Sìgà kọ́ọ̀ bùlà Bàrì ea di mm̀ ńkpóí kọ́ nú ea beè naaá mm̀ tẽ̀ènè kpò tṍó. Bé ea ḿḿ-má mm̀ kele-kele sĩ́deè naa zógè kọ è di mm̀ “gbò deé e tṍó é gé tà.”—Dán. 12:4.

• Gbò Dọ̀ Kpá Káí Kùùà 11:7; 12:13, 17; 13:1-8, 12

  Kọ́ọ̀ Bùlà Bàrì “Nom kọ̀la” a bẹl boo kunukẽ̀í mm̀ nú ea sígá 3,000 gbáá. Mm̀ gbò deé e tṍó é gé tàí, kom beè bã ló ní ea égè a àlàbà kà togóá. Tṍó e tṍó téní, togóeá beè kpáá boá vaá “dénè bàlà boo” beè kõ̀òà nyoonée nvée. Sétàn beè tú nom̀ kọ̀la beemá “dénè na gbò pá a nvín e a sígáá.”

  M̀m̀-me Kọ́ọ̀ Bùlà Bàrìí Tṍó e Tù Múúá ni téní tà, bẹbẹ̀l ea bé uú boo Jìhóvà ní ea géè bẹ̀l gbò nen ẽ́. Mm̀ túá tṍó bé bàlà booá, tṍó e gã́bug gbò gbáá ni téní, lóó bẹbẹ̀l pá Britain beè ọọ. Lóóe beè gbóó kpáá agà tṍó e United State gbáaẹ́ ló. Èlmà tõ̀ò mm̀ gbò deé e tṍó é gé tàí, Sétàn dì ea gé bíìgè ló gbò níí Bàrì tení dú ló gbò kpóó bẹbẹ̀l bàlà booí.

• Gbò Dọ̀ Kpá Káí Dán. 11:25-45

  Kọ́ọ̀ Bùlà Bàrì Béa é dí zẹ̀ẹ̀ méné boo gù nè méné boo kpọ̀lọ̀-kpọ̀lọ̀ mm̀ gbò deé e tṍó é gé tàí.

  M̀m̀-me Kọ́ọ̀ Bùlà Bàrìí Germany beè bé Anglo-American. Mm̀ gbáá 1945 pá Soviet Union nè gbò e bà gbáaẹ́ ló beè gbóó dú méné boo gù. Mm̀ gbáá 1991, pá Soviet Union náa beè bẹ̀l nà, vaá tṍó e tṍó téní, pá Russia nè gbò e bà gbáaẹ́ ló beè gbóó bẹ̀l dú méné boo gù.

• Gbò Dọ̀ Kpá Káí Àìz. 61:1; Mál. 3:1; Lúùk 4:18

  Kọ́ọ̀ Bùlà Bàrì Jìhóvà beè lẹ̀ẹ̀là a “neǹ lẹ̀ẹ̀la tóm” kọ á gé “kpoogè dee ló ke” besĩ́ì Boǹ Méné Mèsáíà kálá dù. Neǹ lẹ̀ẹ̀la tómí beè dààmà togó gè “vee Lé Kpẹa nè gbò sàn.”

  M̀m̀-me Kọ́ọ̀ Bùlà Bàrìí Lọl mm̀ gbáá 1870 ààmà, C. T. Russell nè pá a gbò beè tú bẹ̀à sã́ bùlà bààmà tẽ́ gbò kà kà bel ea di mm̀ Kpá Káí. Mm̀ gbáá 1881, ba beè mòn kọọ̀ à palàge dú bíi kọ gbò gyóòlo Bàrì á kọ́ kpẹ̀a. Ba beè emí gbò kpá ea kọlà “Wanted 1,000 Preachers” nè “Anointed to Preach.”

• Gbò Dọ̀ Kpá Káí Máát. 13:24-30, 36-43

  Kọ́ọ̀ Bùlà Bàrì Neǹ ọ́b tú kpá kyàlà kpẽ̀è fó gbàà kà kpá kyàlà vaá a beè dú gè sọ̀bá kọ á gbá bọọ dọ̀ọ̀mà tṍó e tṍó bùùlà nu lee; tṍóá ba beè gbóó kpòòlà kà kpá kyàlà lọl gbàà kpá kyàlà kpẽ̀èa.

  M̀m̀-me Kọ́ọ̀ Bùlà Bàrìí Lọl mm̀ gbáá 1870, kele ea di zẹ̀ẹ̀ kà kà gbò níí Kráìst nè gbò e bà kpọ́ kyáá kọ bà gé nyoonìè nvéè Kráìst beè palàge dọ bàlà kẽ. Mm̀ gbò deé e tṍó é gé tàí, bà bṍònè ló kà kà gbò níí Kráìst lọl mm kyáá fã̀.

