1-2. Dẹ̀ẹ̀a boo nú ea di mm̀ kpá Psalm 34:8, mósĩ́ deè ní eé láá nyimá bé e Jìhóvà dú lé naa ẽ́?

DÒÒMÀ dẽe ló kọọ̀ nen dõo gyã́á eo gáà de tọ́ọ̀ dee nè ni. Òó láá nyimá bé ea meà naa tení dú ló gè ẹ̀bsĩ́, sĩ̀à nù ló, ge gbĩ́ gè nyimá nú e ba beè bùlmà, àbèè ge bĩiná dõòna gbò be à ólò leemá va. Kọ̀láá bé ea dì naa, áá nú eo é náa gè nyimá kọbèè à dú lé àbèè kọ náa dú lé dú gè daalá dém ló.

² Èé láá nyimá bé e Jìhóvà dú lé naa tení dú ló gè bugi Kpá Káí, bẹẹ gbò kpá, nè ge pãane tṍ ló gbò lòbèl e dõòna gbò ne ea kọ́ nú ea kil ló gbò tã́áná dee bá e baala beè ié lọl bá Jìhóvà. Sõò, èé palàge dã́tẽ́ ló bé e Jìhóvà dú lé naa tṍó e ‘dáàlà dém ló.’ (Bugi Psalm 34:8.) Naanii èé baatẽ́ enè sĩ́deè eé láá naamá vó. Be à sẹlẹ è gbĩ́ gè bọ̀ọ̀vẹ̀ gbàà bẹẹ sìtóm nè Jìhóvà, sõò besĩ́ è kálá láá teá tùlà nu sẹ̀ẹ̀a sĩ́á, àé dú bíi kọ é tõó dùm ea válí bá. Be à sẹlẹ, è ólò bọọgẹ̀ bugi nú ea kil ló zìgànù Jíízọ̀s ea kọ́ é gbĩ́ Boǹ Méné Bàrì naamá túá kà, mè Jìhóvà é néi dénè nú ea dúi bíí ló, sõò è gáà mòn kọọ̀ nakà zìgà nùá ḿḿ-má kìlmàí ló. (Máát. 6:33) Náa kal ló béè vó, boo béè zìgà e íè mm̀ zìgànù Jíízọ̀s, è dũunà bá lọl ló bé e zálì nu naa nè bé e síì pííla naa, vaá gbóó bọ̀ọ̀vẹ̀ gbàà bẹẹ sìtóm kọ̀ kpẹ̀a. Tṍó e náà vó, èé mon kọọ̀ Jìhóvà ólò ẹ̀b nú ea kil ló gbò nú ea biíi. Èé mon nagé bé e Jìhóvà dú lé kìlmàí ló naa.

3. Dẹ̀ẹ̀a boo nú ea di mm̀ kpá Psalm 16:1, 2, bà mée ní e Jìhóvà ólò dú lé kilma lóé?

³ Jìhóvà “dú lé kilma ló dénè nen,” bã̀àna gbò e bà náa nyímáe ló. (Ps. 145:9; Máát. 5:45) Sõò à ólò palàge vùlè  vaá tãanè dee bá gbò e bà sí tóm nèe lọl mm̀ dénè ba dùm. (Bugi Psalm 16:1, 2.) Naanii èé ló bel boo gbò lé nú e Jìhóvà ni náa nèi.

4. Mósĩ́ deè ní e Jìhóvà ólò zogè kọ à dúè lé kilma ló gbò e bà daamà togó gè tõo bã̀é lóé?

⁴ Kọ̀láá tṍó e túù gbò nú e nóò ea kil ló Jìhóvà siimá tóm, è ólò mòn bé ea nveè bá nèi naa. Tṍó e nóò nú ea kilíé ló vaá vùlèe, àé nveè bá nèi kọ é gá naana gbò nú ea bẽ́émáe. (Kọ́l. 1:21) Vaá tṍó e beè kìn lóó nè Jìhóvà vaá dììa múú, e beè mòn bé ea dú lé naa, a beè nèi õ̀òa bug vaá naa kọ é kpáá palàge tõo bã̀é ló.—1 Pít. 3:21.

