17 TOGÓ BEL GE NÒ
“M̀ Kólìi Kóò”
“M̀ kólìi kóò, boo bée kọ m kọ́ kọ̀láá kà nu e m beè dã́ gã́ nà Tẹ̀ nèi.”—JỌ́Ọ̀N 15:15.
SỌ́L EA GÃ́BUG DÚ 13 Nó Nu Dòòmà Bá Kráìst
GE TENÍ BOO NÚ EÉ NÓ *
1. Ò ólò bã̀àà kóò nen naa vàẹ?
DÌ BELÍ bé ea ólò dì naa, be à gá náa vaá ò gbĩ́ì ge bã̀àà kóò nen, à dú bíi kọ ó tú tṍó zọ̀ọ̀mà nená naaá nu. Tṍó eo kọ́ì bọọ tọa ló nè nú eo beè teníí bá nei ene, à ólò agẹlẹ ló bọọ gbaa ló. Sõò, à íe gbò ànà-ànà e ólò kpee sĩ́ ló tṍó e gbĩ́ì ge bã̀àà kóò Jíízọ̀s. Níà mókà gbò ànà-ànà ẽ?
2. Éé ní ea dú túá kà ànà-ànà e íè mm̀ ge bã̀àà kóò Jíízọ̀s e?
2 Túá kà ànà-ànà dú gè kọọ̀ è gáà mònmà dẽè Jíízọ̀s tọ́ọ̀ dee. Gã́bug gbò nyòòne nvéè Kráìst mm̀ túá gbò gbááá beè kpee nagé sĩ́ ló nakà ànà-ànàí. Náa kal ló béè vó, neǹ tóm Pítà beè kọọ̀: “Boolo gáà monmaíe dẽe, sõò ò vulèìe. Nóo monììe kátogóí, sõò ò dẹlẹ̀ìe nyíe boo.” (1 Pít. 1:8) Boo béè vó, àé láá valí gè bã̀àà kóò Jíízọ̀s, kọbèè è gáà mònmàe dẽe.
3. Éé ní ea égè bàà kà ànà-ànà e íè mm̀ ge bã̀àà kóò Jíízọ̀s e?
3 Ní ea égè bàà kà ànà-ànàí dú gè kọọ̀ née láà zọ̀ Jíízọ̀s loá bel. Tṍó e tãàgã ló Bàrì, è gé zọ Jìhóvà loá bel. À dú kà kà kọ è ólò tã̀àgã ló Bàrì boo béè Jíízọ̀s, sõò née ólò tã̀àgã ló Bàrì má Jíízọ̀s. Kàsĩ́, Jíízọ̀s náa gbĩ́ kọọ̀ é tã̀àgã ló Bàrì maè ẹlẹ. Ló éé? Boo béè kọọ̀ tã̀àgã ló dú enè sĩ́deè ge fã̀ Bàrì, vaá áá Jìhóvà ní ea bọ́ló kọ é nè fã̀e. (Máát. 4:10) Náa kal ló béè vó, èé láá zogè kọ è vulèè Jíízọ̀s.
4. Éé ní ea égè taà kà ànà-ànà ẽ, vaá éé ní eé ló sọ́l boo mm̀ nakà togó belí é?
4 Ní ea égè taà kà ànà-ànàí dú gè kọọ̀ Jíízọ̀s di káála, boo béè vó, néé láá tõ̀òa kẽ naaá nu. Sõò, èé láá nyimáe ló vaá zọ̀ẹ naaá nu mm̀ sĩ́deè e nen náa monmà dẽe. Èé ló bel boo ténì kà nú eé náa kọbé è láá agẹlẹ ló bẹẹ gbaa ló kìlmàé ló. Túá kà, naanii mè é ẹb nú ea náa vaá à palàge dì bíi kọ é ié kà lé gbaa ló kilma ló Kráìst.
ÉÉ NÍ EA NÁA À DÚ BÍI KỌ É BÃ̀ÀÀ KÓÒ JÍÍZỌ̀S E?
