1. Éé ní e gè ọgá ló pọ́lọ́ tõó dọ̀ ẹ?

 À BỌ́LÓ kọ é ọgá tṍó e náà nú ea dú pọ́lọ́. Kpá Káí baatẽ́ nen ea ọ́gá ló a pọ́lọ́ naamá nen ea ọ́ví pọ́lọ́ nú ea beè naa, kùb ge labví pọ́lọ́ lábvá, vaá beeláfùl kọ náa é lábvì nàè íb lábvá.​—Máát. 3:8; Tóm 3:19; 2 Pít. 3:9.

 2. Éé ní ea náa vaá à dú bíi kọ é nyimá nú e gè ọgá ló pọ́lọ́ tõó dọ̀ ẹ? (Nèhèmáíà 8:​9-11)

² À dú bíi kọ kọ̀láá nen á nyimá nú e gè ọgá ló pọ́lọ́ tõó dọ̀. Ló éé? Boo béè kọ dénè bẹ̀ì ólò sí pọ́lọ́. Tã́gíní bé e dúù gbò nvín e aà mm̀ Ádàm nè Íìva, e beè ié náàkyọ̀ nè ú lọ̀l va bá. (Róm̀ 3:23; 5:12) Dénè bẹ̀ì ólò sí pọ́lọ́, vóà naa, à dú bíi kọ é ọgá. Náa beè valí ló bã̀àna gbò e ba beè palàge ié zìgà ge kìn ge sí pọ́lọ́, dì belí bé ea beè naaá ló neǹ tóm Pọ́ọ̀l naaá. (Róm̀ 7:​21-24) É kọ níí tõó dọ̀ kọ à bọ́ló kọ é olòó biile nyíe dénè tṍó boo béè kọ è ólò sí pọ́lọ́? Ẽ́èe, boo béè kọ Jìhóvà dú Bàrì sàn nyíe vaá à gbĩ́ kọ nyíéi á ẹẹ. Bugi togó boo nú ea beè naaá ló pá Júù e ba beè di mm̀ deè Nèhèmáíà. (Bugi Nèhèmáíà 8:​9-11.) Jìhóvà náa beè gbĩ́ kọ bàá biile nyíe boo béè pọ́lọ́ e ba beè sì. Tãa vó, a beè gbĩ́ kọ bàá fãàe mm̀ ẹ́ẹ́-ẹẹ̀ nyíe. Jìhóvà nyímá kọọ̀ nyíéi ólò ẹẹ tṍó e ọ́gà ló bẹẹ pọ́lọ́. Vó ní ea náa vaá à kọ́ nèi kọ é ọgá ló bẹẹ pọ́lọ́ ẹ́. Be è ọ́gá ló bẹẹ pọ́lọ́, èé láá agala boo kọọ̀ bẹẹ Tẹ̀ ea íe sàn nyíe é ia ló nèi.

 3. Éé ní eé ló bel boo mm̀ nakà togó bel ge nòí ẽ́?

³ Mm̀ nakà togó bel ge nòí, èé nó nú ea kil ló gè ọgá ló pọ́lọ́. Èé ló bel boo taa kà nu. Túá kà, èé ló bel boo nú e Jìhóvà beè noomà pá Ízràẹ̀l ea kil ló gè ọgá ló pọ́lọ́. Ní ea  égè bàà, èé ló bel boo bé e Jìhóvà beè nvèè bá nè gbò nen kọ bàá ọgá ló ba pọ́lọ́ naa. Dee-deè nvée, èé ló bel boo nú e Jíízọ̀s beè noomà pá a gbò nyòòne nvée ea kil ló gè ọgá ló pọ́lọ́.

NÚ E JÌHÓVÀ BEÈ NOOMÀ PÁ ÍZRÀẸ̀L EA KIL LÓ GÈ ỌGÁ LÓ PỌ́LỌ́

 4. Éé ní e Jìhóvà beè noomà pá Ízràẹ̀l ea kil ló gè ọgá ló pọ́lọ́ ẹ́?