5. Mósĩ́ deè ní e dénè bẹ̀ì ólò mòn bé e Jìhóvà dú lé naá mm̀ bẹẹ sìtóm kọ̀ kpẹ̀a ẹ́?

⁵ Tṍó e kọ́ọ̀ kpẹ̀a, è ólò kilsĩ́ gè mòn bé e Jìhóvà dú lé naa. É kọọ̀ kẹ́ẹ ólò bọọgẹ̀ sií ni? Gã́bug gbò gyóòlo Jìhóvà dì naa vó. Be à sẹlẹ, besĩ́ ò kalá dú enè Neǹ Ditõ̀ò Jìhóvà, ò gáà beè dòòmà dẽe ló kọ òó konìè bá ló nù tọọ̀ nen vaá kọ́ kpẹ̀a nèe tọ́ọ̀ dee. Sõò, ò dì eo gé náa vó kátogóí. Vaá Jìhóvà a nveè bá nè ni kọ ó láá kilsĩ́ gè ié zààvà mm̀ o sìtóm kọ̀ kpẹ̀a! A nveè nàgé bá nè ni mm̀ dõòna kà gbò sĩ́deè. A nveè bá nè ni kọ ó láá kilsĩ́ gè ié ẹ́ẹ́ nyíe tṍó e gbò nen náa pãané ni tṍ ló. A nveè nàgé bá nè ni kọ ó láá kẽ̀èa boo gbò dọ̀ Kpá Káí eo é kọ́ọ́má kpẹ̀a nè nen ea íe lèèma. Vaá a né ni kói kọ ó láá kilsĩ́ gè kọ́ kpẹ̀a tṍó e gbò nen náa pãané ni tṍ ló.—Jèr. 20:7-9.

6. Mósĩ́ deè ní e gbò búma e íè zógè kọọ̀ Jìhóvà dú lé é?

⁶ Jìhóvà a náa nagé kọ é mòn bé ea dúè lé naa tení dú ló gè bumái nyòòmà sìtóm kọ̀ kpẹ̀a. (Jọ́ọ̀n 6:45) Gbẹá bẹẹ nònù èèlè nyíè zẹ̀ẹ̀ sè, è ólò ẹ̀b gbò lé nu dòòmà bá gè kọọmá kpẹ̀a, vaá à ólò nvèè bá nèi tṍó e gé kọ́ kpẹ̀a. Túá ból, pọ̀ é láá siíi gè tú ãa sĩ́deè kọọmá kpẹ̀a, sõò Jìhóvà é tã́ànèi dee bá tṍó e náà vó. Bẹẹ gbò nònù nè pọ̀bkà bõ̀ònaló ólò nvèè nàgé bá nèi kọ é nyimá dõòna kà gbò ãa sĩ́deè ge kọọmá kpẹ̀a e gáà beè nyima. Sìgà tṍó, níí é láá bĩiná kọ é aa bẹẹ be, sõò tṍó e náà vó, Jìhóvà é tã́ànèi dee bá. Naanii èé ló bel boo sìgà tã́áná dee bá e ólò ié tṍó e túù ãa sĩ́deè siimá tóm nè Jìhóvà dẹ̀ẹ̀a boo bé e bẹẹ kpóó sim tùlà naa. Tṍó e lóò bel boo níá lọ̀l, èé ló nágé bel boo bé eé láá bọ̀ọ̀vẹ̀ gbàà bẹẹ sìtóm kọ̀ kpẹ̀a naa.

