TÃ̀ÀGÃ̀ bùlà é láá belí nyìè tò ea dìí nyíe. (Pró. 12:25) É kọ à íe tṍó eo beè ié tã̀àgã̀ bùlà? É kọọ̀ a beè tõo ní ló belí kọ nóo é láá ĩimà nàè? Beè vó, níì áá ọ̀ọ̀ nì. Àé láá dú kọọ̀ sìgà bẹ̀ì íè gbò e gé ẹb nu ea kil ló, nen e beè vùlè beè ù, búùló kyọ̀à sĩ́ nu beè naaáí ló, àbèè kọọ̀ è gé téní bá dõòna kà gbò dìtõ̀ò ea tãagẽ bẹẹ bug togó nè nom̀ kpá ló. Sõò éé ní ea é láá nvèè bá nèi kọ é bé èlbá tã̀àgã̀ bùlàẹ? *

Èé láá nó gã́bug nú ea kil ló bé eé láá bé èlbá tã̀àgã̀ bùlà naa tení dú ló gè bugi togó boo nu dòòmà bá Méné Dévìd. A beè tení bá gã́bug tàvàlà dìtõ̀ò, vaá sìgà tṍó a dùm beè di kèbá gẹẹ-gẹẹ ló. (1 Sám. 17:​34, 35; 18:​10, 11) Mósĩ́ deè ní e Dévìd beè láá bé èlbá a tã̀àgã̀ bùlàẹ? Mósĩ́ deè ní eé láá nó a nu dòòmà báẹ́?

Dévìd beè tení bá gã̀bug tã̀àgã̀ tẽ̀ènè tṍó. Dì belí nu dòòmà bá, bugi togó boo nu ea beè naaá tṍó ea géè teelá aa bá Méné Sọ́ọ̀l. Tṍó e Dévìd nè pá a gbò bé ooà aa dẽè bé iná tọ, a beè bọọ́ vá ló gè mòn kọọ̀ ba gbò ọ́b beè zìb ba gyọ́, tẹlẹ̀ sã́ ló ba tọ, vaá sii pá ba tọ ààmà. Dévìd beè labví láb naa vàẹ? “Dévìd nè gbò gbálà e bà dìé ló beè gbóó dààmà togó gè tò dọ̀ọ̀mà tṍó e bà náa íe na kóì ge toomá.” Ge naa kọọ̀ nyíè Dévìd á kpáá pagàge bììlà, gbò e ba beè dìé ló ea beè dẹlẹ nyíé booá beè “noo gè tobmàe dem.” (1 Sám. 30:​1-6) Taà kà tã̀àgã̀ e Dévìd beè tení bá tẽ̀ènè tṍó: Pá a tọ beè di kèbá gẹẹ-gẹẹ ló, pọ̀ beè siíe kọọ̀ pá a gbò bé é fẹ́ẹ̀ẹ, vaá Sọ́ọ̀l géè kpenèe nagé. Dòòmà dẽe ló bé ea beè láá tãagẽ bùlà Dévìd naa!

Éé ní e Dévìd beè naa ẽ́? Tẽ̀ènè tṍóá, a “beè ié kói tení dú ló Jìhóvà ea dú a Bàrì.” Dévìd beè naa níí naa vàẹ? Dévìd beè bàn Jìhóvà kọ á nveenìè bá neèe, vaá a beè bugi togó boo bé e Jìhóvà beè nveenìè bá neèe naa tṍó ea kil nvéeá. (1 Sám. 17:37; Ps. 18:​2, 6) Dévìd beè mòn kọ à dú bíi gè bàn tùle ea aa bá Jìhóvà, vo beè naa kọ á bĩiná Jìhóvà nu ea bọ́ló kọ á naanìè. Dévìd beè gbẹá boo labví láb tṍó ea íe tùle lọl bá Jìhóvà. Tã́áná dee bá ea aa bá Jìhóvà beè naa kọọ̀ pá a gbò nè ẹ̀ẹ̀ á láá tú pá ba tọ nè ba gbò gyọ́ òòma kẽ. (1 Sám. 30:​7-9, 18, 19) Ò nveè gé kpíí ló taà kà nu e Dévìd beè naa? A beè tã̀àga ló Jìhóvà kọ á nveenìè bá neèe, a beè bugi togó boo gbò nu e Jìhóvà beè naa nèe tṍó ea kil nvéeá, vaá a beè labví láb dẹ̀ẹ̀a boo tule e Jìhóvà née. Mósĩ́ deè ní eé láá nó Dévìd e? Bugi togó boo taà sĩ́deè eé láá naamá vó.

