1-2. Éé ní e Jíízọ̀s géè kọ̀, tṍó ea ló bel ea di mm̀ kpá Jọ́ọ̀n 4:35, 36 é?

JÍÍZỌ̀S géè kyã̀à tení boo bàlà ól, be à sẹlẹ boo bàlà ól e ba beè ãàa fó báálì, ea bélí kpá kyàlà. (Jọ́ọ̀n 4:3-6) Àé sígè ténì ẽ́ vaá nu e ba beè fòí léèvè. Jíízọ̀s beè gbóó ló bel e bà náa beè ẹ̀bmà dẽe kọ àé ló, kọọ̀: “Dalai dẽe ẹbmai boo bàlà ól vaá ò ẹvii bé e nu ni léèvè vaá lee gè bùùlà naa!” (Bugi Jọ́ọ̀n 4:35, 36.) Éé ní ea géè kọ̀ ẹ?

² Jíízọ̀s géè ló bel ea kil ló gè bõonè ló gbò nen e bè níì kpá kyàlà nì. Zẹ́ẹ́ bugi togó boo nu ea beè ãàa naaá. Náa kal ló béè kọọ̀ pá Júù náa ólò zọ̀ pá Sàmérià naaá nu, Jíízọ̀s beè kọ́ kpẹ̀a nè ene kà ńnváá ea dú Sàmérià—vaá ńnvááá beè pãanée tṍ ló! Kàsĩ́, tṍó e Jíízọ̀s géè ló bel kilma ló bàlà ól ea ‘ni léèvè vaá lee gè bùùlàa,’ gã́bug pá Sàmérià e bà dã́ nu ea kil ló Jíízọ̀s lọl gã́ ńnvááá beè di èèlè e bà géè dù kọbé à nóòmàè va nu. (Jọ́ọ̀n 4:9, 39-42) Enè nen ea ólò baatẽ́ Kpá Káí beè kọ́ kilma ló nakà nòòtẽ́í kọọ̀: “Ge kọọ̀ gbòa beè vàlẹ̀ bá dú ló gè mòn Jíízọ̀s, nè ge kọ á noomàè va nu zógè kọọ̀ ba beè ié tàn ge nyoonée nvée.”

3. Mósĩ́ deè ní eo é láá dú kà lé neǹ kọ̀ kpẹ̀a, be ò ẹb gbò nen belí bé e Jíízọ̀s beè ẹ̀b va naa ẽ́?

³ Ò ólò labví láb naa vàẹ, kilma ló gbò eo kọ́ọ̀ kpẹ̀a nèe? É kọ ò ólò ẹ̀b va belí nu ea ni léèvè vaá lee gè bùùlà? Be à dì naa vó, òó náa taà kà nuí. Túá kà, òó tú gbala-gbala kọọmá kpẹ̀a. Tṍó bùùlà nuá náa bọọ; tọ́ọ̀ kà tṍó gè pee á gé. Ní ea égè bàà kà, nyíé ni é ẹ́ẹ tṍó eo monì gbò e bà dã́ lé kpẹ̀a. Kpá Káí kọ́ọ̀: “Nyíè gbò nen ólò ẹẹ tṍó bùùlà nu.” (Àìz. 9:3) Ní ea égè taà kà, òó ẹb buù nen eo kọ́ọ̀ kpẹ̀a nè belí nen ea é láá nyoone nvéè Kráìst, vó é náa kọ ó nyaaná bá ló o kọ̀ kpẹ̀a vaá ló bel boo nu ea é léémáe.

4. Éé ní eé nó lọl ló neǹ tóm Pọ́ọ̀l mm̀ nakà togó belí é?

