Mm̀ togó belá, e beè nó kọ à íe ene kà bel ea palàge dú bíi ea tọ́a ló kọ̀láá nen, bií ló gbò nyómá tóm: ea dú gè naa kọọ̀ béè Jìhóvà ea bọọá á di káí. Bel ea kil ló bọ́ọ́-bọọ̀ Jìhóvà​—ea dú kọọ̀ bẹlbẹ̀l Jìhóvà ní ea palàge dú lé lọ̀l vaá à lee é​—dú enè gá ea di ló gè tú béè Jìhóvà sẹlẹ́ káí. Vaá dõona kà gá ea di ló dú gè nyimá beè gbò nen é bọ́ló dẹ̀lẹ̀ nyíé boo nè Jìhóvà àbèè kọ bà náa é náa vó.

Éé ní ea náa vaá è nvèè kà m kọọ̀ béè Jìhóvà nè ge naa kọ á di káí ní ea dú bel ea bọọ lọ̀l vaá à lee é? Naanii èé ló bel boo taa kà nú ea náa è kọ́ vó.

Túá kà, Sétàn beè kyọ̀ béè Jìhóvà nè íb nen ea dú gbẹá mm̀ gònò Ídèn. Bùlà ea beè di nvéè bel e Sétàn beè bĩiná Íìva beè dú gè naa kọọ̀ bàá ẹ̀b Jìhóvà naamá nen e náa ólò dõo nu taalẹ bá nè ge kọọ̀ gbò dùùlà bá deè tṍ ea beè nè náa bọ́ló. Tṍóá, Sétàn beè ló bel ea dú kele ló níí Jìhóvà, vaá kọọ̀ Jìhóvà dú neǹ kyáá bel. Vóà naa, à ténmà dém ló Jìhóvà. A beè gbóó dú “Pọ́lọ́ Nyómá,” ea tõó dọ̀ “neǹ ténmà dém ló nen.” (Jọ́ọ̀n 8:44) Íìv beè zìgà kyáá bel e Sétàn kpọ́á, lọ̀l togó kèbá Bàrì, vaá náa beè gbĩ́ kọọ̀ Bàrì á bẹlìèe. (Jén. 3:1-6) Dọ̀ kátogóí, Sétàn dì ea gé ténmà dém ló Bàrì vaá kpọ́ẹ kyáá bel ló. Náa ólò bọọgẹ̀ valí ló gbò e bà ziga ló kyáá belí gè gbàntṍ ló Jìhóvà. Sõò kilma ló gbò níí Bàrì, bé e Sétàn ténmà dém ló béè Jìhóvà naa, dú kà pọ́lọ́ bèèla ea bọọ lọ̀l vaá à lee. Kyáá belí ní ea dú kpò kúm kọ̀láá kà tã̀àgã̀ nè pọ́lọ́ láb ea di bàlà booí é.

Ní ea égè bàà, kọbé nu léé ló dénè nú ea di dùm, Jìhóvà a bééláfùl ge naa kọọ̀ a bée á di káí aa kèbá kọ̀láá kà kọ́ọ̀ kyọ̀. Níà nú ea palàge bọọ́ ló Jìhóvà lọ̀l vaá à lee é. Vó ní ea náa vaá à kọọ̀: “Nda é náa kọọ̀ ńdáà gbele bée á di káí” é. (Èzí. 36:23) Jíízọ̀s beè ló bel ea palàge bọọ lọ̀l vaá à lee ea bọ́ló kọọ̀ dénè gbò e bà bọ́ló dẹ̀lẹ̀ nyíé boo nè Jìhóvà á nvee mm̀ ba tãagã ló, a beè kọọ̀: “O béè a di káí.” (Máát. 6:9, NW.) Gã́bug tṍó, Kpá Káí ólò nvèè kà mm̀ bé ea dú bíi kọ é nvèè ka ló béè Jìhóvà naa. Dì belí nu dòòmà bá, Kpá Káí kọọ̀: “Tui ka ea bọ́ló béè Jìhóvà neíe.” (1 Krọ́. 16:29; Ps. 96:8) “Ọlí sọ́l lèèmà a bée e ka di ló.” (Ps. 66:2) “Nda é nveè ka ló o bée dọ̀ọ̀mà dè-dè.” (Ps. 86:12) Enè tṍó e Jìhóvà beè tõó káála ló bel, beè dú gbẹá tọọ̀ káí ea di Jèrúsalẹ̀m, tṍó e Jíízọ̀s beè kọọ̀: “Tẹ̀, nvèè dũ̀ùnè ló o bée.” Jìhóvà beè aalá kọọ̀: “M beè nvèè dũ̀ùnè ló, vaá m̀ é kpáá nvèènà gé dũ̀ùnè ló.”​—Jọ́ọ̀n 12:28. a

