É kọọ̀ o beè láá tú ọ̀ẹ̀ dẽe bùgmà gbò Kpá Tọ Kùdẽe Ló e ba beè emí gbááí? Ẹ̀b be òé láá aalá gbò bíbví:

Éé ní e gè naa kọọ̀ bẹẹ “bug togó á dú ãa” tõó dọ̀ ẹ? (Róm̀ 12:2)

À tõó dọ̀ ge naa nú ea dú lé, ẹ̀b íb nen e dúù nè ge nyaaná bá ló gbò kĩée ea dú bíi, vaá pììgà bé e bẹẹ kpóó sim tùlà naa kọbé è láá tõó boo gbò nòòkúù Jìhóvà.​—w23.01, 8-9 náásĩ́.

Mósĩ́ deè ní eé láá ẹ̀b nu boo bá ea bọ́ló tṍó e monì gbò nu ea gé nááá bàlà booí é?

À ólò tànii gè nyimá bé e gbò nú ea gé nááá kátogóí ḿm̀-mè kọ́ọ̀ bùlà Bàrì ea di mm̀ Kpá Káí naa. Tṍó e gé zọ dõona gbò loá sọ́l boo kọ́ọ̀ bùlà Bàrì ea di mm̀ Kpá Káí, náa bọ́ló kọ é dõogẽ kọ́ bẹẹ bùlà vaá kyọ̀ gbaa ló ea di zẹ̀ẹ̀ pá vígà. Tãa vó, èé piiga boo gè ló bel dẹ̀ẹ̀a boo gbò nú e bõ̀ònatõ̀ò Jìhóvà ni émí. (1 Kọ́r. 1:10)​—w23.02, 16 náásĩ́.

Mók à kele ní ea di zẹ̀ẹ̀ dììa múú Jíízọ̀s nè níí pá a gbò nyòòne nvée ẽ́?

Náa beè dú bíi kọ Jíízọ̀s á kìn lóó nè Jìhóvà, boo béè kọ a beè mea mm̀ dó ea beè dì nè Bàrì. Náa beè dú bíi kọ á ọgá boo béè kọọ̀ a beè gbõoma, vaá náa beè sí tọ́ọ̀ kà pọ́lọ́.​—w23.03, 5 náásĩ́.

Mósĩ́ deè ní eé láá naa kọọ̀ dõona gbò á aalá bel gbẹá nònù ẽ?

Èé láá naa kọọ̀ pá vígà á aalá bel gbẹá nònù tṍó e túù bẹẹ ààla naamá ńkpulu. Née é ló bel boo gã́bug gá kọbé dõona gbò íe nú e bàé kọ́.​—w23.04, 23 náásĩ́.

Éé ní e “Èèlè Ea Di Káí” e kpá Àìzáíà 35:8 ló bel kilma lóá tõó dọ̀ẹ?

Èèlè ea di káíí beè zẹ́ẹ́ loá bel kilma ló èèlè e pá Júù beè tení boo aa Bábilọ̀n kil Jèrúsalẹ̀m. Èé kọ́ vàẹ kilma ló beélè deeí é? Besĩ́ à kalá dú gbáá 1919, ba beè kpoogè dee ló èèlèa​—ea dú gè tàb vaá naa príǹt gã́bug kpoò Kpá Káí vaá si nagé dõona kà tóm. Lọ̀l gé tṍóá, gbò níí Bàrì dì e bà gé kyãà boo ‘èèlè ea di káíá’ bã mm̀ bõ̀ònatõ̀ò Bàrì, vaá níí é náa kọ bàá ié gã́bug tã́áná dee bá ea aa ló Boǹ Méné Bàrì.​—w23.05, 15-19 náásĩ́.

Mókà dùùlà bá deè tṍ ní e kpá Próvẹẹ̀b 9 togó néi kilma ló pábia ea nyímá nu nè pábia e náa nyímá nuá ẽ́?

Kpá Próvẹẹ̀b ló bel kilma ló “pábia e náa nyímá nu,” ea kól é fáálá nen ea biiàẹ́ nvée tẹlẹ mm̀ “Bànà Ú” nè pábia ea tõó dọ̀ “kà-kà nyìmànù,” ea kól é náa kọọ̀ nen á “kyãa boo èèlè dã̀ból ló nu” nè dùm. (Pró. 9:​1, 6, 13, 18)​—w23.06, 22-24 náásĩ́.