⁴ Tṍó e Jìhóvà beè nè log pá Ízràẹ̀l, ba beè zìgà kọ bà é gbanìèe tṍ ló. Jìhóvà beè kọ́ nè pá Ízràẹ̀l kọ be bà gbanìèe tṍ ló, àé tã́ànìè va dee bá. Kilma ló log ea beè nè vaá, Jìhóvà beè kọ́ nè va kọọ̀: “Log em gé néi nieí náa é bọọgẹ̀ tàvàlàí ló gè sẹlẹ, vaá níì log e nóo é láá tõoníí boo nì.” (Dìt. 30:​11, 16) Sõò be bà lọlíe togó kèbá àbèè kọ bà sa ge fã̀ dõona kà gbò ńbàlì, Jìhóvà náa é tã́ànè nàva dee bá, vaá bà é mon tã̀àgã̀. Sõò náa tõó dọ̀ kọ Jìhóvà é kin va, boo béè kọọ̀ bà é láá ‘òòà kẽ nyoone Jìhóvà [ba] Bàrì vaá bà gbaníe tṍ ló.’ (Dìt. 30:​1-3, 17-20) Níà ge kọọ̀, bà é láá ọgá. Be bà náa vó, Jìhóvà é tú va nvea ló, vaá tãanè va dee bá.

 5. Mósĩ́ deè ní e Jìhóvà beè zogè kọ à íèè ĩ̀ìmà tṍó e pá a gbò beè lọ̀lìe togó kèbá ẹ́? (2 Kíǹg 17:​13, 14)

⁵ Gbò e Jìhóvà beè sàí beè kilsĩ́ gè lọ̀lìe togó kèbá. Gbá ló vó, ba beè fã̀ dõona kà gbò ńbàlì vaá naa gbò nú ea palàge dú pọ́lọ́. Vó beè naa kọ bàá mòn tã̀àgã̀. Sõò Jìhóvà beè kilsĩ́ gè nvèè bá nè pá a gbò naa ní e bà láá kpáá fã̀e. A beè lẹ̀ẹ̀là gbò kọ́ọ̀ bùlà Bàrì siimá vá ló gã́bug tóm, bàn va kọ bàá ọgá ló ba pọ́lọ́ vaá òòà kẽ dù gé fãèe.​—Bugi 2 Kíǹg 17:​13, 14.

 6. Mósĩ́ deè ní e Jìhóvà beè tú gbò kọ́ọ̀ bùlà Bàrì kọọmá nè pá Ízràẹ̀l nú ea náa vaá à dú bíi kọ bàá ọgá ló ba pọ́lọ́ ẹ́? (Ẹ̀b nàgé fòtó.)

⁶ Jìhóvà beè olòó lẹ̀ẹ̀là gbò kọ́ọ̀ bùlà Bàrì siimá vá ló kọ bàá ãané va kilma ló nú ea é náaa vá ló be bà náa ọ́gá vaá nyaaá. Dì belí nu dòòmà bá, Jìhóvà beè lẹ̀ẹ̀là neǹ kọ́ọ̀ bùlà Bàrì Jèrèmáíà kọ á kọ́ nè va kọọ̀: “Ooaí kẽ, e booló pá Ízràẹ̀l, eo sãanàì bá ló bọọ Bàrì gbẹẹ́ kẽ . . . Ním é nveèi súng ló, boo béè kọ nda bọ́ọ̀ló dẹ̀lẹ̀  nyíé boo . . . Ním é ká súng gbẹá gbàà dọ̀ dè-dè. Nyimai bé e bọọ pọ́lọ́ palàge bọọ naa, boo béè kọ ò lọlìì togó kèbá Jìhóvà ea dú bọọ Bàrì.” (Jèr. 3:​12, 13) Jìhóvà beè kọ́ nè Jóẹ̀l kọ á kọ́ nè pá a gbò kọọ̀: “Ooaí kẽ gé faḿi lọaí mm̀ dénè bọọ nyíe.” (Jóẹ̀l 2:​12, 13) A beè kọ Àìzáíà á kọ́ nè va kọọ̀: “Õonai bọọ lóó; Tui bọọ pọ́lọ́ láb lọliimí kèsĩ́; Ó gá sinai pọ́lọ́.” (Àìz. 1:​16-19) Tení dú ló neǹ kọ́ọ̀ bùlà Bàrì Èzíkiẹ̀l, Jìhóvà beè bĩiná va kọọ̀: “É kọ nyíém ólò ẹẹ tṍó e neǹ pọ́lọ́ ú? . . . É kọ náa ólò tànim kọ á ọgá ló a pọ́lọ́ vaá kilsĩ́ gè tõó dùm? Nyíém náa ólò ẹẹ tṍó e nen ú, . . . Vóà naa, ọgai ló bọọ pọ́lọ́ vaá ò tõoníí dùm.” (Èzí. 18:​23, 32) Nyíè Jìhóvà ólò ẹẹ tṍó e gbò nen ọ́gá ló ba pọ́lọ́ boo béè kọ à gbĩ́ kọọ̀ bàá tõó dùm dọ̀ dè-dè! Vóà naa, Jìhóvà náa ólò dõogẽ elá dọ̀ọ̀mà tṍó e nen é ọ́gá ló a pọ́lọ́ besĩ́ à kálá nvèè bá nè ẽ. Naanii èé ló bel boo sìgà nu dòòmà bá ea zógè kọọ̀ níí dú kà-kà.