⁴ Sìgà gbò nyòòne nvéè Jíízọ̀s beè ié bùlà kọọ̀ pá Sàmérià  náa é láá nyoone nvéè Jíízọ̀s, sõò Jíízọ̀s náa beè ẹ̀b va naa vó. Tãa vó, a beè ẹ̀b va belí gbò e bàé láá nyoonèè nvéè ẹlẹ. À bọ́ló kọ é ẹ̀b nàgé gbò e kọ́ọ̀ kpẹ̀a nè belí gbò e bàé láá nyoone nvéè Kráìst. Neǹ tóm Pọ́ọ̀l beè zogèi kà lé nu dòòmà bá. Éé ní eé láá nó lọ̀líé ló é? Mm̀ nakà togó bel ge nòí, èé ló sọ́l boo (1) bé e ẹlẹ beè nyimá nú e gbò ea kọ́ kpẹ̀a nè ziga ló naa, (2) bé ea beè nyimá nú ea léémá va naa, nè (3) bé ea beè ẹ̀b va belí gbò e bàé láá nyoone nvéè Kráìst naa.

5. Éé ní ea náa vaá Pọ́ọ̀l beè dã́tẽ́ ló gbò ea beè kọ́ kpẹ̀a nè gbẹá mm̀ tọ Bàrì pá Júùa ẹ?

⁵ Pọ́ọ̀l beè olòó bọọgẹ̀ kọ́ kpẹ̀a mm̀ tọ Bàrì pá Júù. Dì belí nu dòòmà bá, gbẹá mm̀ tọ Bàrì ea beè di Tẹ̀sàlonáíkà, Pọ́ọ̀l “beè tú taa dee bò séi pá Júù olòó zọ̀màva lóá bel boo Kpá Káí.” (Tóm 17:1, 2) Be à sẹlẹ, lóó Pọ́ọ̀l beè dĩ̀ìnà gbẹá tọ Bàrìa. A beè bọọ gbẹá zẹ̀ẹ̀ pá Júù. (Tóm 26:4, 5) A beè láá tú agẹ ló kọọmá kpẹ̀a nè pá Júù boo béè kọọ̀ a beè nyimá nu ea kil vá ló.—Fíl. 3:4, 5.

6. Mósĩ́ deè ní e gbò e ba beè di kè kiì pá Átẹ̀nz beè dú kele ló gbò e Pọ́ọ̀l beè kọ́ kpẹ̀a nè gbẹá mm̀ tọ Bàrì pá Júùa ẹ?

⁶ Tṍó e Pọ́ọ̀l beè teelá aa Tẹ̀sàlonáíkà nè Beríà boo béè bíígá ló, a beè kil Átẹ̀nz. Dõòna tṍó, “a beè gboó olòó bã tọ Bàrì pá Júù vaá zọ̀ pá Júù nè gbò e bè níì pá Júù nì e bà ólò fã̀ Bàrì pá Júù lóá bel.” (Tóm 17:17) Kọ̀láá bé ea dì naa, Pọ́ọ̀l beè kọ́ kpẹ̀a nè kele-kele nen, tṍó ea géè kọ́ kpẹ̀a gbẹá kè ki. Gbò e ba beè di zẹ̀ẹ̀ gbò e Pọ́ọ̀l géè kọ́ kpẹ̀a nèa, beè dú gbò nòòmà nù nè gbò e bè níì pá Júù nì e ba beè ẹ̀b nòòmà nù Pọ́ọ̀l belí “ãa dò bá nu.” Ba beè kọ́ nèe kọọ̀: “Sìgà gbò nu e e dã́ni gã́ e o gé ló dú ãa deè tṍ beele.”—Tóm 17:18-20.

