1. Éé ní e Jìhóvà gbĩ́ kọ é naa ẽ́?

 ENE kà nú ea ólò naa kọọ̀ nyíè dóm nè va á palàge ẹẹ, dú tṍó e bà íe ãa nvín. Sõò, kọ̀láá bé e bà vulè ba ãa nvín naa, náa ólò tàn va kọ á gbẹá pá nvín lee. Kàsĩ́, bàé palàge ié tã̀àgã̀ bùlà be à gá náa vaá nvíná náa bọọ. Mm̀ tẽ̀ènè sĩ́deèá, nyíè Jìhóvà ólò palàge ẹẹ tṍó e daamà togó gè nó nu ea kilíé ló, vaá náa gbĩ́ kọ é iná kĩá elá. (1 Kọ́r. 3:1) Tãa vó, à gbĩ́ kọ é ‘bugi togó belí’ neǹ Kráìst e togóe tulà nu.​—1 Kọ́r. 14:20.

2. Éé ní eé ló bel boo mm̀ nakà togó belí é?

² Éé ní e gè dú neǹ Kráìst e togóe tulà nu tõó dọ̀ ẹ? Éé ní eé láá naa kọbé è dú gbò e gé nyoone nvéè Kráìst e togói tulà nu ẽ́? Mósĩ́ deè ní e gè nó gbò kà-kà bel ea di mm̀ Kpá Káí e náa bọọgẹ̀ valí gè dã́tẽ́ ló ólò nvèè bá nèi kọ é ié lé gbaa ló kilma ló Jìhóvà ẹ? Éé ní ea náa vaá née é dẹlẹ nyíé boo bẹẹ bá zelmá kẽ ẽ́? Èé ló bel boo ààlaà gbò bíbví mm̀ nakà togó belí.

ÉÉ NÍ E GÈ DÚ NEǸ KRÁÌST E TOGÓE TULÀ NU TÕÓ DỌ̀ Ẹ?

3. Éé ní e gè dú neǹ Kráìst e togóe tulà nu tõó dọ̀ ẹ?

³ Mm̀ Kpá Káí, moǹ bel Gríìk e bà tab naamá “togóe tulà nu” é láá tõo nagé dọ̀ “ge kpono,” “ge gbõoma,” nè “ge egá.” a (1 Kọ́r. 2:​6, NW.) È dúù gbò nyòòne nvéè Kráìst e togói tulà nu tṍó e kilsĩ́ gè nó nu vaá naa gbò nú ea é náa kọọ̀ bẹẹ gbaa ló kilma ló Jìhóvà á aga ló. Bã̀àna tṍó e ni dú neǹ Kráìst e togói tulà nu, née e aa ló gè sìm kilsĩ́. (1 Tím. 4:15) Dénè bẹ̀ì, bã̀àna gbò nvín ãa é láá dú neǹ Kráìst e togói tulà nu. Sõò, mósĩ́ deè ní eé láá nyimá beè e dú nen ea gé nyoone nvéè Kráìst e togói ni tulà nu ẽ́?

4. Éé ní ea zógè kọọ̀ nen a dú neǹ Kráìst e togóe tulà nu ẽ́?

 ⁴ Nen ea gé nyoone nvéè Kráìst dú nen ea ólò naa dénè nú e Bàrì bĩ́inaé bá, vaá náa ólò sà ní ea taníe gè naa. À dú kà-kà kọọ̀, àé láá ié lọ̀ tã́gíní bé e náa gbõomaá. Náa kal ló béè vó, bé ea tõó dùm naá buù dee ólò zogè kọọ̀ à gé piigà ge naa nú e Jìhóvà gbĩ́. À ólò zogè kọ à nveàè ãa nen vaá kilsĩ́ gè naa kọọ̀ bé ea bugi togó naa á gbaaá ló bé e Bàrì gbĩ́ naa. (Ẹ́fẹ. 4:​22-24) A nó nágé gè nè lé béèlàfùl tení dú ló gè bugi togó boo gbò nòòkúu nè log Jìhóvà, vó ólò naa kọ á gá íe bíi ló gã́bug log ea é kọ́ nú ea é náa nèe. Vaá à ólò pììga boo gè naa nú ea bééláfùl ge naa.​—1 Kọ́r. 9:​26, 27.