5. Éé ní ea náa vaá èé íè ge bã̀àà kóò Jíízọ̀s e? (Bugi nagé ńkpó ea kọ́ọ̀: “ Ge Bã̀àà Kóò Jíízọ̀s É Náa Kọ É Bã̀àà Kóò Jìhóvà” nè “ Ge Ẹ̀b Dọ̀ Jíízọ̀s Mm̀ Kuna-kuna Bá.”)
5 Be è gbĩ́ì ge ié kà lé gbaa ló kilma ló Jìhóvà, èé íè ge bã̀àà kóò Jíízọ̀s. Ló éé? Bugi togó boo bàà kà nú ea náa vaá è kọ́ vó. Túá kà, Jíízọ̀s beè kọ́ nè pá a gbò nyòòne nvée kọọ̀: “Kà lèlà sĩ́ ẹlẹ, Tẹ̀, vulè boolo. À vulèi boo bée kọ ò vulèi.” (Jọ́ọ̀n 16:27) A beè kọ nágé kọọ̀: “Tọ́ọ̀ nen náa é láá iná ló Tẹ̀ e bè náa téní domá ló.” (Jọ́ọ̀n 14:6) Ge gbĩ́ gè bã̀àà kóò Jìhóvà e bè nóo íè kà lé gbaa ló kilma ló Jíízọ̀s, bélí nen ea gbĩ́ gè tení deè nvíǹdò bã̀àma tọ. Jíízọ̀s beè tú tẽ̀ènè kà nu dòòmà báá loomá bel kilma ló a bá, tṍó ea beè kọọ̀ ẹlẹ diè belí “nu tọ e gbò naanà ból é téní.” (Jọ́ọ̀n 10:7) Ní ea égè bàà kà dú gè kọọ̀ Jíízọ̀s beè nó dénè gbò kpãa ea Tẹ̀ íe mm̀ sĩ́deè ea gbõoma. Ẹlẹ béè kọ́ nè pá a gbò nyòòne nvéè kọọ̀: “Nen e a ni mon nda a mon Tẹ̀.” (Jọ́ọ̀n 14:9) Boo béè vó, ge nó nú ea kil ló Jíízọ̀s níà kà pọ̀b kà sĩ́deè ge nyimá ló Jìhóvà ẹ. Bé e gé nó nú ea kil ló Jíízọ̀s naa, níà bé eé vulè nàè gé naa ẽ́. Vaá bé e bẹẹ vulè kilma ló Jíízọ̀s gé bọọ naa, níà bé e bẹẹ vulè kilma ló a Tẹ̀ é dọ́ ló naa ẽ́.
6. Dõòna kà éé ní ea náa vaá à palàge dú bíi kọ é ié kà lé gbaa ló kilma ló Jíízọ̀s e? Baatẽ́.
6 Kọbé Bàrì áálá bẹẹ tã̀àgã ló, èé íè ge ié kà lé gbaa ló kilma ló Jíízọ̀s. Níí tõó dọ̀ kọọ̀ èé náa èlmà boo áá gè dõogẽ kọọ̀, “boo béè Jíízọ̀s” e dee deè nvéè bẹẹ tã̀àgã ló. Èé íè ge dã́tẽ́ ló bé e Jìhóvà ólò tú Jíízọ̀s aamá bẹẹ tã̀àgã ló naa. Jíízọ̀s beè kọ́ nè pá a gbò tóm kọọ̀: “M̀ é náá kọ̀láá nu e o bĩ́ìnai boo nà bée nèi.” (Jọ́ọ̀n 14:13) Náa kal ló béè kọọ̀ Jìhóvà ní ea ólò dã̀ vaá aalá bẹẹ tã̀àgã ló é, Bàrì beè nè kpóó Jíízọ̀s kọ á naamàè ńlẹ́ẹ̀ bùlà. (Máát. 28:18) Kọ̀láá bé ea dì naa, besĩ́ Bàrì kálá aalá bẹẹ tã̀àgã ló, à ólò zẹ́ẹ́ ẹ̀b be à gá náa vaá beele ólò ìà gé ló pọ́lọ́ nè dõòna gbò dì belí bé e Jíízọ̀s beè kọ é naa naaá. Dì belí nu dòòmà bá, Jíízọ̀s beè kọọ̀: “Be ò iai ló pọ́lọ́ e dõòna nen beè síi, bọọ Tẹ̀ e a di káála é ia ló boólo pọ́lọ́ nèi. Sõò be nóo iai ló pọ́lọ́ nèi dõòna nen, bọọ Tẹ̀ e a di káála náa é ia ló boólo pọ́lọ́ nèi.” (Máát. 6:14, 15) Boo béè vó, à palàge dú bíi kọọ̀ beele é tú bá e Jìhóvà nè Jíízọ̀s sẹẹmài, sẹ̀ẹ̀mà dõòna gbò!
