1. Éé ní e Jìhóvà ne buù kà pá a gyóòlo e bà bọ́ló dẹ̀lẹ̀ nyíé boo é?

JÌHÓVÀ ne deè buù kà pá a gyóòlo e bà bọ́ló dẹ̀lẹ̀ nyíé boo kọ bàá ié tóm gè sí mm̀ bõ̀ònatõ̀ò boo béè kọ à vulè va. Náa kal ló béè kọọ̀ bẹẹ tóm dú kele-kele, à nveè ka ló buù bẹ̀ì vaá dénè bẹ̀ì íè bíi ló ene. Neǹ tóm Pọ́ọ̀l nveè bá nèi kọ é dã́ ból ló bé e níí palàge dú bíi naa. Mósĩ́ deè e?

2. Dẹ̀ẹ̀a boo nú ea di mm̀ kpá Ẹ́fẹsọ̀s 4:16, éé ní ea náa vaá à dú bíi kọ é nvèè ka ló ene vaá gbá siá tómé?

² Dẹ̀ẹ̀a boo bé e dọ̀ Kpá Káí e togó belí aa m kọ́ naaá, Pọ́ọ̀l baatẽ́ kọọ̀ tọ́ọ̀ bẹ̀ì née gé láá kọ́ nè dõòna kà gyóòlo Jìhóvà kọọ̀: “Nóo dú bíí ló!” (1 Kọ́r. 12:21) Be è gbĩ́ì kọọ̀ fẹ́ẹ́-fẹẹ̀ ló á di mm̀ bõ̀ònatõ̀ò, èé íè ge nvèè ka ló ene vaá zọ̀ va siá tóm. (Bugi Ẹ́fẹsọ̀s 4:16.) Tṍó e síà tóm mm̀ gbaa ló, bõ̀ònatõ̀ò ólò gbóó aga ló vaá kilsĩ́ mm̀ vulà.

3. Éé ní eé ló sọ́l boo mm̀ nakà togó belí é?

³ Mókà gbò sĩ́deè ní eé láá zogè kọ è nvèè ka ló dõòna kà pá vígà e bà di mm̀ bõ̀ònatõ̀ò ẽ? Mm̀ nakà togó belí, èé ló sọ́l boo sĩ́deè e gbò kànen mm̀ bõ̀ònatõ̀ò ólò nvèè ka ló ene. Vaá è baatẽ́ bé e dénè bẹ̀ì é láá zogè kọ è nveenìè ka ló pá vígà e bà gáà ili àbèe ge iá naa. Vaá dee deè nvée, èé nó bé eé láá zogè kọ è vulèè gbò e bà náa ólò láá ló bẹẹ dém bel leevè naa.

4. Mókà ã̀àne e Pọ́ọ̀l beè nè ea di mm̀ kpá Róm̀ 12:10 ní ea bọ́ló kọ gbò kànen á siimá tómé?

⁴ Nyómá káí ní e Jìhóvà beè sààmà gbò kànen mm̀  bõ̀ònatõ̀ò ẽ. Sõò, buù ọ̀và íe kele-kele íb dõ̀ònù. (1 Kọ́r. 12:17, 18) Àé láá dú kọọ̀ bà ã́àa íbá ló sìgà ọ̀và naamá neǹ kànen vaá à gáà nyima gã́bug nu. Zọ̀ ló àbèè áná é láá naa kọọ̀ sìgà ọ̀và á gá naa gã́bug nu. Náa kal ló béè vó, náa bọ́ló kọọ̀ enè neǹ kànen á kọ́ nè dõòna kà neǹ kànen kọọ̀, “Nóo dú bíí ló!” Tãa vó, à bọ́ló kọọ̀ buù ọ̀và á tú ã̀àne e Pọ́ọ̀l beè nè siimá tóm ea di mm̀ kpá Róm̀ 12:10.—Bugi.

