41 TOGÓ BEL GE NÒ
Kilsĩ́ Gè Bọ́ló Dẹ̀lẹ̀ Nyíe Boo Mm̀ Tṍó “Pọ̀b Kpo Tã̀àgã̀”
“Dénè boólo eo bọ́ì ló dẹ̀lẹ̀ nyíé boo, vulei Jìhóvà! Jìhóvà ólò kpènà gbò e bà bọ́ló dẹ̀lẹ̀ nyíé boo.”—PS. 31:23.
SỌ́L EA GÃ́BUG DÚ 129 Èé Kilsĩ́ Gè Ié Ĩ̀ìmà
GE TENÍ BOO *
1-2. (a) Éé ní e gbò e bà gé bẹl bàlà boo é beè vee pọ́ì ńkem̀ tṍó àla ẹ́? (b) Mókà gbò bíb ní ea dú bíi kọ é aalá ẹ́?
ZẸ́Ẹ́ dòòmà dẽe kọọ̀ gbò e bà gé bẹl bàlà booí a vee nu kọọ̀ “nu a dú lé vaá ló kẽ a fẹ́ẹ́gá” e Kpá Káí beè kọ̀a. Bàé láá ẽegã́ boo kọọ̀ bàlà booí a dú kà fẹ́ẹ́-fẹẹ̀ ló ketõ̀ò. Bàé gbĩ́ kọ é bugi togó kọọ̀ baa láá kpoogèè dee ló gbò tã̀àgã̀ ea di mm̀ bàlà booí. Sõò bà náa é láá lẹ̀ẹ̀là bel ló nu ea é nááá bẽene! Ló éé? Dẹ̀ẹ̀a boo kọ́ọ̀ bùlà Bàrì ea di mm̀ Kpá Káí, “bùló kyọ̀à sĩ́ é gboó dọ̀vá boo . . . naa ní e gbò nen náa é láá teá zelí bá.”—1 Tẹ̀s. 5:3.
2 À íe gbò bíb ea palàge dì bíi kọ é aalá, ea kọ́ọ̀: Éé ní ea é nááá tṍó ‘pọ̀b kpo tã̀àgã̀a’ ẽ? Éé ní e Jìhóvà é gbĩ́ kọ é naa tṍóá ẽ́? Vaá mósĩ́ deè ní eé láá di kpènà ló kátogóí kọbé è bọ́ló dẹ̀lẹ̀ nyíé boo vaá fùl zelí bá pọ̀b kpo tã̀àgã̀a ẽ́?—Máát. 24:21.
ÉÉ NÍ EA É NÁÁÁ MM̀ TṌÓ ‘PỌ̀B KPO TÃ̀ÀGÃ̀’?
3. Dẹ̀ẹ̀a boo kpá Kùùà Nù 17:5, 15-18, mósĩ́ deè ní e Bàrì é kyọgàlà sĩ́ “Gbele Bábìlọ̀n” ẽ?
3 Bugi Kùùà Nù 17:5, 15-18. Bàé kyọsĩ́ “Gbele Bábìlọ̀n.” Dì belí bé e beè zẹ́ẹ́ kọ́ naaá, gbò e bà gé bẹl bàlà booí náa é láá ié kói boo gbò nú ea é lẹẹà tṍóá. Ló éé? Boo béè kọọ̀ “Bàrì [é nveè vá] nyíe kọ bà á naa nú e ẹlẹ beè noo.” Éé ní e ẹlẹ beè noo ẽ́? Níí dú ge kyọ̀gàlà sĩ́ dénè kyáá fã̀, bií ló gbò bõ̀ònaló fã̀ e bà kpọ́ kyáá kọọ̀ bà gé nyoonìè nvéè Kráìst sõò bà náa fã́e mm̀ sĩ́deè e ẹlẹ ténmá. * Bàrì é tú nú e ẹlẹ beè noo nvee nyíè “òb kà koò” ea di togó “nom kọ̀l e kpá lóe kúm mii” ã́. Òb kà koòí tõó dọ̀ dénè kpóó bẹbẹ̀l e bà nveè sãa kúm “nom kọ̀la”—naamá United Nations. (Kùùà 17:3, 11-13; 18:8) Tṍó e gbò kpóó bẹbẹ̀lá é náa uú boo kyáá fã̀, níá é gboó dú kpíi ea zógè kọọ̀ pọ̀b kpo tã̀àgã̀ a daamà togó. Àé búló naaá, vaá siìmà pọ̀ dénè nen ea di bàlà booí.
