1-2. Mókà gbò dìtõ̀ò ní ea ólò láá naa kọ é tò e?

 GBÒ nú ea ólò naa kọ é tò ólò naaáí ló. Sìgà tṍó, è ólò tò boo béè kọ nyíéi palàge ẹẹ. Be à sẹlẹ, o beè tò tṍó e nú ea palàge ẹẹlẹ̀ ni nyíe beè naaá​—àé láá dú tṍó eo nvín beè mèà, àbèè tṍó eo bugì togó boo kà lé nú ea beè naaá ní ló. Àé láá du nagé kọ o beè tò tṍó eo beè mòn o kóò eo gáà beè mòn nà mm̀ gã́bug gbáá.

² Sõò gã́bug tṍó, è ólò tò boo béè nu bììla nyíe ea náaaí ló. Dì belí nu dòòmà bá, è ólò láá tò tṍó e nen e beè dẹlẹ nyíé boo tú pọ́lọ́ bá sẹ̀ẹ̀mài. È ólò láá to nagé tṍó e kpá lói zọ àbèè tṍó e nen e beè vùlè ú. Tṍó ea meà naa vó, èé láá ié íb tọa ló e neǹ kọ́ọ̀ bùlà Bàrì Jèrèmáíà beè ié tṍó e pá Bábilọ̀n kyọsĩ́ Jèrúsalẹ̀m. Jèrèmáíà beè kọọ̀: “Gĩ́i beè ọví àà ḿ dẽe . . . Gĩ́i beè ọví àà ḿ dẽe lee, vaá kùbmà náa beè bã ló.”​—Làm. 3:​48, 49.

3. À ólò tọá ló Jìhóvà naa vàẹ tṍó ea mon pá a gyóòlo e bà gé mon tã̀àgã̀ ẽ? (Àìzáíà 63:9)

³ Jìhóvà nyímá gã́bug tṍó e ni tó boo béè gbò tã̀àgã̀ e gé téní bá. Kpá Káí kọ́ọ̀ à nyímá tṍó e moǹ tã̀àgã̀, vaá à ólò dã́i mon tṍó e banìe kọ á nvèè bá nèi. (Ps. 34:15) Sõò Jìhóvà ólò naa èlmà ge dõogẽ mònii vaá dã́i mon tṍó e gé tó. À ólò palàge tọá ló Jìhóvà tṍó e tóò boo béè kọ à dú bẹẹ Tẹ̀ ea palàge vùlèi, vaá à ólò gè vàlẹ̀bá nvèè bá nèi.​—Bugi Àìzáíà 63:9.

4. Mókà gbò nu dòòmà bá ea di mm̀ Kpá Káí ní eé ló bel boo é, vaá éé ní e gbò nu dòòmà báí nóòmài kilma ló Jìhóvà ẹ?

 ⁴ Tení dú ló Kpá Káí, Jìhóvà kọ́ bé ea ólò tọáẹ́ ló naa tṍó ea mon pá a gyóòlo e bà tó nè bé ea ólò nvèè bá nè va naa. Dì belí nu dòòmà bá, èé láá nó nu lọl ló nú ea beè naaá ló Hánà, Dévìd nè Méné Hèzìkáíà. Èé ló bel boo nú ea beè naa kọ bàá tò, nè bé e Jìhóvà beè nvèè bá nè va naa. Tṍó e ni náa vó lọ̀l, èé gbóó ló bel boo bé e Jìhóvà ólò nvèè bá nèi tṍó e nyíéi biilà àbèè tṍó e bà tú pọ́lọ́ bá sẹ̀ẹ̀mài naa.

JÌHÓVÀ ÓLÒ MÒN TṌÓ E NYÍÉ NI BIILÀ VAÁ Ò TÒ

5. Nú ea beè naaá ló Hánà beè tọáẹ́ ló naa vàẹ?

⁵ Hánà beè mòn gã́bug tã̀àgã̀ ea beè naa kọ nyíée á bììlà naa ní ea tó. Ene kà tã̀àgã̀ e Hánà beè ié dú kọọ̀ a dóm beè ilí bàà kà va. Béè dẽ́énaà Hánà beè kọ̀là Pènínà, vaá a beè palàge tú pọ́lọ́ bá sẹ̀ẹ̀mà Hánà. Nú ea beè palàge zoolè dìtõ̀ò Hánà dú kọ náa beè ié nvín boo tṍó e Pènínà beè ié gã́bug nvín. (1 Sám. 1:​1, 2) Pènínà beè olòó òn Hánà boo béè kọ náa íe nvín. À gáẹ̀ beè tọá ní ló naa vàẹ be olo ní eo beè di íb dìtõ̀ò e Hánà beè dìa ẹ? ‘Nyíè Hánà beè palàge bììlà naa ní ea ólò tò vaá náa é dé gyã́á.’​—1 Sám. 1:​6, 7, 10.

6. Éé ní ea beè nvèè nyíé gbàà Hánà ẽ?

