BUÙ gbááí, bà ólò kpáá tú gã́bug gbò e ba beè kpò nvee mm̀ bõ̀ònatõ̀ò. Dòòmà dẽe ló íb ‘ṍò kààgà’ ea é dí káála tṍó e buù nen oòa kẽ! (Lúùk 15:7, 10) Be ba beè kpáá tú ni nvee mm̀ bõ̀ònatõ̀ò, àgala boo kọọ̀ nyíè Jíízọ̀s, gbò nyómá, nè Jìhóvà palàge ẹẹ kọ ò kpáà òòa kẽ bã mm̀ bõ̀ònatõ̀ò. Sõò, à íe gã́bug nu ànà-ànà eo é kpeesĩ́ ló tṍó eo gé kpáá sí tóm ló o gbaaló kilma ló Jìhóvà. Níà mókà gbò ànà-ànà ẽ, vaá éé ní ea é láá nvèè bá nè ni ẽ́?

Gã́bug gbò e ba beè kpáá tú nvee mm̀ bõ̀ònatõ̀ò ólò láá kpáá ié tã̀àgã̀ bùlà. Be à sẹlẹ àé láá tọá ní ló belí bé ea beè tọá ló Méné Dévìd naaá. Bã̀àna tṍó e Bàrì ia ló a náàkyọ̀ nèe, a beè kọọ̀: “Nà náàkyọ̀ elím kẽ́é.” (Ps. 40:12; 65:3) Tṍó e nen ni kpáá òòa kẽ dú ló Jìhóvà, àé láá kilsĩ́ gè ié tã̀àgã̀ bùlà nè sììà kẹ́ẹ mm̀ gã́bug gbáá. Isabelle, e ba beè kpóe mm̀ nú ea é láá sigá ló 20 gbáá beè kọọ̀, * “A beè palàge tàvàlàḿ ló gè zìgà kọọ̀ Jìhóvà é láá ia ló nèm.” Beè lóó ni ọọ, o gbaaló kilma ló Jìhóvà é láá kpáá ọọ ló. (Pró. 24:10) Ógá zìgà kọọ̀ níá á naaá ní ló.

À ólò tõó ló sìgà gbò kọ bà náa é láá naa nàè nú ea dú bíi gè naa mm̀ ge kpáá siè tóm ló ba gbaaló kilma ló Jìhóvà. Tṍó e bà kpáá tú Antoine nvee mm̀ bõ̀ònatõ̀ò, a beè kọọ̀, “Kọ̀láá kà nú em beè nò vaá nyimá tṍó em beè di-dí mm̀ bõ̀ònatõ̀òa a tám nyíe.” Ge bugi togó naa vó, é láá naa kọọ̀ sìgà nen á gá pììgà bé ea kpóó sim tùlà naa gè sí tóm nè Jìhóvà.

Dì belí nu dòòmà bá, lóó nen e tù múú beè kyọ̀sĩ́ a be ea palàge leemáe é láá ọọ tṍó ea  bugi togó boo gã́bug tṍó nè kói ea é bãàa mm̀ ge kpáá sí tóm ló. Mm̀ tẽ̀ènè sĩ́deèá, beè agẹbá pọ́lọ́ beè kyọ̀gàlà o gbaaló kilma ló Jìhóvà, àé láá tõó ní ló kọọ̀ ge kpáá sí tóm ló o gbaaló kìlmàé ló é bĩ́íná gã́bug tóm nè kói. Sõò è íè neǹ nvèè bá.

Jìhóvà kólíi kọọ̀: “Dui mè èé kpóògè dee ló tã̀àgã̀ ea dìí zẹ̀ẹ̀.” (Àìz. 1:18) Jìhóvà vulè ni boo béè kọọ̀ o piigà ge kpoogè dee ló “tã̀àgã̀ ea dìí zẹ̀ẹ̀.” Nyimá kọọ̀ boo béè kọ ò náà vó, Jìhóvà íe nú ea é élá boo aamá bel gã́ Sétàn!—Pró. 27:11.

Ge kọ ò kpáà bã mm̀ bõ̀ònatõ̀ò, tõó dọ̀ kọọ̀ ò gbĩ́ gè tõo bã ló Jìhóvà, vaá à zigà kọ àé tõonìè bãè ní ló. (Jém̀z 4:8) Sõò, níì áá gè naa kọọ̀ dõòna gbò á nyimá kọ o ooàẹ̀ kẽ bã mm̀ bõ̀ònatõ̀ò ní eo é náa ẽ́ nì. À dú bíi kọ ó kilsĩ́ gè agẹlẹ ló vulè eo íè kilma ló o Tẹ̀ nè o Kóò, ea dú Jìhóvà. Mósĩ́ deè ní eo é láá naa vó é?

Pììga boo gè noo gbò nu sẹ̀ẹ̀a sĩ́ eo é láá teá tùlà. Kẽ̀èa boo kọọ̀ gbò nú eo beè nò ea kil ló Jìhóvà nè gbò a zìgànù ea kil ló dì deèsĩ́ dì bé ea beè dì naa. Sõò à dú bíi kọ ó kpáá naa gbò nú e pá vígà gé náa, dì belí gè olòó kọ́ kpẹ̀a, sí nònù, nè ge zọ̀ pá vígà naaá nu. Bugi togó boo dõòna kà gbò nú eo é láá naa.