4. (a) Éé ní e kpóó ea gé bẹl bàlà booí é élá boo vaá naa uú boo kyáá fã̀e? (b) Éé ní e gbò e ba beè olòó sí gbò bõ̀ònalóí é beè láá naa ẽ́?
4 Née nyímà nú e kpóó ea gé bẹl bàlà booí é élá boo vaá naa uú boo Gbele Bábìlọ̀n. Bàé láá kọọ̀ gbò bõ̀ònaló fã̀ ea di bàlà booí náa kọọ̀ gbò dó á gá ié fẹ́ẹ́-fẹẹ̀ ló, vaá bà ólò bọ̀ọ̀gẹ̀ nvèè gã́ dẽè nú e gbò e bà gé bẹl náa. Àbèè kọ bàé kọ́ọ̀ gbò bõ̀ònalóá a bã méné vaá ié gyọ́. (Kùùà 18:3, 7) Àé láá dú kọọ̀ tṍó e kpóó ea gé bẹl bàlà booí é náa uú boo bõ̀ònaló kyáá fã̀, náa é kyọgàlà sĩ́ dénè nen ea di m. Tãa vó, kpóó ea gé bẹl bàlà booí é kyọgàlà sĩ́ bõ̀ònaló kyáá fã̀ lọ̀l. Kọ̀láá tṍó e bà kyọgàlà sĩ́ gbò bõ̀ònaló kyáá fã̀ lọ̀l, gbò e ba beè zẹ́ẹ́ olòó sì é gbóó nyimá kọọ̀ ba gbò tùle náa láá mm-mè nu e ba beè zìgà neèva, vaá vó é gbóó naa kọọ̀ bàá kpòòlà lóó lọl ló gbò bõ̀ònalóá.
5. Éé ní e Jìhóvà beè zìgà kọ àé náanìè kilma ló pọ̀b kpo tã̀àgã̀a ẽ, vaá boo béè éé?
5 Kpá Káí náa kọ́ begè dẽè tṍó e kyọ̀àsĩ́ é dọ́ boo Gbele Bábìlọ̀ní, sõò è nyímà kọọ̀ náa é bọọgẹ̀ tú gbele tṍó. (Kùùà 18:10, 21) Jìhóvà beè zìgà kọ àé ‘fulìè gã́bug deè’ e pọ̀b kpo tã̀àgã̀a é tõ̀òmà naamá kpulu naa ní e “gbò e a beè sà” nè kà kà bõ̀ònaló fã̀ ful zelí bá. (Máàk 13:19, 20) Sõò éé ní e Jìhóvà é kọ́ é naá mm̀ gbò tṍó pọ̀b kpo tã̀àgã̀a tẹlẹ tṍó bé Amagẹ́dọ̀n ẽ?
KILSĨ́ GÈ FÃ̀ JÌHÓVÀ MM̀ KÀ KÀ
6. Dõòna kà éé ní eé náa mm̀ ge zogè kọọ̀ née dṹùnà kyáá fã̀ ẽ?
6 Dì belí bé e beè nó mm̀ na kpò nònù ea kil nvéeá naaá, Jìhóvà gbĩ́ kọọ̀ pá a gyóòlo á kpòòlà lóó lọl ló kyáá fã̀. Sõò níì áá gè kpoolà lóó lọl ló kyáá fã̀ níí eé náa ẽ́ nì. Èé íè ge beeláfùl ge fã̀ Jìhóvà mm̀ sĩ́deè ea léémáe. Èé zẹ́ẹ́ ló sọ́l boo bàà kà sĩ́deè eé láá naamá vó.