Mósĩ́ deè ní e Bàrì beè zogè kọ à kilmàè kpá ló kẽ vaá dú gbọ́ọ́-gbọọ̀ ló tṍó ea géè zọ̀ Lọ́ọ̀t naaá nu ẽ́?

Jìhóvà beè kọ́ nè Lọ́ọ̀t kọ á teelá aa Sọ́dòm kil deè boo gù. Sõò Lọ́ọ̀t beè bànie kọ á sọ̀tọ́ deè kọọ̀ pá a tọ nè ẹ̀ẹ̀ á kilìè boǹ Zọ́à, vaá Bàrì beè zìgà nú ea kọ́.​—w23.07, 21 náásĩ́.

Éé ní e va é náa be a dóm ólò ẹ̀b fòtó ea zógè kóló kètẽ́ nen ẽ́?

Náa bọ́ló kọ á bẽgẽ̀ bel a bá. Tãa vó, á ká bùlà gbẹẹ́ boo a gbaa ló kilma ló Bàrì vaá bugi togó boo gbò nòòtẽ́ ea di mm̀ Kpá Káí ea kil ló gbò pábia e Bàrì beè naa kọ́ bàá ié dĩ̀ìnè ló bùlà tṍó e ba beè di kèbá tã̀àgã̀. Àé láá nvèè bá nè a dóm kọ á kpòòlà lóó lọl ló gbò dìtõ̀ò ea é náa kọ á bã mm̀ dùmá.​—w23.08, 14-17 náásĩ́.

Mósĩ́ deè ní e nyìmànù é láá nvèè bá nèi kọ é dú gbọ́ọ́-gbọọ̀ ló tṍó e gbò nen ló pọ́lọ́ bel kilma ló nú e zigà ló é?

Tãa vó e ẹbvì bíb e nen bĩ́ínái naamá bel ànà-ànà, àé dú lé be è ẹb naamá sĩ́deè ge nyimá bé ea bugi togó vaá ẹ̀b nu naa. Vó é láá naa kọ é tú gbọ́ọ́-gbọọ̀ ló aamá bel nèe.​—w23.09, 17 náásĩ́.

Éé ní eé láá nó lọl ló nú e Mérì beè naa kọbé à láá ié agẹló é?

Tṍó e Mérì nyímá kọ àé dúè kà Mèzáíà, a beè bĩiná nvèè bá lọl bá dõona gbò. Gébrìẹ̀l nè Èlízabẹ̀t beè ló bel ea di mm̀ Kpá Káí nè Mérì, vaá níí beè sièe kpóó ló. Beele é láá ié nágé sìà kpóó ló lọl bá pá vígà.​—w23.10, 15 náásĩ́.

Mósĩ́ deè ní e Jìhóvà é láá aalá bẹẹ tã̀àgã ló é?

Jìhóvà zigà kọ àé dã́è bẹẹ tã̀àgã ló, vaá à ólò ẹ̀b bé e nú e bĩ́ìnàé bá gbááá ló a bùlà naa. (Jèr. 29:12) Àé láá aalá tẽ̀ènè íb tã̀àgã ló ea aa bá pá a gyóòlo mm̀ kele-kele sĩ́deè, vaá àé kilsĩ́ gè nvèè bá nèi.​—w23.11, 21-22 náásĩ́.

Kpá Róm̀ 5:2 kọ́ nú ea kil ló “ból dẽesĩ́,” éé ní ea náa vaá a 4 gã́bel à kpáá ló bel kilma ló é?

Nen é láá ié ból dẽesĩ́ gè tõó dùm mm̀ páradaìs boo kunukẽ̀í túá tṍó ea dã́ lé kpẹaí. Sõò a ból dẽesĩ́ é kpáá agaló tṍó ea téní bá tã̀àgã̀ vaá à ĩ̀ìmà, nè tṍó ea nyímá kọọ̀ Jìhóvà ténmàè ẽ.​—w23.12, 12-13 náásĩ́.