7. Dẹ̀ẹ̀a boo nú ea di mm̀ kpá Tóm 17:22, 23, mósĩ́ deè ní e Pọ́ọ̀l beè nyaaná bá ló a kọ̀ kpẹ̀a ẹ́?

⁷ Bugi Tóm 17:22, 23. Pọ́ọ̀l náa beè tú tẽ̀ènè íb bá ea beè kọọmá kpẹ̀a nè pá Júù gbẹá tọ Bàrìa, kọọmá nè gbò e bè níì pá Júù nì gbẹá Átẹ̀nz. Pọ́ọ̀l beè láá bĩiná a bá kọọ̀, ‘Éé ní e gbò e bà di Átẹ̀nz ziga ló é?’ A beè palàge tú ọ̀ẹ̀ dẽe ẹ̀bmà kiẽ́e ea dì vaá nvèè kpíí ló nu e bà ziga ló. Tṍó e Pọ́ọ̀l beè noomà va kà kà bel ea di mm̀ Kpá Káí, a beè dààmà togó tení dú ló nu e bà ziga ló. Enè nen ea ólò baatẽ́ Kpá Káí beè kọọ̀: “Dì belí nen ea ólò fã̀ Bàrì pá Júù, Pọ́ọ̀l beè nyimá kọọ̀ gbò e bè níì pá Júù nì náa ólò fã̀ ‘kà kà’ Bàrì pá Júù, sõò a beè pììga boo gè naa kọ bàá nyimá kọọ̀ Bàrì e ẹlẹ gé veelìè nu ea kil lóá, náa dú ãa ló pá Átẹ̀nz.” Boo béè vó, Pọ́ọ̀l beè di kpènà ló gè nyaaná bá ló a kọ̀  kpẹ̀a. A beè kọ́ nè pá Átẹ̀nz kọọ̀, ‘Bàrì e bè Nóo Nyímàì Ló’ eo gbĩ́ gè fãiá, níà Bàrì e nda gé kọ́ nu ea kilíé ló nèi kátogóí é. Náa kal ló béè kọọ̀ gbò e bè níì pá Júù nì náa nyímá gbò nu ea di mm̀ Kpá Káí, Pọ́ọ̀l náa beè ẹ̀b va belí kọọ̀ bà náa é láá nyoone nvéè Kráìst. Tãa vó, a beè nyaaná bá ló a kọ̀ kpẹ̀a boo béè kọọ̀ a beè ẹ̀b va belí nu ea ni léèvè vaá lee gè bùùlà.

8. (a) Éé ní ea é nveè bá nè ni kọ ó nyimá nu e gbò e bà di kiẽ́e eo ólò kọ́ kpẹ̀a ziga ló é? (b) Be nen kọ́ nè ni kọọ̀ à íèè ńlẹ́ẹ̀ bõ̀ònaló fã̀, mó bá ní eo é láá sií ló é?

⁸ Tẹlẹ̀ dẽé kẽ, belí Pọ́ọ̀l. Tú dẽe gbĩimá gbò nu ea é nveè bá nè ni kọ ó nyimá nú e gbò e bà di kiẽ́e eo ólò kọ́ kpẹ̀a ziga ló. Mósĩ́ deè ní e tẹ̀ íè tọ sí tóm ló a bé é? É kọọ̀ a bée, nvèà nu, gyáa ea sẹẹ̀a ból, àbèè bá ea lóómá bel zógè íb bõ̀ònaló fã̀ ea ólò sì? Be à sẹlẹ, a beè kọ́ nè ni kọọ̀ à íèè ńlẹ́ẹ̀ bõ̀ònaló fã̀. Tṍó e nen beè kọ́ naa vó nè Flutura ea dú neǹ gyà deè sĩ́ tóm kọ̀ kpẹ̀a ea di kele, a beè aalá kọọ̀, “Nda ním dúù ló gè bení ni kọ ó ziga ló nu e nda zigà ló, sõò ge zọ̀ ni loá bel boo togó bel ea kọ́ọ̀ . . . “

9. Gbò éé ní e nen eo kọ́ọ̀ kpẹ̀a nè ea ólò sí dõòna kà bõ̀ònaló fã̀ é láá zọ̀ ni ziga ló é?

⁹ Mókà togó bel ní eo é láá kọọmá kpẹ̀a nè nen ea íe ńlẹ́ẹ̀ bõ̀ònaló fã̀e? Pììga boo gè nyimá nu eo gbáì zigaí ló. Àé láá dú nen ea ólò fã̀ áá tẽ̀ènè kà Bàrì, àé láá nyimá kọọ̀ Jíízọ̀s ní e Bàrì téní dú ló vaá dùùlà gbò nen ẽ́, àbèè kọọ̀ à zigà kọọ̀ è di mm̀ tṍó e pọ́lọ́ lab dògò ea zóógáí, é gé iná kùbmà. Dààmà togó o kọ̀ kpẹ̀a mm̀ sĩ́deè ea é léémáe, tení dú ló gè ló bel boo nú eo gbáì zigaí ló.