Naanii mè née é gbẹ́mà nvée ge olòó bõoná, kọbèè mm̀ tàvàlà tṍó (Ẹ̀b 7 kpò) *
7. (a) Mósĩ́ deè ní eé láá palàge tõó boo gbò kpãà lé lab dògò Jìhóvà ea õoà ẽ́? (b) Éé ní ea náa vaá kpá Híbrù 10:24, 25 à kọ é olòó bõonáé, vaá éé ní ea palàge dì bíi kátogóí é?
7 Túá kà, èé íè ge olòó tõó boo gbò kpãà lé lab dògò Jìhóvà ea õoàa. Née é zigà ge tú lóó gbá ló dùm pá bàlà booí e bè náa õoà. Dì belí nu dòòmà bá, née é zigà ge bã mm̀ dùm kúnàgã̀ mm̀ tọ́ọ̀ sĩ́deè, àbèè ge nvèè sãa kúm kọọ̀ págbálà nè págbálà àbèè pábia nè pábia é láá ilá, nè ge kọọ̀ págbálà kuná págbálà àbèè kọ pábia kúná pábia. (Máát. 19:4, 5; Róm̀ 1:26, 27) Ní ea égè bàà kà, èé íè ge olòó zọ̀ pá vígà bõoná fã̀ Bàrì. È ólò naa vó gbẹá kọ̀láá kiẽ́e e láà bõoná, kọbèè Kíndòm Họ́ọ̀l àbèè tọọ̀ neǹ vígà àbèè ge gũá sẹlẹ nònù. Kọ̀láá íb nu ea nááá, née é láá òòà aa ló gè olòó sí nònù. Kàsĩ́, è íè bíi ló gè olòó bõoná naa ní eé “kpáá palà ge nvee kpóó ló ene, tã́gíní bé e [nyímà] kọ Dee e bẹẹ Dõò é dú a íná ku ló.”—Bugi Híbrù 10:24, 25.
8. Mósĩ́ deè ní e bẹẹ lẹ̀ẹ̀là tóm é láá nyaaá dì deè sĩ́é?
8 Tṍó e pọ̀b kpo tã̀àgã̀ é dú, nyààa é láá bã ló kpẹ̀a e gé vee. Kátogóí, è gé vee lé kpẹ̀a ea kil ló Boǹ Méné Bàrì vaá pììga boo gè naa kọ gbò nen á nyoone nvéè Kráìst. Sõò tṍóá, èé láá vee kpẹ̀a ea palàge agabá. Kpá Káí tú níí doolé ló gbele báa-báà múú ea nyee belí kpò dem. (Kùùà 16:21) Èé láá vee kọọ̀ bàlà boò Sétàn é gé ié kyọ̀àsĩ́. Tṍóá ní eé palàge nyimá ló íb kpẹ̀a eé kọ́ nè bé eé vee naaé. É kọ bá e gé kọ́ọ́má kpẹ̀a vaá noòmà nuù gbò nen mm̀ nu ea é sígá ló enè tõ̀ò gbááí ní eé kọ́ọ́má kpẹ̀a tṍóá ẽ́? Sẹ̀ èé tú dõòna kà bá vèèmàe? Née nyímà. Sõò kọ̀láá íb bá e kọ́ọ̀mà, à bélí kọọ̀ èé íe nèà dee gè tú agẹló kọọmá lẹ̀ẹ̀la bel Jìhóvà!—Èzí. 2:3-5.
9. Kpóó ea gé bẹl bàlà booí é beè láá labví láb kilma ló bẹẹ tóm naa vàẹ, sõò éé ní eé láá àgala boo é?
9 Be à sẹlẹ, bẹẹ lẹ̀ẹ̀là tóm é biile nyíè gbò e bà gé bẹl bàlà boo vaá bàé gbóó gbĩ́ gè kùb bẹẹ tóm. Dì belí bé e gé dẹẹ̀a boo nvèè bá Jìhóvà mm̀ bẹẹ sìtóm kọ̀ kpẹ̀a kátogóí naa, èé beè íe bíi ló a nvèè bá tṍóá nagé. Èé láá àgala boo kọọ̀ beélè Bàrì é néi kpóó gè láá naamá a bùlà.—Máí. 3:8.