Ní ea égè taa, dénè tóm̀ bùlà Jìhóvà gbááá ló nú ea bée tõó dọ̀, àbèè íb nen ea dú. Bugi togó boo níí: Tṍó e dee deè nvéè ẹ̀bmà ni naaá lọl, vaá Enè Tõ̀ò Gbáá Bẹlbẹ̀l Kráìst a íná kùbmà, éé ní ea é nááá ẽ́? É kọọ̀ gbò nen nè gbò nyómá tóm é kilsĩ́ gè ié kele-kele bùlà kilma ló gè tú béè Jìhóvà sẹlẹ́ káí? Kọbé è láá aalá bíbví, naanii èé bugi togó boo bàà gá ea  di ló belí​—ea dú beè gbò nen é bọ́ló dẹ̀lẹ̀ nyíé boo nè Jìhóvà nè ge nyimá beè Jìhóvà ní ea bọọ lọ̀l vaá à lee é. É kọọ̀ gbò e ba beè bọ́lọ́ dẹ̀lẹ̀ nyíé boo é kpáá kpeesĩ́ ló gbò dìtõ̀ò ea é doà ba bọ́ọ̀ló dẹ̀lẹ̀ nyíé boo? Ẽ́èe. Bàé gbõoma vaá bà náa é tení ná bá tọ́ọ̀ kà dò ẹ̀b. Bàé íe dùm e bè náa tá. É kọọ̀ gbò nen nè gbò nyómá tóm é ólòó bugi togó boo vaá ié bàà-bàà bùlà kilma ló nen ea lela ló kọ à bẹ̀l? Ẽ́èe. Boo béè kọọ̀ tṍóá dénè gbò e bà di káála nè boo kunukẽ̀í é gbááá ló vaá nvèè sãa kúm bẹlbẹ̀l Jìhóvà. Tṍóá, é kọ àé dú bíi kọọ̀ gbò gyóòlo Jìhóvà á kpáá bugi togó boo gè tú béè Jìhóvà sẹlẹ́ káí?

Tṍóá, kọ̀láá nen a nyímá kà-kà bel ea kil ló béè Jìhóvà, vaá béè Jìhóvà é di káí boo béè kọọ̀ a béè é dí pọ́ì aa bá kọ̀láá kà kọ́ọ̀ kyọ̀. Sõò, dénè gbò gyóòlo Jìhóvà e bà di káála nè boo kunukẽ̀í é kilsĩ́ gè nvèè ka ló a bée. Ló éé? Boo béè kọọ̀ bàé ólòó mòn gbò tóm dũ̀ùnè é Jìhóvà é sí. Nyimá nágé kọọ̀: Jíízọ̀s é kilmà kpá ló kẽ vaá òòmà dénè bẹlbẹ̀l nè Jìhóvà, vaá “Bàrì é gbóó lẹ̀ẹ̀là bel ló dénè nu gbõome.” (1 Kọ́r. 15:28) Tṍó e níá ni nááá lọ̀l, gbò e bà di boo kunukẽ̀í é gbóó dé kpéè ló “dì pọ́ì ea dú dũ̀ùnè, ea dì nè gbò nvín Bàrì.” (Róm̀ 8:21, NW.) Vaá Jìhòvà é ḿm̀-mè a tóm̀ bùlà ea beè ié lọl dààà togó bàlà booí, ea kil ló gè naa kọọ̀ dénè nú ea di káála nè boo kunukẽ̀í á dú tẽ̀ènè kà.​—Ẹ́fẹ. 1:10.

Tṍó e gbò nuí ni nááá lọ̀l, mósĩ́ deè ní ea é tọ́á ló pá tọọ̀ Jìhóvà e bà di káála nè boo kunukẽ̀í ẽ́? È agàla boo kọọ̀ tṍóá, àé palàge tànii gè lèèlà béè Jìhóvà dénè dee. Dévìd beè emí gbẹá kèbá tule nyómá káí Bàrì kọọ̀,: “Lèèlà á dìnè Jìhóvà Bàrì . . . Lèèlà á dìnè a bée e ka di ló dọ̀ọ̀mà dè-dè.” (Ps. 72:18, 19) Èé kilsĩ́ gè mòn ãa-ãa nu ea é náa kọọ̀ ge lèèlà Jìhóvà á tànii dọ̀ dè-dè.

Mm̀ kà-kà, béè Jìhóvà bãaa mm̀ kọ̀láá kà nú ea kilíé ló. Tṍó e bugì togó boo béè Jìhóvà, è ólò kẽea boo bé ea vulèi naa. (1 Jọ́ọ̀n 4:8) Èé ólòó kẽea boo kọọ̀ Jìhóvà beè dèmii boo béè kọ à vulèi, à néi nu ààaá boo béè kọ à vulèi, vaá bé ea bẹlíi naa zógè kọọ̀ à dú neǹ lé lab dògò vaá vùlèi. Vaá èé kilsĩ́ gè mòn bé e Jìhóvà vulè dénè nú ea beè dèm naa dọ̀ọ̀mà dè-dè. Àé tan dénè bẹ̀ì gè tõo bã ló bẹẹ Tẹ̀ Jìhóvà vaá ọlí sọ́l lèèmà a bée e ka di lóá dọ̀ọ̀mà dè-dè.​—Ps. 73:28.