Gbò gã́belá kol béè sĩ́ìna òb kà kpãà neǹ Kráìst kọọ̀: “Nyómá Káí ólò domà vulà súú dẽe ló, ṍ kààgà, fẹ́ẹ́ fẹẹ̀ ló, ĩ̀ìmà, tóè sàn, lé nyíe, ge láá bọ́ ló dẹ̀lẹ̀ nyíe boo, gbọ́ọ́ gbọọ̀ ló, nè ge láá lẹ̀ẹ̀là bel ló o bá.” Sõò níì áá nakà gbò kpãaí ní e nyómá káí Bàrì ólò nvèè bá nèi kọ é láá toníé nì.

Éé ní ea náa vaá è nyimá é? Lé, besĩ́ì neǹ tóm Pọ́ọ̀l à kalá kòl béè gbò kpãá e nyómá káí ólò domá, a beè zẹ́ẹ́ emí kọọ̀: “Tóm e nom kpá ló ólò sì . . . dọ bàlà kẽ m kúnà gã̀, dùm e bè náa õoà, òòvà ló, ge tãaga ló gbò ńbàlì e bà náàmà bá, ge bó tã́á, ọ́la, kana, ọ́b nyíe, sṹg, kùlù kúlù, pòòà, kpòl nèà, bẹẹ súú dẽe, [ge fẹ́ nen,] tènè míí dẽe, ge dé bìlà, nè dõòna kà gbò nu e a bélígi vó.” (Gàl. 5:19-21) Pọ́ọ̀l nveè kùbmà ló a bel tení dú ló gè kọọ̀, “nè dõòna kà gbò nu e a bélígi vó,” boo béè vó, náa kol béè dénè “tóm e nom kpá ló ólò sì” dì belí gbò ní ea kol bée mm̀ kpá Kọ́lọsì 3:5 á. Mm̀ tẽ̀ènè sĩ́deèá, tṍó ea kólí béè sĩ́ìna òb kà lé-lé kpãá lọ̀l, a beè gbóó kọọ̀: “Tọ́ọ̀ kà log á gé ló na gbò láví.” Vóà naa, Pọ́ọ̀l náa géè gbĩ́ gè kolí béè dénè kpãa e nyómá káí ólò láá nvèè bá nèi kọ é toní.

Níí palàge dọa bàlà kẽ tṍó e túù níí doolé ló gbò bel e Pọ́ọ̀l beè emí má bõ̀ònatõ̀ò ea di Ẹ́fẹsọ̀s, ea kọ́ọ̀: “Boo bée kọ ẹ́ẹ́ dee ní e a ólò domà kele kele íb ból lé nàà nu, nè lé lab dògò, nè nu e a dú kà kà e.” (Ẹ́fẹ. 5: 8, 9) Mm̀ kà kà, “lé nàà nu” gbá ló ge dú lé lab dògò nè kà kà, dú enè gá ea di ló kpãa e “ẹ́ẹ́ dee” ólò domá, sõò à dú nágé enè gá ea dṹùnà ból súú “Nyómá Káí.”

Mm̀ tẽ̀ènè sĩ́deèá, Pọ́ọ̀l beè siè kpóó ló Tímotì kọ á “bé boo gè ié lé lab dògò, nè ge fã̀ Bàrì, nè ge dẹlẹ́e nyíe boo, nè ge ié vulà súú dẽe ló, nè ge láá ĩ̀ìmà nu, nè ge dú gbọ́ọ́ gbọọ ló”—ọ̀ọ̀lẹ̀ kà lé-lé kpãá ea kólí bée. (1 Tím. 6:11) Áá taà kà ea di zẹ̀ẹ̀ ea dú gè (bọ́ló dẹ̀lẹ̀ nyíé boo, vulà, nè gbọ́ọ́-gbọọ̀ ló) ní ea beè kòl bée gbàà ból súú “nyómá káí” é. Kọ̀láá bé ea dì naa, a beè dú bii kọọ̀ Tímotì á toní nágé kpãà lé lab dògò, dùm ge fã̀ Bàrì, nè ĩ̀ìmà.—Doolé ló Kọ́lọsì 3:12; 2 Pítà 1:5-7.

Boo béè vó, kpá Gàlésìà 5:22, 23 náa kol béè dénè kpãa e nen ea gé nyoone nvéè Kráìst é tóní. Nyómá káí Bàrì é láá nvèè bá nèi kọ é toní sĩ́ìna òb kà gá ea di ló ból súú “Nyómá Káí.” Sõò à íe dõòna kà gbò kpãa ea dú bíi kọ é toní kọbé è láá dú neǹ Kráìst ea ni agaló vaá nvèà “ãa nen, e Bàrì dem kọ á belìè ẹlẹ vaá à dọ bàlà kẽ dú kà kà m ge di lèlà vaá di káí.”—Ẹ́fẹ. 4:24.