Zíl dú “agẹbá nu e nen zigà kọ àé náànìè, e sìgà tṍó, à tú béè Bàrì nvee m naamá a neǹ ditõ̀ò.” Àé láá dú ní e nen kọ́ọ̀mà gã́ àbèè ge emí.

Sìgà nen é láá bugi togó kọọ̀ ge zilá zíl náa lelà boo béè kọ Jíízọ̀s beè kọọ̀: “Ó gá zilai zíl boo tọ́ọ̀ kà nu eo gbĩ́ì ge naanii . . . Áá ge kọ ó zigai nu eo é náanii vaá ò aalii ló ge zigai ní e bè nóo é náanii ní ea dú bíi é (e bè nóó zẹ́ẹ́ zilai zíl boo). Be níì vó nì, vaá ò kọ òó náanii gé íb ní e gbò nen é zigà kọ ò gé lói kà kà bel, ò nyímai kọọ̀ bá Pọ́lọ́ Nyómá a íná m.” (Máát. 5:​33-37) Jíízọ̀s beè nyimá kọọ̀ Log Mózìs beè tenmá kọ bàé láá zilá sìgà zíl, vaá gbò gyóòlo Bàrì e bà bọ́ló dẹ̀lẹ̀ nyíé boo beè zilá zíl. (Jén. 14:​22, 23; Ẹ́xọ. 22:​10, 11) À nyímá nágé kọọ̀ Jìhóvà beè zilá zíl. (Híb. 6:​13-17) Vóà naa, Jíízọ̀s náa géè kọọ̀ née é íe ge zilá zíl. Tãa vó, à géè ãane gbò nen kilma ló gè dõogẽ zilá zíl boo gbò nu e náa dú bíi àbèè nu e náa é dọ tọ́ọ̀ kà bélè. À bọ́ló kọ é ẹ̀b bel ea aàí gã́ naamá nu ea di káí. Èé íè ge naa nu e zigà.

Beè vó, éé ní ea bọ́ló kọ ó naa be bà kọ́ ó zilá zílé? Túá kà, mòn kọ òó láá mm-mèè zíl eo gbĩ́ zilá. Àé dú lé kọ ó gá zilá zíl be nóo agàla boo kọ òó láá mm-mèè. Moǹ Bel Bàrì ãanéi kọọ̀: “À dú lé kọ ó gá zilá zíl èlmà ge zilá vaá nóo láà mm-mè.” (Ẹ̀klì. 5:5) Bugi togó boo gbò nòòkúù Kpá Káí ea kọ́ nu ea kil ló zíl e bà kọ́ ó ziláá, vaá ò gbóó nè béèlàfùl dẹ̀ẹ̀a boo búma eo ni íe. Mókà sìgà gbò nòòkúù Kpá Káí ní ea é láá nvèè báẹ́?

Sìgà zíl gbááá ló bùlà Bàrì. Dì belí nu dòòmà bá, Gbò Neǹ Ditõ̀ò Jìhóvà ólò zilá zíl tṍó e bà gé ílá. Níí dú enè íb zíl. Dóm nè va ólò zìgà gbẹá kèsĩ́ Bàrì nè gbò nen kọ bàé vulèè, ẹ̀b nu ea kil ló ene, vaá fã̀ dẽè ene, nè ge kọ bàé náànìè vó dénè dee mm̀ ba dùm.” (Àé láá dú kọọ̀ sìgà dóm nè va náa é kọ́ gbõ̀ònà vó tṍó e bà gé ílá, sõò bà ólò zilá zíl gbẹá kèsĩ́ Bàrì.) Tṍó e ba ni zílá zíl lọ̀l, bà ólò gbóó tenmà va naamá dóm nè va, vaá bàé kilsĩ́ gè dú dóm nè va dénè dee mm̀ ba dùm. (Jén. 2:24; 1 Kọ́r. 7:39) Nakà zílí palàge lèlà, bọ́ló, vaá gbaaá ló bùlà Bàrì.

Sìgà zíl náa gbááá ló bùlà Bàrì. Kà kà nen ea gé nyoone nvéè Kráìst náa é zílá zíl gè bé bé tenmá boo dó, àbèè ge nyaaná gã́ kọ náa é fã nàè Bàrì. Ge naa vó é bé uú boo log Bàrì. Gbò e bà gé nyoone nvéè Kráìst ‘náa dṹùnà bàlà booí,’ vóà naa, née é láá tú lóó gbá ló ba bé nè ba kàna​—Jọ́ọ̀n 15:19; Àìz. 2:4; Jém̀z 1:27.

