1. Mókà nèà deè ní e ólò dé kpéè ló é?

À DÚ kà pọ̀bkà nèà deè e beele íè ge dũùnà bõ̀ònatõ̀ò Jìhóvà! È gé dé kpéè ló kà pọ̀b kpoò fẹ́ẹ́-fẹẹ̀ ló nè ẹ́ẹ́-ẹẹ̀ nyíe mm̀ ge zọ̀ pá vígà mm̀ bõ̀ònatõ̀ò nè fã̀ Jìhóvà. Mókà tóm ní ea dì nè olo gè sí mm̀ bõ̀ònatõ̀ò ẽ?

2. Mókà nu dòòle ló ní e Pọ́ọ̀l beè bọọ̀gẹ̀ loomá bel mm̀ gbò a kpá ẹ́?

² Èé láá nó nu ea kil ló nakà togó belí lọl ló nu dòòle ló e neǹ tóm Pọ́ọ̀l beè nvee mm̀ a bel tṍó ea géè emí gi gbò a kpá kèbá tùle nyómá káí Bàrì. Mm̀ buù kà a kpá lẹ̀ẹ̀la tómí, Pọ́ọ̀l tú bõ̀ònatõ̀ò doolé ló nom̀ kpá ló nen. À tú nágé buù nen ea di mm̀ bõ̀ònatõ̀ò doolé ló buù ketõ̀ò ea di ló nen.—Róm̀ 12:4-8; 1 Kọ́r. 12:12-27; Ẹ́fẹ. 4:16.

3. Mókà taà kà nu gè nò ní eé ló sọ́l boo mm̀ nakà togó belí é?

³ Mm̀ nakà togó belí, èé ló sọ́l boo taà kà nu gè nò ea palàge dì bíi eé láá nó lọl ló bel dòòle ló Pọ́ọ̀l. Túá kà, èé nó kọọ̀ buù bẹ̀ì íè dọ̀ tóm * gè sí mm̀ bõ̀ònatõ̀ò Jìhóvà. Ní ea égè bàà kà, èé ló sọ́l boo nú e beele é láá naa be à tavàlàí ló ge mòn tóm gè sí mm̀ bõ̀ònatõ̀ò. Vaá ní ea égè taà kà, èé ló sọ́l boo nú ea náa à dú bíi kọ é kilsĩ́ gè sí tóm e Jìhóvà ne buù bẹ̀ì kọ é sí mm̀ bõ̀ònatõ̀ò.

4. Éé ní e kpá Róm̀ 12:4, 5 nóòmài ẽ́?

⁴ Túá kà nú eé láá nó lọl ló nu dòòle ló Pọ́ọ̀l dú gè kọọ̀  buù bẹ̀ì íè tóm gè sí mm̀ bõ̀ònatõ̀ò Jìhóvà. Pọ́ọ̀l daamà togó a bel dòòle ló tení dú ló gè kọọ̀: “È íè gã́ bug ke tõ̀ò e a di ló nom kpá ló nen, sõò bu ke tõ̀ò ólò sí kele kele íb tóm. Tẽ̀ènè báá, dénè bẹ̀ì tení dú ló bẹẹ gè gbaa ló Kráìst dú tẽ̀ènè kà nom kpá ló. Náa kal ló bée kọ è dú gã́ bug gbò nen, dénè bẹ̀ì gbáà gbaá ló ene dì belí bé e kele kele íb ke tõ̀ò e a di ló nom kpá ló nen gbaá ló ene vaá dú tẽ̀ènè kà naaá.” (Róm̀ 12:4, 5) Éé ní e Pọ́ọ̀l géè kọ̀ẹ? Buù bẹ̀ì íè kele-kele tóm gè sí mm̀ bõ̀ònatõ̀ò, sõò buù bẹ̀ì dì bíi.

