Éé ní ea beè naa kọọ̀ Jíízọ̀s á ló gbò moǹ bel Dévìd ea di mm̀ kpá Psalm 22:1 besĩ́ à kalá ù e?

Gbò bel ea di mm̀ kpá Máátìù 27:46 ea kọ́ọ̀: “Nà Bàrì, nà Bàrì, éé ní e a náa vaá ò ìàm̄ ló é?” beè di gbàà gbò dee deè nvéè bel e Jíízọ̀s beè lò tṍó ea é gé ù. Gbò bel e Jíízọ̀s lóí, beè mm-mè gbò bel e neǹ ọ́lì sọ́l Dévìd beè emí mm̀ kpá Psalm 22:1. (Máàk 15:34) Náa é bọ́ló gè bugi togó kọọ̀ Jíízọ̀s beè ló gbò belí boo béè kọ à túúmá kọọ̀ Bàrì kẹlẹ̀ẹ̀ẹ àbèè kọọ̀ náa beè ié ná zìgà tṍóá. Jíízọ̀s beè palàge dã́ ból ló nú ea náa vaá àé bọ́ló kọ á uè, vaá a beè di kpènà ló gè naa vó. (Máát. 16:21; 20:28) A beè nyimá nágé kọọ̀ Jìhóvà é tú kọ̀láá kà “gbọọ̀ kpènà” lọlìèé ló tṍó ea é gé uè. (Jóòb 1:10) Vó beè naa kọ Jìhóvà á sọ̀tọ́ deè kọọ̀ Jíízọ̀s á zogè kọ à íèè bọ́ọ̀ló dẹ̀lẹ̀ nyíé boo kèbá kọ̀láá kà dìtõ̀ò ea ú é náa kọ á tení bá.—Máàk 14:35, 36.

Vóà naa, éé ní ea beè naa kọ Jíízọ̀s á ló gbò bel ea di mm̀ kpá psalmí ẽ́? Náa kal ló béè kọọ̀ née nyímà kà lèlà nú ea beè naa kọ á kọ́ vó, èé ló bel boo sìgà nú ea beè naa kọ á láá kọ́ vó. *

É kọọ̀ gbò bel e Jíízọ̀s lóí zógè kọọ̀ à géè kọọ̀ Jìhóvà náa é kpegàẹ̀ deè a ú? A beè dú bíi kọọ̀ Jíízọ̀s á úí boo e Jìhóvà náa é nveè bá nèe. Jíízọ̀s beè di mm̀ nom̀ kpá ló nen vaá a beè dú bíí kọ á ù kọbé à láá “ú boo dénè nen.”—Híb. 2:9.

 Ge kọọ̀ Jíízọ̀s ló sìgà bel ea di mm̀ kpá Psalm 22 togó, é kọ à géè gbĩ́ kọọ̀ gbò nen á bugi togó boo dénè gã́bel ea di mm̀ kpá psalmá? A beè dú lóó nuù pá Júù ge olòó kọ́ gbò nú ea di mm̀ kpá psalm lọa togó. Be à gá náa vaá nen à kolí enè gã́bel ea di mm̀ kpá psalm, àé válí ló neǹ Júù gè láá kẽ̀èa boo dénè gã́bel ea di mm̀ togó bel e nená kolí gã́belá lọ̀l. Be à gá náa vaá níì nú e Jíízọ̀s géè gbĩ́ gè naaé, àé dú kọọ̀ a beè nvèè bá nè gã́bug pá a gbò nyòòne nvée e bà dú Júù kọ bàá láá kẽ̀èa boo gbò kọ́ọ̀ bùlà Bàrì ea di mm̀ kpá psalmí ea kọ́ nú ea kil ló gbò nú ea é nááá tṍó e ẹlẹ é úè. (Ps. 22:7, 8, 15, 16, 18, 24) Nagé, dee deè nvéè gã́bel ea di mm̀ kpá Psalm 22 togó, leelà Jìhóvà vaá kọọ̀ à dú méné boo dénè nen.—Ps. 22:27-31.

Ge kọọ̀ Jíízọ̀s ló gbò bel e Dévìd beè emíí, é kọ à géè kọọ̀ à gáà siè pọ́lọ́? Besĩ́ bà kálá fẹ́ẹ, ba beè beeláẹ bel ló vaá gbàẹ bel kọ à on Bàrì. (Máát. 26:65, 66) Ba beè tú gbala-gbala beemáe bel ló bílá dee, e náa beè gbaá ló nu e log ténmá. (Máát. 26:59; Máàk 14:56-59) Àé láá dú kọọ̀ Jíízọ̀s beè bĩiná bíbvá boo béè ge kììlà bùlà gbò nen nyòòmà ge kọọ̀ à gáà siè tọ́ọ̀ kà pọ́lọ́ ea gáẹ̀ naa kọ bàá fẹẹ̀ẹ.