5. Mókà nuù gẹẹ-gẹẹ ló ní e neǹ Kráìst e togóe gáà tùlà nu ólò kpeesĩ́ ló é? (Ẹ́fẹsọ̀s 4:​14, 15)

⁵ Boo dõona bá, nen ea gé nyoone nvéè Kráìst e náa sim kilsĩ́ naa ní e togóe é tulà nu ólò vàlẹ̀bá bã bá “gbò dàg” nè gbò e bà nyímá “kyèèlè ge kẹ̀ẹ̀mà nen,” vaá bàé láá vàlẹ̀bá ziga ló gbò kyáá bel ea aa bá gbò e ba beè dọ̀ aa nvéè nòòmànù Kráìst. b (Bugi Ẹ́fẹsọ̀s 4:​14, 15.) Àé láá vàlẹ̀bá bẹ́ nyíé ló dõona gbò, kaná kana, bã̀ súng, vaá sí pọ́lọ́ tṍó ea kpeesĩ́ ló ẹ̀bmà.​—1 Kọ́r. 3:3.

6. Èé láá tú gè sìm kilsĩ́ vaá dú neǹ Kráìst e togóe tulà nu doolé ló éé? (Ẹ̀b nàgé fòtó.)

⁶ Dì belí bé e beè zẹ́ẹ́ kọ́ naaá, Kpá Káí tú gè sìm kilsĩ́ vaá dú neǹ Kráìst e togó tulà nu doolé ló tṍó e nvín bọọ dú kànen. À íe gã́bug nú e gbò pá nvín náa ólò nyimá, vóà naa bà íe bíi ló kànen ea é kpenà vaá lelé va dee bá. Dì belí nu dòòmà bá, kà ólò láá kọ́ nè a ńkem̀ nvín kọ á siilìèe bá ló tṍó e bà gé ful èèlè. Sõò tṍó e nvíná ni bọọ, kàa ólò gbóó ààẹ́ ló kọ áá ẹ̀ẹ̀ á fùl èèlè, sõò à ólò kẽeé nyíe kọọ̀ á palàge ẹ̀b èèlè kọbé faà náa konée. Tṍó e nvíná ni dú kànen, náa ólò gbóó ié ná bíi ló nen ea é kọ́ nú ea é náa tṍó ea é ful èèlè. Dì belí bé e gbò pá nvín ólò ié bíi ló nvèè bá nè kpènà ea aa bá gbò kànen naaá, níà bé e gbò e bà gé nyoone nvéè Kráìst e togó va gáà tùlà nu ólò ié nágé bíi ló nvèè bá ea aa bá gbò e bà gé nyoone nvéè Kráìst e togó va ni tulà nu naa ẽ́, kọbé bà láá nè lé béèlàfùl vaá ié lé gbaa ló kilma ló Jìhóvà.  Boo dõona bá, tṍó e gbò nyòòne nvéè Kráìst e togó va tulà nu gbĩ́ gè nè béèlàfùl, bà ólò bugi togó boo gbò nòòkúu ea di mm̀ Kpá Káí kọbé bà nyímá nú e Jìhóvà gbĩ́ kọ bàá naa, vaá naa nú ea lelà.

7. É kọọ̀ gbò nyòòne nvéè Kráìst e togó va tulà nu íe bíi ló nvèè bá ea aa bá dõona gbò?

⁷ É kọ níí tõó dọ̀ kọọ̀ nen ea gé nyoone nvéè Kráìst e togóe tulà nu náa íe bíi ló nvèè bá ea aa bá dõona gbò? Ẽ́èe. Bà ólò ié nágé bíi ló nvèè bá sìgà tṍó. Sõò nen ea gé nyoone nvéè Kráìst e togóe gáà tulà nu ólò ié bíi ló nen ea é kọ́ nú ea é náa nèe àbèè nen ea é ne béèlàfùl nèe. Níí dú kele ló nen ea gé nyoone nvéè Kráìst e togóe tulà nu boo béè kọọ̀ tṍó ea bĩ́íná nvèè bá lọl bá gbò e bà nyímá nu èlìe, náa ólò dõgẽ naa kọ̀láá kà nú e bà kọ́ á naa, tãa vó à ólò nyímá kọọ̀ Jìhóvà ẹbmà dẽe kọọ̀ ‘buù nen é tóólá a nyèè.’​—Gàl. 6:5.