7. Bà mée ní e bàé íe bélè lọl ló vààa gyọ́ọ̀ Jíízọ̀s e?
7 Áá gbò e bà íe kà lé gbaa ló kilma ló Jíízọ̀s ní e bàé íe bélè lọl ló a vààa gyọ́ọẹ́. Éé ní ea náa è nyimá naa vó é? Jíízọ̀s beè kọọ̀ à diè “kpènà ló gè [uè] boo” pá a kóò. (Jọ́ọ̀n 15:13) Gbò e ba beè bọ́ló dẹ̀lẹ̀ nyíé boo e ba beè ù besĩ́ì Jíízọ̀s à kálá dú boo kunukẽ̀í, é beè ié bíi ló gè nó nú ea kilíé ló vaá vùlèe. Gbò e bà dì belí Ébràhàm, Sérà, Mózìs, nè Réhàb é beè kẽ̀èà, sõò gbò e ba beè bọ́ló dẹ̀lẹ̀ nyíé booí é íe bíi ló gè ié kà lé gbaa ló kilma ló Jíízọ̀s kọbé bà láá ié dùm e bè náa tá.—Jọ́ọ̀n 17:3; Tóm 24:15; Híb. 11:8-12, 24-26, 31.
8-9. Éé ní eé láá naa be à gá náa è bã̀àà kóò Jíízọ̀s e, vaá éé ní ea náa níí à dú bíi dì belí bé e bà baatẽ́ mm̀ kpá Jọ́ọ̀n 15:4, 5 naa ẽ́?
8 Nyíéi ẹ́ẹ gè zọ̀ Jíízọ̀s siá tóm mm̀ ge vee lé kpẹ̀aí vaá noòmà kà kà bel ea kil ló Boǹ Méné Bàrì. Tṍó e Jíízọ̀s beè di boo kunukẽ̀í, a beè noòmà nuù gbò nen. Dì belí nen ea di togó bõ̀ònatõ̀ò, Jíízọ̀s dì ea gé túlè sìtóm kọ̀ kpẹ̀a nè ge noòmà nuù gbò nen, lọl tã́gíní tṍó ea beè kil káála. À mon vaá nvèè ka ló o pììgà ge nvèè bá nè gã́bug nen kọ bàá nyimá ló ẹlẹ bií ló a Tẹ̀. Kàsĩ́, tení dú ló áá nvèè bá ea aa bá Jìhóvà nè Jíízọ̀s ní ea é láá naa kọ é sí nakà tómí ẽ́.—Bugi Jọ́ọ̀n 15:4, 5.
9 Moǹ Bel Bàrì palàge noomài kọọ̀ èé íè ge kilsĩ́ gè vùlè Jíízọ̀s be à gá náa è gbĩ́ gè naa nú ea é léémá Jìhóvà. Boo béè vó, naanii mè é ló sọ́l boo ténì kà nú eé náa kọbé è láá bã̀àà kóò Jíízọ̀s.