Olòó tãagã ló Jìhóvà. O Tẹ̀ dã́tẽ́ ló kọọ̀ ge olòó bẽgẽ̀ bel o bá ea kil ló pọ́lọ́ eo beè sì é láá naa kọ á tàvàlà ní ló gè tãagã̀èé ló. (Róm̀ 8:26) Kọ̀láá bé ea dì naa,“tãàgai ló Bàrì lee,” kọ́ nèe bé ea tan ni gè bã̀ààe kóò naa. (Róm̀ 12:12) Andrej kọ́ọ̀: “Kẹ́ẹ beè palàge siím vaá bugím à bẽgèm bel. Sõò à ólò kil kẽ kọ̀láá tṍó em tãàgã ló Bàrì lọ̀l. M̀ ólò kpáá ié dĩ̀ìnè ló bùlà.” Be nóo nyímà nu eo é tãàgã ló Bàrì kilma ló, kẽ̀èa boo tã̀àgã ló Bàrì e Méné Dévìd beè tã̀àgã̀ tṍó ea ọ́gá ea di mm̀ kpá Psalms 51 nè 65.

Olòó nó Kpá Káí. Níí é nveè bá naa kọọ̀ gbaaló nè vulè eo íè kilma ló Jìhóvà á kpáá bọọ dọ ló. (Ps. 19:7-11) Felipe beè kọọ̀, “Ge kọ ním beè ié nòònù ge bugi Kpá Káí ní ea beè naa kọ lóóm á ọọ vaá m̀ dọ̀ aa nvéè Jìhóvà ẹ. Ním beè gbĩ́ gè kpáá ié ná lọ̀á, boo béè vó, m beè gbóó beeláfùl ge olòó nó Kpá Káí boo nà lóó.” Olo é láá naa nagé vó. Be ò íè bíí ló nen ea é nveè bá kọ́ togó bel eo é nó nè ni, kọ́ nè o kóò ea íe lé gbaaló kilma ló Jìhóvà kọ á nveenìè bá neè ni.

Kpáá sí tóm ló gbaaló eo íè kilma ló pá vígà. Sìgà gbò e bà kpáá òòà bã mm̀ bõ̀ònatõ̀ò ólò ié bùlà kọọ̀ dõòna gbò é tú pọ́lọ́ dẽe ẹbmàè va. Larissa beè kọọ̀: “Kẹ́ẹ beè palàge siím. A beè tõo ḿ ló belí kọọ̀ m̀ kẹlẹ̀ pá vígà. A beè tõo ḿ ló naa vó mm̀ gã̀bug gbáá.” Agala boo kọọ̀ gbò kànen nè pá vígà di kpènà ló gè nvèè bá nè ni kọ ó kpáá ié lé gbaaló kilma ló Jìhóvà. (Ẹ̀b ńkpó ea kọ́ọ̀ “ Éé Ní E Gbò Kànen É Láá Naa Ẽ́?”) Nyíé va palàge ẹẹ kọ ò oòa kẽ, vaá bà gbĩ́ kọọ̀ nyíé ni á ẹẹ nagé!—Pró. 17:17.

Éé ní ea é láá naa kọ ó tõo bã ló pá vígà ẹ? Zọ̀ pá vígà naa gbò nú e bà gé náa—ea dú gè olòó sí nònù nè ge kọ́ kpẹ̀a. Mósĩ́ deè ní e níí é láá nvèè bá nè ni ẽ́? Felix beè kọọ̀: “Pá vígà géè ẹ̀bmà dẽè tṍó em é kpáá òòa kẽ dù. Ba beè palàge vùlèm. Dénè ọ̀và beè nvèè bá nèm kọ ḿ kpáá dũunà pá vígà, nè ge naa kọ ḿ nyimá kọọ̀ Jìhóvà a ia ló nèm vaá m̀ḿ gbóó láá kilsĩ́ gè sí tóm nèe.”—Ẹ̀b ńkpó ea kọ́ọ̀ “ Éé Ní Eo É Láá Naa Ẽ́?”

Sétàn é kilsĩ́ gè naa nú ea é ọọvẹ ló o gbaaló kilma ló Jìhóvà. (Lúùk 4:13) Di kpènà ló gè agẹlẹ ló o gbaalo kilma ló Jìhóvà kátogóí.

Jìhóvà zigà nè pá a gbò naanà ból kọọ̀: “Nda é gbĩ́ gbò ní ea beè pè, nda é ooma kẽè gbò ní ea beè dagí, nda é lo kpálá ló gbò ní e kpóótọ́ va ééá, vaá siè kpóó ló gbò ní e lóó va ọọ.” (Èzí. 34:16) Jìhóvà a nveè bá nè gã́bug nen kọ bàá kpáá sí tóm ló ba gbaaló kilmàèé ló. Àgala boo kọ à gbĩ́ gè nvèè nàgé bá nè olo kọ ó ié kà lé gbaaló kìlmàèé ló.