5. Mósĩ́ deè ní e gbò kànen mm̀ bõ̀ònatõ̀ò ólò zogè kọ bà nveenìè ka ló enè ẽ́, vaá éé ní ea náa vaá à dú bíi kọ bàá naa vó é?

⁵ Gbò kànen ólò zogè kọ bà nveenìè ka ló ene tení dú ló gè pãane tṍ ló ene leevè. Níí palàge dú bíi tṍó e gbò kànen íe bila ló bel ea palàge aga bá. Ló éé? Kpá Tọ Kùdẽe Ló níí October 1, 1988 kọ́ọ̀: “Gbò kànen á nvèè kpíí ló kọọ̀ Kráìst ólò tení dú ló nyómá káí, vaá naa kọọ̀ enè neǹ kànen zẹ̀ẹ̀ gbò kànen mm̀ bõ̀ònatõ̀ò á kẽ̀èa boo nòòkúu ea di mm̀ Kpá Káí, ea é láá nvèè bá nè va kọ bàá nyimá lèlà nu gè naa. (Tóm 15:6-15) Nyómá káí ólò nvèè bá nè dénè gbò kànen mm̀ bõ̀ònatõ̀ò, níì áá enè nen nì.”

6. Mósĩ́ deè ní e gbò kànen é láá siá tóm mm̀ gbaa ló é, vaá mósĩ́ deè ní e bõ̀ònatõ̀ò ólò ié dọ̀ bélè lọl ló tṍó e bà náa vó é?

⁶ Neǹ kànen ea nveè ka ló dõòna kà neǹ kànen náa ólò gbĩ́ gè gyà sĩ́ ló bel dénè tṍó e gbò kànen íe bìla ló bel. Náa ólò kọọ̀ áá ẹlẹ é gbáẹ̀ dénè bel lòe, vaá náa ólò tuumá kọ áá ńlẹ́ẹ̀ bel ní ea lelà kọ̀láá tṍó ẽ́. Tãa vó, à ólò tú kìlmà kpá ló kẽ kọọmá a bùlà. À ólò palàge pãane tṍ ló bel e dõòna gbò ló. Bọọ èlmà tõ̀ò, à ólò ié tàn ge tú gbò nòòkúu ea di mm̀ Kpá Káí nvèèmà bá nè dõòna gbò vaá di kpènà ló gè nyoone nvéè tùle ea aa bá “nen tóm e a nyimá nu vaá bọ́ ló dẹ̀lẹ̀ nyíe boo.” (Máát. 24:45-47) Tṍó e gbò kànen zógè kọ bà vulèè vaá nveenìè ka ló ene mm̀ ba bila ló bel, nyómá káí Bàrì ólò dì vá ló vaá nvèè bá nè va kọ bàá láá nè béèlàfùl ea é síè kpóó ló bõ̀ònatõ̀ò—Jém̀z 3:17, 18.

7. Jíízọ̀s beè ẹ̀b gbò e bà gáà ili àbèè ge iá naa vàẹ?

⁷ Deè nieí, è íè gbò dóm nè va nè pá tọ e bà di mm̀ bõ̀ònatõ̀ò. Sõò, à íe nagé gã́bug pá vígà e bà gáà ilí àbèè ge iá. À bọ́ló kọ é ẹ̀b gbò e bà gáà ili àbèè ge iá naa vàẹ? À bọ́ló kọ é nó gè ẹ̀b va belí bé e Jíízọ̀s beè ẹ̀b va naa. Jíízọ̀s náa beè ilí va tṍó ea géè sí a tóm kọ̀ kpẹ̀a gbẹá boo kunukẽ̀í. Náa beè ilí va vaá a beè ká bùlà gbẹẹ́ boo a sìtóm kọ̀ kpẹ̀a. Jíízọ̀s náa beè noòmà kọọ̀ nen é íè ge ilí àbèè ge iá àbèè ge kọọ̀ nen á gá ilí àbèè ge iá. Sõò, a beè kọọ̀ sìgà gbò níí Kráìst é láá bééláfùl kọ bà náa gé ílìè àbèè ge iàẹ̀. (Máát. 19:11, 12) Jíízọ̀s beè nvèè ka ló gbò e bà náa beè ilí àbèè ge iá. Náa beè ẹ̀b va belí kọ bàá gé ló tọ́ọ̀ nu àbèè kọ à íe nú ea peè va.