 Sìgà zíl dú ní e nen é zílá dẹ̀ẹ̀a boo a bug. Sìgà tṍó, àé dú bíi kọ é palàge tú ọ̀ẹ̀ bùgmà togó boo zíl e gbĩ́ gè zilá dẹ̀ẹ̀a boo ã̀àne e Jíízọ̀s beè nè ea kọ́ọ̀ “kpẽ́i nu ea kuu Méné Róm̀ nei Méné Róm̀ vaá ò kpẽ́i nu ea kuu Bàrì nei Bàrì.”​—Lúùk 20:25.

Dì belí nu dòòmà bá, dòòmà dẽe ló kọọ̀ nen ea gé nyoone nvéè Kráìst gbĩ́ gè tú kpá ea é náa kọ á dũùnà ene kà dó, àbèè ge tú passport vaá à gbóó nyimá kọọ̀ àé bĩ́íná kọ á zilàẹ̀ zil gè tõó boo kọ̀láá kà log ea bẹl dóá. Beè zílá dú ní ea é náa kọ á naa nu ea bé uú boo log Bàrì, nyìmànù ea ni íe lọl mm̀ Kpá Káí náa é sọtọ́ deè kọ á zilá. Kpóó ea gé bẹl dóá é láá nèe deè kọ á nyaaná sìgà moǹ bel ea di gbàà zílá kọbé a bug sọ́ẹ tọ́ deè kọ á zilá.

Ge zilá zíl e bà nyááná sìgà moǹ bel gbàà ea kil ló gè tõó boo log é láá gbaaá ló nòòkúu ea di mm̀ kpá Róm̀ 13:​1, ea kọ́ọ̀: “Kọ̀láá nen á tõo kè kẽè gbò e bà gé bẹl.” Boo béè vó, neǹ Kráìst é láá beeláfùl kọọ̀ tọ́ọ̀ kà pọ́lọ́ á gé ló gè zilá zíl gè naa nu e Bàrì beè noo gbẹẹ́ kẽ.

À palàge du nágé bíi kọ ó gbàntṍ ló o bug e Kpá Káí beè bumá be bà kọ́ ó tú bá àbèè enè íb nu zilmá zíl. Pá Róm̀ nè pá Scythia deè kéléá beè olòó tú ba gẹ̀ bé zilmá zíl mm̀ ge kolmá kpóó lọl bá ba ńbàlì bé kọbé bà láá dẹlẹ̀ẹ̀ nyíe boo nen gbẹá sĩ́ bé. Pá Gríìs ólò zilè bá sĩ́ káála tṍó e bà gé zílá zíl. Bà nyímá kọọ̀ à íe nen ea di káála ea íe kpóó ea gé pãanìè va tṍ ló vaá mòn nu e bà gé náanìè, nè ge kọọ̀ ẹlẹ ní e gbò nen é ne kpẹ̀a ea kil ló bé e bà náa nu naa ẽ́.

Mm̀ kà kà, gyóòlo Jìhóvà náa é tú kpáta àbèè dõòna kà nu ea gbááá ló kyáá fã̀ zilmá zíl. Sõò éé ní eo é náa be bà kọ́ ó dẹlẹ bá boo Kpá Káí zilmá zíl gbẹá tọ bèèla ge zogè kọ ò gé lóè kà kà belé? Be à meà naa vó, òó láá beeláfùl ge naa tã́gíní bé e Kpá Káí kọ́ọ̀ gbò e ba beè bọ́ló dẹ̀lẹ̀ nyíé boo beè tú bá zilmá zílá. (Jén. 24:​2, 3, 9; 47:​29-31) À palàge dú bíi kọ ó kẽ̀èa boo kọọ̀ be ò zílá zíl naa vó, ò zílà zíl kèsĩ́ Bàrì kọ ò gé lóè kà kà bel. À dú bíi kọ ó kpoogá dee ló nyòòmà ge ló kà kà bel ea kil ló kọ̀láá kà bíb e bàé bĩ́íná ni.

Boo béè kọ è palàge nvèè ka ló bẹẹ gbaa ló kilma ló Jìhóvà, à bọ́ló kọ é tã̀àgã ló Bàrì vaá palàge bugi togó besĩ́ è kálá zilá zíl kọbé náa bé uú boo nòòkúù Kpá Káí nè bẹẹ bug. Be ò bééláfùl ge zilá zíl, mòn kọ ò ḿm̀-mèè​—1 Pít. 2:12