8. Mósĩ́ deè ní e gbò nyòòne nvéè Kráìst e togó va tulà nu dú kele ló ene ẽ́?

⁸ Dì belí bé e gbò nen ólò ié kele-kele mèà naaá, níà bé e gbò nyòòne nvéè Kráìst e togó va tulà nu ólò ié nágé kele-kele kpãà neǹ Kráìst naa ẽ́. Dì belí nu dòòmà bá, sìgà gbò ólò palàge nyimá nu, íe agẹ ló, dõo nu taalẹ bá, boo tṍó e sìgà gbò ólò palàge íe tóè sàn. Mm̀ tẽ̀ènè sĩ́deèá, tṍó e bàà nen e bà gé nyoone nvéè Kráìst e togó va tulà nu kpeesĩ́ ló tẽ̀ènè íb dìtõ̀ò, bàé láá nè kele-kele béèlàfùl ea gbááá ló nòòkúù Kpá Káí. Níí ólò bọ̀ọ̀gẹ̀ naaá tṍó e Kpá Káí náa aa deè kọ́ nú e nen é náa. Ge nyimá naa vó é nvèè bá nè pálaa ọ̀và kọ bàá gá gbĩ́ lọ̀ ló béèlàfùl e buù ọ̀và ne. Tãa vó, bàé piiga boo gè di mm̀ gbaa ló.​—Róm̀ 14:10; 1 Kọ́r. 1:10.

ÉÉ NÍ EÉ LÁÁ NAA KỌBÉ È DÚ GBÒ E GÉ NYOONE NVÉÈ KRÁÌST E TOGÓI TULÀ NU Ẽ́?

9. É kọọ̀ nen ólò láá dõgẽ ié lé gbaa ló kilma ló Jìhóvà? Baatẽ́.

⁹ Nen ólò bọọ vaá dú kànen dẹ̀ẹ̀a boo gã́bug gbáá ea ni tóólá, sõò tọ́ọ̀ nen naa ólò láá dõgẽ ié lé gbaa ló kilma ló Jìhóvà beè náa síá kpóó ló. Dì belí nu dòòmà bá, pá vígà e ba beè di Kọ́ríǹt beè tú lé bá tuumá lé kpẹ̀aá, dììa múú, vaá Bàrì à nèva nyómá káí, naa ní e ba beè ié bélè lọl ló gbò dùùlà bá deè tṍ e neǹ tóm Pọ́ọ̀l beè nèva. (Tóm 18:​8-11) Sõò sìgà gbáá aa ló tṍó e ba ni diia múú lọ̀l, sìgà ọ̀và beè dú gbò nyòòne nvéè Kráìst e bà gáà kpono. (1 Kọ́r. 3:2) Éé ní eé láá naa kọbé née bélì va ẹ́?

10. Éé ní eé íè ge naa kọbé togói tulà nu ẽ́? (Júùd 20)

¹⁰ Èé íe ge ié tàn ge sìm kilsĩ́ kọbé è láá dú gbò nyòòne nvéè Kráìst e togói tulà nu. Náa é válí ló gbò e bà ‘vulè nú e nyìmànù á gé m’ gè sìm kilsĩ́ mm̀ ge fã̀ Bàrì. (Pró. 1:22) Née gbĩ́ gè belí gbò e ba ni dú kànen e bà náa ólò gbĩ́ gè nè béèlàfùl boo ba lóó, tãa vó bà ólò dẹ̀ẹ̀a boo béèlàfùl ba tẹ̀ ne ba kà. Sõò èé tú gbò láb tọ ea é náa kọ é ié kà lé gbaa ló kilma ló Jìhóvà. (Bugi Júùd 20.) Be ò gé piiga boo gè sìm kilsĩ́ mm̀ ge fã̀ Bàrì, bàn kọ Jìhóvà á ‘nè ni tàn nè kpóó gè naamá nú ea léémáe.’​—Fíl. 2:​13, NW.