8. Dẹ̀ẹ̀a boo nú ea dí mm̀ 1 Kọ́rìnt 7:7-9, éé ní e Pọ́ọ̀l beè siè kpóó ló pá vígà kọọ̀ bàá bugi togó boo é?

⁸ Dì belí Jíízọ̀s, neǹ tóm Pọ́ọ̀l náa beè ili va tṍó ea géè sí a tóm gè kọ́ kpẹ̀a. Pọ́ọ̀l náa beè noòmà kọọ̀ à dú pọ́lọ́ be neǹ vígà ilí àbèè ge iá. A beè nyimá kọọ̀ buù nen é ne ńlẹ́ẹ̀ béèlàfùl. Sõò Pọ́ọ̀l beè siè kpóó ló pá vígà kọ bàá bugi togó boo be bàé láá fã̀ Jìhóvà dì belí gbò e bà náa ilí àbèè ge iá. (Bugi 1 Kọ́rìnt 7:7-9.) Vóà naa, Pọ́ọ̀l náa beè ẹ̀b gbò e bà náa ilí àbèè gé iá kọ bàá gé ló tọ́ọ̀ nu. Kàsĩ́, a beè sà nvín ãa Tímotì ea gáà ili va kọ á ẹ̀b nú ea kil ló gã́bug tóm mm̀ bõ̀ònatõ̀ò. * (Fíl. 2:19-22) È gbóò palàge mòn kọọ̀ à dú lọ̀ ge tuumá kọọ̀ neǹ vígà sim tùlà àbèè kọ náa sim tùlà boo béè kọ a ílí àbèè kọọ̀ a gáà ili—1 Kọ́r. 7:32-35, 38.

9. Éé ní eé láá kọ́ kilma ló ílà dóm nè va nè ge kọọ̀ nen náa ílí abèè ge iá ẹ́?

⁹ Jíízọ̀s àbèè Pọ́ọ̀l náa beè noòmà gbò e bà gé nyoone nvéè Kráìst kọ bàé íè ge ilí àbèè ge iá àbèè kọ bà náa é íè ge ilí àbèè ge iá. Beè vó, éé ní eé láá kọ́ kilma ló ílà dóm nè va àbèè ge kọ nen náa ílí àbèè ge iá ẹ́? Kpá Tọ Kùdẽe Ló níí October 1, 2012, palàge aalá bíbví. À baatẽ́ kọọ̀: “Mm̀ kà kà, àé láá dú gè baatẽ́ [ílà dóm nè va àbèè ge kọ nen náa ílí àbèè ge iá] naamá dõ̀ònù e Bàrì ne. . . . Jìhóvà náa ẹb gè kọọ̀ nen e [gáà ili àbèè ge iá] á siiá kẹ́ẹ àbèè kọ à biile nyíè boo béè kọ à  gáà ili àbèè ge iá.” Ge tú níí sẹ̀ẹ̀a bùlà, à dú bíi kọ é nvèè ka ló pá vígà e bà gáà ili àbèè ge iá e bà di mm̀ bõ̀ònatõ̀ò.

