ZÍLẸẸ̀K ea dú Ámòn, Ùráíà ea dú Híìt, nè Ìítmà ea dú Móàb beè di zẹ̀ẹ̀ gbò bé Dévìd. a (1 Kró. 11:​39, 41, 46) Pá “Kérẹt, Pélẹt, nè Gíìt” beè dì nàgé gbàà gbó bé Dévìd.” (2 Sám. 15:18) À belí kọọ̀ pá “Kérẹt nè Pélẹt nè pá Fìlítìà dúá ló. (Èzí. 25:16) Vaá pá Gíìt aa pọ̀b boǹ Fìlítìà ea kọlà Gáàt.​—Jós. 13:​2, 3; 1 Sám. 6:​17, 18.

Éé ní ea beè naa kọọ̀ Dévìd á sọ̀tọ́ deè kọọ̀ gbò e bà náa dú Ízràẹ̀l á di zẹ̀ẹ̀ pá a gbò bé é? A beè agala boo kọọ̀ bàé bọ́ló dẹ̀lẹ̀ nyíé boo neèe vaá bọ nagé ló dẹ̀lẹ̀ nyíé boo nè Jìhóvà. Dì belí nu dòòmà bá, kilma kĩée pá Kérẹt nè Pélẹt dì, The New Interpreter’s Dictionary of the Bible kọ́ọ̀: “Ba beè kilsĩ́ gè bọ́ló dẹ̀lẹ̀ nyíé boo nè Dévìd tṍó ea géè bẹ̀l, bã̀àna tṍó e nu beè palàge tàvàlàẹ́ ló.” Mósĩ́ deè ní e ba beè bọ́ló dẹ̀lẹ̀ nyíé boo nèe ẽ́? Tṍó e “dénè gbò gbálà e bà dú Ízràẹ̀l” beè aa ló Méné Dévìd nyoone “nen ea ólò nvèè tã̀àgã̀ ea bée kọlà Shíbà,” pá Kérẹt nè Pélẹt beè bọ́ló dẹ̀lẹ̀ nyíé boo nè Dévìd vaá nvèè kùbmà ló tã̀àgã̀ e shíbà géè nvèèa. (2 Sám. 20:​1, 2, 7) À íe tṍó e Àdònáíjà ea dú nvín Méné Dévìd beè gbĩ́ gè tú dọ̀ méné lọl bá a tẹ̀. Sõò pá Kérẹt nè Pélẹt beè bọ nagé ló dẹ̀lẹ̀ nyíé boo nè Dévìd vaá naa kọọ̀ Sólomoǹ e Jìhóvà beè sà á dú méné.​—1 Kíǹ. 1:​24-27, 38, 39.

Dõona nèn e náa beè dú Ízràẹ̀l ea beè bọ nagé ló dẹ̀lẹ̀ nyíé boo nè Dévìd dú Ítaì ea dú Gíìt. Ítaì nè 600 pá a gbò bé beè nvèè sãa kúm Méné Dévìd tṍó ea nvín Ábsolọ̀n beè gbĩ́ gè tú dọ̀ méné lọ̀lẹ́ẹ́ bá vaá naa kọọ̀ gbò gbálà e bà dú Ízràẹ̀l á naa uúé boo. Túá ból, Dévìd beè kọ́ nè Ítaì kọọ̀ náa bọ́ló kọ á zọẹ̀ẹ teelá dọ ól boo béè kọọ̀ náa dú Ízràẹ̀l. Sõò Ítaì beè kọọ̀: “Boo béè kọọ̀ Jìhóvà di dùm vaá nen ea íém ea dú méné à dì nàgé dùm, kọ̀láá kĩée e nen ea íém ea dú ménéá kil, kọbèè à ú àbèè à di dùm, níà kĩée eo gyóòlo é di nàgé gé é!”​—2 Sám. 15:​6, 18-21.

Náa kal ló béè kọọ̀ pá Kérẹt nè Pélẹt nè pá Gíìt náa beè dú Ízràẹ̀l, ba beè nyimá kọọ̀ Jìhóvà ní ea dú kà-kà Bàrìe vaá ẹlẹ ní ea beè tṍ nóo ból Dévìd e. Èb bé e nyíè Dévìd beè palàge ẹẹ kọ à íèè gbò e bà bọ́ló dẹ̀lẹ̀ nyíé boo naaà!