5. Mókà gbò “dõ̀ò nu” ní e Jìhóvà ni ne bõ̀ònatõ̀ò ẽ?

⁵ Tṍó eo bugì togó boo gbò e bà íe dọ̀ tóm gè sí mm̀ bõ̀ònatõ̀ò, o nyíe é láá vàlẹ̀ bá dọ boo gbò e bà gé túlè tóm mm̀ bõ̀ònatõ̀ò. (1 Tẹ̀s. 5:12; Híb. 13:17) À dú kà kà kọọ̀ tení dú ló Kráìst, Jìhóvà iégi “dõ̀ò nu e a nè gbò nen” mm̀ A bõ̀ònatõ̀ò. (Ẹ́fẹ. 4:8) Gbò “dõ̀ò nu e a nè gbò nen” dú nágé Gbò Ge Tulè Tóm, gbò e bà gé nveè bá nè Gbò Ge Tulè Tóm, Gbò E Ba Gé Túlè Tóm Tọ Nàà Tóm ea di buù kà bálá sĩ́, gbò kùdẽe ló sẹ́kiùt, gbò e bà ólò noòmà nu gbẹá kele-kele tọọ̀ kpá mm̀ bõ̀ònatõ̀òí, gbò kànen mm̀ bõ̀ònatõ̀ò, nè gbò nvèè bá sìtóm. À dú gè tú nyómá káí Jìhóvà iimá bá ló dénè pá vígà págbálàí kọbé bà ẹb nú ea kuu naanà ból Jìhóvà nè ge siè kpóó ló bõ̀ònatõ̀ò.—1 Pít. 5:2, 3.

6. Dẹ̀ẹ̀a boo nú ea di mm̀ 1 Tẹ̀sàlónaikà 2:6-8, éé ní e pá vígà e ba beè tú nyómá káí sààmà va gé piigà gè náa ẽ́?

⁶ Bàrì beè tú a nyómá káí sààmà gbó víga págbálàí nvee mm̀ kele-kele tóm ge sì. Dì belí bé e bá nè kpóó tọ ea dú kele-kele ketõ̀ò ea di ló nom̀ kpá ló nen ólò dọ̀ bélè naaá, níà bé e pá vígà e ba beè tú nyómá káí sààmàí ólò tú agẹ bá siimá tóm ea é dọ bélè nè zivèkà bõ̀ònatõ̀ò naa ẽ́. Bà náa ólò gbĩ́ ka nèà ba bá. Tãa vó, bà ólò pììga boo gè siè kpóó ló ba gbò vígà págbálà nè pábia. (Bugi 1 Tẹ̀sàlónaikà 2:6-8.) È ṍà Jìhóvà zaa ló pá vígà e ba sim tùlà vaá tú lóó vaamá gyọ́ọí!

7. Mókà gbò tã́áná dee bá ní e gbò e bà di boo sìtóm dénè tṍó ólò ié é?

⁷ Bà ólò íbá ló sìgà nen ea di mm̀ bõ̀ònatõ̀ò naamá gbò e bàé kọ́ kpẹ̀a aa dó dọ dó, gbò e bà di boo kele íb sìtóm, àbèè gbò gyà deè sĩ́ tóm. Kàsĩ́, pá vígà e bà di beeá ló bàlà booí a tú tóm kọ̀ kpẹ̀a naamá tóm e bà sí dénè tṍó. Tṍó e bà náa vó, bà nveè bá nè gã́bug nen kọ bàá dú gbò e bà gé nyoone nvéè Jíízọ̀s Kráìst. Náa kal ló béè kọọ̀ gbò e bà ólò kọ́ kpẹ̀a dénè tṍóí náa íe gã́bug gyọ́, Jìhóvà a né va gã́bug tã́áná dee bá. (Máàk 10:29, 30) È palàge vùlè bẹẹ gbò vígà págbálà nè pábiaí, vaá nyíéi ẹ́ẹ kọ bà dṹùnà bõ̀ònatõ̀òí!

8. Éé ní ea náa vaá Jìhóvà à palàge nvèè ka ló dénè gbò kọ̀ kpẹ̀a ẹ́?

⁸ É kọọ̀ áá gbò vígà págbálà e ba beè sà nè gbò e bà di boo sìtóm dénè tṍó ní e bà íe tóm gè sí mm̀ bõ̀ònatõ̀ò ẽ? Níì vó nì! Kọ̀láá kà gbò kọ̀ kpẹ̀a dú bíi ló Bàrì nè bõ̀ònatõ̀ò. (Róm̀ 10:15; 1 Kọ́r. 3:6-9) Kàsĩ́, ene kà nú e bõ̀ònatõ̀ò ólò sẹ̀ẹ̀a sĩ́ ea palàge dú bíi dú gè kolí gbò e bàé nyoone nvéè bẹẹ Dõò Jíízọ̀s Kráìst. (Máát. 28:19, 20; 1 Tím. 2:4) Dénè gbò e bà di mm̀ bõ̀ònatõ̀ò, gbò e ba ni diia múú nè gbò kọ̀ kpẹ̀a e bà gáà diia múú ólò tú sìtóm kọ̀ kpẹ̀aí kolmá nu.—Máát. 24:14.