DI KPÈNÀ LÓ NYÒÒMÀ NÀÀ UÚ BOO EA É DỌ́ BOO GBÒ GYÓÒLO BÀRÌ
10. Dì belí bé e kpá Lúùk 21:25-28 kọ́ naa, mósĩ́ deè ní e gbò nen é lábví láb nyòòmà gbò nú ea é nááá tṍó pọ̀b kpo tã̀àgã̀ ẽ?
10 Bugi Lúùk 21:25-28. Tṍó e pọ̀b kpo tã̀àgã̀ é nááá, àé bọọ́ ló gbò nen ge mòn tṍó e gbò nú e ba beè dòòmà kọọ̀ àé di lee mm̀ bàlà booí gé kyọasĩ́. Bàé di mm̀ gbele kpóó ló “bùlà,” vaá siiá pọ̀ kọ bàé fẹ́ẹ̀va mm̀ kà tàvàlà tṍóí mm̀ nòòtẽ́ gbò není. (Zèf. 1:14, 15) Tṍóá, dùm é palàge tavala ló gbò nen, kọbèè gbò gyóòlo Jìhóvà. Boo béè kọ née dṹùnà nakà bàlà booí, èé tení bá tàvàlà ditõ̀ò. Be à sẹlẹ née é íe dénè nú e íè bíi ló gè tõ̀òma dùm.
11. (a) Éé ní ea é náa kọọ̀ gbò e bà gé bẹl bàlà boo á kììlà sĩ́ kpee Gbò Neǹ Ditõ̀ò Jìhóvà ẹ? (b) Éé ní ea náa vaá náa dú bíi kọ é siiá pọ̀ ló pọ̀b kpo tã̀àgã̀ ea gè dúí é?
11 Sìgà tṍó, àé láá dú kọọ̀ gbò e ba beè kyọ̀sĩ́ ba bõ̀ònaló fã̀ é láá palàge bã̀ súng boo béè kọ bà náa kyọsĩ́ bõ̀ònaló Gbò Neǹ Ditõ̀ò Jìhóvà. Bàé náa kọọ̀ dõòna gbò á nyimá bé e sùng gé bãè va naa, dì belí gè kọ́ tenmá boo íntanèt. Gbò e bà gé bẹl bàlà booí bii ló Sétàn ea dú ba neǹ togó, é ọ́bvíi boo béè kọọ̀ áá beélè bõ̀ònaló fã̀ ní e bà náa beè kyọ̀sĩ́é. Bà gáà kyọ̀gàlà sĩ́ dénè bõ̀ònaló fã̀ lọl boo kunukẽ̀í dì belí bé e ba beè noo naa. Vóà naa, bàé gbóó kììlà sĩ́ kpeéi. Tṍóá, gbò e bà gé bẹl bàlà booí é gbóó naa nú ea é túva naamá Gọ́g ea aa boo kunukẽ̀ Mégọ̀g. * Bàé bõoná vaá tú dénè ba kpóó naamá uú boo gbò níí Jìhóvà. (Èzí. 38:2, 14-16) Èé gbóó láá dààmà togó gè bugi togó boo nú ea é nááá tṍó pọ̀b kpo tã̀àgã̀, bọọ èlmà tõ̀ò, boo béè kọọ̀ née nyímà kà lèlà bé ea é nááá naa. Kọ̀láá bé ea dì naa, èé láá àgala boo kọọ̀ náa dú bíi kọ é siiá pọ̀ ló pọ̀b kpo tã̀àgã̀ ea é gé naaáí. Jìhóvà é néi gbò dùùlà bá deè tṍ ea é náa kọ é fùl zelí bá. (Ps. 34:19) Èé láá gboó ‘elá vaá è dalà dẽe boo’ boo béè kọ è nyímà kọọ̀ bẹẹ “dùùà a íná ku ló.” *
12. Mósĩ́ deè ní e gyóòlo “e a nyímá nu vaá bọ́ ló dẹ̀lẹ̀ nyíe boo” á dì ea gé kpóògèi dee ló nyòòmà gbò nu ea é nááá dì deè sĩ́é?
