1. Éé ní ea beè náa kọ Jìhóvà á dèm dùm ẽ?

À ÍE tṍó e áá Jìhóvà ní ea beè dìe. Sõò náa beè biilée nyíe. Ẹlẹ beè palàge gbõoma mm̀ kọ̀láá sĩ́deè. Náa kal ló béè vó, Bàrì beè gbĩ́ kọọ̀ dõòna gbò á dé kpéè ló dùm. Vulè e Jìhóvà íe beè naa kọ á dààmà togó ge dèm nu.—Ps. 36:9; 1 Jọ́ọ̀n 4:19.

2. Gbò dèmnù Jìhóvà beè tọá ló Jíízọ̀s nè gbò nyómá tóm naa vàẹ?

² Túá kà, Jìhóvà beè dèm nen ea é zọ́ẹ siá tóm. Tṍóá sõò, a beè gbóó tú a Sã́áná dèmà, “kọ̀láá kà nu,” bii nagé ló gã́bug gãà gbò nyómá tóm. (Kọ́l 1:16) Nyíè Jíízọ̀s beè palàge ẹẹ gè zọ̀ a Tẹ̀ siá tóm. (Pró. 8:30) Vaá nyíè gbò nyómá tóm beè palàge ẹẹ nagé. Ba beè mònmà dẽe tṍó e Jìhóvà nè Jíízọ̀s ea géè zọ̀ẹ siá tómá géè dèm káála nè boo kunukẽ̀í. Éé ní e gbò nyómá tóm beè naa ea zógè kọ nyíé va beè ẹẹ ẹ́? Ba beè “lèèlà Bàrì” tṍó ea dem boo kunukẽ̀í vaá kilsĩ́ gè lèèlàẹ tṍó ea kpáá dèm dõòna kà gbò nu, èlmà tõ̀ò gbò nen. (Jóòb 38:7; Pró. 8:31, ekk.) Buù kà nú e Jìhóvà beè dèm zógè bé ea ié vulè vaá nyimá nu naa.—Ps. 104:24; Róm̀ 1:20.

3. Dì belí bé ea dọa bàlà kẽ naá mm̀ 1 Kọ́rìnt 15:21, 22, éé ní e vààa gyọ́ọ̀ Jíízọ̀s náa kọ á valí é?

³ A beè dú bùlà Jìhóvà kọọ̀ gbò nen á tõó dùm dọ̀ dè-dè gbẹá boo kunukẽ̀ e ẹlẹ beè dèmí. Sõò tṍó e Adàm nè Íìv lọl togó kèbá ba Tẹ̀ ea vulè vaí, náà kyọ̀ nè ú beè gbóó mm-má boo kunukẽ̀í. (Róm̀ 5:12) Jìhóvà beè labví láb  naa vàẹ? Tẽ̀ènè tṍóá, a beè kọ́ sĩ́deè e ẹlẹ é duulàẹ̀ gbò nen. (Jén. 3:15) Jìhóvà beè zìgà kọ àé nèe a Sã́áná, Jíízọ̀s, naamá nu ààa ea é náa kọọ̀ pá nvín Ádàm nè Íìv á di pọ́ì aa bá náà kyọ̀ nè ú. Vaá tṍóá, àé gbóó nè di dùm e bè náa tá kọ̀láá gbò e bà sa gè fã̀ ẹlẹ.—Jọ́ọ̀n 3:16; Róm̀. 6:23; bugi 1 Kọ́rìnt 15:21, 22.

4. Mókà gbò bíb ní eé ló sọ́l boo mm̀ nakà togó belí é?

⁴ Zìgànù Bàrì ge kẽee gbò nen lọl kemà ú náa kọ é bĩiná gã́bug bíb. Dì belí nu dòòmà bá, kẽ̀èà aa kemà ú é nááá naa vàẹ? É kọ èé láá nyimá ló gbò e beè vùlè tṍó e bàé kẽeà aa kemà ú? Mókà gbò sĩ́deè ní e kẽ̀èà aa kemà ú é náa kọ é ié zààvàẹ? Vaá mósĩ́ deè ní e gè bugi togó boo kẽ̀èà aa kemà ú é náa kọ é ié lèèma ló vulè, nyìmànù, nè ĩ̀ìmà e Jìhóvà íe é? Naanii mè é ló sọ́l boo buù kà bíbvá.