9. Éé ní ea náa è nvèè ka ló bẹẹ gbò vígà pábia ẹ́?

⁹ Jìhóvà nveè ka ló gbò vígà pábia tení dú ló gè nè va tóm gè sí mm̀ bõ̀ònatõ̀ò. À  nveè ka ló gbò vaà dóm, gbò kà, gbò vaà tãà, nè gbò vígà pábia e bà gáà ia dóm e bà gé fã́e mm̀ bọ́ọ̀ló dẹ̀lẹ̀ nyíé boo. Kpá Káí kolgi béè gbò vígà pábia e ba beè naa nú ea léémá Bàrì. À dú gè lèèlà va boo béè kọọ̀ bà zógè lé nu dòòmà bá ea kil ló gè ié nyìmànù, zìgà, bẹ̀à sã́ bùlà, agẹ ló, ge dõo nu taalẹ bá, nè ba gbò lé tóm. (Lúùk 8:2, 3; Tóm 16:14, 15; Róm̀ 16:3, 6; Fíl. 4:3; Híb. 11:11, 31, 35) È palàge õá Jìhóvà zaa ló gè íe gbò vígà pábia e bà íe íb gbò lé kpãaí mm̀ bẹẹ bõ̀ònatõ̀ò!

10. Éé ní ea náa è nvèè ka ló bẹẹ gbò vígà e ba ni dú kànen mm̀ dee é?

¹⁰ Nyíéí palàge ẹẹ gè íe gbò vígà e bà ni dú kànen mm̀ dee mm̀ bẹẹ bõ̀ònatõ̀ò. Sìgà bõ̀ònatõ̀ò íe gbò vígà págbálà nè pábia e bà ni dú kànen mm̀ dee e ba ni tú dénè ba dúm siimá tóm nè Jìhóvà. Sìgà gbò e a ni dú kànen mm̀ dee ã́àa ba mm̀ bõ̀ònatõ̀ò. Kọ̀láá bé ea dì naa, zọ̀ kpá ló dú ene kà nu ànà-ànà e bẹẹ gbò vígà e bà ni dú kànen mm̀ deeí ólò ié. Gbò tã̀àgã̀a ólò naa kọ bàá gá láá naa nú e bà gáẹ̀ láá naá mm̀ bõ̀ònatõ̀ò nè boo sìtóm kọ̀ kpẹ̀a. Sõò, gbò e ba ni dú kànen mm̀ deeí ólò naa nú e ba kpóó sim tùlà mm̀ sìtóm kọ̀ kpẹ̀a, vaá bà ólò tú dénè ba kói nvèèmà bá vaá bumá dõòna gbò! Gbò nú e ba beè tení bá ólò dọ̀ bélè nè beele. Nyíè beele nè Jìhóvà palàge ẹẹ́ vá ló.—Pró. 16:31.

11-12. Mósĩ́ deè ní eo ni íe sìà kpóó ló tení dú ló gbò nvín ãa e bà di mm̀ bọọ bõ̀ònatõ̀ò ẽ?

¹¹ Ni bugi nagé togó boo bẹẹ gbò nvín ãa. Bà gé kpee sĩ́ ló gã́bug nu ànà-ànà mm̀ pọ́lọ́ bàlà boo é Sétàn gé lẹẹlà bel lóí, tení dú ló gbò á pọ́lọ́ nòòmà nù. (1 Jọ́ọ̀n 5:19) Sõò, à ólò sièi kpóó ló tṍó e monì bẹẹ gbò nvín ãa e bà áálá bíb gbẹ̀a nònù, kọ́ kpẹ̀a, vaá tú agẹ ló lóómá bel boo gbò nú e bà ziga ló. Ẽei, booló gbò nvìn ãa íèì tóm ge sií mm̀ bõ̀ònatõ̀ò Jìhóvà.—Ps. 8:2.

¹² À ólò tavàlà ló sìgà bẹẹ gbò vígà págbàlà nè pábia gè zìgà kọọ̀ baala gé láá sinàè gé tóm mm̀ bõ̀ònatõ̀ò. Éé ní ea é  láá nvèè bá nè buù bẹ̀ì kọ é nyimá kọọ̀ è íè dọ̀ tóm gè sí mm̀ bõ̀ònatõ̀ò ẽ? Naanii mè é ẹb.