1. Tã̀àgã ló Bàrì. Èé láá bàn nvèè bá nè nyìmànù lọl bá Jìhóvà kọ̀láá tṍó e daamà togó gè ié tã̀àgã̀ bùlà. Bẹẹ tã̀àgã̀ bùlà é láá kil kẽ tṍó e kọ́ọ̀ dénè nú ea tọ́aí ló nèe mm̀ tã̀àgã ló. Àbèè kọọ̀ èé láá tã̀àgã̀é ló pọ́ì ńkem gbẹá mm̀ bẹẹ nyíe be níà bé e dìtõ̀ò tóólá naa ẽ́. Kọ̀láá tṍó e banì nvèè bá lọl bá Jìhóvà, è zógè kọ è dẹlẹ̀ẹ nyíé boo belí Dévìd ea beè kọọ̀: “Jìhóvà dú nà báà dem nè nà agẹbá ketõ̀ò gũ̀a nè nen ea ólò dùùlàm. Ńdáà Bàrì ní ea dú nà dem em ólò gũá deè e.” (Ps. 18:2) É kọọ̀ tã̀àgã ló Bàrì ólò nvèè gé bá? Ene kà vígà pábia ea dú neǹ gyà deèsĩ́ tóm ea bée kolà Kahlia kọ́ọ̀: “Lóóm ólò dĩ̀ìnà tṍó em tãàgã̀ ló Bàrì lọ̀l. Tã̀àgã ló Bàrì ólò nvèè bá nèm kọ ḿ bugi togó belí Jìhóvà, vaá naa kọ ḿ kpáá palàge  dẹlẹ́ẹ nyíé boo.” Mm̀ kà kà, tã̀àgã ló Bàrì dú dõ̀ònù ea aa bá Jìhóvà ea é nveè bá nèi kọ é bé èlbá tã̀àgã̀ bùlà.

2. Bugi togó boo. Tṍó eo bugì togó boo nu ea beè naaá ní ló, é kọọ̀ ò láà kẽ̀èa boo tã̀àgã̀ e áá nvèè bá ea aa bá Jìhóvà ní ea beè naa kọ ó láá bé èlbá ẹ́? È ólò ié dĩ̀ìnè ló vaá kpáá palàge dẹlẹ nyíé boo Jìhóvà tṍó e kẽèa boo bé ea beè nvèè bá nè beele bií ló pá a gyóòlo tṍó ea kil nvéeá naa. (Ps. 18:​17-19) Enè neǹ kànen ea bée kọlà Joshua beè kọọ̀: “M beè emí gbò nà tã̀àgã ló e Bàrì beè aalá. Níí ólò nvèè bá kọ ḿ kẽ̀èa boo gbò tṍó em beè bĩiná nu bá Jìhóvà vaá à aalá nèm.” Mm̀ kà kà, è ólò kpáá ié kói vaá bé èlbá tã̀àgã̀ bùlà tṍó e bugì togó boo bé e Jìhóvà beè nvèè bá nèi naa.

3. Labví láb. Èé láá gbĩ́ tùle lọl mm̀ Moǹ Bel Bàrì besĩ́ è kálá beeláfùl boo nú eé náa. (Ps. 19:​7, 11) Gã́bug nen a mon kọọ̀ tṍó e bà gbĩ́è tẽ́ ló nu ea kil ló enè kà dọ̀ Kpá Káí, à ólò nveenìè bá neè va kọ bàá kpáá palàge dãè tẽ́ ló bé e bàé túè siimàè tóm naa. Enè neǹ kànen ea bée kọlà Jarrod kọ́ọ̀: “Ge gbĩ́tẽ́ ló nu ólò nvèè bá nèm kọ ḿ dã́tẽ́ ló dénè gá ea di ló dò Kpá Káíá nè nú e Jìhóvà gé kọ́ nèm. Níí ólò naa kọ ḿ palàge dã́tẽ́ ló nu em bugi kọbé m̀ láá labví láb dẹ̀ẹ̀a boo a tùle.” Èé láá bé èlbá bẹẹ gbò tã̀àgã̀ bùlà tṍó e gbĩ́ì tùle lọl bá Jìhóvà vaá tõó boo.

Dévìd beè dã́tẽ́ ló kọọ̀ nvèè bá ea aa bá Jìhóvà dú bíi kọbé à láá beè elìè bá tã̀àgã̀ bùlà. Nyíée beè palàge ẹẹ́ ló nvèè bá ea aa bá Jìhóvà naa ní ea beè kọọ̀: “M̀ é láá dẽe gbọọ tení dú ló kpóó e Bàrì ném. Kà kà Bàrì ní ea tú kói nvèè ḿ ló belí kọ̀là ló é.” (Ps. 18:​29, 32) Bẹẹ tã̀àgã̀ é láá tõoí ló belí gbọọ̀ dem e nen náa é láá dẽe tení boo. Sõò tení dú ló nvèè bá Jìhóvà, èé láá bé kọ̀láá kà tã̀àgã̀ ea bélí gbọọ̀ demá èlbá! Mm̀ kà kà, tṍó e banì nvèè bá lọl bá Jìhóvà, bugi togó boo gbò nu ea ni náa nèi, vaá labví láb dẹ̀ẹ̀a boo a tùle, èé láá àgala boo kọọ̀ àé néi kói nè nyìmànù e íè bíi ló kọbé è láá bé èlbá tã̀àgã̀ bùlà!