12 Gyóòlo “e a nyímá nu vaá bọ́ ló dẹ̀lẹ̀ nyíe boo” á dì ea gé kpóògèi dee ló kọbé è láá ful zelí bá pọ̀b kpo tã̀àgã̀ ea gé dú sĩ́ mm̀ bọ́ọ̀ló dẹ̀lẹ̀ nyíé boo. (Máát. 24:45) À dú gè naa níí mm̀ gã́bug sĩ́deè, sõò ene kà nu dòòmà bá dú tení dú ló bẹẹ gbò pọ̀b kà bõ̀ònaló e beè sí mm̀ gbò gbáá 2016-2018 na. Gbò lòbèl ea beè nea mm̀ gbò bõ̀ònalóá beè sièi kpóó ló kọ é agẹlẹ ló bẹẹ gbò kpãa e íè bíi ló tṍó e deè Jìhóvà ni íná kulóí. Naanii mè é zẹ́ẹ́ tú ńkem̀ tṍó tenmá boo gbò kpãaí.
KILSĨ́ GÈ SIÈ KPÓÓ LÓ O BỌ́Ọ̀LÓ DẸ̀LẸ̀ NYÍÉ BOO, Ĩ̀ÌMÀ, NÈ AGẸLÓ
Kpoogá dee ló nyòòmà ge fùl zelí bá ‘pọ̀b kpo tã̀àgã̀a” (Ẹ̀b 13-16 kpò) *
13. Mósĩ́ deè ní eé láá siè kpóó ló bẹẹ bọ́ọ̀ló dẹ̀lẹ̀ nyíé boo kilma ló Jìhóvà ẹ, vaá éé ní ea náa èé náa vó kátogóí é?
13 Bọ́ọ̀ló Dẹ̀lẹ̀ Nyíe Boo: Togó bel bõ̀ònaló ea beè sẹ̀ẹ̀a mm̀ gbáá 2016 na beè kọ̀là “Kilsĩ́ Gè Olòó Bọ́ló Dẹ̀lẹ̀ Nyíé Boo nè Jìhóvà!” Nakà bõ̀ònalóí beè noomài kọọ̀ ge ié lé gbaa ló kilma ló Jìhóvà é náa kọ é láá bọ́ló dẹ̀lẹ̀ nyíé boo kìlmàé ló. A beè kẽeé nyíe nagé kọọ̀ èé láá tõo bã ló Jìhóvà tení dú ló gè tã̀àgã̀é ló lọa mm̀ bẹẹ nyíe nè ge tú àgẹ bá noomá Kpá Káí. Ge naa vó é nveè bá nèi kọ é láá emá kà tàvàlà ẹ̀bmà ea élaí sĩ́. Boo tṍó e bàlà boò Sétàn é gé iná kùbmàí, èé ẹbmà dẽe kọọ̀ bẹẹ bọ́ọ̀ló dẹ̀lẹ̀ nyíé boo kilma ló Bàrì nè a Boǹ Méné é kpáá palàge bã kèbá ẹ̀bmà. Gbò nen é kpáá kilsĩ́ gè olòó nvèèmài lẹ́. (2 Pít. 3:3, 4) Ene kà nú ea náa vaá bàé náa vó dú kọọ̀ née nveè sãa kúm tọ́ọ̀ kà nu ea di mm̀ bàlà boò Sétàní. À bọ́ló kọ é siè kpóó ló bẹẹ bọ́ọ̀ló dẹ̀lẹ̀ nyíé boo kátogóí, kọbé è láá bọ́ló dẹ̀lẹ̀ nyíé boo tṍó pọ̀b kpo tã̀àgã̀.