• Gbò Dọ̀ Kpá Káí Dán. 2:31-33, 41-43

  Kọ́ọ̀ Bùlà Bàrì Boo ká tọ e bà tú pììà kpọ́gọ́lọ́ nè loobã́ naamáá dṹùnà ńneǹ té e bà tú kele-kele íb kpọ́gọ́lọ́ naamáá.

  M̀m̀-me Kọ́ọ̀ Bùlà Bàrìí Loobã́á tõó dọ̀ gbò dó ea kil kẽ e bẹbẹ̀l Anglo-American náa léémá va. Gbòí ní e bà gé ọọvẹ ló bẹbẹ̀l Anglo-American kọ á gá láá ié kpóó belí kpọ́gọ́lọ́ ẹ́.

• Gbò Dọ̀ Kpá Káí Máát. 13:30; 24:14, 45; 28:19, 20

  Kọ́ọ̀ Bùlà Bàrì “Bàé bṍònè ló “kà kpá kyàlà” sẹlẹ́ “dógo” vaá íbá ló “nen tóm e a nyímá nu vaá bọ́ ló dẹ̀lẹ̀ nyíe boo” kọ á nè gyã́á “pá a gbò tóm.” Tóm gè vee ‘lé kpẹ̀a ea kil ló Boǹ Méné Bàrì’ beè dààmà togó gè zààlà bã “dénè ke tõ̀ò e a di bàlà booí.”

  M̀m̀-me Kọ́ọ̀ Bùlà Bàrìí Mm̀ gbáá 1919, ba beè íbá ló neǹ tóm ea nyímá nu vaá bọ́ló dẹ̀lẹ̀ nyíé boo kọ á ẹ̀b nú ea kil ló gbò níí Bàrì. Lọl tṍóá ààmà, Gbò Nvín Nò Kpá Káí beè gbóó kpáá palàge kọ́ kpẹ̀a. Deè nieí, Gbò Neǹ Ditṍò Jìhóvà dì e bà gé kọ́ kpẹ̀a mm̀ nú ea sígá ló 200 kpò kunukẽ̀ vaá emí gi gbò kpá ea dẹẹ̀a boo Kpá Káí nvee mm̀ nú ea sígá ló 1,000 dém bel.

• Gbò Dọ̀ Kpá Káí Dán. 12:11; Kùùà 13:11, 14, 15

  Kọ́ọ̀ Bùlà Bàrì Nom̀ kọ̀l ea beè ié bàà kà koòa beè kẹlẹ gbò e bà di boo kunukẽ̀í kọ bàá dèm “nu e a é bélí na kà nom̀ kọ̀l” ea beè dìa, vaá à gbóó “nvèè séi gbàà nu e ba è dèm kọ á belí túá kà nomá.”

  M̀m̀-me Kọ́ọ̀ Bùlà Bàrìí Bẹbẹ̀l Anglo-America beè gyààma sĩ́ ló gè nvèè Bõ̀òna Ló Dénè Dó kẽ. Dõòna kà gbò dó beè gbaá ló nakà bõ̀ònalóí. Tṍó e tṍó ni téní, méné boo gù beè gbóó gbaá ló Bõ̀òna Ló Dénè Dóí—lọl mm̀ gbáá 1926 tẹlẹ 1933. Gbò nen beè ziga ló kọọ̀ Gbaa Ló Gbò Dó é láá nvèè fẹ́ẹ́-fẹẹ̀ ló mm̀ zivèkà bàlà booí belí bé e ba beè zìgà nàgé ló kọọ̀ Bõ̀òna Ló Dénè Dó é náaá, ea dú nu e Boǹ Méné Bàrì ní ea é láá naa ẽ́.

• Gbò Dọ̀ Kpá Káí Dán. 8:23, 24

  Kọ́ọ̀ Bùlà Bàrì Ene kà gyã̀à-gyã̀à ló méné beè “tú kà agẹ bá kyọ̀à sĩ́ tẹlẹ boo gbò nen.”

  M̀m̀-me Kọ́ọ̀ Bùlà Bàrìí Bẹbẹ̀l Anglo-American a fẹ́ gã́bug nen vaá domà agẹbá kyọ̀à sĩ́. Dì belí nu dòòmà bá, tṍó Bàà Tóm Bé Bàlà Booá, dó United State beè tú bàà tóm bóm̀b ea kọlà atomic tẹlẹ boo ene kà dó ea géè bé dó Britain nè United State, naa ní ea fẹ́ gã́bug nen èlmà kọ̀láá íb bóm̀b e bà ni tẹ́lẹ̀.

