É kọọ̀ olo é láá aalá gbò bíbví dẹ̀ẹ̀a boo Kpá Tọ Kùdẽe Ló níí 2019?

Éé ní e zìgà nù Bàrì ea kọ́ọ̀: “Tọ́ọ̀ kà nuù bé e bà noo nyòòmà ni náa é íe togó” tõó dọ̀ ẹ? (Àìz. 54:17)

Èé láá dẹlẹ nyíé boo kọọ̀ Bàrì é kpenài lọl bá gbò nu ea é láá dú nu àà kom ló nèi dì belí “tṍó e pọ́lọ́ ea aa bá gbò e bà gé bíìgèi ló” agabá. (Àìz. 25:4, 5) Pá bẹẹ gbò ọ́b náa é láá tú kom ea é gbẹaí ló lee nvèèi ló.—w19.01, 6-7 náásĩ́.

Mósĩ́ deè ní e bé e Bàrì beè zọ̀ pá Kénaàn nè pá Ízràẹ̀l e ba beè lọ̀lie togó kèbáá naaá nu naa zógè a lé bèèla ẹ́?

Bàrì beè tú bèèla bel tẹlẹ boo gbò e bà bã́ mm̀ láb kúnà gã̀ àbèè ge naa kọọ̀ gbò bia nè gbò pá nvín á mòn tã̀àgã̀. A beè tãanè dee bá gbò e bà gbaníe tṍ ló nè gbò e bà tú lé bá sẹ̀ẹ̀mà dõòna gbò.—w19.02, 22-23 náásĩ́.

Éé ní eé náa be è di kiẽ́e e nen e bè náa gé zọ́i fã̀ Jìhóvà gé tãagà ló Bàrì e?

Èé láá pĩi gã́ vaá zogè fã̀ dẽe sõò née é kọ́ọ̀ “amen” àbèè ge sii bá ló bá gbò e bà di kĩá. Èé láá tã̀àgã ló Bàrì gbẹá m-míí.—w19.03, 31 náásĩ́.

Ge kàb bá ló gbò pá nvín agabá naa vàẹ?

Ge kàb bá ló gbò pá nvín dú pọ́lọ́ e bà sí nen e nuá nááá lóá, bõ̀ònatõ̀ò, kpóó ea gé bẹl, nè Bàrì. Kiẽ́e e kpóó ea gé bẹl ténmá kọọ̀ bàá kpẹá íb gbò lábvá, gbò kànen mm̀ bõ̀ònatõ̀ò ólò naa vó.—w19.05, 9-10 náásĩ́.

Mósĩ́ deè ní e olo é láá nyaaná bá ló àbèè ge sìm kilsĩ́ mm̀ o nyómá nè o bug e?

Nee gbò nu ea é nveè bá nè nií: Bàn Jìhóvà mm̀ tã̀àgã ló. Boo tṍó eo gé bugi togó, sẹ̀ẹ̀a bùlà ge nyaaná bá ló gbò o láb eo mon kọ à dú bíi kọ ó nyaaná bá ló. Tú nyìmà nù sààmà pá o kóò.—w19.06, 11 náásĩ́.

Éé ní eé láá naá kátogóí gè kpoogá dee ló nyòòmà bíígá ló é?

À bọ́ló kọ é agẹlẹ ló bẹẹ gbaa ló kilma ló Jìhóvà. Ge dẹlẹ nyíé boo kọ Jìhóvà vulèi vaá náa é sãanài bá ló gbẹẹ́ kẽ tọ́ọ̀ dee. Bugi Kpá Káí buù dee, vaá ò tã̀àgã̀ ló Bàrì lee. Àgala boo kọọ̀ gbò tã́áná dee bá eé íé mm̀ Boǹ Méné Bàrì é nááá. Kẽ̀èa boo gbò dọ̀ Kpá Káí ea ólò palàge leemá ni nè gbò sọ́l ea leelà Jìhóvà.—w19.07, 2-4 náásĩ́.

Éé ní eé láá naa ge nvèèmà bá nè pá bẹẹ dúà ló kọ bàá dùùà ẹ?

À palàge dú bíi kọ é nyimá bé e nu tọ́á ló nen naa, bẹẹ lé nu dòòmà bá á sí neǹ ditõ̀ò nèi, vaá è ié ĩ̀ìmà nè ge tú kyèèlè naamá nu.—w19.08, 15-17 náásĩ́.

Mósĩ́ deè ní e íè bõ̀séi dì belí bé e Jíízọ̀s beè zìgà nèi mm̀ kpá Máátìù 11:28 naa ẽ́?

È íè gbò tùle e bà vulèi, kà lé gbò kóò ea tõo lọ̀l vaá à lee, nè tóm ge sì ea dú lé lọ̀l vaá à lee.—w19.09, 23 náásĩ́.

Mósĩ́ deè ní e Bàrì é láá náa kọ á tànii vaá ò naanii nu e a léémáe ẽ́? (Fíl. 2:13)

Boo tṍó e gé bugi Kpá Káí vaá bugi togó boo, Bàrì é láá nèi kói, vaá naa kọ á tànii ge naa nu ea léémáe. A nyómá káí é láá naa kọ é tú bẹẹ tál siimá tóm leevè.—w19.10, 21 náásĩ́.

Mókà gbò láb tọ e nyìmànù di m ní ea bọ́ló kọ é zẹ́ẹ́ tù besĩ́ è kálá nè béèlafùl e?

Vòò kà láb tọí dú: Palàge gbĩ́tẽ́ ló nu. Bàn kọ Bàrì á neè ni nyìmànù. Bugi togó boo gbò bug ea di nvéè o béèlafùl. Ié kà lèlà gbò nu eo noò sẹ̀ẹ̀a sĩ́. Nyimá ló nu eo é láá naa nè nu e bè nóo é láá naa.—w19.11, 27-29 náásĩ́.

É kọọ̀ bug ea kil ló kọọ̀ ból nyíè nen náa ólò ù beè dààmà togó aa ló bel e Sétàn beè kọ́ nè Íìv a?

Níì vó nì. Sétàn beè kọ́ nè Íìv kọ náa é ú, níì ge kọọ̀ à bélí kọ àé ú nì. Náa beè íe tọ́ọ̀ kà kyáá fã̀ ea beè láá fùl zelí bá Tù Múú ea beè naaá. Gbò nen beè láá dààà togó gè ié bug kọọ̀ ból nyíè nen náa ólò ù tṍó e Bàrì ni zaali gbò nen e bà géè tìb Babel a.—w19.12, 15 náásĩ́.