Tṍó e Jíízọ̀s beè di káála, a beè nó gbò kpãá ea náa kọọ̀ á dú lé neǹ ge zọ̀ siá tóm. Tṍó ea íná boo kunukẽ̀í, a beè zogè kà lé nu dòòmà bá ea kil ló nen e bàé láá zọ̀ siá tóm. Mósĩ́ deè ní eé láá ié bélè lọl ló a nu dòòmà bá ẹ́? Tení dú ló gè nó a nu dòòmà bá, èé mon taa kà nòòkúu ea é láá nvèè bá nèi kọ é zọ̀ dõòna gbò siá tóm. Nagbò nòò-kúuí é nveè bá nèi kọ é kpáá palàge gbaaá ló pá vígà.

Lé neǹ ge zọ̀ siá tóm ólò kìlmà kpá ló kẽ, à ólò nvèè ka ló gbò ea gé zọ siá tóm vaá náa ólò naa nú ea é kólí bùlà gbò nen nèà a bá. Jíízọ̀s beè nó gè kìlmà kpá ló kẽ lọl bá a Tẹ̀. Náa kal ló béè kọọ̀ áá Jìhóvà ní ea bọ́ló gè kolíe Neǹ Dèmnù ẽ, à gbĩ́ kọọ̀ dõòna gbò á nyimá íb tóm ea Sã́áná beè sì. È dã́à tẽ́ ló naa vó lọl ló bel e Bàrì beè lò, tṍó ea kọ́ọ̀: “Naa mè èé dem nen mm̀ bẹẹ bèla.” (Jén. 1:26) Tṍó e Jìhóvà ló gbò belá, Jíízọ̀s beè nyimá kọọ̀ Jìhóvà dú neǹ kìlmà kpá ló kẽ.—Ps. 18:35.

Jíízọ̀s beè kìlmà nàgé kpá ló kẽ tṍó ea beè di boo kunukẽ̀í. Tṍó e gbò nen leelàẹ ló gbò nú ea náa, ẹlẹ beè lèèlà Bàrì. (Máàk 10:17, 18; Jọ́ọ̀n 7:15, 16) Jíízọ̀s beè zọ̀ pá a gbò nyòòne nvée naaá nú mm̀ fẹ́ẹ́-fẹẹ̀ ló vaá faalá va belí pá a kóò, níì belí gbò gyóòlo nì. (Jọ́ọ̀n 15:15) A beè logí va kpóó tọ boo béè ge noòmà va kọ à dú bíi kọ bàá kìlmà kpá ló kẽ. (Jọ́ọ̀n 13:5, 12-14) Dì belí Jíízọ̀s, à bọ́ló kọ  é nvèè ka ló gbò e bà gé zọ́i siá tóm èlmà ge gbĩ́ beélè lee ló. Èé láá naa gã́bug nu tṍó e nveè ka ló ene vaá née bọọgẹ̀ gbĩ́ kọ bàá lèèlài.—Róm̀ 12:10.

Nen ea kilmà kpá ló kẽ ólò nyimá nágé kọọ̀ “nú e nen noo . . . ólò ié togó tení dú ló dùùlà bá deè tṍ ea aa bá gã́bug nen.” (Pró. 15:22) À bọ́ló kọ é kẽ̀èa boo kọọ̀ kọ̀láá bé e nyímà nu vaá ié kalì naa, née é láá nyimá dénè nu. Kọbèè Jíízọ̀s beè kọọ̀ à íe sìgà nú e bè ẹlẹ náa nyímàè. (Máát. 24:36) A beè leemá náe gé gè dã́ bùlà pá a gbò nyòòne nvée e bà náa gbõoma. (Máát. 16:13-16) Níà nú ea náa vaá lóó gbò ea géè zọ̀ siá tóm beè dĩ̀ìnà gbẹáẹ́ kpàn ẽ! Mm̀ tẽ̀ènè sĩ́deèá, be è kilmà kpá ló kẽ vaá kẽ̀èa boo kọọ̀ née nyímà dénè nu nè ge tú lọ̀ọ̀gà bùlà dõòna gbò, àé náa kọọ̀ fẹ́ẹ́-fẹẹ̀ ló á dì vaá nú e noò é íe “togó.”