14. (a) Mókà nyààa ní ea é bã́ kẽ kilma ló gbò e bà gé túlèi boo kunukẽ̀í ẽ́? (b) Éé ní ea náa vaá àé dú bíi kọ é bọ́ló dẹ̀lẹ̀ nyíé boo tṍóá ẽ́?
14 Tṍó pọ̀b kpo tã̀àgã̀, nyààa é bã́ kẽ kilma ló gbò vígà e bà gé túlèi boo kunukẽ̀í. À íe tṍó ea é beè dú gè bõonè ló dénè gbò e Bàrì beè tṍ nóo ból e bà di dí boo kunukẽ̀í kilma káála naa ní e bàé dõonà tõ̀ò ló bé Amagẹ́dọ̀n. (Máát. 24:31; Kùùà 2:26, 27) Níí tõó dọ̀ kọọ̀ Gbò Ge Tulè Tóm náa é dina boo kunukẽ̀í. Sõò ge bõonè ló gbele gã́bug nená é kilsĩ́. Gbò gbálà e bà sim tùlà e bà dṹùnà na gònò naanà bólá ní e bàé túlèi é. Èé zógè kọ è bọ́ẹ̀ ló dẹ̀lẹ̀ nyíé boo kilma ló Jìhóvà tení dú ló gè gbànva tṍ ló vaá nyoone nvéè tùle e bà íe lọl bá Bàrì. Èé íè ge nyoone nvéè ba tùle be è gbĩ́ì gè dùùà!
15. Mósĩ́ deè ní eé láá siè kpóó ló bẹẹ gè íe ĩ̀ìmàe, vaá éé ní ea náa vaá à palàge dú bíi kátogóí é?
15 Ĩ̀ìmà: Togó bel bõ̀ònaló ea beè sẹ̀ẹ̀a mm̀ gbáá 2017 na beè kọ̀là “Lóó Ni Á Gá Ọọ!” Nakà bõ̀ònalóí beè sièi kpóó ló kọ é ié ĩ̀ìmà kèbá tã̀àgã̀. E beè nó kọọ̀ bẹẹ gè ié ĩ̀ìmà náa dẹẹ̀a boo tṍó e dìtõ̀ò leéi ló. Èé íè ge siè kpóó ló bẹẹ gè ié ĩ̀ìmà tení dú ló gè dọ̀ bẹ̀là Jìhóvà. (Róm̀ 12:12) Naanii mè nú e Jíízọ̀s beè zìgà náa é táí nyíe, ea kọ́ọ̀: “Bàrì é duulà kọ̀láá nen e a ĩimà tẹlẹ kùbmà.” (Máát. 24:13) Nakà zìgànùi kọlà kọọ̀ èé íè ge bọ́ló dẹ̀lẹ̀ nyíé boo kèbá kọ̀láá kà ẹ̀bmà ea élaí sĩ́. Be à gá náa vaá è ĩ̀ìmà kèbá dénè bẹẹ tã̀àgã̀ kátogóí, bẹẹ zìgà é agaló besĩ́ pọ̀b kpo tã̀àgã̀ kálá dààmà togó.
16. Éé ní ea ólò naa kọọ̀ é ié agẹló é, vaá mósĩ́ deè ní eé láá siè kpóó ló bẹẹ gè ié agẹló kátogóí é?