11. Mókà nvèè bá ní e Jìhóvà néi kọbé è láá sìm kilsĩ́ ẽ́? (Ẹ́fẹsọ̀s 4:​11-13)

¹¹ Jìhóvà náa ẹ̀bmà dẽe kọọ̀ áá bẹ̀ì é sìm kilsĩ́ mm̀ bẹẹ gè fã̀e. À néi gbò kànen mm̀ bõ̀ònatõ̀ò kọ bàá noomài nu kọbé è láá palàge sìm kilsĩ́ váa kpono mm̀ bẹẹ fã̀, vaá “tùlà dénè kpãa bé e Kráìst tóólá naa.” (Bugi Ẹ́fẹsọ̀s 4:​11-13.) Jìhóvà ólò nè nài  gé a nyómá káí kọbé à nveè bá nèi naa ní e bẹẹ “bùlà nè níí Kráìst [é] dú tẽ̀ènè kà.” (1 Kọ́r. 2:​14-16) Gbá ló vó, Jìhóvà beè tú a nyómá káí nè gbò e bà beè emí ténì kà kpá ea di mm̀ Kpá Káí ea kọ́ nú ea kil ló bé e Jíízọ̀s beè bugi togó, ló bel vaá labví láb naa tṍó ea beè di boo kunukẽ̀í. Ge nó bé e Jíízọ̀s beè bugi togó vaá labví láb naa, é náa kọ ó sìm tùlà o nu sẹ̀ẹ̀a sĩ́ gè dú neǹ Kráìst e togó ni tulà nu.

BÉ E GBÒ KÀ-KÀ BEL EA DI MM̀ KPÁ KÁÍ E NÁA BỌỌGẸ̀ VALÍ GÈ DÃ́TẼ́ LÓ ÓLÒ NVÈÈ BÁ NÈI NAA

12. Éé ní ea dú “túá kpãà nònù ea di mm̀ dòbá nuù Kráìst” e?

¹² Be è gbĩ́ gè dú gbò nyòòne nvéè Kráìst e togói tulà nu, èé íe ge nó nu èlmà “túá kpãà nònù ea di mm̀ dòbá nuù Kráìst” ea dú gbò nú e beè nó túá ból e ã́àa bã mm̀ bõ̀ònatõ̀òí ã́. Dì belí nòòmànù ea kil ló gè ọgá aa ló pọ́lọ́, ge ié zìgà, ge dììa múú nè kẽ̀èa aa kemà ú. (Híb. 6:​1, 2) Níà gbò nòòmànù e kọ̀láá gbò e bà gé nyoone nvéè Kráìst ólò zẹ́ẹ́ nyimá ẽ́. Vó ní ea beè naa kọọ̀ neǹ tóm Pítà á ló bel kilma ló gbò nòòmànùá tṍó ea géè kọ́ kpẹ̀a nè gã́bug nen deè Pẹ́ntìkọ̀sta ẹ. (Tóm 2:​32-35, 38) Kọbé è láá dú gbò e gé nyoone nvéè Kráìst, èé íe ge ziga ló gbò nòòmànùá. Dì belí nu dòòmà bá, Pọ́ọ̀l beè kọọ̀ née é láá kọọ̀ è dúù kà-kà gbò e gé nyoone nvéè Kráìst be née zigà ló nòòmànù ea kuu kẽ̀èà aa kemà ú. (1 Kọ́r. 15:​12-14) Náa kal ló béè vó, náa bọ́ló kọọ̀ áá gbò túá kpãà nòòmànù ea di mm̀ Kpá Káí á gbõomáí ló.

13. Éé ní eé íè ge naa kọbé è láá ié bélè lọl ló kpoò gyã́á e bà kọ́ nú ea kil ló mm̀ kpá Híbrù 5:14 é? (Ẹ̀b nàgé fòtó.)

¹³ Kpoò gyã́á ea tõó dọ̀ gbò kà-kà bel ea di mm̀ Kpá Káí e náa bọọgẹ̀ valí gè dã́tẽ́ ló dú kele ló túá kpãà nòòmànù, boo béè kọọ̀ náa kọ́ áá nú ea kil ló log Jìhóvà nè gbò a nòòkúu ea di mm̀ Kpá Káí, sõò à nveè nàgé bá nèi kọ é nyimá bé e Jìhóvà ólò bugi togó naa. Èé íè ge nó Kpá Káí, bugi togó boo gbò nú e bugì, vaá tú gbò nú e nóò siimá tóm kọbé è láá ié bélè lọl ló. Tṍó e náà vó, àé nveè bá nèi kọ é nè béèlàfùl ea léémá Jìhóvà. c​—Bugi Híbrù 5:14.