5. Éé ní ea náa vaá née ẹbmà dẽe kọọ̀ dénè nen é beè kẽ̀èà aa kemà ú tẽ̀ènè tṍó ẽ́?

⁵ Tṍó e Jìhóvà é kẽee gã́bug gãà gbò nen tení dú ló a Sã́áná, èé láá tuumá kọọ̀ níì dénè ọ̀và ní e bàé kẽea tẽ̀ènè tṍó ẽ́ nì. Éé ní ea náa à dì naa vó é? Boo béè kọọ̀ beè gã́bug nen dõogẽ bú ló m-má boo kunukẽ̀í, àé gyue gbò nen. Vaá Jìhóvà náa ólò naa nú mm̀ sĩ́deè e bè náa kyãa boo kúu, ea é gyue gbò nen. Ẹlẹ nyímá kọọ̀ nú e íè ge kyãa boo kúu kọbé fẹ́ẹ́-fẹẹ̀ ló di. (1 Kọ́r. 14:33) Jìhóvà Bàrì beè palàge nyimá nu vaá ié ĩ̀ìmà tṍó ea géè lọ́ló kẽ zọ̀ Jíízọ̀s siá tóm gè dèm boo kunukẽ̀í nè gbò nen. Jíízọ̀s é beè zogè nàgé áá kà gbò kpãaí mm̀ a Enè Tõ̀ò Gbáá Ge Bẹ̀l, tṍó ea é zọ gbò e bà ful zelí bá bé Ámàgídòn sí tóm ló boo kunukẽ̀í nè ge kẽee gbò nen lọl kemà ú.

6. Dẹ̀ẹ̀a boo nú ea di mm̀ kpá Tóm 24:15, bà mée ní e bàé dí zẹ̀ẹ̀ gbò e Jìhóvà é kẽee lọl kemà ú é?

 ⁶ Ní ea palàge bọọ, àé dú bíi kọọ̀ gbò e bàé ful zelí bá bé Ámàgídòn á noòmà gbò e bàé kẽeà aa kemà ú, nú ea kil ló Boǹ Méné Bàrì nè gbò nú e Jìhóvà bĩiná lọ̀líí bá. Ló éé? Boo béè kọọ̀ gã́bug gbò e bàé kẽeà aa kemà uí dú “gbò pọ́lọ́.” (Bugi Tóm 24:15.) Bàé íe bíi ló gè nyaaná bá ló gã́bug nú mm̀ ba dùm kọbé bà láá ié bélè lọl ló vààa gyọ́ọ̀ Jíízọ̀s vaá ié dùm e bè náa tá. Ni bugi togó boo bé e tóm gè noòmà nuù gã́bug gãà gbò e bà gáà beè zẹ́ẹ́ nyimá ló Jìhóvà é bọọ naa. É kọọ̀ buù nen é íe nen ea é nóòmà nuù ẹlẹ dì belí bé e ólò sẹlẹ nò Kpá Káí naá deè nieí? É kọọ̀ bàé tú ãa gbò e bà kẽeàí nvee mm̀ kele-kele bõ̀ònatõ̀ò vaá noòmà va nu naa ní e baala é láá noòmà nuù dõòna gbò e bàé kẽeà bẽene baala? Àé dú bíi kọ é elá vaá ẹ̀b bé ea é meà naa. Sõò, è nyímà kọọ̀ tṍó e Enè Tõ̀ò Gbáá Bẹbẹ̀l Kráìst é íná kùbmà, “nyìmànù Jìhóvà é gbóó mm-má boo kunukẽ̀í.” (Àìz. 11:9) Èé íe gã́bug tóm ge sì ea é néi zààvà mm̀ enè tõ̀ò gbááá!

7. Éé ní ea náa gbò níí Bàrì é íe tóè sàn tṍó e bà gé nóòmà nuù gbò e bà kẽeà aa kemà ú é?

⁷ Mm̀ Enè Tõ̀ò Gbáá Bẹbẹ̀l Kráìst, àé dú bíi kọọ̀ kọ̀láá kà gbò níí Jìhóvà á kilsĩ́ gè nyaaná bá ló ba dùm kọbé bà láá fã̀e. Dénè ọ̀và é íe tóè sàn boo tṍó e bà gé nveè bá nè gbò e bàé kẽeà aa kemà ú kọ bàá láá bé èl bá pọ́lọ́ bùlà nè pọ́lọ́ tàn vaá tõó boo gbò nòòkúù Jìhóvà. (1 Pít. 3:8) Tọ́ọ̀ kà bàà-bàà bùlà á gé ló, gbò e bàé kẽeà bã mm̀ dùm é gbááá ló gbò gyóòlo Jìhóvà e bà kilmà kpá ló kẽ, e bà gé sí nágé tóm “kọbé [ba] dùùà” ḿḿ-máá.—Fíl. 2:12.