10. Éé ní ea bọ́ló kọ é pììga boo gè naa ẽ́, vaá ló éé?

¹⁰ Nyimá kọọ̀ níì kọ̀láá nen ní ea ólò ziga ló dénè nu e ba bõ̀ònaló fã̀ nóòmàe nì. Bã̀àna tṍó eo ni nyímá ló bõ̀ònaló fã̀ e nená ólò sì, pììga boo gè nyimá gbò nú e ẹlẹ ziga ló. David ea dú neǹ gyà deè sĩ́ tóm kọ̀ kpẹ̀a ea di kele gbẹá dó Australia beè kọọ̀: “Kátogóí, gã́bug nen ólò tú nyìmànù bàlà boo gbá ló nu e ba bõ̀ònaló fã̀ ziga ló.” Donalta, ea di Albania, kọ́ọ̀: “Sìgà gbò e kọ́ọ̀ kpẹ̀a nè ólò kọọ̀ baala íèè bõ̀ònaló fã̀ e bà ólò siè, sõò tṍó e tṍó téní, bà ólò kọọ̀ bà náa aalìè deè zigàẹ̀ ló Bàrì.” Vaá ene kà vígà págbálà ea ólò kọ́ kpẹ̀a aa dó dọ dó ea ólò tõó Argentina beè kọọ̀ sìgà gbò ólò kọọ̀ baala zigàẹ̀ ló kọọ̀ Taà Kà Bàrì Di Mm̀ Ene Kà, sõò bà náa aa deè zìgà kọọ̀ Tẹ̀, Sã́áná, nè nyómá káí gbááá ló dú tẽ̀ènè kà Bàrì. A beè kọọ̀: “Ge nyimá naa vó ólò naa kọ á palàge valíḿ ló gè nyimá bá eḿ kọ́ọ́má kpẹ̀a nè va.” Boo béè vó, pììga boo gè nyimá nu e nen aa deè ziga ló. Tṍóá, dì belí Pọ́ọ̀l, òó “tõo belí bé e kọ̀láá íb gbò  [eo] gé vee Lé Kpẹa nè tõo naa.”—1 Kọ́r. 9:19-23.

11. Dẹ̀ẹ̀a boo nú ea di mm̀ kpá Tóm 14:14-17, mósĩ́ deè ní e Pọ́ọ̀l beè láá kọ́ kpẹ̀a nè gbò e bà di Léstrà mm̀ sĩ́deè e bà dã́tẽ́ ló é?

¹¹ Bugi Tóm 14:14-17. Pọ́ọ̀l beè mòn gbò nú ea léémá gbò ea géè kọ́ kpẹ̀a nè, vaá gbóó nyaaná bá ló a kọ̀ kpẹ̀a nyòòmà. Dì belí nu dòòmà bá, gbò ea beè kọ́ kpẹ̀a nè gbẹá Léstrà náa beè nyimá nú ea di mm̀ Kpá Káí. Vó beè naa kọ Pọ́ọ̀l á ló bel mm̀ sĩ́deè e bàé láá dã́tẽ́ ló. A beè kọ́ nu ea kil ló bé e kele-kele íb sĩ́ té ólò múmí tṍó e bà ólò múmí naa, nè ge láá dé kpéè ló dùm. A beè tú gbò moǹ bel nè nu dòòmà bá e gbò ea kọ́ kpẹ̀a nè é dã́tẽ́ ló nvee mm̀ a lòbèl.