13-14. Éé ní ea é láá naa kọọ̀ sìgà gbò á bugi togó kọ bàá géè ló tọ́ọ̀ kà nú mm̀ bõ̀ònatõ̀ò ẽ?

¹³ Ní ea égè bàà kà nú eé láá nó lọl ló bel dòòle ló Pọ́ọ̀l dú gè kọọ̀, à kiilà bug gbò nen kilma ló tã̀àgã̀ e gã́bug nen ié deè nieí. À ólò tàvala ló gã́bug nen ge zìgà kọọ̀ bõ̀ònatõ̀ò e láá túè va siimàè tóm. Pọ́ọ̀l émí kọọ̀: “Be kpóó tọ kọ́, ‘Boo bée kọ nda níì bá nì, nda ní dṹùnà nom kpá ló,’ níá náa náa kọ á gá dṹùnànà nom kpá ló. Vaá be tṍ kọ, ‘Boo bée kọ nda níì súú dẽe nì, nda ní dṹùnà nom kpá ló,’ níá náa náa kọ á gá dṹùnànà nom kpá ló.” (1 Kọ́r. 12:15, 16) Éé ní e Pọ́ọ̀l géè noòmà ẽ?

¹⁴ Be à gá náa ò tú o lóó doolé ló dõòna gbò e bà di mm̀ bõ̀ònatõ̀ò, òó gbóó láá dààmà togó gè bugi togó kọ ó géè ló tọ́ọ̀ kà nú mm̀ bõ̀ònatõ̀ò. Sìgà nen ea di mm̀ bõ̀ònatõ̀ò ólò láá palàge noòmà nu, noo nu, àbèè ge kãa pá vígà. Àé láá tõó ní ló belí kọọ̀ olo nóo láá naanìè belìè va. Níí zógè kọọ̀ ò dúù neǹ kìlmà kpá ló kẽ vaá naa nú mm̀ kuna-kuna bá. (Fíl. 2:3) Sõò, ié ọ̀ẹ̀ dẽe. Be ò kilsĩ́ gè olòó tú o lóó doolé dõòna gbò e bà íe kalì, àé ọọvẹ́ ni ló. Kàsĩ́ òó láá bugi togó belí bé e neǹ tóm Pọ́ọ̀l kọ́ naaá kọọ̀, ó géè ló tọ́ọ̀ kà nú mm̀ bõ̀ònatõ̀ò. Éé ní ea é láá nvèè bá nè ni kọ ó bé nakà bùlàí èl bá ẹ́?

15. Dẹ̀ẹ̀a boo nú ea di mm̀ 1 Kọ́rìnt 12:4-11, éé ní ea bọ́ló kọ é nyimá ea kil ló kọ̀láá íb nènù eé láá ié é?

¹⁵ Bugi togó boo nakà kà kà belí, ea kọ́ọ̀: Jìhóvà beè dõo a nyómá káí nè sìgà gbò níí Kráìst e ba beè di mm̀ túá gbò gbááá mm̀ sĩ́deè ea dú dũ̀ùnè, sõò níì dénè gbò e bà géè nyoone nvéè Kráìst ní e ba beè ié tẽ̀ènè íb dõ̀ònùí ẽ́ nì. (Bugi 1 Kọ́rìnt 12:4-11.) Jìhóvà beè nè va kele-kele dõ̀ònù nè kalì gè láá naamá nu, sõò ba beè nvèè ka ló buù kà gbò níí  Kráìstí. Deè nieí, náa dú gè nèi nyómá káí mm̀ sĩ́deè ea dú dũ̀ùnè. Sõò èé láá nó nu lọl ló. Níì dénè bẹ̀ì ní e íè tẽ̀ènè íb kalìe nì, sõò Jìhóvà nveè ka ló dénè bẹ̀ì.

16. Mókà ã̀àne e neǹ tóm Pọ́ọ̀l ne ní ea dú bíi kọ é tú siimá tóm ẽ́?

¹⁶ Tãa vó e túù bẹẹ lóó doolé ló dõòna gbò níí Kráìst, à dú bíi kọ é tú ã̀àne e Pọ́ọ̀l ne siimá tóm, ea kọ́ọ̀: “Ní e a dì á palà ge ẹ̀b láb e ẹlẹ gé láví. Na tóm sõò, be à ẽ́égá, à é gboó dú gè kọ à gé ẽ́égá boo lé e ẹlẹ beè naa, e bè níì gè tú a ló doole ló dõòna nen nì.”—Gàl. 6:4.