8. Éé ní ea náa èé láá ẹ̀bmà dẽe gè nyimá ló pá bẹẹ tọ nè pá bẹẹ kóò e bà kẽeà aa kemà ú é?

⁸ Boo béè gã́bug bug, eé láá tuumá kọọ̀ gbò e bàé kanà mòn gbò e bàé kẽeà aa kemà úí é nyímá ló ba nen e ba beè vulè ea beè ù. Dì belí nu dòòmà bá, dẹ̀ẹ̀a boo gbò kẽeà aa kemà ú ea beè naaá, à bélí kọọ̀ Jìhóvà é beè kpáá dèm gbò nen mm̀ sĩ́deè e ba sĩ́, lòbèl, nè ba bug togó é bélí bé ea beè zẹ́ẹ́ dì naa besĩ́ bà kalá ù. Kẽ̀èa boo kọọ̀ Jíízọ̀s beè tú ú doolé ló dáá vaá tú kẽ̀èà aa kemà ú doolé ló tṍó e nen kẽeà aa dáá. (Máát. 9:18, 24; Jọ́ọ̀n 11:11-13) Tṍó e gbò nen kẽeà aa dáá, bà ólò kpáá belí bé e ba beè zẹ́ẹ́ dì naa besĩ́ bà kalá daaá, vaá kpáá ié ba bug. Bugi togó boo nu ea beè naaá ló Lázàrọ̀s. A dú ténì dee ea beè ù, vaá a daamà togó ge bèm. Sõò, tṍó e Jíízọ̀s kẽée lọl kemà ú, a vígà pábia beè nyimáe ló tẽ̀ènè tṍóá, vaá Lázàrọ̀s beè gbẹá boo nyimá va ló.—Jọ́ọ̀n 11:38-44; 12:1, 2.

9. Éé ní ea náa vaá gbò e bàé kẽeà aa kemà ú náa é íe bùlà nè nom̀ kpá ló ea gbõoma ẽ́?

⁹ Jìhóvà zigà kọọ̀ tọ́ọ̀ nen ea é dí kè kẽè bẹbẹ̀l Kráìst náa gé kpáá kọọ̀: “Kpá lóm zọ.” (Àìz. 33:24; Róm̀ 6:7) Vóà naa, gbò e bàé kẽee lọl kemà úá é kẽeà bã mm̀ válá kpá ló. Sõò níì tẽ̀ènè tṍóá ní e bàé gbõomaé nì. Be níì vó nì, pá ba tọ nè pá ba kóò náa é nyímá va ló. À bélí kọọ̀ kèbá Enè Tõ̀ò Gbáá Bẹbẹ̀l Kráìst ní e gbò nen é gbóó kilsĩ́ gè gbõoma ńkem kem ẽ́. Tṍó e enè tõ̀ò gbááá ni íná kùbmà, Jíízọ̀s é gbóó òòma kẽè Boǹ Ménéá nè a Tẹ̀. À gá dọ tṍóá, Boǹ Ménéá beè naa kọ̀láá kà nú e Jìhóvà gbĩ́ kọ á naa, bã̀àna gè naa kọọ̀ gbò nen á gbõoma—1 Kọ́r. 15:24-28; Kùùà 20:1-3.

10. Kẽ̀èà aa kemà ú é tọ́á ló olo naa vàẹ?

¹⁰ Ni tṍòmà dẽe ló bé ea é meà naa tṍó eo é kanà mòn gbò eo beè vùlè e bà kẽeà aa kemà ú. É kọọ̀ zààvà eo é íe é naa kọ ó mangã̀ sẹ̀ ge tọ e? É kọọ̀ ẹ́ẹ́-ẹẹ̀ nyíé é náa kọ ó ọlí sọ́l lèèmà Jìhóvà? À íe nú ea é íè ge naaá, níà ge kọọ̀ èé ié kà agẹ bá vulè kilma ló bẹẹ Tẹ̀ ea vulèi nè a Sã́áná ea náa kọọ̀ kẽ̀èà aa kemà ú á valí.