 7. Éé ní e Jìhóvà beè noomà pá a gbò tení dú ló nu dòòmà bá neǹ kọ́ọ̀ bùlà Bàrì Hòsíà nè a vaà Gómà ẽ?

⁷ Nvèè kpíí ló nú e Jìhóvà beè noomà pá a gbò tení dú ló nu dòòmà bá Gómà ea dú vaà neǹ kọ́ọ̀ bùlà Bàrì Hòsíà. Tṍó e Gómà ni kúná gã̀ gbẹẹ a dóm lọ̀l, a beè gbóó ààẹ́ ló nyoone dõona kà gbò gbálà. Éé ní e Jìhóvà beè naa kọbé Gómà láá nyaaá ẽ́? Jìhóvà ea dú Bàrì ea ólò nyimá nú ea di nyíè nen beè kọ́ nè Hòsíà kọọ̀: “Kpáá àà gé vùlè nvín pábia e dõona kà págbálà vulè vaá à gé kúná gã̀a, dì belí bé e Jìhóvà vulè pá Ízràẹ̀l boo tṍó e bà gé fã dõona kà gbò ńbàlì” naaá. (Hòs. 3:1; Pró. 16:2) Nvèè kpíí ló kọ vaà Hòsíà beè sí kà agẹbá pọ́lọ́ vaá à gáà beè nyaaa. Sõò, Jìhóvà beè kọ́ nè Hòsíà kọ á ia ló nèe vaá túe. a Tení dú ló nu dòòmà báá, Jìhóvà beè naa kọ pá a gbò á nyimá kọ à gáà kinìè va. Jìhóvà beè zogè kọ à vulèè va, náa kal ló béè kọ bà géè sí agẹbá pọ́lọ́ vaá bà gáà beè nyaaa. A beè kilsĩ́ gè lẹ̀ẹ̀là gbò kọ́ọ̀ bùlà Bàrì siimá vá ló naa ní e bà nveè bá nè va kọ bàá ọgá ló ba pọ́lọ́ vaá nyaaá. Nu dòòmà báí zógè kọọ̀ “Jìhóvà ní ea ólò ẹ̀b nú ea di nyíè nen ẽ́,” vaá à gbĩ́ gè nvèè bá nè nen ea gé sí agẹbá pọ́lọ́ kọ á ọgá vaá nyaaá. (Pró. 17:3) Naanii èé ló bel boo sĩ́deè e Jìhóvà ólò naamá vó.

BÉ E JÌHÓVÀ BEÈ NVÈÈ BÁ NÈ GBÒ NEN KỌ BÀÁ ỌGÁ LÓ BA PỌ́LỌ́ NAA

 8. Éé ní e Jìhóvà beè naa kọbé à láá nvèè bá nè Kéìn kọ á ọgá ẹ́? (Jénesìs 4:​3-7) (Ẹ̀b nàgé fòtó.)