10. Mósĩ́ deè ní eé láá zogè kọ è nveenìè ka ló pá vígà e bà gáà ili àbèè ge iá ẹ́?

¹⁰ Mósĩ́ deè ní eé láá zogè kọ è nveenìè ka ló dìtõ̀ò nè bé e nu tọ́á ló bẹẹ gbò vígà e bà gáà ilì abèè ge iá naa ẽ́? Àé dú lé be è ólòó kẽea boo kọọ̀ sìgà gbò vígàí a bééláfùl gè tõo naa vó. Àé láá leemá sìgà pá vígà ge ili àbèè ge iá, sõò, bà gáà mòn lèlà nen ea leemá va. Boo tṍó e dóm àbèè va a ú aa ló sìgà nen. Kọ̀láá bé ea dì naa, é kọ gbò e bà di mm̀ bõ̀ònatõ̀ò é gbóó bĩiná pá vígàí nú ea náa bà gáà ili àbèè ge iá, àbèè gè kọ́ nè va kọ bàé gbĩ́è nen e bàé ílí àbèè ge iá neè va? À dú kà-kà kọọ̀ sìgà pá vígà é láá ié bíi ló nakà nvèè báí. Sõò be bà gáà kọ nè ni kọ ó naa vó vaá ò dõogẽ naa, olo bulà kọ àé tọ́á ló pá vígà e bà gáà ili àbèè ge iáí naa vàẹ? (1 Tẹ̀s. 4:11; 1 Tím. 5:13) Naanii mè é zẹ́ẹ́ ló sọ́l boo sìgà gbò bel ea aa gã́ bẹẹ gbò vígà e bà gáà ilì àbèè gè iá e bà bọ́ló dẹ̀lẹ̀ nyíé boo.

11-12. Mósĩ́ deè ní e nú e náà é láá ọọvẹ ló gbò e bà gáà ili àbèè ge íá ẹ́?

¹¹ Ene kà vígà págbálà ea ólò kùdẽè ló sẹ́kiùt ea gé palàge sí a tóm leevè ea gáà ili va mon kọọ̀ gã́bug bélè di ló gè kọ nen gáà ili àbèè ge iá. Sõò a beè kọọ̀, à ólò dú nuù ọ́ọ́-ọọ̀ ló tṍó e pá vígà págbálà nè pábia bĩ́ìnàèe kọọ̀: “Éé ní ea náa ò gáà ili va ẹ́?” Ene kà vígà págbálà ea ólò sí tóm Bẹ́tẹẹ̀l ea gáà ili va kọ́ọ̀: “Sìgà tṍó, pá vígà págbálà nè pábia ólò naa kọ á tõo ḿ ló belí kọọ̀ à bọ́ló gè tó sàn gbò e bà gáà ili àbèè ge iá. Níí e láá náa kọọ̀ nen á ẹ̀b kọọ̀ ge kọ nen náa ili àbèè ge iá dú tã̀àgã̀ tãa vó ea dú gè ẹ̀b naamá dõ̀ònù.”

¹² Ene kà vígà pábia ea ólò sí tóm Bẹ́tẹẹ̀l beè kọọ̀: “Sìgà pá vígà ólò tuumá kọọ̀ kọ̀láá kà neǹ vígà ea gáà ili àbèè ge iá gé gbĩ́ nen ea é ílí àbèè ge iá àbèè gè kọọ̀ kọ̀láá kà vígà ea gáà ili àbèè ge iá ólò tú kè sẹ̀lẹ̀nù naamá kiẽ́e e bàé gbĩ́ nen e bàé ílí àbèè ge iá. À íe deé em beè sí dõòna ketõ̀ò boo béè nà tóm Bẹ́tẹẹ̀l, m beè iná kiẽ́e kà lèlà bílá deè deé e bà ólò sẹlẹ ba nònù. Vígà pábia em beè tõó a tọ beè kọ́ nèm kọọ̀, à íe bàà kà vígà págbálà e bà di mm̀ ba bõ̀ònatõ̀ò e bàé láá dú nà sĩ́ gbò. A beè kọ́ nèm kọọ̀ náa gé gbĩ́è nen ea é ílím nèm. Sõò tṍó e ínà Kíǹdòm Họ́ọ̀l, a beè faalám siimá ló pálàa kà vígà págbálàa. Mm̀ kà kà, níá beè palàge siimà kẹ́ẹ̀ nda nè bàà kà vígà págbálàa.”