16 Agẹló: Togó bel bõ̀ònaló ea beè sẹ̀ẹ̀a mm̀ gbáá 2018 na beè kọ̀là “Ié Àgẹló!” Gbò lòbèl ea beè nèà gbẹá bõ̀ònalóá beè nvèè bá nèi kọ é kẽ̀èa boo kọọ̀ née íè agẹló boo béè gbò nú e beele é láá naa. Dì belí gè ié ĩ̀ìmà , è ólò ié kà kà agẹló tení dú gè dọ̀ bẹ̀là Jìhóvà. Mósĩ́ deè ní eé nó gè kpáá palàge dọ̀ bẹ̀là Jìhóvà ẹ? Tení dú ló gè bugi Kpá Káí buù dee nè ge bugi togó boo sĩ́deè e Jìhóvà beè dùùlà pá a gyóòlo deè kéléá naa. (Ps. 68:20; 2 Pít. 2:9) Tṍó e gbò e bà gé bẹl bàlà booí é dú gé naa uúí boo tṍó pọ̀b kpo tã̀àgã̀, èé íé bíi ló agẹló nè ge dẹlẹ nyíé boo Jìhóvà èlmà bé e beè olòó naa. (Ps. 112:7, 8; Híb. 13:6) Be è dẹẹ̀a boo Jìhóvà kátogóí, èé láá íe agẹló tṍó e Gọ́g é náa uúí boo. *
KILSĨ́ GÈ Ẹ̀BMÀ DẼÈ O DÙÙÀ
Jíízọ̀s nè pá a gbò bé e bà di káála e pọ́ì ńkem̀ tṍóá la bàé gé tú bé Amagẹ́dọ̀n kyọ̀ọ̀mà sĩ́ gbò ọ́b Bàrì! (Ẹ̀b 17 kpò)
17. Éé ní ea náa vaá née é sííá pọ̀ ló bé Amagẹ́dọ̀n ẽ? (Ẹ̀b fùtó ea di boo kóó.)
17 Dì belí bé e ã́àa nó mm̀ nakà kpò nònù ea kil nvéeá naa, gã́bug bẹ̀ì beè mea mm̀ gbò dee e tṍó e gé tàí. Sõò è ẹbmà nàgé dẽe gè fùl zelí bá pọ̀b kpo tã̀àgã̀a. Bé Amagẹ́dọ̀n ní ea é nveè kùbmà ló nakà bàlà booí é. Kọ̀láá bé ea dì naa, née é sííá pọ̀ ló tọ́ọ̀ kà nu. Ló éé? Boo béè kọọ̀ níà bé Jìhóvà vaá beele née é bé-bé. (Pró. 1:33; Èzí. 38:18-20; Zèk. 14:3) Tṍó e Jìhóvà é ne gã́, Jíízọ̀s Kráìst é gbóó faalá gbò bé Bàrì siimá ól bé. Gbò e Bàrì beè tṍ nóo ból e ba beè kẽ̀èà aa kemà ú bií ló gã́bug gãà gbò nyómá tóm é díé ló. Bàé gbá bé Sétàn, pá a gbò zọ, nè pá a gbò bé e bà di boo kunukẽ̀í.—Dán. 12:1; Kùùà 6:2; 17:14.
18. (a) Éé ní e Jìhóvà beè zìgà ẹ? (b) Mósĩ́ deè ní e kpá Kùùà Nù 7:9, 13-17 nveè bá nè olo kọ ó gá ié bàà-bàà bùlà kilma ló o ból dẽe sĩ́ nyòòmà dì deè sĩ́é?
18 Jìhóvà beè zìgà nèi kọọ̀: “Tọ́ọ̀ kà nuù bé e bà noo nyòòmà ni náa gé íé ni kóí ló.” (Àìz. 54:17) “Gbele gã́ bug nen” e bà dú gbò gyóòlo Jìhóvà e bà bọ́ló dẹ̀lẹ̀ nyíé boo é “ful zelí bá gbele kpóó ló tã̀àgà.” Tṍóá bàé gbóó kilsĩ́ gè olòó fã̀e. (Bugi Kùùà Nù 7:9, 13-17.) Kpá Káí néi gã́bug nu ea náa kọ é àgala boo kọọ̀ èé duuà! È nyímà kọọ̀ “Jìhóvà ólò kpènà pá a gbò e bà bọ́ló dẹ̀lẹ̀ nyíé boo.” (Ps. 31:23) Nyíè kọ̀láá nen ea vulè vaá lèèlà Jìhóvà é ẹ́ẹ́ ló gè mòn tṍó ea bée é dí káí.—Èzí. 38:23.