À palàge dú bíi kọọ̀ gbò kànen á nó bé e Jíízọ̀s beè kìlmà kpá ló kẽ naa tṍó e bà gé gbá siá tóm. À dú bíi kọ bàá kẽ̀èa boo kọọ̀ nyómá káí Bàrì é láá naa kọọ̀ enè nen ea dì vá zẹ̀ẹ̀ á ló bel ea é náa kọọ̀ bàá nè lé béèlàfùl. Beè tṍó e bà íe bila ló bel vaá bà naa kọọ̀ lóó kọ̀láá nen á taaá gè ló bel, ba béèlàfùl é dọ bélè nè zivèkà bõ̀ònatõ̀ò.

Lé neǹ ge zọ̀ siá tóm ólò dú gbọ́ọ́-gbọọ̀ ló tṍó ea gé zọ dõòna gbò siá tóm. À ólò gbọọlẹ̀ ló vaá tú dùùlà bá deè tṍ. Jíízọ̀s beè mòn bé ea Tẹ̀ dú gbọ́ọ́-gbọọ̀ ló naa. Dì belí nu dòòmà bá, Jìhóvà beè lẹ̀ẹ̀làẹ kọ á gé dùù-là gbò nen lọl kèbá ú ea beè bọ́vá ló.—Jọ́ọ̀n 3:16.

Jíízọ̀s beè naa nu tṍó ea bọ́ló. Kẽ̀èa boo kọọ̀ a beè nvèè bá nè ńnváá ea dú Fanísìàa, náa kal ló béè kọọ̀ Bàrì beè lẹ̀ẹ̀làẹ má áá pá tọọ̀ Ízràẹ̀l. (Máát. 15:22-28) Náa beè ẹ̀bmà nàgé dẽe kọọ̀ pá a gbò nyòòne nvée á naa nú e bà náa é láá naa. Tṍó e Pítà ea dú kóò Jíízọ̀s amàe sàn gbẹá gbàà gbò lọ̀l, a beè ia ló nèe. Tṍó e tṍó téní, a beè tú tóm ea palàge bọọ nè Pítà. (Lúùk 22:32; Jọ́ọ̀n 21:17; Tóm 2:14; 8:14-17; 10:44, 45) Nu dòòmà bá Jíízọ̀s palàge tẹlẹ bàlà kẽ kọọ̀ à bọ́ló kọ beéle é naa ‘ní e dénè nen é nyímá kọ è dúù gbọ́ọ́-gbọọ̀ ló’ tení dú ló bé e zọọ̀ dõòna gbò naaá nu naa.—Fíl. 4:5.

Ge dú gbọ́ọ́-gbọọ̀ ló é nveè nàgé bá nèi kọ é nyaaá nyoone dìtõ̀ò ea bã́ kẽ kọbé è láá zọ̀ kọ̀láá nen siá tóm mm̀ fẹ́ẹ́-fẹẹ̀ ló. Jíízọ̀s beè tú kà lé bá faamá gbò e ba beè dìé kpàn e bà  pãane tṍ ló lé kpẹ̀a ea géè vee, naa ní e pá a gbò ọ́b gbáẹ bel kọọ̀ “à zọ gbò lọl kpègè nè gbò e a íe pọ́lọ́ bée naaá nu.” (Máát. 11:19) Dì belí Jíízọ̀s, é kọọ̀ beele é láá zọ̀ gbò e ba nàànù dú kele naaá nu? Ene kà vígà págbálà ea bée kọlà Louis ea ni zọ kele-kele nen naaá nu tṍó ea beè di boo tóm gè kãa sẹ́kiùt nè gbẹá Bẹ́tẹẹ̀l, kọ́ọ̀: “Ge zọ̀ dõòna gbò e bà náa gbõoma siá tóm, dì belí gè tú kele-kele kpò dem e náa kunà nòòmà gbọọ. Boo béè kọọ̀ gbò kpò demá náa kunàgì, àé tú gã́bug tṍó besĩ́ì gbọọá kálá lèlà. M beè pììgà ge nyaaná nà láb kọbé m̀ láá zọ̀ dõòna gbò siá tóm mm̀ fẹ́ẹ́-fẹẹ̀ ló naa ní e gbọọá é lelà, ea dú gè gbá sí tóm e báí beè di ló.” Níà kà lé láb!