⁸ Kéìn náa beè gbõoma boo béè kọọ̀ à dú nvín ea aa mm̀ Ádàm nè Íìv. Gbá ló vó, Kpá Káí kọ́ọ̀: A “láb beè dú pọ́lọ́.” (1 Jọ́ọ̀n 3:12) Be à sẹlẹ, níà nú ea náa vaá nyíè Jìhóvà “náa beè ẹẹ ló Kéìn nè a vààla gyọ́ọ” ẹ́. Tãa vó ea nyááá, “Kéìn [beè] palàge bã̀ súng vaá nyíée beè bììlà.” Éé ní e Jìhóvà beè naa ẽ́? A beè ló bel nè Kéìn. (Bugi Jénesìs 4:​3-7.) Nvèè kpíí ló kọ Jìhóvà beè tú gbọ́ọ́-gbọọ̀ ló loomá bel nè Kéìn, a beè kọ́ nèe kọ àé tã́ànìèe dee bá beè à náa nú ea dú lé. Jìhóvà beè ãane náe gé kọọ̀ a súng é láá naa kọ á sí pọ́lọ́. À dú pọ́lọ́ kọọ̀ Kéìn náa beè gbànìe tṍ ló. Náa beè zìgà kọ Jìhóvà á nveenìè bá neèe naa ní ea é ọ́gá. É kọ Jìhóvà beè beeláfùl kọ náa é nveenàè bá neè gbò nen kọ bàá ọgá ló ba pọ́lọ́ boo béè kọọ̀ Kéìn náa beè gbànìe tṍ ló? Ẽ́èe, náa beè naa vó!

 9. Mósĩ́ deè ní e Jìhóvà beè nvèè bá nè Dévìd kọ á ọgá ló a pọ́lọ́ ẹ́?

 ⁹ Jìhóvà beè palàge vùlè Méné Dévìd. Kàsĩ́, a beè kolíe “nen ea léémám.” (Tóm 13:22) Sõò Dévìd beè sí kà agẹbá pọ́lọ́. A beè kuná gã̀ vaá fẹ́ nen. Dẹ̀ẹ̀a boo Log Mózìs, a beè bọ́ló kọ bàá fẹ́ Dévìd. (Lìv. 20:10; Nóm. 35:31) Sõò Jìhóvà beè iée sàn nyíé ló vaá nvèè bá nèe kọ á ọgá. b Jìhóvà beè lẹ̀ẹ̀là neǹ kọ́ọ̀ bùlà Bàrì Nétàn kọ á síé ló bã̀àna tṍó e Dévìd gáà beè zogè kọ a ọ́gàẹ̀ ló a pọ́lọ́. Nétàn beè tú bel dòòle ló nvèèmà bá nè Dévìd kọ á dã́ ból ló bé e pọ́lọ́ ea beè sì palàge agabá naa. Vó beè naa kọ Dévìd á nyimá kọ à síè kà agẹbá pọ́lọ́, vaá a beè ọgá. (2 Sám. 12:​1-14) A beè emí sọ́l ea zógè kọ à ọ́gàẹ̀ ló nú ea beè naa. (Ps. 51, émì nu ea di boo togó) Sọ́l e Dévìd beè emí mm̀ kpá psalma ólò nvèè nyíé gbàà gã́bug gbò e ba beè sí pọ́lọ́, vaá nvèè bá nè va kọ bàá ọgá ló ba pọ́lọ́. Nyíéi palàge ẹẹ kọ Jìhóvà beè nvèè bá nè Dévìd kọ á ọgá ló a pọ́lọ́.

10. Ge nyimá kọ Jìhóvà íe ĩ̀ìmà vaá di kpènà ló gè ia ló nèi ólò tọá ní ló naa vàẹ?

¹⁰ Jìhóvà ọ́ví pọ́lọ́ láb. Náa kal ló béè vó, à nyímá kọ née gbõomà. (Ps. 5:​4, 5) Sõò boo béè kọ à vulèi, à ólò gbĩ́ gè nvèè bá nèi kọ é nyaaá. À ólò pììga boo gè nvèè bá nè bã̀àna gbò e bà palàge dú pọ́lọ́ kọ bàá ọgá vaá fãèe. Nyíéi palàge ẹẹ kọ Jìhóvà gbĩ́ gè ia ló nèi! Tṍó e bugì togó boo bé e Jìhóvà ólò ié ĩ̀ìmà vaá ia ló nèi naa, à ólò nvèè bá nèi kọ é kilsĩ́ gè bọ́ló dẹ̀lẹ̀ nyíé boo vaá vàlẹ̀bá ọgá tṍó e síì pọ́lọ́. Naanii èé ló bel boo nú e Jíízọ̀s beè noomà pá a gbò nyòòne nvée ea kil ló gè ọgá ló pọ́lọ́.

NÚ E JÍÍZỌ̀S BEÈ NOOMÀ PÁ A GBÒ NYÒÒNE NVÉE EA KIL LÓ GÈ ỌGÁ LÓ PỌ́LỌ́

11-12. Mókà bel dòòle ló nu ní e Jíízọ̀s beè kọ́ nè pá a gbò nyòòne nvée ea zógè kọ Jìhóvà palàge di kpènà ló gè ia ló nèi ẽ́? (Ẹ̀b fòtó ea di boo kóò kpáí.)