7. Mókà tã́áná dee bá ní e ólò ié tṍó e bọọvẹ̀ gbàà bẹẹ sìtóm kọ̀ kpẹ̀a ẹ́?

⁷ È ólò kpáá palàge tõo bã ló Jìhóvà. Bugi togó boo nu dòòmà bá ene kà neǹ kànen ea bée kọlà Samuel, * e a va nè ẹ̀ẹ̀ ólò tõó Colombia. Dóm nè vaí géè dé kpéè ló ba tóm gyà deèsĩ́ tóm gbẹá ba bõ̀ònatõ̀ò, ba beè gbĩ́ gè bọ̀ọ̀vẹ̀ gbàà ba sìtóm kọ̀ kpẹ̀a tení dú ló gè nvèè bá nè ene kà bõ̀ònatõ̀ò e bíi palàge di ló. Kọbé bà láá naa vó, ba beè òòà aa ló gè naa sìgà nú ea ólò leemá va. Samuel kọ́ọ̀ “E beè tú nú ea di mm̀ kpá Máátìù 6:33 siimá tóm, vaá òòà aa ló gè zalí gbò nú e née íè bíí ló. Sõò, ní ea beè palàge tàvàlà beè dú gè aa bẹẹ be. Ba beè tìb bẹẹ tọí belí bé e gbĩ́ì naa vaá née beè sii tọ́ọ̀ kà kom ló tọí.” Dóm nè vaá mon kọọ̀ tṍó e bà kilìè ãa bõ̀ònatõ̀ò, pọ́ì ńkem̀ kpègè gbõomàè vá ló èl bé ea beè dì naa. Samuel kọ́ọ̀ “È monì bé e Jìhóvà lele dee bá gbò nú e náà vaá aalá bẹẹ gbò tã̀àgã ló naa. È monì kọọ̀ nyíè Jìhóvà ẹ́ẹí ló vaá à kpáá palàge vùlèi èlmà tṍó ea kil nvéeá.” É kọ òó láá bọ̀ọ̀vẹ̀  gbàà o sìtóm kọ̀ kpẹ̀a mm̀ sìgà sĩ́deè? Beè vó, àgala boo kọọ̀ òó kpáá palàge tõo bã ló Jìhóvà vaá àé ẹb nú ea kil ní ló.—Ps. 18:25.

8. Éé ní eé láá nó lọl ló bel e Ivan nè Viktoria kọ́ ẹ́?

⁸ È ólò ié zààvà mm̀ bẹẹ sìtóm. Nvèè kpíí ló bel e ene kà dóm nè va e ba bée kọlà Ivan nè Viktoria, e ba beè dú gbò gyà deèsĩ́ tóm kọ̀ kpẹ̀a gbẹá Kyrgyzstan kọ́. Ba beè tõó dùm ea válí bá kọbé bà láá nè lóó gè sí kọ̀láá kà tóm, kọbèè ge tìb tọ. Ivan kọ́ọ̀: “È ólò tú dénè bẹẹ kói siimá kọ̀láá kà tóm e bà néi. Kọbèè deé e lóói ọọ tṍó e ni sí tóm lọ̀l, è ólò ié fẹ́ẹ́-fẹẹ̀ ló nè dĩ̀ìnè ló bùlà, boo béè kọ è nyímà kọọ̀ Jìhóvà ní e géè tú bẹẹ kói siimá tóm nèe. Gbò nú e ténì bá nè gbò ãa kóò e bãaà beè zaavẹ́ nái gé ló.”—Máàk 10:29, 30.

9. Éé ní e ene kà vígà pábia ea di kèbá tàvàlà dìtõ̀ò beè naa kọbé à láá bọ̀ọ̀vẹ̀ gbàà a sìtóm kọ̀ kpẹ̀a ẹ́, vaá éé ní ea silà aa m ẽ́?

⁹ Nyíéi ólò ẹẹ́ ló gè sí tóm nè Jìhóvà, bã̀àna tṍó e bẹẹ dìtõ̀ò tavàlà. Dì belí nu dòòmà bá, tṍó e bà kọ́ nè ene kà vaà tãa ea ni dú kànen mm̀ dee ea bée kọlà Mirreh, ea di bálásĩ́ West Africa, kọ á gbóó sẹ̀ẹ̀a ló a tóm dì belí neǹ dóm biè, a beè gbóó dú neǹ gyà deèsĩ́ tóm kọ̀ kpẹ̀a. Mirreh beè ié kà agẹ bá kom̀ dẽè kpóó ea ólò palàge ge zọ̀ẹ, vaá áá ene kà ávà ní ea ólò láá kọọmá kpẹ̀a aa tọ dọ tọ ẹ́. Sõò, à ólò láá tú gã́bug tṍó kọọmá kpẹ̀a gbẹá kiẽ́e e gbò nen bọọ. À íe gã́bug gbò ea ólò noòmà Kpá Káí nè gbò ea ólò sì gé kãa, vaá à ólò kolí nágé sìgà ọ̀và boo fóòn. Éé ní ea beè naa kọọ̀ Mirreh á tú gã́bug tṍó siimá tóm nè Jìhóvà ẹ? Mirreh kọ́ọ̀ “M̀ palàge vùlè Jìhóvà nè Jíízọ̀s. Vaá m̀ ólò tã̀àgã ló Jìhóvà kọ á nvèè bá nèm kọ ḿ láá sí a tóm dẹ̀ẹ̀a boo bé e nà kpóó sim tùlà naa.”—Máát. 22:36, 37.