17. Mósĩ́ deè ní eé láá ié dọ̀ bélè lọl ló ã̀àneè Pọ́ọ̀l ẹ?

¹⁷ Be à gá náa è tú ã̀àne e Pọ́ọ̀l ne tú ẹ̀bmá bẹẹ gbò láb, èé gbóó láá mòn kọọ̀ beele íè kele íb dõ̀ònù nè kalì e dõòna gbò náa íe. Dì belí nu dòòmà bá, sìgà neǹ kànen náa gé láá palàge noòmà nu tṍó ea di boo ketõ̀ò ge tõo nè lòbèl, sõò, àé láá palàge kọ́ kpẹ̀a leevè. Àbèè kọọ̀ náa gé láá palàge noo nu leevè belí dõòna kà gbò kànen e bà di mm̀ ba bõ̀ònatõ̀ò, sõò, àé láá dú nen e bà palàge nyimáe ló kọ à ólò vùlè pá vígà vaá bùlà nú ea kuu dõòna gbò, vaá à ólò valí ló pá vígà ge gbĩ́ dùùlà bá deè tṍ ea aa mm̀ Kpá Káí lọ̀líé bá. Àbèè kọọ̀ bà nyímáe ló kọ à ólò láá kolí kyáà. (Híb. 13:2, 16) Tṍó e nyímà ló nú e beele é láá naa, àé náa kọọ̀ nyíéi á ẹẹ kọ à íe tóm e beele é láá sí mm̀ bõ̀ònatõ̀ò. Vaá àé náa kọ é gá bẹ́ nyíe ló dõòna kà gbò vígà e bà íe nènù ea dú kele ló ní e beele íè.

18. Éé ní eé náa kọbé è láá noòmà nu leevè e?

¹⁸ Kọ̀láá kà dọ̀ tóm e íè mm̀ bõ̀ònatõ̀ò, à bọ́ló kọ á tàn dénè bẹ̀ì ge bọ̀ọ̀vẹ̀ gbàà bẹẹ sìtóm vaá sìm kilsĩ́ mm̀ bẹẹ kalì bá gè siimá tóm. Kọbé è láá sìm kilsĩ́, Jìhóvà dì ea gé búmái tení dú ló a bõ̀ònatõ̀ò. Dì belí nu dòòmà bá, bẹẹ gbò nònù èèlè nyíè zẹ̀ẹ̀ sè ólò noòmài bé eé láá palàge kọ́ kpẹ̀a naa. É kọọ̀ ò gé piigà ge tú gbò búmaá siimá tóm leevè?

19. Éé ní eé náa kọbé è láá sìm tùlà ge sí Tọọ̀ Kpá Ea Dì Nè Gbò E Bà Gé Vee Kpẹ̀a Boǹ Méné ẽ́?

¹⁹ Dõòna kà búma ea dú dũ̀ùnè e ólò ié dú Tọọ̀ Kpá Ea Dì Nè Gbò E Bà Gé Vee Kpẹ̀a Boǹ Méné. Tọ́ọ̀ kpáí dì nè gbò vígà págbálà nè pábia e bà di boo sìtóm kọ̀ kpẹ̀a dénè tṍó e ba ni tóólá 23 tẹlẹ 65 gbáá. Àé láá tõó ní ló belí kọ nóo gé láá simìè tulàẹ̀ nakà nu sẹ̀ẹ̀a sĩ́í. Sõò tãa vó eo bugì togó boo gbò nú ea é náa kọ ó gá láá sì, bugi togó boo gbò nú ea náa vaá ò gbĩ́ì ge sì. Tṍó eo náà vó, àé nveè bá nè ni kọ ó noo gbò nú ea é náa kọ ó láá sìm tùlà. Tení dú ló nvèè bá Jìhòvà nè o sìà kpóó ló, òó gbóó láá naa nú ea beè tõó ní ló belí kọọ̀ náa é láá valíá.

20. Éé ní eé láá nó lọl ló nú ea di mm̀ kpá Róm̀ 12:6-8 é?

²⁰ Ní ea égè taà kà nú eé láá nó lọl ló bel dòòle ló Pọ́ọ̀l di mm̀ kpá Róm̀ 12:6-8. (Bugi.) Kĩí, Pọ́ọ̀l kpáá baa nagé tẽ́ kọọ̀ gbò e bà di mm̀ bõ̀ònatõ̀ò íe kele-kele dõ̀ònù. Sõò kátogóí, à nveè kà mm̀ kọọ̀ èé láá tú kọ̀láá kà dõ̀ònù e íè nvèèmà bá nè bõ̀ònatõ̀ò.

