É kọọ̀ olo beè láá tú ọ̀ẹ̀ dẽe bùgmà Kpá Tọ Kùdẽe Ló níí gbááí? Ẹ̀b be òé láá aalá gbò bíbví:

Mó bá ní ea bọ́ló kọ é sẹ̀ẹ̀mà gbò e bà dé fétúlú vaá ṍ míí gbẹá kè sẹ̀lẹ̀ nù ge kẽ̀èa boo ú Kráìst e?

È nveè ka ló ba zìgà; sõò, èé òòà aa ló dùm ge “di boo nu e . . . gbĩ́ gè ié lọl bá nen olòó lèèlàe.” (Júùd 16) Née é bĩiná va gbò nu e náa bọ́ló kọ é nyimá ea kil ló ba ból dẽe sĩ́.—w20.01, 29 náásĩ́.

Éé ní ea é náa kọ ó àgala boo kọọ̀ Jìhóvà bulà nú ea kil ló olo é?

Kpá Káí zógè kọọ̀ a beè nyimá ni ló besĩ́ ò kálá mèà. Vaá à ólò dã́ o tã̀àgã ló. À nyímá nu ea dì ní nyíe, nè gbò o tóm̀ bùlà vaá o láb ólò tọáẹ́ ló. (1 Kró. 28:9; Pró. 27:11) A beè dùùlà ni nvea ló.—w20.02, 12 náásĩ́.

Éé ní ea zógè gbò nu dòòmà bá ea kil ló tṍó ea lelà ge ló bel nè tṍó ea bọ́ló kọ é pĩi gã́é?

È ólò tú ẹ́ẹ́-ẹẹ̀ nyíe kọọmá nu ea kil ló Jìhóvà. È ólò ló bel tṍó e monì nen ea gé naa nú ea é túe nvee kèbá tã̀àgã̀. Gbò kànen ólò ló bel mm̀ ge nèèmà dùùlà bá deè tṍ é be à dú bíi. Née ólò ló bel boo béè ge nyimá (àbèè ge kọ́ nè dõòna gbò) kpò kúm bé e tóm kọ̀ kpẹ̀a ólò siá naa mm̀ dó e bà kub bẹẹ sìtóm kọ̀ kpẹ̀a. Née ólò ló gbò bel ea bọ́ló gè sẹlẹ́ ke gũ̀a.—w20.03, 20-21 náásĩ́.

Mósĩ́ deè ní e gbò ńgùlù bèè ea di mm̀ kpá Jóẹ̀l 2 togó dú kele ló ní ea di mm̀ kpá Kùùà Nù 9 togó é?

Kpá Jóẹ̀l 2:20-29 kọ́ọ̀ Bàrì beè kpó gbò ńgùlù bèèa vaá zìgà kọ àé neè kpẽ́ ló nu e gbò ńgùlù bèèa kyọ sĩ́. Tṍó e níá ni nááá lọ̀l, Bàrì beè gbóó nè a nyómá káí. Gbò nuá beè mm-má tṍó e pá Bábilọ̀n beè kyọ̀ sĩ́ dó Ízràẹ̀l nè gbò tṍó ea bẽene. Kpá Kùùà Nù 9:1-11 baatẽ́ gbò ńgùlù bèèa naamá gbò e Bàrì beè tṍ nóo ból boo tṍó e bà gé vee bèèla bel e Bàrì é tẹ́lẹ boo nakà pọ́lọ́ bàlà booí, vaá níá é bíìgè ló kọ̀láá nen ea nveè sãa kúm bàlà booí.—w20.04, 3-6 náásĩ́.

Mée ní ea dú méné boo gù deè nieí é?

Russia nè gbò e bà gbáaẹ́ ló. Bà dọ́ bàlà kẽ naa uú boo gbò níí Bàrì, kùb ba tóm kọ̀ kpẹ̀a vaá zogè kọ bà ọ́bvìè Gbò Neǹ Ditõ̀ò Jìhóvà. Méné boo gù nè méné boo kpọ̀lọ̀-kpọ̀lọ̀ dì e bà gé kilsĩ́ gè beá ene.—w20.05, 13 náásĩ́.

É kọọ̀ gbò kpãa e bà kólí bée mm̀ kpá Gàlésìà 5:22, 23 ní ea dú áá gbò gá ea dṹùnà ból súú “Nyómá Káí” é?

Ẽ́èe. Nyómá káíá ólò nvèè bá nèi kọ é toní dõòna kà gbò lé-lé kpãa, dì belí lé lab dògò. (Ẹ́fẹ. 5:8, 9)—w20.06, 17 náásĩ́.

Éé ní ea dú gẹẹ-gẹẹ ló ea di ló gè lẹ̀ẹ̀là gì gbò fùtó nè nú e émì ea kil ló áá bẹ̀ì tẹlẹ boo íntanèt e?

Gbò nú eo lẹẹlà tẹlẹ boo íntanèt é láá zógè kọọ̀ ò dúù neǹ dàlà kpá ló boo, vaá nóo dúù neǹ kìlmà kpá ló kẽ.—w20.07, 6-7 náásĩ́.

Éé ní e gbò kọ̀ kpẹ̀a e bà gé nyoone nvéè Kráìst é láá nó lọl ló gbò síì dọọ̀ e bà íe kalì e?

Bà ólò kpó dọọ̀ tṍó nè kiẽ́e e bàé mon gyã́à. Bà ólò nyimá tẽ́ gè láá tú kele-kele íb nuù síìmà gyã́à kpoomá dọọ̀. Vaá tú agẹ ló kpoomá dọọ̀ bã̀àna kèbá tàvàlà dìtõ̀ò. Beele é láá naa nagé vó mm̀ bẹẹ sìtóm kọ̀ kpẹ̀a.—w20.09, 5 náásĩ́.

Mókà gbò sĩ́deè ní eé láá nvèèmà bá nè gbò e ólò noòmà Kpá Káí kọ bàá kpáá palàge vùlè Jìhóvà ẹ?

Èé láá siè va kpóó ló kọ bàá bugi Kpá Káí buù dee vaá bugi togó boo gbò nú e bà bugi. Vaá èé láá noomà va kọ bàá tã̀àgã ló Bàrì.—w20.11, 4 náásĩ́ .

Bà mée ní e bel ea kọ́ọ̀: “Kẽ̀èà aa ke mà ú é tulànà gé dénè nen tení dú ló gè gbaa ló Kráìst” gé lóá bel kilma ló é?—1 Kọ́r. 15:22.

Neǹ tóm Pọ́ọ̀l náa géè kọọ̀ kọ̀láá nen é kẽ̀èà aa kemà ú. Tãa vó, à géè ló bel kilma ló gbò níí Kráìst e Bàrì beè tṍ va nóo ból, ea dú gbò e Bàrì beè “kolí naamá pá ńlẹ gbò tení dú ló gè gbaa ló Kráìst Jíízọ̀s.” (1 Kọ́r. 1:2; 15:18)—w20.12, 5-6 náásĩ́.

Éé ní e gbò e Bàrì beè tṍ nóo ból é náa tṍó e ba ni ‘nyaaá m ńkáb dẽe tṍó, e bàé uuli kubmà nvéè koòa ẹ’?—1 Kọ́r. 15:51-53.

Bàé zọ Kráìst tú túm e bà náàmà kpọ́gọ́lọ́ bẹ̀lmà gbò nen. (Kùùà 2:26, 27)—w20.12, 12-13 náásĩ́.