11. Dẹ̀ẹ̀a boo gbò moǹ bel Jíízọ̀s ea di mm̀ kpá Jọ́ọ̀n 5:28, 29, éé ní ea é nááá ló gbò e bà gban tṍ ló Bàrì e?

¹¹ Ni ẹ̀b íb zààvà e gbò e bàé kẽeà é íe tṍó e bà mon kọọ̀ baa láá nyaanàè ba nómá dùm vaá tõó boo gbò nòòkúù lé lab dògò níí Bàrì. Gbò e bà láá nyaaná ba dùm naa vóí é tõó mm̀ Páladaìs dọ̀ dè-dè. Sõò Jìhóvà náa é sọtọ́ deè gbò e bà náa zigà ge nyaaná ba dùm kọ bàá bã mm̀ Páladaìs, be níì vó nì, bàé tãagẽ fẹ́ẹ́-fẹẹ̀ ló ea é dí kĩá—Àìz. 65:20; bugi Jọ́ọ̀n 5:28, 29.

12. Mósĩ́ deè ní e Jìhóvà é tã́ànè dee bá dénè gbò e bà di boo kunukẽ̀í ẽ́?

¹² Kèbá bẹbẹ̀l Boǹ Méné Bàrì, dénè gbò níí Bàrì é gbóó mòn kà kà bel ea di mm̀ kpá Próvẹẹ̀b 10:22 ea kọ́ọ̀: “Tã́áná dee bá ea aa bá Jìhóvà ní ea ólò naa kọọ̀ nen á dú ménéé, vaá naa ólò tú tọ́ọ̀ kà zọ̀ bíi ló.” Boo béè kọọ̀ nyómá Jìhóvà dì va ló, gbò níí Bàrì é kilsĩ́ gè bã̀ méné mm̀ ba gè fã̀ Bàrì, níà ge kọọ̀ bàé kilsĩ́ gè belí Kráìst vaá gbóó gbõoma. (Jọ́ọ̀n 13:15-17; Ẹ́fẹ. 4:23, 24) Buù deeí, bàé kpáá kilsĩ́ gè ié válá ló vaá dú lé gbò nen. Ẹ̀b íb zààvà ea é dí mm̀ dùm tṍóá ã̀! (Jóòb 33:25) Mósĩ́ deè ní e gè bugi togó boo kẽ̀èà aa kemà ú é nveè bá nè ni kátogóí é?

13. Dẹ̀ẹ̀a boo nú ea di mm̀ kpá Psalm 139:1-4, mósĩ́ deè ní e kẽ̀èà aa kemà ú zógè bé e Jìhóvà palàge nyimáí ló naa ẽ́?

¹³ Dì belí bé e beè zẹ́ẹ́ ló sọ́l boo naaá, tṍó e Jìhóvà é kẽee gbò nen lọl kemà ú, àé náa kọ ba bug nè íb nen e ba beè dù á tõo belí bé ea beè dì naa. Zẹ́ẹ́ bugi togó boo nú e níí tõó dọ̀. Bé e Jìhóvà vulè ni naa, náa kọ á tú bé eo beè olòó bugi togó, ló bel, vaá naa nu naa sẹ̀ẹ̀a bùlà. Vóà naa, àé válié ló gè kẽeé ni sẹlẹ kà lèlà bé eo beè dì naa besĩ́ ò kalá ù. Méné Dévìd beè palàge nyimá bé e Jìhóvà nyímá ló buù bẹ̀ì naa. (Bugi Psalm 139:1-4.) À ólò tọáí ló naa vàẹ tṍó e dã́à ból ló bé e Jìhóvà palàge nyimáí ló naa ẽ́?

14. À bọ́ló kọ á tọáí ló naa vàẹ tṍó e bugi togó boo bé e Jìhóvà palàge nyimáí ló naa ẽ́?

¹⁴ Née é íe tã̀àgã̀ bùlà, tṍó e bugì togó boo bé e Jìhóvà nyímáí ló naa. Ló éé? Kẽ̀èà boo kọọ̀ Jìhóvà palàge ẹ̀b nú ea kilíí ló. À nveè ka ló buù kà bẹẹ láb ea túi naamá kele ló dõòna gbò. À ólò palàge nvèè kpíí ló kọ̀láá kà nú e gé téní bá mm̀ dùm ea náa kọ é dú íb nen e dúù. Ẹ̀b bé e nakà belí dĩinéi ló naaà! Ó gá ié bùlà kọọ̀ áá bẹ̀ì dì. Jìhóvà dìí kpàn kọ̀láá dee vaá di kpènà ló gè nvèè bá nèi.—2 Kró. 16:9.

