹ vaá biigèe ló vaá nvèèmàe lé.” (1 Tím. 1:​12-14) Ge kọọ̀ Jíízọ̀s kpáá nè tóm Pọ́ọ̀l tṍó ea ni sí pọ́lọ́ lọ̀l beè naa kọ á àgala boo kọọ̀ Jíízọs íée sàn nyíe ló, vulèe, vaá dẹlẹ́ẹ nyíé boo. Jíízọ̀s tú nágé tóm kọ̀ kpẹ̀ai nè buù bẹ̀ì. (Máát. 28:​19, 20) É kọọ̀ tómí é láá naa kọọ̀ é dã nágé tẽ́ ló kọọ̀ Jíízọ̀s beè ú boo beele?

Albert, e ba beè kpóe lọl mm̀ bõ̀ònatõ̀ò vaá bà ãàa kpáá túe tṍó e nú ea é dú 34 gbáá ni téní beè baatẽ́ kọọ̀: “Gbò pọ́lọ́ em beè sì náa ólò táḿ nyíe tọ́ọ̀ dee. Sõò tṍó em gé kọ́ kpẹ̀a, m̀ ólò ié íb tọa ló e Pọ́ọ̀l beè iéá, gè kọọ̀ Jíízọ̀s ném tóm kọ ḿ sì. Níí ólò ẹẹlẹ̀m nyíe vaá nèm ból dẽe sĩ́.”​—⁠Ps. 51:⁠3.

Allan, ea beè olòó tõó dùm ge sí pọ́lọ́ vaá kyọ̀sĩ́ nu besĩ́ à kálá bã mm̀ kà kàí beè kọọ̀: “M̀ dì em gé kpáá bugi togó boo gbò pọ́lọ́ em beè sí gbò nen. Sìgà tṍó, à ólò tãagẽ́m nyíe. Sõò m̀ ṍà Jìhóvà zaa kọ à sọtọ́ deè kọ neǹ náàkyọ̀ ea bélí nda á láá kọ́ lé kpẹ̀a nè dõòna gbò. Tṍó em monì bé e gbò nen gé lábví láb naa nyòòmà lé kpẹ̀aí, à kẽeé ḿ nyíe bé e Jìhóvà dú lé vaá vùlèi naa. À tọ́a ḿ ló kọ à tú nda nvèèmà bá nè dõòna gbò e bà gé téní nágé bá tã̀àgã̀ bùlà e nda beè tení bá.”

Ge kọ́ kpẹ̀a ólò naa kọ é naa lé nu vaá ié lé bug. À ólò naa kọ é àgala boo kọọ̀ Jíízọ̀s íéi sàn nyíe ló, vulèi, vaá dẹlẹ́i nyíé boo.

Dọ̀ọ̀mà tṍó ea é dú gè kyọ̀sĩ́ pọ́lọ́ bàlà boò Sétàn, bẹẹ nyíe é láá kilsĩ́ gè bẽgẽ̀i bel boo béè pọ́lọ́ e beè sí tṍó ea kil nvéeá. Éé ní ea é nveè bá nèi kọ é bé íb gbò tọa lóí elbá ẹ́?

Jean, e nyíée ólò bẽgẽ̀e bel ló dùm ge sẹlẹ ló kọ à gé fãè Bàrì boo tṍó e náa géè fã Bàrì tṍó ea beè di ãa, kọ́ọ̀; “Nyíém ẹ́ẹ kọọ̀ ‘Bàrì el boo nyíe e a dìí m.’ ” (1 Jọ́ọ̀n 3:​19, 20) Ge nyimá kọọ̀ Jìhóvà nè Jíízọ̀s dã́tẽ́ ló bẹẹ dìtõ̀ò náàkyọ̀ èlmà beele é láá nvèè nàgé nyíé gbàà beele. Kẽ̀èa boo kọọ̀, pálàa ọ̀và ní e ba beè nèi nu ààa ẹ́, níì boo gbò nen e bà gbõoma nì, sõò boo gbò e bà ọ́gá aa ló ba pọ́lọ́.​—⁠1 Tím. 1:⁠15.

È palàge àgala boo kọọ̀ nu ààaí é síá tóm kilma ló buù bẹ̀ì tṍó e tãàgã ló Bàrì vaá bugi togó boo bá e Jíízọ̀s beè faamá gbò nen e bà náa gbõoma naa nè tṍó e dì e gé náa nu e bẹẹ kpóó sim tùlà mm̀ ge kọ́ kpẹ̀a ea dú tóm e bà nèií. Tṍó e náà vó, olo, dì belí Pọ́ọ̀l, é gbóó láá kọọ̀: Jíízọ̀s “beè vùlè vaá ú boo.”