BÉ EÉ LÁÁ BÃ̀ÀÀ KÓÒ JÍÍZỌ̀S NAA
Òó láá bã̀àà kóò Jíízọ̀s tení dú ló gè (1) gbĩ́ gè nyimá ló Jíízọ̀s, (2) nó bé e Jíízọ̀s beè bugi togó vaá labví láb naa, (3) nvèè bá nè pá vígà Kráìst, nè ge (4) nvèè sãa kúm gbò nòònù ea di mm̀ bõ̀ònatõ̀ò Jìhóvà (Ẹ̀b 10-14 kpò) *
10. Éé ní ea dú túá kà nú eé náa be è gbĩ́ì ge bã̀àà kóò Jíízọ̀s e?
10 (1) Gbĩ́ gè nyimá ló Jíízọ̀s. Èé láá naa vó tení dú ló gè bugi kpá Máátìù, Máàk, Lúùk, nè Jọ́ọ̀n. Boo tṍó e bugì togó boo gbò nòòtẽ́ ea kil ló dùm Jíízọ̀s mm̀ Kpá Káí, àé náa kọ é vùlè vaá nvèè ka ló Jíízọ̀s boo béè íb lé bá ea beè zọ̀ọ̀mà gbò nen naamá nu. Dì belí nu dòòmà bá, náa kal ló béè kọọ̀ ẹlẹ ní ea beè dú ba Neǹ Togó é, náa beè sẹlẹ gbò e bà géè nyoonée nvée belí gbò gyóòlo. Tãa vó, a beè kọ́ a tọa ló nè nu ea bugi togó boo nèva. (Jọ́ọ̀n 15:15) Tṍó e nyíé va biilà, a beè biile nagé nyíè ẹlẹ vaá a beè zọ̀ va tò. (Jọ́ọ̀n 11:32-36) Kọbèè pá a gbò ọ́b beè mòn kọọ̀ Jíízọ̀s bãaà kóò gbò e bà gban tṍ ló nu ea nóòmà. (Máát. 11:19) Tṍó e nóò sĩ́deè bé e Jíízọ̀s beè zọ̀ pá a gbò nyòòne nvée naaá nu naa, bẹẹ gbaa ló kilma ló dõòna gbò é agabá, àé dĩinéi ló vaá ẹẹlẹ̀i nyíe, vaá èé kpáá palàge vùlè Jíízọ̀s vaá nvèèe ka ló.
11. Éé ní ea égè bàà kà nú eé náa be è gbĩ́ì ge bã̀àà kóò Jíízọ̀s e, vaá éé ní ea náa à dú bíi é?
11 (2) Nó bé e Jíízọ̀s beè bugi togó vaá labví láb naa. Bé e nóò vaá nyimá bé e Jíízọ̀s bugi togó naa, níà bé e bẹẹ gbaa ló kìlmàé ló é aga ló naa ẽ́. (1 Kọ́r. 2:16) Mósĩ́ deè ní eé láá nó Jíízọ̀s e? Bugi togó boo kóló ene kà nu dòòmà bá. Jíízọ̀s beè palàge bùlà nu ea kil ló gè nvèè bá nè dõòna gbò èlmà ge lèèlà a bá. (Máát. 20:28; Róm̀ 15:1-3) Boo béè kọ a beè bugi togó naa vó, a beè ia ló pọ́lọ́ vaá ié dùm ge tú lóó vaamá gyọ́ọ. Náa beè vàlẹ̀ bá bã̀ súng boo bel e gbò nen lóé ló. (Jọ́ọ̀n 1:46, 47) Vaá náa beè sọ̀tọ́ deè kọọ̀ pọ́lọ́ e nen beè sì á tọá ló bé ea zọ́ẹ naaá nu naa. (1 Tím. 1:12-14) Jíízọ̀s beè kọọ̀: “Bé e o vulèì ene naa, ní e a é náa kọ dénè nen á nyimá kọ ò gé nyoonéi nvée é.” (Jọ́ọ̀n 13:35) Àé dú lé gè bĩiná o bá kọọ̀: “É kọọ̀ nda gé nó gé nu dòòmà bá Jíízọ̀s, tení dú ló gè naa kiẽ́e nà kpóó sim tùlà ge naa kọ fẹ́ẹ́-fẹẹ̀ ló á di zẹ̀ẹ̀ pá vígà nè m̀m̀?”