É kọọ̀ Jíízọ̀s géè kẽeé va nyíe nagé kọọ̀ ge kọọ̀ Jìhóvà beè sọ̀tọ́ deè kọọ̀ Dévìd á mòn tã̀àgã̀ náa zógè kọọ̀ náa beè bọ́ló dẹ̀lẹ̀ nyíé boo? Bíb e Dévìd beè bĩináí náa zógè kọọ̀ náa beè iéná zìgà. Tṍó ea bĩ́íná bíbvá lọ̀l, a beè gbóó kọ́ bé ea dẹlẹ̀ẹ̀ nyíé boo kpóó Jìhóvà naa vaá Jìhóvà beè kilsĩ́ gè tãanèe dee bá. (Ps. 22:23, 24, 27) Mm̀ tẽ̀ènè sĩ́deèá, náa kal ló béè kọọ̀ Jíízọ̀s ea dú “Nvín Dévìd,” beè mòn tã̀àgã̀ boo té tã̀àgã̀, náa tõó dọ̀ kọọ̀ náa beè bọ́ló dẹ̀lẹ̀ nyíé boo.—Máát. 21:9.

É kọọ̀ Jíízọ̀s géè kọ́ bé e nyíée gé biilàẹ̀ naa gè kọọ̀ Jìhóvà tú A kpènà lọlìèé ló kọbé à láá zogè kọ à bọ́ẹ̀ ló dẹ̀lẹ̀ nyíé boo? Lọl dààmà togó, Jìhóvà náa beè noo kọọ̀ a Sã́áná é mon tã̀àgã̀ vaá ù. Tṍó e Ádàm nè Íìv lọl togó kèbá Jìhóvà lọ̀l ní ea beè gbóó dú bíi kọ Jíízọ̀s á ù e. Jíízọ̀s gáà si tọ́ọ̀ kà pọ́lọ́, sõò a beè dú bíi kọ á ù kọbé à láá aalá bíb e Sétàn beè bĩiná, nè ge tú a dùm zalmá nú e Ádàm beè peeá. (Máàk 8:31; 1 Pít. 2:21-24) Níí é láá valí áá tṍó e Jìhóvà tú a kpènà lọl ló Jíízọ̀s túá tṍó mm̀ a dùm.

É kọọ̀ Jíízọ̀s géè gbĩ́ gè nvèè bá nè pá a gbò nyòòne nvée kọ bàá nyimá nú ea náa vaá Jìhóvà à sọ̀tọ́ deè kọ á uè boo té tã̀àgã̀? * Jíízọ̀s beè nyimá kọọ̀ gè kọ àé úè boo té tã̀àgã̀ belí neǹ zib é láá sivè gã́bug nen. (1 Kọ́r. 1:23) Be à gá náa vaá pá a gbò nyòòne nvée à ká bùlà gbẹẹ́ boo kà lèlà nú ea náa vaá à ù, bàé nyímá nú ea ú tõó dọ̀. (Gàl. 3:13, 14) Vó é náa kọ bàá nyimáe ló naamá ba Neǹ Dùùlà níì neǹ zib nì.

Kọ̀láá kà bùlà e Jíízọ̀s beè ié ea náa kọ á ló belá, a beè nyimá kọọ̀ tã̀àgã̀ ea gé ténìè báá beè dú bùlà Bàrì. Pọ́ì ńkem̀ tṍó aa ló tṍó e Jíízọ̀s ló gbò bel ea di mm̀ kpá psalmí lọ̀l, a beè kọọ̀: “A tá!” (Jọ́ọ̀n 19:30; Lúùk 22:37) Ge kọọ̀ Jìhóvà zẹ́ẹ́ tú a kpènà lọl ló Jíízọ̀s, náa kọọ̀ Jíízọ̀s á láá naa dénè nú ea beè di boo dú boo kunukẽ̀í. A beè naa nagé kọọ̀ á láá mm-mè dénè nú e ‘Log Mózìs, Gbò Kọ́ọ̀ Bùlà Bàrì nè kpá Psalm’ beè kọ́ kìlmàé ló.—Lúùk 24:44.