12. Mósĩ́ deè ní eo é láá nyimá ló nu ea é léémá nen eo gbĩ́ì ge kọ́ kpẹ̀a nè vaá ò nyááná bá ló o kọ̀ kpẹ̀a nyòòmà ẽ?

¹² Tú nyìmànù sààmà vaá ò nyááná bá ló o kọ̀ kpẹ̀a nyòòmà nú ea léémá gbò e bà di kiẽ́e eo ólò kọ́ kpẹ̀a. Mósĩ́ deè ní eo é láá nyimá ló nu ea é léémá nen eo gbĩ́ì ge kọ́ kpẹ̀a nè tṍó eo ínàé ló àbèè ge iná a tọ ẹ́? È kpáà kọọ̀, tẹlẹ̀ dẽé kẽ. Be à sẹlẹ, à gé õonà ló a be, à gé bugi kpá, à gé sí tóm ló faà, àbèè kọọ̀ à gé náa dõòna kà nu. Be à bọ́ló, òó láá dààmà togó o kọ̀ kpẹ̀a lọl ló nu ea gé náa. (Jọ́ọ̀n 4:7) Kọbèè kọ̀là ló e nen nveà é láá naa kọ ó nyimá ló íb nen ea dú—be à sẹlẹ àé náa kọ ó nyimá dó ea dú, íb tóm ea ólò sì, àbèè gbò bìlà bọ́ọ̀l ea ólò leemáe. Gustavo beè kọọ̀: “M beè dààmà togó gè zọ̀ ene kà nvín ãa gbálà ea ni tóólá 19 gbáá ea nveà kọ̀là ló, e nen ea ólò ọlí sọ́l e bà palàge nyimá ló di dẽe loá sọ́l, m beè bĩiná nu ea kil ló vaá a beè kọ́ nú ea náa vaá neǹ ọ́lì sọ́lá ólò palàge leemàèe. Loa sọ́lá beè naa kọ ḿ zọ̀ẹ noá Kpá Káí, vaá kátogóí a dú neǹ vígà.”

13. Mósĩ́ deè ní eo é láá kọ́ nú ea kil ló nò Kpá Káí mm̀ sĩ́deè ea é léémá nen ẽ́?

¹³ Tṍó eo gbĩ́ì ge zọ̀ nen noá Kpá Káí, naa kọọ̀ nená á ié tàn ge nò; kọ́ nèe bé e gè nó Kpá Káí é nveè bá nèe naa. (Jọ́ọ̀n 4:13-15)  Dì belí nu dòòmà bá, ene kà vígà pábia ea bée kọlà Poppy géè kọ́ kpẹ̀a vaá ene kà ńnváá ea íe lèèma ló gè nó Kpá Káí beè kọ́ nèe kọ á bã tọ. Tṍó e Poppy bã́ tọ vaá mòn kpá ea di gbàà kú tọ ea tẹ́lẹ bàlà kẽ kọọ̀ ńnvááá beè nó nu ea kil ló gè noòmà nu gbò nen, a beè kọ́ nèe kọọ̀ beele ólò noòmà nàgé nu gbò nen tení dú ló gè sí bẹẹ gbò nònù nè ge zọ̀ gbò nen noá Kpá Káí. Ńnvááá beè dààmà togó gè nó Kpá Káí, sí nònù deé ea bẽene, vaá sí àsémblì tṍó e tṍó téní. A beè dììa múú tṍó e enè gbáá ni téní. Bĩiná o bá kọọ̀: ‘Gbò éé ní ea ólò leemá buù nen em ólò kpáá sì gé kãa tṍó em gé kọ́ kpẹ̀a ẹ́? É kọ m̀ḿ láá kọ́ nú ea kil ló bẹẹ nò Kpá Káí mm̀ sĩ́deè ea é léémá ẽ?’