13. Mókà gbò nu dòòmà bá ní ea beè siè kpóó ló ene kà vígà pábia ea gáà iá dóm ẽ́?

¹³ Dõòna kà vígà pábia ea ólò sí tóm Bẹ́tẹẹ̀l kó nágé kọọ̀: “Nda nyímà ló sìgà gbò e ba ni tú gã́bug gbáá siimá tóm gyã̀ deè sĩ́ tóm e bà palàge nyimá nu, tú ba tóm naamá nú e bà sẹẹa sĩ́, tú lóó vaamá gyọ́ọ, e bà íe ẹ́ẹ́-ẹẹ̀ nyíe vaá dì e bà gé nveè bá nè bõ̀ònatõ̀ò. Bà tõó boo bá ea bọ́ló dì belí gbò e bà gáà ili àbèè ge iá. Bà náa bugi togó kọ bà léèlìè elìè dõòna gbò boo béè kọọ̀ bà náa ílìè àbèè ge iàẹ̀, àbèè ge bugi togó kọọ̀ nyíé va náa é ẹ́ẹ̀lìè boo béè kọọ̀ bà náa ílìè àbèè ge iàẹ̀ nè ge ié gbò pá nvín.” Níà nú ea náa vaá à dù nuù ẹ́ẹ́-ẹẹ̀ nyíe gè di mm̀ bõ̀ònatõ̀ò e kọ̀láá nen fã dẽè ene vaá nvèè ka ló ene ẽ́. Nyimá kọọ̀ pá vígà náa gé nveemà ni lẹ́ àbèè ge bẹ́ ni nyíe ló àbèè ge ẹ̀b ni tẹlẹ kẽ àbèè ge dàlà ní boo èlmà kọ̀láá nen. Nyima kọọ̀ bà palàge vulè ni.

14. Mósĩ́ deè ní eé láá zogè kọ è nveenìè ka ló gbò e bà gáà ili àbèè ge iá ẹ́?

¹⁴ Nyíè bẹẹ gbò vígà e bà gáà ili àbèè gé iá ólò ẹẹ tṍó e nveè va ka ló boo béè gbò  lé kpãa e bà íe, e bè níì ge kọọ̀ bà gáà ili àbèè ge iá nì. Tãa vó e ẹb va tẹlẹ kẽ, èé nveè va ka ló boo béè ba bọ́ọ̀ló dẹ̀lẹ̀ nyíé boo. Vó é náa kọọ̀, a gá tõó ló gbò vígà e bà gáà ili àbèè ge iá belí kọ è gé kọ́ nè va kọọ̀: “Nóo dú bíí ló!” (1 Kọ́r. 12:21) Tãa vó, bàé nyímá kọọ̀ nyíéi palàge ẹẹ vá ló vaá è nveenìè ka ló tóm e bà gé sí mm̀ bõ̀ònatõ̀ò.

15. Éé ní e sìgà gbò ni nyaaná bá ló boo béè ge bọ̀ọ̀vẹ̀ gbàà ba sìtóm kọ̀ kpẹ̀a ẹ́?