12. Éé ní ea égè taà kà nú eé náa be è gbĩ́ì ge bã̀àà kóò Jíízọ̀s e, vaá mósĩ́ deè ní eé láá naa vó?
12 (3) Nvèè bá nè pá vígà Kráìst. Jíízọ̀s ẹb nú e náà nè gbò e Bàrì beè tṍ nóo ból belí kọ è náanìè neè ẹlẹ. (Máát. 25:34-40) Kà pọ̀b kà sĩ́deè e nveemà bá nè va dú gè kọ́ kpẹ̀a ea kil ló Boǹ Méné Bàrì nè ge naa kọ gbò nen á nyoone nvéè Kráìst dì belí bé e Jíízọ̀s beè kọ é naa naaá. (Máát. 28:19, 20; Tóm 10:42) Tení dú ló áá nvèè bá ea aa bá “dõòna gbò naanà ból” ní e pá vígà Kráìst é láá mm-mè sìtóm kọ̀ kpẹ̀a ea gé kọ́á beeá ló bàlà booí kátogóí é. (Jọ́ọ̀n 10:16) Be ò dṹùnà pọ̀b gònò naanà bólá, kọ̀láá tṍó eo síì nakà tómí, ò zógè kọ ò vulèè pá vígà Kráìst bii nágé ló Jíízọ̀s.
13. Mósĩ́ deè ní eé láá tú dùùlà bá deè tṍ Jíízọ̀s ea di mm̀ kpá Lúùk 16:9 siimá tóm ẽ́?
13 È ólò bã̀àà nàgé kóò Jìhóvà nè Jíízọ̀s tení dú ló gè tú bẹẹ kpègè nvèèmà sãa kúm tóm e baala gé túlè. (Bugi Lúùk 16:9.) Dì belí nu dòòmà bá, èé láá nè lọ̀là-lọ̀là nyòòmà tóm ea gé síá beeá ló bàlà booí, bà ólò tú gbò lọ̀là-lọ̀làí nvèèmà sãa kúm sìtóm kọ̀ kpẹ̀a bã̀àna kiẽ́e ea di kà kpã́á, ge tìbmàgì nè ge siimági tóm ló Kíndòm Họ́ọ̀l nè gbò ńdõòna kà, nè ge nvèèmà bá nè pá vígà e nu kyọa ló. Èé láá tu nágé kpègè nvèèmà bá nè bẹẹ bõ̀ònatõ̀ò nè ge nvèèmà bá nè gbò e monì kọ bà íe bíi. (Pró. 19:17) Níì gbò sĩ́deè eé láá nvèèmà bá nè pá vígà Kráìst e.
14. Dẹ̀ẹ̀a boo nú ea di mm̀ kpá Ẹ́fẹsọ̀s 4:15, 16, éé ní ea égè ténì kà nú eé náa be è gbĩ́ì ge bã̀àà kóò Jíízọ̀s e?
14 (4) Nvèè sãa kúm gbò nòònù ea di mm̀ bõ̀ònatõ̀ò Jìhóvà. È dúù kà lé kóò Jíízọ̀s ea di togó bõ̀ònatõ̀òa, tṍó e gbaǹ tṍ ló gbò e ba beè íbá kọ bàá ẹ̀b nú ea kilíí ló. (Bugi Ẹ́fẹsọ̀s 4:15, 16.) Dì belí nu dòòmà bá, kátogóí e piigà ge mòn kọọ̀ kọ̀láá kà Kíndòm Họ́ọ̀l siá tóm dì belí bé e beè noo naa. Boo béè vó, e beè gbá sìgà bõ̀ònatõ̀ò vaá nyaaná bá ló gbò ketõ̀ò ge kọ́ kpẹ̀a. Nakà nòònùí náa kọ é kùbmà gã́bug kpègè. Boo béè vó, a beè naa kọọ̀ sìgà pá vígà á nyaaná ba dìtõ̀ò nyòòmà gbò ãa nòònùí. Gbò vígàí beè láá tú gã́bug gbáá dììma dõòna kà bõ̀ònatõ̀ò vaá palàge nyimá ló pá vígà e bà di kĩá. Sõò, ba beè kọ bàá nyaaná bõ̀ònatõ̀ò. Ẹ̀b bé e nyíè Jíízọ̀s é ẹ́ẹ ge mòn pá a gbò nyòòne nvée e bà gban tṍ ló nakà nòònùí naaà!