19. Mókà lé dì deèsĩ́ ní e gé élá bànà ẽ?
19 Zẹ́ẹ́ bugi togó boo bé e bà gáẹ̀ láá nyaaná bá ló gbò moǹ bel ea di mm̀ 2 Tímotì 3:2-5 naa be à gá náa vaá bà géè ló nyòòmà gbò e bà di mm̀ ãa bàlà boo e Sétàn á géá. (Ẹ̀b ńkpó ea togó bel kọ́ọ̀ “ Bé E Gbò Nen É Tõó Dùm Naá Tṍóá.”) Vígà George Gangas, * ea beè dũunà Gbò Ge Tulè Tóm, beè baatẽ́ kọọ̀: “Ẹ̀b bé e nakà bàlà booá é dú lé naaà be dénè nen beè fã Jìhóvà! Pọ́ì ńkem̀ tṍó àla, òó íe nèà dee ge tõó dùm mm̀ ãa bàlà booá. Òé dí dùm lee mm̀ begẽ̀ dẽè tṍó e Jìhóvà dì. Èé tõó dùm dọ̀ọ̀mà dèdè.” Níà ẹ̀b dẽesĩ́ ea dú dũ̀ùnè!
SỌ́L EA GÃ́BUG DÚ 122 Elá Àgàlà, Ó Gá Kpọ̀gà
^ par. 5 È nyímà kọọ̀ dénè nen é gé tení bá ‘pọ̀b kpo tã̀àgã̀’ pọ́ì ńkem̀ tṍó àla. Éé ní e níá é kọlà kilma ló gbò gyóòlo Jìhóvà tṍóá ẽ́? Éé ní e Jìhóvà é gbĩ́ kọ é naa tṍóá ẽ́? Mókà gbò kpãa ní e íe bíi ló gè ié kátogóí kọbé è láá bọ́ló dẹ̀lẹ̀ nyíé boo tṍó e pọ̀b kpo tã̀àgã̀ é dú é? Èé dã́ ààla ea kuu gbò bíbví mm̀ nakà kpò nònùí.
^ par. 3 GE BAATẼ́ MOǸ BEL: Christendom gé lóá nyòòmà gbò bõ̀ònaló fã̀ e bà kọ́ọ̀ bà gé nyoonèè nvéè Kráìst, sõò bà náa nóòmà gbò nen kọ bàá tõó boo gbò kpãà Jìhóvà.
^ par. 11 GE BAATẼ́ MOǸ BEL: Tã́á bel ea kọlà Gọ́g ea aa boo kunukẽ̀ Mégọ̀g (vaá a ńkpulu bá gè kolmáe ea kọlà, Gọ́g) gé lóá bel nyòòmà gbò dó e bà bõoná vaá naa uú boo gbò e bà gé fã Jìhóvà tṍó pọ̀b kpo tã̀àgã̀.
^ par. 11 Be ò gbĩ́ì ge dã́ gã́bug nú ea kil ló gbò nú ea é nááá besĩ́ì bé gím Amagẹ́dọ̀n kálá dààmà togó, bugi 21 togó bel mm̀ kpá ea kọlà God’s Kingdom Rules! Be ò gbĩ́ì ge dã́ nú ea kil ló nàà uú boo ea aa bá Gọ́g ea aa boo kunukẽ̀ Mégọ̀g bọ̀ọ̀vè nè bé e Jìhóvà é kpenà pá a gbò naá tṍó Amagẹ́dọ̀n, bugi 17 nè 18 togó mm̀ kpá ea kọlà Pure Worship of Jehovah—Restored At Last!
^ par. 16 Togó bel pọ̀b kà bõ̀ònaló 2019 ea kọlà “Vulà Náa Íe Ke Kùbmà!” náa kọ é àgala boo kọọ̀ èé kilsĩ́ gè di mm̀ kpènà ea aa bá Jìhóvà ea vulèiá.—1 Kọ́r. 13:8.
^ par. 19 Bugi togó boo bel ea kọ́ọ̀: “His Deeds Follow Him” Watchtower e ba beè emí mm̀ December 1, 1994.