14. Mósĩ́ deè ní eo é láá nyaaná bá ló bé eo ólò noòmà nuù buù nen eo ólò noòmà Kpá Káí naa ẽ́?

¹⁴ Tṍó eo ni láá zọ̀ẹ noá Kpá Káí, palàge kpoogá dee ló nyòòmà buù tṍó eo é zọ́ẹ noá nu. Bugi togó boo nú ea kil ló pá a tọ, be à nyímá kpá àbèè kọ náa nyímá kpá, gbò nú ea ni téní bá mm̀ dùm nè gbò nú ea ólò leemáe. Boo tṍó eo gé kpóógá dee ló, sà gbò dọ̀ Kpá Káí eo é bugi, gbò vídiò eo é zógè, nè gbò nu dòòmà bá eo é baamà tẽ́ gbò kà kà bel ea di mm̀ Kpá Káí. Bĩiná o bá kọọ̀: ‘Éé ní ea é palàge leemáe vaá à dã́tẽ́ ló é?’ (Pró. 16:23) Ene kà ńnváá ea dú Albania ea ólò zọ̀ Flora ea dú neǹ gyà deè sĩ́ tóm noá nu beè kọọ̀: “Nda ním é láá ziga ló nòòmà nù ea kọ́ọ̀ nen é kẽeà aa kemà ú.” Flora náa beè bení ńnvááá kọ á ziga ló nuá tẽ̀ènè tṍóá. A beè kọọ̀: “M beè nyimá kọọ̀ à dú bíi kọ á zẹẹ́ nyimá nu ea kil ló Bàrì ea zigà kọ àé kẽenèè gbò nen lọl kemà ú.” Lọl tṍóá ààmà, buù tṍó e Flora é zọ́ẹ noá nu, à ólò nvèè kà mm̀ bé e Jìhóvà nyímá nu, ié kpóó vaá vùlèi naa. Tṍó e tṍó téní, ńnvááá beè gbóó zìgà kọọ̀ nen é kẽeà aa kemà ú. Kátogóí, a dú neǹ vígà ea gé tú bẹ̀à sã́ bùlà fã̀àmà Bàrì.

15. Dẹ̀ẹ̀a boo nú ea di mm̀ kpá Tóm 17:16-18, mókà gbò láb e pá Gríìs géè labví ní ea beè tãagẽ Pọ́ọ̀l ẹ, sõò éé ní ea náa vaá náa beè òòà aa ló gè kọ́ kpẹ̀a nè pá Átẹ̀nz e?

¹⁵ Bugi Tóm 17:16-18. Pọ́ọ̀l náa beè òòà aa ló gè kọ́ kpẹ̀a nè pá Átẹ̀nz, kọbèè bà géè fã̀ gbò ńbálì e bà náàmà bá, kuná gã̀, vaá ziga ló nòòmà nù gbò e bà náa ólò fã̀ Bàrì; àbèè ge sọ̀tọ́ deè kọ ba bel gbẹ́a á ọọvẹ̀ẹ̀ẹ ló. Náa kal ló béè kọọ̀ Pọ́ọ̀l beè dú nen ea gé nyoone nvéè Kráìst, à géè zẹ́ẹ́ “gbẹ́e vaá biigèe ló vaá nvèèmàe lẹ́.” (1 Tím. 1:13) Dì belí bé e Jíízọ̀s beè mòn kọ Pọ́ọ̀l é láá nyoonèè nvéè ẹlẹ naaá, níà bé e Pọ́ọ̀l beè ẹ̀b kọ pá Átẹ̀nz é láá nyoone nvéè Kráìst naa ẽ́. Vaá a beè naaá gbõ̀ònà bé ea géè ẹ̀bmà dẽe naa.—Tóm 9:13-15; 17:34.

16-17. Éé ní ea zógè kọọ̀ kọ̀láá íb nen é láá nyoone nvéè Kráìst e? Nè nu dòòmà bá.

¹⁶ Mm̀ túá gbò gbááá, gbò e bà aa kele-kele dó beè nyoone nvéè Kráìst. Tṍó e Pọ́ọ̀l beè emí kpá má pá vígà e bà di bon e pá Gríìs ólò tõo, ea di Kọ́rìnt, a beè kọọ̀ sìgà gbò e bà di mm̀ bõ̀ònatõ̀òa beè zẹ́ẹ́ dú gbò zib, àbèè gbò e ba beè tõó mm̀ dùm e bè náa õoà. Tṍóá a beè kpáá kọọ̀: “Sìgà bọ̀ì beè dii naanii vó. Sõò Bàrì beè gboó logíi õ̀ònà.” (1 Kọ́r. 6:9-11) É kọọ̀ ò gáẹ̀ beè zìgà kọ íb gbò ea meà naa vó, é láá nyaaná ba dùm vaá dú gbò e bàé nyoone nvéè Kráìst?