¹⁵ Mm̀ gbò gbáá ea kil nvéeá, gã́bug pá vígà a tú gè ló dõòna kà dém bel naamá nú e bà sẹẹ̀a sĩ́ kọbé bà láá bọ̀ọ̀vẹ̀ gbàà ba sìtóm kọ̀ kpẹ̀a. Ge naa vó é bĩ́íná kọ bàá nyaaná bá ló gã́bug nú mm̀ ba dùm. Gbò vígà págbálà nè pábiaí a aa mm̀ bõ̀ònatõ̀ò e bà ólò ló ba dém bel kil dõòna kà bõ̀ònatõ̀ò e bà ólò ló dõòna kà dém bel e bíi kọ̀ kpẹ̀a ea dì palàge bọọ. (Tóm 16:9) Níì béèlàfùl e buù nen ólò ne boo a lóó boo béè ge fã̀ Jìhóvà leevè. Náa kal ló béè kọọ̀ à ólò tú va gã́bug gbáá bá kọbé bà láá ló ãa dém belá leevè. Ba gbò lé kpãa nè nú e ba ni téní bá ólò siè kpóó ló pá vígà e bà di mm̀ bõ̀ònatõ̀ò. Nyíéi palàge ẹẹ ló pá vígà págbálà nè pábia e bà tú lóó vaamá gyọ́ọí!

16. Éé ní e gbò kànen é ẹbmà be nen sim tùlà ge dú neǹ kànen àbèè neǹ nvèè bá sìtóm ẽ́?

¹⁶ Gbò kànen e bà di mm̀ bõ̀ònatõ̀ò á gá beeláful kọ bà náa gé íè bá ló vígà págbálà naamá neǹ kànen àbèè neǹ nvèè bá sìtóm, boo béè kọ bà náa láá ló dém bel ba bõ̀ònatõ̀ò leevè. Gbò kànen e bà di mm̀ bõ̀ònatõ̀ò á tú gbò kpãa e Kpá Káí ténmá kọ neǹ vígà é sim tùlà besĩ́ à kálá dú neǹ kànen àbèè neǹ nvèè bá sìtóm ẹ̀bmàe, e bè níì bé ea palàge ló dém bel e bà ólò sẹ̀ẹ̀mà ba nònù naa nì.—1 Tím. 3:1-10, 12, 13; Táítọ̀s 1:5-9.

17. Mókà gbò bíb ní e sìgà pá tọ ólò kpee sĩ́ ló tṍó e bà kil dõòna kà dó é?

¹⁷ Sìgà pá tọ e bà ólò sí nònù a nyaaná tõ̀ò kil dõòna kà dó boo béè ge teá tã̀àgã̀ ea di mm̀ ba dó. Tṍó ea meà naa vó, ba gbò nvín ólò gbóó láá sí tọọ̀ kpá e dém bel dóá ní e bà ólò sẹ̀ẹ̀màe. Gbò tẹ̀ nè kà e íe bíi ló gè nó ãa dém bel kọbé bà láá íe tóm gè sì. Vaá be à gá náa à ié bõ̀ònatõ̀ò e bà ólò ló ba dém bel ea di kiẽ́e e bà kilá à? Mókà bõ̀ònatõ̀ò ní e pá tọí é sì é? É kọ àé dú bõ̀ònatõ̀ò e bà ólò ló dém bel dóá sẹ̀ àé dú níí mm̀ baálà dém bel é?

18. Dẹ̀ẹ̀a boo nú ea di mm̀ kpá Gàlésìà 6:5, mósĩ́ deè ní eé láá zogè kọọ̀ è nveenìè ka ló béèlàfùl e togó boo tọ ne ẽ́?

¹⁸ Togó boo tọ é íè ge nè béèlàfùl kilma ló bõ̀ònatõ̀ò e pá a tọ é sí. Boo béè kọọ̀ níí dú béèlàfùl e buù nen é né boo a lóó, à íè ge bugi togó boo nú ea é palàge lee ló pá a tọ. (Bugi Gàlésìà 6:5.) À dú bíi  kọ é fã̀ dẽè béèlàfùl e togó boo tọ ne. Èé nveè ka ló kọ̀láá kà béèlàfùl ea ne, vaá tú bàà bá tuumá pá tọí vaá vùlè va dì belí gbò e bà dṹùnà bẹẹ bõ̀ònatõ̀ò.—Róm̀ 15:7.

19. Éé ní e togó boo tọ é tú ọ̀ẹ̀ dẽè nè tã̀àgã ló Bàrì bùgmà togó boo é?