15. Mósĩ́ deè ní e kẽ̀èà aa kemà ú zógè nyìmànù e Jìhóvà íe é?

¹⁵ Tṍó e gbò nen sííá pọ̀ ló ú, ba gbò ọ́b é láá tú bá kpóó siimá va kọ bàá naa nú e bà náa beè gbĩ́ gè naa boo béè pọ̀ ge kọ bàé fẹ́ẹ̀ va. Gbò e Sétàn gé lẹẹlà bel ló ólò tú bá kpóó siimá gbò nen kọ bàá sí pọ́lọ́ ba kóò àbèè ge naa nú e bè  náa lelà. Sõò náa é láá ié kói ló beele. È nyímà kọọ̀ beè bẹẹ gbò ọ́b fẹ́i, Jìhóvà é kẽei lọl kemà ú. (Kùùà 2:10) È palàge àgala boo kọọ̀ tọ́ọ̀ nú e bẹẹ gbò ọ́b náa, náa gé láá òòmài lọl ló gè fã̀ Jìhóvà. (Róm̀ 8:35-39) Jìhóvà a zógè kọọ̀ ẹlẹ palàge nyimàè nu tení dú ló gè nèi ból dẽe sĩ́ kẽ̀èà aa kemà ú! Boo béè vó, pọ̀ náa sííi beè gbò e bà gé nveè sãa kúm Sétàn kọ bàé fẹ́ẹ̀i be née náà nú e bà kọ́. À ne nài gé agẹ ló kọ é láá kilsĩ́ gè bọ́ló dẹ̀lẹ̀ nyíé boo nè Jìhóvà.

16. Mókà gbò bíb ní ea bọ́ló kọ ó bĩìà o bá ẹ́, vaá mósĩ́ deè ní e gbò o ààla é nveè bá nè ni kọ ó nyima bé eo dẹlẹ nyíé boo Jìhóvà naa ẽ́?

¹⁶ Beè gbò ọ́b Jìhóvà kọ́ bàé fẹ́ẹ̀ ni, é kọ òó dẹlẹ nyíé boo kọ Jìhóvà é kẽeé ni lọl kemà ú? Òó láá naa và nyimá ẽ́? Enè sĩ́deè dú gè bĩìà o bá kọọ̀, ‘É kọọ̀ gbò ńkem̀ béèlàfùl em neè buù dee zógè kọọ̀ m̀ dẹlẹ̀ nyíé boo Jìhóvà?’ (Lúùk 16:10) Dõòna kà bíb kọ́ọ̀, ‘É kọọ̀ nà sĩ́deè tõò dùm zógè kọọ̀ m̀ dẹlẹ̀ nyíé boo kọ Jìhóvà zigà kọ àé ẹbvìè nú ea kil ló nà gbò bíi é be m̀ tú Boǹ Méné Bàrì naamá túá kà nú mm̀ dùm?’ (Máát. 6:31-33) Be ò áálá gbò bíbví naa ẽei, à zógè kọọ̀ ò dẹlẹ̀ nyíé boo Jìhóvà, vaá òó dí kpènà ló gè bé èl bá kọ̀láá kà ẹ̀bmà ea dú ní sĩ́.—Pró. 3:5, 6.

17. (a) Mósĩ́ deè ní e kẽ̀èà aa kemà ú zógè kọọ̀ Jìhóvà íe ĩ̀ìmà ẽ? (b) Mósĩ́ deè ní eé láá zogè kọ è zaavàẹ̀ ló íè ĩ̀ìmà Jìhóvà ẹ?

