Éé ní ea náa vaá ene kà gbálà e bà náa kolíe bée ea di mm̀ kpá Rúùt à kọọ̀ a iènù é ‘peelìèe’ be à ílìè Rúùt e? (Rúùt 4:​1, 6)

Mm̀ gbò tṍó e bà géè emí Kpá Káíá, beè nen ea beè ilí va ú tṍó ea gáà boǹ nvín, sìgà bíb ea dú bíi gè aalá dú vóí: Éé ní ea é nááá ló gbò kunukẽ̀ ea beè iéé? É kọọ̀ a bée é gbóó pè dọ̀ọ̀mà dè-dè? Log e Bàrì beè nè tenmá bá Mózìsa beè aalá gbò bíbví.

Éé ní ea beè olòó naaá ló nen ea ú gbẹẹ a kunukẽ̀, àbèè nen e nání bá náa kọ á oo a kunukẽ̀e? A vígà págbálà àbèè nen ea dṹùnàe ólò láá zalí kunukẽ̀a. Níí ólò naa kọọ̀ ìènùa á gbẹá mm̀ ba tọ.​—Lìv. 25:​23-28; Nóm. 27:​8-11.

Mósĩ́ deè ní e níí ólò naa kọọ̀ béè nen ea beè ùa á gá pèe? Béè nen ea beè ùa náa ólò pè beè a vígà págbálà ílí va ea beè ú gbẹẹá, dì belí bé ea beè naaá ló Rúùt naaá. Vígà nen ea beè ùa é láá ilí a va kọbé à bon nvín ea é sẹlẹ a bée vaá tú a gyọ́. Nakà lé nòònù ea kyãa mm̀ vulèí ólò nvèè nàgé bá nè vaà tãaá.​—Dìt. 25:​5-7; Máát. 22:​23-28.

Bugi togó boo nú ea beè naaá ló Nèómì. A beè iá ene kà gbálà ea kọlà Ẹ̀límelẹ̀k. Tṍó e gbálàí nè bàà kà a nvín págbálà ú, Nèómì náa beè ie ná tọ́ọ̀ nen ea é ẹb nú ea kilíé ló. (Rúùt 1:​1-5) Tṍó e Nèómì ooà iná Júdà, a beè kọ́ nè Rúùt ea dú vaà a nvín kọ á kọ́ nè Bóàz kọ á zalìè ba kunukẽ̀ naamá a ìènù. Bóàz nè Ẹ̀límelẹ̀k beè duá ló. (Rúùt 2:​1, 19, 20; 3:​1-4) Sõò Bóàz beè nyimá kọọ̀ à íe dõona nèn e Kpá Káí náa kol bée ea palàge dũùnà Ẹ̀límelẹ̀k elmàè ẹlẹ. Vó beè naa kọọ̀ á zẹ́ẹ́ sì gé bĩiná gbálàa be àé zálí.​—Rúùt 3:​9, 12, 13.

Túá ból, gbálà e Kpá Káí ‘náa kolíe béeí’ beè di kpènà ló gè nvèè bá. (Ruth 4:​1-4) Náa kal ló béè kọọ̀ àé túe sìgà nu bá, a beè nyimá kọọ̀ Nèómì náa é láá màn nà nvín ea é tú kunukẽ̀ Ẹ̀límelẹ̀k. Boo béè vó, kunukẽ̀a é gbóó du nágé níí gbálà e Kpá káí náa kolíe béeí, vóà naa, níí beè sẹlẹ ló belí kà lé pííla.

Sõò gbálàí beè nyaaná a bùlà tṍó ea nyímá kọọ̀ àé íè ge ilìè Rúùt be à zálìè kunukẽ̀a. A beè gbóó kọọ̀: “Ním é láá zalí boo béè kọọ̀ ńdáà ìènù é láá pèèm.” (Rúùt 4:​5, 6) Éé ní ea beè naa kọ á nyaaná bùlà ẹ?

IBeè gbálàí àbèè dõona nèn ílí Rúùt vaá à màn nvín págbálà, nvíná ní ea é tú ìènù Ẹ̀límelẹ̀k e. Mósĩ́ deè ní e níí é náa kọọ̀ “ìènù” gbálàí á ‘pèèe’ é? Kpá Káí náa kọ́, sõò nee sìgà nu ea beè láá naa kọ á kọ́ vóí.

• Túá kà, àé láá dú kọọ̀ kpègè ea beè zalmáá é peèe, boo béè kọọ̀ kunukẽ́ Ẹ̀límẹlẹ̀k náa é dú ńlẹ dọ̀ọ̀mà dè-dè. Nvín e Rúùt maná ní ea tùe.

• Ní ea égè bàà, ẹlẹ ní ea é ne gyã́á vaá ẹ̀b nú ea kil ló Nèómì nè Rúùt e.

• Ní ea égè taa, beè Rúùt man dõona kà gbò nvín nè gbálàá, bàé zọ pá a nvín dõ̀ònà a ìènù.

• Ní ea égè ténì, beè gbálàí náa íe nvín, nvín e Rúùt man nèeá ní ea é tú ìènù Ẹ̀límelẹ̀k nè ńlẹ́ẹ̀ ìènù ẽ. Vó é náa kọọ̀ a kunukẽ̀ á dú níí nvín ea é zigà béè Ẹ̀límelẹ̀k, e bè níì ńlẹ́ẹ̀ bée nì. Náa beè tàn gbálàí gè pee a ìènù boo béè ge nvèè bá nè Nèómì. Tãa vó, a beè sọ̀tọ́ deè kọọ̀ dõona nèn ea kuu nagé bá á zalí. Bóàz beè naa vó boo béè kọ a beè gbĩ́ kọọ̀ “béè gbálà ea beè ùa [á di] ló a ìènù.”​—Rúùt 4:10.

À dọa bàlà kẽ kọọ̀ gbálà e Kpá Káí náa kolíe béeí beè gbĩ́ gè kpènà a bée nè a ìènù. A beè ié dùm kùlù-kúlù. Sõò tãa vó ea bée di, a bée beè pè tá mm̀ nòòtẽ́ nómá. Náa beè ié nágé kele íb nèà deè e Bóàz beè iéá. Bée Bóàz di zẹ̀ẹ̀ mana-mana Jíízọ̀s Kráìst, ea dú Mèzáíà. Kà pọ́lọ́ nu beè sìlà aa m boo béè kọọ̀ dùm kùlù-kúlù beè naa kọọ̀ gbálàí á gá nvèè bá nè nen e bíi di ló!​—Máát. 1:5; Lúùk 3:​23, 32.