BÃ̀ÀÀ KÓÒ JÍÍZỌ̀S DỌ̀ DÈ-DÈ
15. Mósĩ́ deè ní e bẹẹ gbaa ló e íè kilma ló Jíízọ̀s é kpáá palàge aga ló e dì deè sĩ́é?
15 Gbò e Bàrì beè tṍ nóo ból íe ẹ̀b dẽe sĩ́ gè di ló Jíízọ̀s dọ̀ọ̀mà dè-dè, vaá zọ̀ẹ bẹl mm̀ Boǹ Méné Bàrì. Bàé dí ló Jíízọ̀s, mònie, zọ̀ẹ loá bel, vaá zọ̀ẹ naaá nu. (Jọ́ọ̀n 14:2, 3) Jíízọ̀s é vulè, vaá ẹ̀b nàgé nu ea kil ló gbò e bà íe ẹ̀b dẽe sĩ́ gè tõó boo kunukẽ̀í. Kọbèè bà náa é mon Jíízọ̀s, gbaa ló e bà íe kìlmàé ló é olòó aga ló boo tṍó e bà gé dé kpéè ló dùm ea aa bá Jìhóvà nè Jíízọ̀s.—Àìz. 9:6, 7.
16. Mókà gbò tã́áná dee bá ní e íè lọl ló gè bã̀àà kóò Jíízọ̀s e?
16 Tṍó e zigà ge bã̀àà kóò Jíízọ̀s, è íè gã́bug tã́áná dee bá. Dì belí nu dòòmà bá, kátogóí, è íè bélè lọl ló a vulè nè a nvèè bá. È íè nèà deè ge tõó dùm dọ̀ọ̀mà dè-dè. Vaá ní ea palàge bọọ, bẹẹ gbaa ló kilma ló Jíízọ̀s é náa kọ é bã̀àà kóò nen ea bọọ lọ̀l vaá à lee ea dú Jìhóvà. Ẹ̀b bé ea dú kà lé gè bã̀àà kóò Jíízọ̀s naaà!
SỌ́L EA GÃ́BUG DÚ 17 “M̀ Gbĩ́ì Ge Naa”
^ par. 5 Gbò tóm Jíízọ̀s a zọ́ẹ loá bel vaá siá tóm mm̀ sìgà gbáá, vaá duá díì-díílá kóò. Jíízọ̀s gbĩ́ nágé kọ é duè pá ńlẹ́ẹ̀ kóò, sõò à íe gbò ànà-ànà e kpeè sĩ́ ló deè nieí, e gbò tóm Jíízọ̀sa náa beè kpee sĩ́ ló. Nakà togó bel ge nòí, é ló sọ́l boo sìgà gbò ànà-ànàí, nè bé eé láá bã̀àà kóò Jíízọ̀s vaá kilsĩ́ gè dú a kóò naa.
^ par. 55 BÀÀTẼ́ EA KIL LÓ FÙTÓ: (1) Tṍó fã̀ pá tọ, èé láá nó nu ea kil ló dùm Jíízọ̀s nè a sìtóm kọ̀ kpẹ̀a. (2) Gbẹá nònù, èé láá naa kọọ̀ fẹ́ẹ́-fẹẹ̀ ló á di zẹ̀ẹ̀ pá vígà nè bẹ̀ì. (3) Tení dú ló gè olòó kọ́ kpẹ̀a, èé láá nvèè sãa kúm pá vígà Kráìst. (4) Tṍó e bà gbá bõ̀ònatõ̀ò, èé láá gbàn tṍ ló béèlafùl gbò kànen.