• Gbò Dọ̀ Kpá Káí Dán. 11:31; Kùùà 17:3, 7-11

  Kọ́ọ̀ Bùlà Bàrì Nom̀ kọ̀l ea íe òb kà koò “e kpá lóe kúm mii” ea aa kè tẽ́ bàlìa ní ea égè aatáà kà méné ẽ́. Kpá Dányẹ̀l baatẽ́ nakà ménéí naamá “nuù kẹ́ẹ ea kyọ tọọ̀ káíá.”

  M̀m̀-me Kọ́ọ̀ Bùlà Bàrìí Kùbmà beè bã ló Bõ̀òna Ló Dénè Dóí tṍó e Bàà Tóm Bé Bàlà Booá íná kùbmà. Tṍó e bà ni bé béá lọ̀l, beè gbóó “bã́ kẽ.” A beè dú gè tú ka ea kuu Boǹ Méné Bàrì nvee ló Gbaa Ló Gbò Dó, dì belí bé e ba beè naa nagé Bõ̀òna Ló Dénè Dó ea beè zẹ́ẹ́ dìa. Pá UN é náa uú boo bõ̀ònaló fã̀.

• Gbò Dọ̀ Kpá Káí 1 Tẹ̀s. 5:3; Kùùà 17:16

  Kọ́ọ̀ Bùlà Bàrì Gbò dó vee kọọ̀ “nu a dú lé vaá ló kẽ a fẹ́ẹ́gá,” vaá “òb kà koò” nè “nom̀ kọ̀la” é náa uú boo “pá bia kyãa ólá” vaá kyọ̀ẹ sĩ́. Tṍó e níá ni nááá lọ̀l, gbò dóá é gbóó ié kyọ̀à sĩ́.

  M̀m̀-me Kọ́ọ̀ Bùlà Bàrìí Gbò dóá é túúmá kọ nu a dú lé vaá lóó kẽ a fẹ́ẹ́gá. Tṍóá gbò dó e bà dṹùnà Gbaa Ló Gbò Dó é gbóó kyọ̀ sĩ́ bõ̀ònaló kyáá fã̀. Níí ní ea é gbóó dú dààmà togó pọ̀b kpo tã̀àgã̀e. Pọ̀b kpo tã̀àgã̀í é íná kùbmà tṍó e Jíízọ̀s é kyọgàlà sĩ́ bàlà boò Sétàní mm̀ bé Amagídòn.

• Gbò Dọ̀ Kpá Káí Èzí. 38:11, 14-17; Máát. 24:31

  Kọ́ọ̀ Bùlà Bàrì Gọ̀g é náa uú boo gbò níí Bàrì. Tṍóá, gbò nyómá tóm é gbóó bõonè ló “gbò e [Bàrì] beè sà.”

  M̀m̀-me Kọ́ọ̀ Bùlà Bàrìí Méné boo gùa é gbááá ló dõòna kà gbò bẹbẹ̀l vaá naa uú boo gbò níí Bàrì. Tṍó e nàà uú booí ni dààmà togó, àé dú gè bõonè ló gbò e Bàrì beè tṍ nóo ból e bà sígá boo kunukẽ̀í kilma káála.

• Gbò Dọ̀ Kpá Káí Èzí. 38:18-23; Dán. 2:34, 35, 44, 45; Kùùà 6:2; 16:14, 16; 17:14; 19:20

  Kọ́ọ̀ Bùlà Bàrì “Nen e a di boo” “ẹ́ẹ́ nom tee” “bé èl bá” tení dú ló gè kyọ̀sĩ́ Gọ̀g nè pá a gbò bé. A beè tobví “nom kọ̀la” tẹlẹ mm̀ “bànà sã́ dem e a gé bẹ́,” vaá ene kà kpò dem beè gbóó kyọ̀gàlà sĩ́ gbele kpã̀àmà ńneǹ téá.

  M̀m̀-me Kọ́ọ̀ Bùlà Bàrìí Jíízọ̀s ea gé bẹl boo Boǹ Méné Bàrì é dú gé dùùlà gbò níí Bàrì. Jíízọ̀s nè 144,000 gbò nen e bàé zọ́ẹ bẹ̀l bií ló gbò nyómá tóm é kyọgàlà sĩ́ dénè dó e bà gbááá ló vaá naa uú boo gbò níí Bàrì. Níà tṍó e bàlà boò Sétàní é gbóó iná kùbmà ẽ.