¹⁷ Jìhóvà a noo dee nè tṍó ea é nveemà kùbma ló nakà pọ́lọ́ bàlà booí. (Máát. 24:36) Jìhóvà náa é dõogẽ labví láb e bè a tṍó gáà ega. À palàge tànie gè kẽee gbò nen lọl kemà ú, sõò à íe ĩ̀ìmà. (Jóòb 14:14, 15) À gé élá bànà kà lèlà tṍó ea beè noo gè kẽeé va lọl kemà ú. (Jóòn 5:28) À bọ́ló kọ é õá Jìhòvà zaa ló a ĩ̀ìmà. Nyimá kọọ̀, boo béè kọọ̀ Jìhóvà íe ĩ̀ìmà, gã́bug nen, bií nágé ló beele á íe nèà deè ge “ọgá ló ba pọ́lọ́.” (2 Pít. 3:9) Jìhóvà gbĩ́ kọọ̀ gã́bug nen á ié dùm e bè náa tá. Vóà naa, naanii mè é nveè ka ló a gè ié ĩ̀ìmà. Mósĩ́ deè e? Tení dú ló gè tú agẹ bá gbĩimá “gbò e Bàrì beè sà kọ bà é ié dùm e bè naa tá” nè ge nvèè bá nè va kọ bàá vùlè Jìhòvà vaá fã̀e. (Tóm 13:48) Tṍóá, bàé gbóó ié bélè lọl ló ĩ̀ìmà e Jìhóvà íe, belí nágé beele.

18. Éé ní ea náa èé ié ĩ̀ìmà kilma ló dõòna gbò e?

¹⁸ Jìhóvà é ĩimà elá dọ̀ọ̀mà tṍó e enè  tõ̀ò gbááá é íná kùbmà besĩ́ à kálá ẹ̀bmà dẽe kọọ̀ e gbõoma. Dọ̀ọ̀mà tṍóá, Jìhóvà di kpènà ló gè ia ló bẹẹ pọ́lọ́ nèi. Vóà naa, à bọ́ló kọ é nó a nu dòòmà bá gè ká dẽe gbẹẹ́ boo gbò lé kpãa e dõòna gbò íe vaá è íe ĩ̀ìmà kìlmà vá ló. Bugi togó boo nú dòòmà bá ea kil ló ene kà vígà pábia e tã̀àgã̀ bùlà beè naa kọ a dóm á gá siná nònù. Vígàí kọ́ọ̀: “Nii beè palàge zọ̀m. Dì belí pá tọ, dénè nú e beè noo kọ èé náá dì deè sĩ́ beè nyaaá mm̀ bù ló.” Sõò kèbá dénè dìtõ̀òí, a va ea palàge vùlèèá beè kilsĩ́ gè ié ĩ̀ìmà kilma ló a dóm. A beè dẹ̀ẹ̀a boo Jìhóvà, vaá lóóe náa beè ọọ. Dì belí Jìhóvà, a beè lọ̀l nyíé boo gbò tã̀àgã̀í vaá ká dẽe gbẹẹ́ boo gbò lé nu ea dóm géè naa. À kọ́ọ̀: “Ńdáà dóm beè ié gi gbò lé kpãa, vaá à gé piigà bé a kpóó sim tùlà naa gè aa bá tã̀àgã̀ bùlà.” À palàge dú bíi kọ é ié ĩ̀ìmà ló pá bẹẹ tọ àbèè gbò e bà di mm̀ bõ̀ònatõ̀ò e bà gé piigà gè bé èlbá gbò nu ànà-ànà!

19. Éé ní e beele é bééláfùl ge naa ẽ́?

¹⁹ Nyíè Jíízọ̀s nè gbò nyómá tóm beè ẹẹ tṍó e Bàrì beè dèm boo kunukẽ̀í. Sõò ni doomà dẽe ló íb zààvà e bàé íe tṍó e gbò e bà gbõoma, e bà vulè Jìhóvà vaá fã̀e é ḿḿ-má boo kunukẽ̀í. Dòòmà dẽe ló íb zààvà e gbò e bàé zọ Kráìst bẹl gbẹá káála é ié tṍó e bà mon gã́bug gbò nen e bà íe bélè lọl ló ba bẹbẹ̀l. (Kùùà 4:4, 9-11; 5:9, 10) Ni doomà dẽe ló tṍó e tó zààvà é nyááá ló tó bììla nyíé, tṍó e zọ̀ló, bã̀àgã̀, nè ú náa é di nà tọ́ọ̀ dee. (Kùùà 21:4) Dọ̀ọ̀mà tṍóá, naanii mè é bééláfùl ge nó bẹẹ Tẹ̀ ea íe vulè, nyìmànù, nè ĩ̀ìmà. Be ò náa vó, òó kilsĩ́ gè ié zààvà kọ̀láá bé eo kpeè sĩ́ ló tã̀àgã̀ naa. (Jém̀z 1:2-4) È palàge õá Jìhóvà zaa kọ à zigà zìgà kọọ̀, “gbò nen . . . é kẽeà aa ke mà ú”!—Tóm 24:15.