21-22. Éé ní eé láá nó lọl ló nú ea beè naaá ló Robert nè Felice e?

²¹ Bugi togó boo nú ea beè naaá ló ene kà vígà págbálà ea kọlà Robert. Tṍó ea ni sí tóm dõòna kà dó lọ̀l, ba beè kolíe kọ á sí tóm Bẹ́tẹẹ̀l ea di ba dó. Náa kal ló béè kọọ̀ ba beè baatẽ́ nèe kọọ̀ ge nyaaná a tóm náa dú boo béè pọ́lọ́ ea sí, ẹlẹ kọ́ọ̀: “Nyíém náa beè ẹẹ mm̀ gã́bug ẽ́, boo béè  kọọ̀ m beè ié bùlà kọọ̀ ním láà sí nà tóm leevè. À íe gbò tṍó em gáẹ̀ gé aa ló gè sí tóm Bẹ́tẹẹ̀l.” A beè naa và láá kpáá ié zààvà ẹ? Neǹ kànen e bà géè gbá siá tóm beè kẽeé nyíé kọọ̀ Jìhóvà beè bumái mm̀ gbò tóm e géè sìà naa ní eé gbóó láá palàge sí tóm ea dìí bá kátogóí leevè. Robert beè gbóó mòn kọ náa dú bíi gè ká dẽe gbẹẹ́ boo gbò nú ea ni kil nvée, sõò gè ká dẽe gbẹẹ́ boo nú ea é láá naa kátogóí.

²² Vígà Felice Episcopo beè tení nágé bá tẽ̀ènè íb dìtõ̀òí. Ẹlẹ nè a va beè tení aa tọọ̀ kpá Gílẹẹ̀d mm̀ gbáá 1956 vaá bã boo tóm gè kũdẽe ló sẹ́kiùt gbẹá Bolivia. Ba beè ié ene kà nvín mm̀ gbáá 1964. Felice kọ́ọ̀: “A beè tàvàlàí ló gè aa ló tóm ea géè palàge leemáíá. M̀ḿ láá kọọ̀ a beè palàge tãagém mm̀ zivè gbáá. Sõò tení dú ló nvèè Jìhóvà, m beè nyaaná nà láb vaá ká bùlà gbẹẹ́ boo nà ãa tóm dì belí tẹ̀.” É kọọ̀ íb níí Robert sẹ̀ níí Felice ní ea beè naaá ló olo é? É kọọ̀ lóó ni ólò ọọ boo béè kọọ̀ o tóm eo géè sí mm̀ bõ̀ònatõ̀ò tṍó ea kil nvéeá nyááá? Beè vó, òó láá kpáá ié ẹ́ẹ́-ẹẹ̀ nyíé be ò lọl nyíé boo ní ea ni téní kil nvée vaá ká bùlà gbẹẹ́ boo tóm eo é láá sí nè Jìhóvà nè pá vígà kátogóí. Kilsĩ́ gè ié gã́bug nu gè naa, tú gbò dõ̀ònù nè kalì eo íè nvèèmà bá nè dõòna gbò, vaá níí é náa kọ nyíé ni á ẹẹ boo tṍó eo gé nveè bá nè bõ̀ònatõ̀ò.

23. Éé ní eé ólòó bugi togó boo é, vaá éé ní eé ló sọ́l boo mm̀ togó bel ea bẽene níí ẽ́?

²³ Jìhóvà nveè ka ló buù bẹ̀ì. À gbĩ́ kọ é dũunàè pá a tọ. Be è ólòó bugi togó boo nú eé láá naa gè nvèèmà bá nè pá vígà vaá pììgà ge nvèè bá nè va, náa é tõo náí ló belí kọ é gé ló tọ́ọ̀ kà nú mm̀ bõ̀ònatõ̀ò. Sõò èé kọ́ vàẹ kilma ló bé e ẹbvì dõòna gbò e bà di mm̀ bõ̀ònatõ̀ò naa ẽ́? Mósĩ́ deè ní eé láá zogè kọọ̀ è vulè va vaá nvèè va ka ló é? Èé ló sọ́l boo nakà togó bel ea palàge dì bíií mm̀ togó bel ea bẽene níí.