10. Dẹ̀ẹ̀a boo nú ea di mm̀ 1 Pítà 5:10, éé ní e Jìhóvà ólò naa nè gbò e bà tú dénè ba tṍó siimá tóm nèe ẽ́?

¹⁰ Jìhóvà ólò nèi dõòna kà gbò búma. Kenny, ea dú neǹ gyà deèsĩ́ tóm kọ̀ kpẹ̀a gbẹá Mauritius, beè mòn kọ à dú kà kà naa vó. Tṍó ea nó Kpá Káí, a beè aaló gè sí pọ̀b tọọ̀ kpá naaní ea diìa múú, vaá dààmà gè tú dénè a tṍó siimá tóm nè Jìhóvà. À kọ́ọ̀, “M beè pììga boo gè gbĩ́ gè belí neǹ kọ́ọ̀ bùlà Bàrì Àìzáíà, ea beè kọọ̀: ‘Nee ndaí! Lẹ̀ẹ̀làm!’ ” (Àìz. 6:8) Kenny a zọ pá vígà tìb gã́bug tọ, vaá nvèè bá tàb bẹẹ gbò kpá nvee mm̀ ba dém bel. Kenny kọ́ọ̀: “Ba beè nèm búma ea é náa kọ ḿ ié kalì ea dú bíi gè siimá nà tóm.” Sõò níì áá bé ea é sí tómá naa ní e ba beè noòmàeé nì. Kenny kpáá kọọ̀, “M beè nó kọọ̀ à íe gbò nú e bè ním é láá naa nè gbò kpãá ea dú bíi kọ ḿ ié kọbé m̀ láá sí tóm nè Jìhóvà.” (Bugi 1 Pítà 5:10.) Sóo sóo, ẹ̀b be o dìtõ̀ò é sọ́ ni bá kọ ó láá bọ̀ọ̀vẹ̀ gbàà o sìtóm nè Jìhóvà kọbé à né ni ãa búma.

11. Éé ní e taà kà vígà pábia e bà di South Korea beè naa kọbé bà láá bọ̀ọ̀vẹ̀ gbàà bá sìtóm kọ̀ kpẹ̀a ẹ́, vaá éé beè sìlà aa m ẽ́? (Ẹ̀b fùtó ea di boo kóó kpáí.)

¹¹ Bã̀àna gbò e ba ni tú gã́bug gbáá siimá tóm nè Jìhóvà ólò ié bíí ló búma tṍó e bà gbĩ́ gè tú ãa sĩ́deè kọọmá kpẹ̀a. Tṍó e COVID-19 géè palàge zoogáá, ene kà neǹ kànen mm̀ ene kà bõ̀ònatõ̀ò ea di South Korea beè emí kọọ̀: “Sìgà gbò ea beè tõó vá ló kọ bà náa gé láá kọ nàè kpẹ̀a boo béè zọ̀ kpá ló, a kọ́ kpẹ̀a kátogóí tenmá boo videoconference. Taà kà vígà pábia e baa ni sígá ló 80 gbáá beè nó gè tú kòmpútà kọọmá kpẹ̀a, vaá be à sẹlẹ ba beè naa vó kọ̀láá dee.” (Ps. 92:14, 15) É kọ àé léémá ni gè bọ̀ọ̀vẹ̀ gbàà o sìtóm kọ̀ kpẹ̀a kọbé ò kpáá palàge mòn bé e Jìhóvà dú lé naa?  Nee sìgà nú eo é láá naa ea é nveè bá nè ni kọ ó teá tùlà o nu sẹ̀ẹ̀a sĩ́í.

12. Éé ní e Jìhóvà zigà ge naa nè gbò e bà dẹẹàẹ́ boo é?