14. Mósĩ́ deè ní e Pọ́ọ̀l beè nvèè bá nè pá vígà e ba beè di Kọ́rìnt kọ bàá dú gbò e togó va tulà nu ẽ́?

 ¹⁴ À ólò bọ̀ọ̀gẹ̀ tavala ló neǹ Kráìst e togóe gáà tùlà nu gè nè béèlàfùl ea dẹẹa boo gbò nòòkúu ea di mm̀ Kpá Káí. Beè Kpá Káí náa aa deè kọ́ lèlà nu gè naa, àé láá tõo ló sìgà gbò kọ bàé láá naanìè kọ̀láá kà nú ea tan va. Sìgà gbò é láá kọọ̀ nen á kọ́ nú e bàé náànìè neè va boo tṍó e náa dú bíi naa vó. Dì belí nu dòòmà bá, à bélí kọọ̀ sìgà gbò nyòòne nvéè Kráìst e ba beè di Kọ́rìnt beè kọọ̀ Pọ́ọ̀l á kọẹ̀ neè vabe bàé láá deè gyã́á e ba beè vaamá gyọ́ọ nè gbò ńbàlì e bà náàmà bá. Tãa vó e Pọ́ọ̀l kọ́ nú e bàé náa nèva, a beè kọ́ nèva kọọ̀ buù nen íe “dì pọ́ì” ge sà nú ea é náa dẹ̀ẹ̀a boo nú ea bug sọ́ẹ tọ́ deè kọ á naa. A beè kọ́ sìgà gbò nòòkúu ea di mm̀ Kpá Káí ea é nveè bá nèva kọ bàá nè béèlàfùl e náa é tãagẽ ba gbaa ló kilma ló Jìhóvà àbèè ge sivè dõona gbò. (1 Kọ́r. 8:​4, 7-9) Vóà naa, Pọ́ọ̀l géè nvèè bá nè gbò nyòòne nvéè Kráìst e ba beè di Kọ́rìnt kọ bàá láá nyimá ló kele ea di zẹ̀ẹ̀ lé nè pọ́lọ́ tãa vó e bà dẹẹa boo nen ea é kọ́ nú e bàé náa nèva.

15. Mósĩ́ deè ní e Pọ́ọ̀l beè nvèè bá nè pá Júù e bà géè nyoone nvéè Kráìst kọ bàá dú gbò e togó va tulà nu ẽ́?

¹⁵ È nóò dõona kà lé nu lọl ló nú e Pọ́ọ̀l beè emí má pá Júù e bà géè nyoone nvéè Kráìst. Lóó sìgà ọ̀và beè ọọ mm̀ ba gè fã̀ Bàrì; vaá ba beè ié bíi ló gè ‘kpáá nó túá kpãà nòòmànù ea kil ló kpẹ̀a Bàrì.’ (Híb. 5:12) Ba beè kìn gbò ãa nú e Jìhóvà géè noomà va tení dú ló a bõ̀ònatõ̀ò. (Pró. 4:18) Dì belí nu dòòmà bá, gã́bug pá Júù géè kpáá tõó boo Log Mózìs bã̀àna tṍó e ú vààa gyọ́ọ̀ Jíízọ̀s beè nvèè kùbmà ló logá 30 gbáá besĩ́ à kalá dọ̀ tṍóá. (Róm̀ 10:4; Táítọ̀s 1:10) Mm̀ kà-kà, 30 gbáá ea ni téníá beè naa kọọ̀ gbò nyòòne nvéè Kráìst á ié gã́bug tṍó gè dãamá tẽ́ ló kọ náa dú bíi gè kpáá tõó boo Log Mózìs! Kọ̀láá nen ea bugi kpá e Pọ́ọ̀l beè emí má pá Júùí é dã́tẽ́ ló kà-kà bel ea géè kọ́ nèva. Níà kà lèlà nú e gbò nyòòne nvéè Kráìst beè ié bíi ló kọbé bà láá dã́tẽ́ ló kọọ̀ ãa sĩ́deè ge fã̀àmà Bàrìí léè èl ní e bà géè naa kèbá Log Mózìsaẹ, nagé a beè siè va kpóó ló kọ bàá kilsĩ́ gè kọ́ kpẹ̀a kèbá nàà uú boo ea aa bá pá Júù.​—Híb. 10:​19-23.

 ÓGÁ DẸLẸ NYÍÉ BOO O BÁ ZELMÁ KẼ

16. Éé ní eé kpáá naa gbá ló gè piiga boo gè dú neǹ Kráìst e togói tulà nu ẽ́?