¹⁷ Deè nieí, gã́bug nen di kpènà ló gè nyaaá vaá nyoone nvéè Kráìst. Dì belí nu dòòmà bá, gbẹá Australia, Yukina ea dú neǹ gyà deè sĩ́ tóm kọ̀ kpẹ̀a ea di kele beè mòn kọọ̀ kọ̀láá íb nen é láá naa nú e Kpá Káí kọ́. Enè dee gbẹá ketõ̀ò ùlà ki, a beè mòn ene kà ńnváá ea tã́á nu lóóe vaá nu ea nveà é náa kọ á gá tàn nen gè bã̀é ló. Yukina beè kọọ̀: “Náa beè valíḿ ló gè bã̀é ló,  sõò tṍó em zọọ̀ẹ loá bel, m beè mòn kọọ̀ à palàge ié lèèma mm̀ Kpá Káí naa ní e sìgà nú ea tã́á ló beè dú gbò moǹ bel ea di mm̀ kpá Psalm!” Ńnvááá beè gbóó dààmà togó gè nó Kpá Káí vaá sí nònù. *

18. Éé ní ea náa vaá néé béélá bel ló dõòna gbò e?

¹⁸ É kọọ̀ Jíízọ̀s beè ẹ̀b bàlà ólá belí kọ a léèvè vaá lee gè bùùlà boo béè kọ à géè ẹ̀bmà dẽe kọ gã́bug nen é nyoonèèe nvée? Ẽ́èe. Kpá Káí beè kọọ̀ pọ́ì ńkem̀ gbò nen ní e bàé dẹlẹ́ẹ nyíé boo é. (Jọ́ọ̀n 12:37, 38) Vaá Jíízọ̀s beè láá nyimá ló nu ea di mm̀ nyíè gbò nen. (Máát. 9:4) Náa kal ló béè vó, a beè ká bùlà gbẹẹ́ boo pọ́ì ńkem̀ gbò e bàé dẹlẹ́ẹ nyíé boo vaá tú bẹ̀à sã́ bùlà kọọmá kpẹ̀a nè kọ̀láá nen. Tã́gíní bé e beele née é láá nyimá nu ea di mm̀ nyíè gbò nená, à bọ́ló kọ é gá ẹ̀b gbò e kọ́ọ̀ kpẹ̀a nè belí gbò e bà náa é láá nyoone nvéè Kráìst! Tãa vó, èé ẹb va dì belí gbò e bàé láá nyoone nvéè Kráìst. Marc, ea dú nen ea ólò kọ́ kpẹ̀a aa dó dọ dó ea di Burkina Faso, beè kọọ̀: “Gbò em beè ié bùlà kọọ̀ bàé sim kilsĩ́, beè òòà aa ló gè nó nu. Sõò gbò e ním beè ié bùlà kọ bàé sim kilsĩ́ ní e bà sim kilsĩ́é. Vó beè naa kọ ḿ nyimá kọọ̀ à palàge dú lé gè sọ̀tọ́ deè kọọ̀, nyómá Jìhóvà á tulèi.”

19. Mó bá ní ea bọ́ló kọ é ẹ̀bmà gbò e kọ́ọ̀ kpẹ̀a nèe?

¹⁹ Túá tṍó, àé láá tõoí ló belí kọọ̀ gbò e bàé láá nyoone nvéè Kráìst á gé kiẽ́e e ólò kọ́ kpẹ̀a. Sõò kẽ̀èa boo nú e Jíízọ̀s beè kọ́ nè pá a gbò nyòòne nvée. Nu a léèvè, níà ge kọọ̀ a lée gè bùùlà. Gbò nen é láá nyaaá vaá nyoone nvéè Kráìst. Jìhóvà ‘nveè ka ló’ vaá ẹ̀b gbò e bà di kiẽ́e e ólò kọ́ kpẹ̀a kọ bàé láá nyoone nvéè Kráìst. (Hég. 2:7) Be è ẹb gbò nen belí bé e Jìhóvà nè Jíízọ̀s ẹb va naa, èé bugi togó boo nú ea kil ló pá ba tọ, be bà nyímá kpá àbèè kọ bà náa nyímá kpá, gbò nú e bà ni téní bá mm̀ dùm nè gbò nú ea ólò leemá va. Néé ẹb va belí gbò e bà náa gé láá nyoone nvéè Kráìst, sõò belí gbò e bàé láá dú pá bẹẹ vígà.