¹² Nó gè dẹ̀ẹ̀a boo Jìhóvà. Jìhóvà zigà kọ àé tã́ànìèi deè bá be è dẹlẹ̀ẹ̀ẹ nyíé boo vaá siè tóm neèe dẹ̀ẹ̀a boo bé e bẹẹ kpóó sim tùlà naa. (Mál. 3:10) Ene kà vígà pábia ea bée kọlà Fabiola ea ólò di Colombia beè mòn kọọ̀ Jìhóvà ḿm̀-mè a zìgà nùí kilmàè ló ẹlẹ. A beè gbĩ́ gè dú neǹ gyà deèsĩ́ kọ̀ kpẹ̀a pọ́ì ńkem̀ tṍó aa ló tṍó ea dììa múú lọ̀l. Sõò, à ólò tú agẹ bá siimá tóm kọbé à láá nè gyã́á pá a tọ. Vóà naa, tṍó e tṍó lée kọ á gbóó sẹ̀ẹ̀a ló a tóm bèkéè, a beè palàge tã̀àgã ló Jìhóvà kọ á nveenìè bá neèe. Fabiola kọ́ọ̀: “Gã́bug gbáá ólò tení besĩ́ bà kálá kpẽ́ kpègè nè nen e ba ni kọ́ á sẹ̀ẹ̀a ló a tóm, sõò ba beè kpẽ́ ńda kóló enè ẽ́ aa ló tṍó em sẹẹà ló gè sí tóm. Aẹ̀ belí tóm dũ̀ùnè!” Bàà ẽ́ aa ló tṍóá, a beè dú neǹ gyà deèsĩ́ tóm kọ̀ kpẹ̀a. Fabiola a sígá ló 70 gbáá kátogóí, vaá a tú nú ea sígá ló 20 gbáá kọọmá kpẹ̀a dénè tṍó. Mm̀ gbò tṍóá, a beè nvèè bá nè aatáà nen kọ bàá dììa múú. À kọ́ọ̀: “Náa kal béè kọọ̀ lóóm ólò ọọ́ sìgà tṍó, Jìhóvà ólò nvèè bá nèm kọ ḿ kilsĩ́ gè kọ́ kpẹ̀a.”

13-14. Mókà gbò nu dòòmà bá ní ea é nveè bá kọ é láá dẹlẹ nyíé boo Jìhóvà vaá tú dénè bẹẹ tṍó siimá tóm nèe ẽ́?

¹³ Nó nu lọl ló nu dòòmà bá gbò e ba beè dẹ̀ẹ̀a boo Jìhóvà. Kpá Káí fáálá gã́bug nu dòòmà bá ea kil ló gbò e ba beè tú agẹ ló siimá tóm nè Jìhóvà. Mm̀ gã́bug nu  dòòmà báá, à íe nú e ba beè naa besĩ́ì Jìhóvà à kalá tãanè va dee bá. Dì belí nu dòòmà bá, náa kal ló béè kọọ̀ Ébràhàm “náa beè nyimá kĩ e a gé tã́ànè,” áá tṍó ea aa be ní e Jìhóvà beè tãanìe dee bá ẹ́. (Híb. 11:8) Áá tṍó e Jékọ̀b dọ bé ló nyómá tómá ní e Jìhóvà beè tãanìe dee bá ẹ́. (Jén. 32:24-30) Tṍó e pá Ízràẹ̀l é gé bã boo Kunukẽ̀ Zìgànùa, tṍó e gbò vààla gyọ́ọ̀ tọ́ tọ́ mm̀ Pene Jọ́dàn ní e pá Ízràẹ̀l beè láá fùle.—Jós. 3:14-16.

¹⁴ Òó láá no nágé nu lọl ló nu dòòmà bá Gbò Neǹ Ditõ̀ò Jìhóvà deè nieí, e ba beè dẹ̀ẹ̀a boo Jìhóvè vaá tú dénè tṍó siimá tóm nèe. Dì belí nu dòòmà bá, ene kà vígà págbálà ea bée kọlà Payton nè a vaà, Diana, beè dé kpéè ló gè bugi nú ea kil ló pá vígà págbálà nè pábia e ba beè bọ̀ọ̀vẹ̀ gbàà tóm e ba sí nè Jìhóvà, dì belí gbò e bà baatẽ́ nú ea kil vá ló mm̀ gbò togó bel ea kọ́ọ̀ “They Offered Themselves Willingly.” * Payton kọ́ọ̀: “Tṍó e bugì gbò nú ea kil vá ló, aẹ̀ belí nú e gé ẹb nen ea gé dé lé gã́ gyã́á. Bé e gé ẹb naa, níà bé ea taníi gè ‘daalá dém ló vaá mòn bé Jìhóvà dú lé’ naa ẽ́.” Tṍóá, Payton nè Diana beè gbóó àà gé sí tóm kiẽ́e e bíi bọọ. É kọ o beè bugi gbò togó belí? É kọ o beè ẹ̀b gbò vídiò ea kọlà Witnessing in Isolated Territory—Australia nè Witnessing in Isolated Territory—Ireland ea di boo jw.org? Gbò vídiòí é láá nvèè bá nè ni kọ ó mòn gbò sĩ́deè eo é láá bọ̀ọ̀vẹ̀ gbàà o sìtóm kọ̀ kpẹ̀a.