Mó tṍó ní eé láá zọgè kọ è dúù gbọ́ọ́-gbọọ̀ ló mm̀ bẹẹ bõ̀ònatõ̀ò ẽ? È íè nèà deè ge naa vó tṍó e gé kọ́ kpẹ̀a. Èé láá zọ̀ pá vígà e bà íe gã́bug tóm mm̀ tọ èl beele siá tóm àbèè gbò e beele nè ọ̀và née dúà sĩ́ gbò. É kọọ̀ èé láá nyaaná bá ló bẹẹ nàànù àbèè bá e kọ́ọ̀mà kpẹ̀a kọbé bà láá dé kpéè ló gè zọ̀i siá tóm?

Lé neǹ ge zọ̀ siá tóm ólò di “kpènà ló gè dõo nu nè nen.” (1 Tím. 6:18) Tṍó e Jíízọ̀s géè zọ̀ a Tẹ̀ siá tóm, a beè mòn kọọ̀ a Tẹ̀ náa gṍèe nu ló. Tṍó e Jìhóvà “beè dèm gbò káála,” Jíízọ̀s “beè di kĩá” vaá nó nu lọ̀líé bá. (Pró. 8:27) Tṍó e tṍó téní, Jíízọ̀s beè tú zààvà kọọmá “kọ̀láá kà nu [ea] beè dã́ gã́” a Tẹ̀, nè pá a gbò nyòòne nvée. (Jọ́ọ̀n 15:15) Èé láá nó nu dòòmà bá Jìhóvà tení dú ló gè olòó kọ́ gbò nú e ni nó nè pá vígà. Lé neǹ ge zọ̀ siá tóm náa ólò gṍ nú ea bọ́ló kọọ̀ gbò ea gé zọ siá tóm á nyimá àbèè nú ea é nveè bá nèva boo béè ge lẹ̀ẹ̀là va bel ló. Àé tú zààvà kọọmá gbò nú ea nyimá nè dõòna gbò.

Beele é láá siè nàgé kpóó ló gbò e gé zọ siá tóm. Tṍó e nen mon bẹẹ pììgà vaá lèèlài, é kọọ̀ nyíéi náa ólò ẹẹ? Jíízọ̀s beè noo tṍó zọ̀ọ̀mà gbò ea géè zọ̀ siá tóm loá bel boo gbò lé nu ea mon vá m. (Doolé ló Máátìù 25:19-23; Lúùk 10:17-20.) Kàsĩ́ a beè kọ́ nèva kọọ̀ bàé “síná gé [tóm] e a el” ní e ẹlẹ beè siè. (Jọ́ọ̀n 14:12) Bilá deè deé ea zilà dú deé e bà fẹ́ẹá, a beè lèèlà pá a gbò tóm e ba beè bọ́ló dẹ̀lẹ̀ nyíé booá kọọ̀: “M dénè nà tṍó tã̀àgà, o beè dim̄í ló.” (Lúùk 22:28) Ni doomà dẽe ló bé e belá beè láá tọá vá ló vaá siè va kpóó ló naa! Be à gá náa beele è lèèlà nàgé gbò e gé gbá siá tóm, nyíé va é ẹ́ẹ vaá bàé kpáá sí tóm leevè.

Ene kà vígà págbálà ea bée kọlà Kayode beè kọọ̀, “Náa dú bíi kọọ̀ nen á zẹ́ẹ́ gbõoma besĩ́ à kálá dú lé neǹ ge zọ̀ siá tóm, sõò à ólò naa kọọ̀ gbò e bà zọ́ẹ siá tóm á ié zààvà vaá naa kọọ̀ tóm e bà gé sí á gá tàvàlà.” É kọọ̀ níà bé e olo dì naa ẽ́? Be à sẹlẹ òó láá bĩiná gbò eo ólò gbai siai tóm bé e bà ẹb ni naa. Be à ólò leemá va gè zọ̀ ni siá tóm belí bé ea beè leemá gbò nyòòne nvéè Jíízọ̀s ge zọ̀ẹ siá tóm naaá, òó láá kọ nágé belí bé e neǹ tóm Pọ́ọ̀l beè kọ́ naaá, kọọ̀: “È gé zọ̀i síá tóm kọ bé nyíei palà ge ẹẹ.”—2 Kọ́r. 1:24.