¹¹ Mèsáíà beè dú boo kunukẽ̀í mm̀ túá gbò gbááá. Dì belí bé e beè nó mm̀ togó  bel e ã́àa nòa naa, Jìhóvà beè noomá pá a gbò nú ea náa vaá à dú bíi kọ bàá ọgá ló ba pọ́lọ́tení dú ló Jọ́ọ̀n Neǹ Dììlè Nen Múú nè Jíízọ̀s Kráìst.​—Máát. 3:​1, 2; 4:17.

¹² Tṍó e Jíízọ̀s beè di boo kunukẽ̀íá, a beè noomà gbò nen kọ a Tẹ̀ di kpènà ló gè ia ló nèi tṍó e síì pọ́lọ́. A beè naa vó tení dú ló gè ló bel dòòle ló ea kil ló nvín pèè gyọ́. Nvín págbálàa beè aa be ló a tẹ̀ gé labví pọ́lọ́ láb. Sõò a beè òòà kil be “tṍó ea nyímá a lóó.” A tẹ̀ beè lábví láb naa vàẹ tṍó ea moníe ẽ́? Jíízọ̀s beè kọọ̀ tṍó e nvín págbálàa “di-dí kpã́á ea gé dú, a tẹ̀ beè mònìe. À gbóó palàge tóe sàn, vaá teelá síé ló gé toví bũ̀ùnàe vaá pyovíe bẹ́ẹ́.” Nvín págbálàa beè gbĩ́ gè bàn a tẹ̀ kọ á tuèe naamá a gyóòlo, sõò a tẹ̀ beè kolíe ‘nà nvín págbálà’ vaá túe naamá a nvín. A tẹ̀ beè kọọ̀: ‘A beè pè, vaá e kpáá mònìe.’ (Lúùk 15:​11-32) Tṍó e Jíízọ̀s beè di káála, a beè mòn gã́bug tṍó ea Tẹ̀ beè ié sàn nyíe ló gbò e ba beè sí pọ́lọ́, nè bé ea beè vàlẹ̀bá ia ló nè va tṍó e bà ọ́gá naa. Bel dòòle e Jíízọ̀s beè kọ́ nè vaá zógè bé e bẹẹ Tẹ̀ Jìhóvà palàge ié sàn nyíe naa.

13-14. Éé ní e neǹ tóm Pítà beè nò ea kil ló gè ia ló pọ́lọ́ ẹ́, vaá éé ní ea beè noomà dõona gbò e? (Ẹ̀b nàgé fòtó.)

¹³ Neǹ tóm Pítà beè nó bé e Jìhóvà ólò di kpènà ló gè ia ló nè gbò e bà ọ́gá ló ba pọ́lọ́ naa lọl bá Jíízọ̀s. Pítà beè ié lọ̀ gã́bug tṍó, vaá Jíízọ̀s beè di kpènà ló gè ia ló nèe. Dì belí nu dòòmà bá, nyíè Pítà beè palàge bììlà tṍó ea amà sàn Jíízọ̀s taà tóm. (Máát. 26:​34, 35, 69-75) Sõò Jíízọ̀s beè sila ló Pítà gbẹá kĩée e áá ẹ̀ẹ̀ dì tṍó ea kẽeà aa kemà ú. (Lúùk 24:​33, 34; 1 Kọ́r. 15:​3-5) Jíízọ̀s beè nyimá kọ Pítà a ọ́gá vaá a beè gbĩ́ gè naa kọ Pítà á nyimá kọ a iàẹ̀ ló neèe.