15. Mósĩ́ deè ní e gè bã̀àà lé kóò é láá nvèè bá nèi ẽ́?

¹⁵ Bã̀àà lé kóò. À ólò tànii gè dé gyã́á e gáà de tọ́ọ̀ dee be è tú gã́bug tṍó dììma ló gbò e bà ólò dè. Mm̀ tẽ̀ènè sĩ́deèá, be è tú gã́bug tṍó dììma ló gbò e bà tú gè sí tóm nè Jìhóvà naamá túá kà nú mm̀ ba dùm, àé náa kọ á tàn beele gè bọ̀ọ̀vẹ̀ gbàà bẹẹ sìtóm. Níà nú ea beè naaá ló ene kà dóm nè va e ba bée kọlà Kent nè Veronica ẹ. Kent kọ́ọ̀, “Pá bẹẹ tọ nè bẹẹ gbò kóò beè sièi kpóó ló kọ é pììga boo gè tú kele-kele sĩ́deè siimá tóm nè Jìhóvà. E beè mòn kọọ̀ ge tú gã́bug tṍó dììma ló gbò e bà tú Boǹ Méné Bàrì naamá túá kà nú mm̀ ba dùm náa kọ é beeláfùl ge tú kele-kele sĩ́deè siimá tóm nè Jìhóvà.” Kátogóí, Kent nè Veronica dú gbò gyà deèsĩ́ tóm kọ̀ kpẹ̀a ea di kele gbẹá Serbia.

16. Dẹ̀ẹ̀a boo nu dòòle ló Jíízọ̀s ea di mm̀ kpá Lúùk 12:16-21, éé ní ea náa vaá à dú bíi kọ é sọ̀bá sìgà nu ẽ́?

¹⁶ Sọ̀bá sìgà nu boo béè ge sí tóm nè Jìhóvà. Náa dú bíi kọ é sọ̀bá dénè nu kọbé è láá naa nú ea é léémá Jìhóvà. (Ẹ̀klì. 5:19, 20) Sõò, be è kpõtẽ́ kil nvée ló gè sí tóm nè Jìhóvà boo béè kọọ̀ née gbĩ́ gè sọ̀bá sìgà nu, èé bélí gbálà ea di mm̀ nu dòòle ló Jíízọ̀s ea beè ié gã́bug gyọ́ vaá náa bulà nú ea kil ló gè fã̀ Bàrìa. (Bugi Lúùk 12:16-21.) Ene kà vígà págbálà ea bée kọlà Christian, ea ólò tõó France, kọ́ọ̀, “Ním beè tú dénè nà tṍó nè kọ́i siimá tóm nè Jìhóvà nè pá nà tọ boo bá ea bọ́ló.” Ẹlẹ nè a va beè beeláfùl ge sí tóm gyà deèsĩ́ tóm kọ̀ kpẹ̀a. Sõò kọbé bà láá naa vó, ba beè aa ló tóm e bà géè sì. Ba beè sí tóm gè õ̀ònà ló kẽ kọbé bà láá ié nu gè dè, vaá nó gè tõó dùm ea é náa kọọ̀ ńkem̀ kpègè e bà íe á ẹẹlẹ̀ va nyíe. Nyíé va beè ẹẹ kọ bà sọẹ̀ bá sìgà nu vaá dú gbò gyà deèsĩ́ tóm. Christian kọ́ọ̀, “È palàge dé kpéè ló bẹẹ sìtóm kọ̀ kpẹ̀a kátogóí, vaá nyíéi ẹ́ẹ tṍó e monì gbò e ólò noòmà Kpá Káí nè gbò e ólò kãa e bà gé nó nú ea kil ló Jìhóvà.”