¹⁶ Níì áá gè pììga boo gè sìm tùlà ge dú neǹ Kráìst e togói tulà nu ní eé náa ẽ́ nì, sõò èé piiga boo gè kọ á gbẹá naa vó. Níí bĩ́íná kọ é gá dẹlẹ nyíé boo bẹẹ bá zelmá kẽ. (1 Kọ́r. 10:12) À bọ́ló kọ é kilsĩ́ gè ‘ẹ̀à’ bẹẹ lóó kọbé è nyímá be è gé sim kilsĩ́.​—2 Kọ́r. 13:5.

17. Mósĩ́ deè ní e kpá lẹ̀ẹ̀la tóm e Pọ́ọ̀l beè emí má pá Kọ́lọsì zógè kọọ̀ à dú bíi kọ bàá kilsĩ́ gè dú gbò e togó va tulà nu ẽ́?

¹⁷ Mm̀ kpá lẹ̀ẹ̀la tóm e Pọ́ọ̀l beè emí má pá Kọ́lọsì, a beè kpáá baatẽ́ bé ea dú bíi kọ bàá kilsĩ́ gè dú gbò nyòòne nvéè Kráìst e togó va tulà nu naa. Náa kal ló béè kọọ̀ ba beè dú gbò nyòòne nvéè Kráìst e togó va tulà nu, Pọ́ọ̀l beè ãané va kọ bàá ọẹ̀ dẽe kọbé bà náa bugi togó belí gbò e bà dì vá kuló. (Kọ́l. 2:​6-10) Ẹ̀páfràs ea beè palàge nyimá ló gbò e bà di mm̀ bõ̀ònatõ̀òa beè olòó tã̀àgã ló Bàrì má va kọ bàá ‘palàge agala boo dénè nú e Bàrì gbĩ́.’ (Kọ́l. 4:12) Éé ní eé láá nó lọl ló níí ẽ́? Pọ́ọ̀l nè Ẹ̀páfràs beè nyimá kọọ̀ ge kilsĩ́ gè dú neǹ Kráìst e togói tulà nu bĩ́íná sìà kpóó ló nè nvèè bá ea aa bá Bàrì. Ba beè gbĩ́ kọọ̀ pá Kọ́lọsì á kilsĩ́ gè agaló àbèè ge kpono mm̀ ge fã̀ Bàrì kèbá kọ̀láá íb nàà uú boo.

18. Éé ní ea é láá naaá ló neǹ Kráìst e togóe tulà nu ẽ́? (Ẹ̀b nàgé fòtó.)

¹⁸ Pọ́ọ̀l beè ãane pá Júù kọ be bà náa ọ́ẹ̀ dẽe, Bàrì náa é ténmà nà va. Nen ea gé nyoone nvéè Kráìst é láá ié agẹ nyíe naa ní e náa é zigà ge nyaaá kọbé Bàrì ia ló nèe. À dú lé kọọ̀ pá Júù gáà beè ie na íb agẹ nyíe ã́. (Híb. 6:​4-9) Deè nieí, èé kọ́ vàẹ̀ kilma ló gbò e ba beè ọọ mm̀ ba fã̀ Bàrì àbèè gbò e ba beè kpọ́ va lọl mm̀ bõ̀ònatõ̀ò vaá tṍó e tṍó téní bà nyaaá ẽ́? Ge kọ bà ọgá zógè kọọ̀ bà dú kele ló gbò e Pọ́ọ̀l géè kọ́ nú ea kil lóá. Kọ̀láá bé ea dì naa, bà ólò ié bíi ló nvèè bá ea aa bá Jìhóvà tṍó e bà ooà dù gé fã̀e. (Èzí. 34:​15, 16) Gbò kànen é láá noo kọọ̀ neǹ vígà e togóe tulà nu á nvèè bá nèva naa ní e bàé kpáá ié lé gbaa ló kilma ló Jìhóvà.

19. Éé ní ea bọ́ló kọ é naamá nu sẹ̀ẹ̀a sĩ́ ẽ́?

¹⁹ Òé láá teelá tùlà o nu sẹ̀ẹ̀a sĩ́ be ò gé piiga boo gè dú neǹ Kráìst e togó ni tulà nu! Kilsĩ́ gè nó gbò kà-kà bel ea di mm̀ Kpá Káí e náa bọọgẹ̀ valí gè dã́tẽ́ ló vaá ò bugi togó belí Jìhóvà. Be o dú neǹ Kráìst e togó ni tulà nu, kilsĩ́ gè gbẹá naa vó.