¹⁴ Pítà beè nyimá íb tọa ló e nen ólò ié tṍó e nen ọ́gá vaá bà ia ló nèe. Vó beè naa kọ á láá noomà dõona gbò nú ea kil ló gè  ọgá ló pọ́lọ́. Sìgà dee aa ló deè Péntikọ̀s, Pítà beè nè lòbèl gbẹá kèsĩ́ pá Júù e bà náa géè nyoone nvéè Kráìst vaá kọ́ bé e ba beè fẹ́ Jíízọ̀s ea dú Mèsáíà naa. Tṍó ea géè nè lòbèla, a beè kọ́ nè va kọọ̀: “Ọgai ló bọọ pọ́lọ́ vaá ò kiiaí kẽ gé nyoonei nvéè Bàrì, kọbé a ia ló bọọ pọ́lọ́ nèi.” (Tóm 3:​14, 15, 17, 19) Pítà beè noomà kọọ̀ tṍó e nen ọ́gá ló a pọ́lọ́, àé nyááná bé ea ólò bugi togó naa, kùb ge naa nú ea dú pọ́lọ́ vaá pììgà ge naa nú ea léémá Bàrì. A beè kọ nagé nè va kọọ̀, Jìhóvà é ia ló ba pọ́lọ́ nè va vaá àé bélí kọ bà tú nu gyùùmà ba pọ́lọ́ lọ̀l. Tṍó e gã́bug gbáá ni téní, Pítà beè kọ́ nè gbò e bà ólò nyoone nvéè Kráìst kọọ̀: Jìhóvà ólò “[ĩ̀ìmà] vaá ẹ̀bmài bá, boo béè kọ náa gbĩ́ kọọ̀ tọ́ọ̀ nen á ié kyọ̀àsĩ́; tãa vó, à gbĩ́ kọ dénè nen á ọgá ló ba pọ́lọ́.” (2 Pít. 3:9) Kọ̀láá bé e bẹẹ pọ́lọ́ beè agabá naa, nyíéi ólò ẹẹ gè nyimá kọ Jìhóvà ólò ia ló nèi tṍó e ọ́gà.

15-16. (a) Mósĩ́ deè ní e neǹ tóm Pọ́ọ̀l beè nó nú ea kil ló gè ia ló pọ́lọ́ ẹ́? (1 Tímotì 1:​12-15) (b) Éé ní eé ló bel boo mm̀ togó bel ea bẽene níí ẽ́?

¹⁵ Sọ́ọ̀l ea dú Tásọ̀s beè sí gã́bug pọ́lọ́. A beè palàge biigè ló gbò nyòòne nvéè Kráìst. Gã́bug gbò nyòòne nvéè Kráìst náa beè ẹ̀bmà dẽe kọ àé beè láá nyaaá. Sõò Jíízọ̀s beè nyimá kọ Sọ́ọ̀l é láá ọgá vaá nyaaá. Jíízọ̀s nè a Tẹ̀ beè mòn gbò lé kpãa e Sọ́ọ̀l íe. Jíízọ̀s beè kọọ̀: “Nda beè sàẹ naamá nen ea é sí tóm nè nda.” (Tóm 9:15) Kàsĩ́, Jíízọ̀s beè sí tóm dũ̀ùnè ea beè naa kọ Sọ́ọ̀l á ọgá. (Tóm 7:58–8:3; 9:​1-9, 17-20) Ba beè gbóó nyimá ló Sọ́ọ̀l naamá neǹ tóm Pọ́ọ̀l tṍó ea nyaaá vaá dú nen ea gé nyoone nvéè Kráìst vaá Jíízọ̀s beè nèe gã́bug tóm gè sì. Gã́bug tṍó, Pọ́ọ̀l beè kọ́ bé e nyíée ẹ́ẹ̀lìè kọ Jìhóvà nè Jíízọ̀s íèe sàn nyíe ló naa. (Bugi 1 Tímotì 1:​12-15.) Pọ́ọ̀l beè noomà pá vígà kọọ̀: “nú ea kọ́ Bàrì á ié ni sàn nyíe ló, ge kọ ó ọgá vaá kiia kẽ.”​—Róm̀ 2:4.

¹⁶ Éé ní e Pọ́ọ̀l beè naa tṍó ea dã́ kọọ̀ bà aa ló ene kà gbálà ea kúná gã̀ gbẹẹ́ mm̀ bõ̀ònatõ̀ò ea beè di Kọ́rìnt e? Nú ea beè kọ́ nè va kọ bàá naa nóòmài kọọ̀ Jìhóvà ólò zogè kọ à vulèèi tṍó ea néi kọ̀bèl ló pọ́lọ́ e síì, vaá iéi sàn nyíe ló tṍó e ọ́gà. È nó nàgé bé eé láá ié sàn nyíe belí Jìhóvà naa. Mm̀ togó bel ea bẽene níí, èé ló bel boo nú ea beè naaá mm̀ bõ̀ònatõ̀ò ea beè di Kọ́rìnt.