17. Éé ní ea é láá naa kọ á tàvàlàí ló gè tú ãa sĩ́deè kọọmá kpẹ̀a ẹ́?

 ¹⁷ Di kpènà ló gè sí tóm nè Jìhóvà mm̀ dõòna sĩ́deè. (Tóm 17:16, 17; 20:20, 21) Shirley, ea dú neǹ gyà deèsĩ́ tóm kọ̀ kpẹ̀a ea di United State, beè nyaaná bá ea kọ́ọ́má tṍó COVID-19. Dààmà togó, náa beè tànìe gè kọ́ kpẹ̀a tenmá noo fóòn. Tṍó e nen ea gé kudẽe sẹ́kiùt kãá va, vaá noòmàe bé ea é náa naa, a beè gbóó dààmà togó gè tú fóòn kọọmá kpẹ̀a dénè tṍó. Shirley kọ́ọ̀: “Dààmà togó pọ̀ beè siím, sõò m̀ palàge dé kpéè ló kátogóí. È gé kọ́ kpẹ̀a nè gã́bug nen kátogóí èlmà tṍó e géè kọ́ kpẹ̀a aa tọ dọ tọá!”

18. Éé ní ea é láá naa kọ é bé èlbá gbò ànà-ànà e kpeè sĩ́ ló tṍó e gbĩ́ gè bọ̀ọ̀vẹ̀ gbàà bẹẹ sìtóm kọ̀ kpẹ̀a ẹ́?

¹⁸ Noo nu sẹ̀ẹ̀a sĩ́ vaá ò piigà ge teá tùlà. Tṍó e kpeè sĩ́ ló gbò nu ànà-ànà, è ólò tã̀àgã ló Bàrì vaá pììga boo gè bugi togó boo bé eé lábví láb kilma ló naa. (Prov. 3:21) Sonia, ea dú neǹ gyà deèsĩ́ tóm kọ̀ kpẹ̀a ea ólò zọ̀ pá vígà e bà ólò ló dém bel Romany bõoná, e ba gáà dú ene kà bõ̀ònatõ̀ò e bà di Europe, kọ́ọ̀: “À ólò leemám gè emí nú em noò ge naá dẽè kpá, vaá tú kpáá sẹlẹ́ kiẽ́e em é ólòó mòn. M beè tã́ èèlè ea é túlè nen kilma bàà ketõ̀ò dẽè kpá sẹlẹ́ boo nà tébòl. Tṍó em gbĩ́ gè nè béèlàfùl, m̀ ólò bugi togó boo bàà kà èèlèá vaá ẹ̀b beè nà béèlàfùl é náa kọ ḿ téá tùlà nà nu sẹ̀ẹ̀a sĩ́.” Sonia beè pììga boo gè tú lé bá ẹ̀bmà gbò tã̀àgã̀ ea dìé ló. À kọ́ọ̀, “M̀ ólò ẹ̀b gbò dìtõ̀ò em kiilà sĩ́ kpee belí gbọọ̀ tọ ea kpegàḿ deè àbèè káà múú ea nveè bá nèm kọ ḿ teá tùlà nà nu sẹ̀ẹ̀a sĩ́.”

19. Éé ní ea bọ́ló kọ é beeláfùl ge naa ẽ́?

¹⁹ Jìhóvà ólò tãanèi dee bá mm̀ gã́bug sĩ́deè. Èé láá zogè kọ nyíéi ẹ́elìè ló gbò nú ea néi tení dú ló gè naa nú ea é nveèe ka ló. (Híb. 13:15) Níá é láá bã̀àa mm̀ ge gbĩ́ ãa sĩ́deè eé siimá tóm nèe, ea é náa kọ Jìhóvà á kpáá palàge tãanèi dee bá. Naanii mè é gbĩ́ gbò sĩ́deè eé láá “daalá dém ló vaá . . . mòn bé e Jìhóvà dú lé naa.” Tṍóá, èé gbóó belí Jíízọ̀s, ea beè kọọ̀: “Nà gyã́á kọlà ge naa bùlà nen e a beè lẹ̀ẹ̀làm̄, nè ge sí tóm e a beè nèm̄ lọ̀l dẽe.”—Jọ́ọ̀n 4:34.