¹⁹ Mm̀ sìgà gbò dìtõ̀ò, sìgà pá tọ é láá di mm̀ bõ̀ònatõ̀ò e bà ólò ló dém bel kà nè tẹ̀á, sõò bà gbò nvín náa láá palàge ló dém belá. Be à gá náa bõ̀ònatõ̀òa di kiẽ́e e bà gé ló dém bel dóá, níí é náa kọ á tàvala ló gbò pá nvíná gè dã́ ból ló gbò bel e bà gé ló gbẹá nònù ea é náa kọ bàá gá láá dũ̀ùà bã kpàn Jìhóvà. Ló éé? Boo béè kọọ̀ gbò pá nvíní é láá sí tọọ̀ kpá e bà gé tú dém bel dóá sẹ̀ẹ̀mà, e bè níì dém bel e ba kà nè ba tẹ̀ ólò lò nì. Tṍó ea meà naa vó, gbò togó boo tọ á tú ọ̀ẹ̀ dẽe bùgmà togó boo vaá bàn Jìhóvà kọ á neè va nyìmànù ge láá nèèmà lé béèlàfùl kilma ló gè nvèè bá nè ba gbò nvín kọ bàá láá dũ̀ùà bã kpàn Jìhóvà nè pá a gbò. Àé dú bíi kọ tẹ̀ nè kà á noòmà ba gbò nvín kọ bàá láá palàge ló baálà dém àbèè ge àà kil bõ̀ònatõ̀ò e bà ólò ló dém bel e ba gbò nvín palàge dã̀. Kọ̀láá kà béèlàfùl e togó boo tọí ne, bõ̀ònatõ̀ò e bà sa gè kìl á nvèè va ka ló vaá vùlè va.

20. Mósĩ́ deè ní eé láá zogè kọọ̀ è nveenìè ka ló bẹẹ gbò vígà e bà gé nó ãa dém bel é?

²⁰ Boo béè gbò bug e ni ló sọ́l booí, pá vígà págbálà nè pábia e bà di gã́bug bõ̀ònatõ̀ò dì e bà gé piigà ge nó gè ló ãa dém bel. Àé láá tàvàlà vá ló gè kọ́ gbò nú ea dì vá bùlà. Sõò, be née káà bùlà gbẹẹ́ boo áá sĩ́deè e bà lóómá ãa dém belí, èé mon bé e bà vulè Jìhóvà vaá íe tàn ge fã̀e naa. Be è mon gbò lé-lé kpãaí, àé náa kọ é palàge nvèè ka ló vaá fã̀ dẽè pá vígàí. Née é kọ́ọ̀: “Nóo dú bíí ló!” boo béè kọọ̀ bà náa láá ló beélè dém bel leevè.

21-22. Mókà kele íb nèà deè ní e íèè e?

²¹ È ṍà Jìhóvà zaa kọ à ne tóm buù bẹ̀ì ge sí mm̀ a bõ̀ònatõ̀ò. Be è dúù págbálà àbèè pábia, e ílí àbèè e íá, è gáà ili àbèè ge ia, e ána àbèè kọ è di dí ãa, àbèè kọ è gé láá ló enè íb dém bel leevè àbèè kọ née láà palàge lò, Jìhóvà nveè ka ló dénè bẹ̀ì vaá è ólò nvèè ka ló ene.—Róm̀ 12:4, 5; Kọ́l. 3:10, 11.

²² Naanii mè é kilsĩ́ gè tú bel dòòle ló nuù Pọ́ọ̀l ea kil ló nom̀ kpá ló není siimá tóm. Be è náa vó, àé nveè bá nèi kọ é nyimá ló nú eé láá naa gè siè kpóó ló pá vígà págbálà nè pábia. Vaá àé nveè nàgé bá nèi kọ é olòó vùlè va vaá nvèè va ka ló.