⁶ Éé ní ea beè nvèè nyíé gbàà Hánà ẽ? Ene kà nú ea beè nvèè bá nèe dú kọ a beè àà gé fã̀ Jìhóvà gbẹá mm̀ a tọọ̀ káí. Àé láá dú kọọ̀ tṍó e Háná íná kĩée e bà ólò tení bãama boo beè tọọ̀ kàn káíá, ní ea beè “dààmà togó gè tã̀àgã ló Jìhóvà vaá tò naa ní e náa láá lẹ̀ẹ̀là nà bel ló a bá” ẹ́. A beè bàn Jìhóvà kọọ̀: ‘mòn tã̀àgã̀ ea di ló o gyóòlo vaá kẽ̀èà ḿ boo.’ (1 Sám. 1:10b, 11) Hánà beè kọ́ bé e nu tọ́aẹ́ ló naa nè Jìhóvà mm̀ tã̀àgã ló. Tṍó e Jìhóvà mon bé gé Hánà tó naa, a beè tọáẹ́ ló boo béè kọ a beè palàge vùlè Hánà!

7. Mókà tọa ló ní e Hánà beè ié tṍó ea kọ́ bé e nu tọ́aẹ́ ló naa nè Jìhóvà lọ̀l ẹ?

⁷ Tṍó e Hánà ni kọ́ bé e nu tọ́aẹ́ ló naa nè Jìhóvà lọ̀l, Pọ̀b Neǹ Vààla Gyọ́ọ̀ Ílaì beè naa kọ á agala boo kọọ̀ Jìhóvà é áálá a tã̀àgã ló. Mókà tọa ló ní e Hánà beè ié tṍó e Jìhóvà zọ́ẹ loá bel lọ̀l ẹ? Nòòtẽ́ ea di mm̀ Kpá Káí kọ́ọ̀: “Pábiaá beè gbóó àà vaá dé nu, vaá sĩ́e náa beè bigálá ná.” (1 Sám. 1:​17, 18) Lóó Hánà beè dĩ̀ìnà, náa kal ló béè kọ dìtõ̀ò ea di bá gáà beè nyaaa. A beè agala boo kọ Jìhóvà dã́ ból ló tã̀àgã̀ ea diè bá nè bé e nu tọ́àẹ̀ẹ́ ló naa, vaá a beè nyimá kọ àé nveenìè bá neèe. Níà gbõ̀ònà nú e Jìhóvà beè naa ẽ́. A beè dã́ ból ló bé e nu tọ́aẹ́ ló naa, dã́ a tã̀àgã ló, vaá a beè naa kọ á ié gbò pá nvín tṍó e tṍó téní. ​—1 Sám. 1:​19, 20; 2:21.

8-9. Dẹ̀ẹ̀a boo nú ea di mm̀ kpá Híbrù 10:​24, 25, éé ní ea náa vaá èé piiga boo gè olòó sí nònù ẽ? (Ẹ̀b nàgé fòtó.)

 ⁸ Nú eé láá nó lọl ló. É kọ ò gé téní bá tàvàlà dìtõ̀ò ea ólò naa kọ nyíé ni á palàge bììlà naa ní eo tóò? Be à sẹlẹ, àé láá dú kọ nen ea dṹùnà ni àbèè kọ o kóò ú. Tṍó ea meà naa vó, àé láá tàn ni gè tõó kĩée ea é dú áá ọ̀ọ̀. Níà bé ea ólò mèà naa ló gã́bug nen ẽ́. Sõò kẽea boo nu dòòmà bá Hánà, a beè àà kil boo beè tọ kàn káí vaá Jìhóvà beè tú Pọ̀b Neǹ Vààla Gyọ́ọ̀ Ílaì nvèèmàe nyíé gbàà. Mm̀ tẽ̀ènè sĩ́deèá, Jìhóvà é láá nvèè ni nyíé gbàà vaá siè ni kpóó ló tṍó eo síì nònù bã̀àna tṍó e lóó ni palàge ọọ vaá nyíé ni à bììlà. (Bugi Híbrù 10:​24, 25.) Tṍó e pãanè tṍ ló gbò dọ̀ Kpá Káí e bà bugi gbẹá nònù, à ólò nvèèi nyíé gbàà vaá nvèè bá nèi kọ é lọ̀l nyíé boo nú ea gé biiléi nyíe. Vó ólò naa kọ nyíéi á ẹẹ bã̀àna tṍó e bẹẹ dìtõ̀ò gáà nyaaa.

⁹ Tṍó e di nònù, pá vígà ólò sièi kpóó ló vaá naa kọ é agala boo kọ bà vulèèi. Vó ólò naa kọ lóói á dĩ̀ìnà tṍó e dì vá ló. (1 Tẹ̀s. 5:​11, 14) Bugi togó boo nú ea beè naaá ló ene kà vígà págbálà ea di boo kele íb sìtóm kọ̀ kpẹ̀a dénè tṍó ea va beè ù. À kọ́ọ̀: “Sìgà tṍó m̀ ólò tõó kĩée ea dú áá m̀m̀ tò boo béè kọ à palàge tànim gè mòn ńdáà va. Sõò m̀ ólò ié sìà kpóó ló tṍó em síì nònù boo béè kọ gbò bel e pá vígà ólò ló nèm ólò nvèèm nyíé gbàà. Kọ̀láá bé e nyíém géè bììlà naa, tṍó em ínà nònù lóóm ólò dĩ̀ìnà.” Tṍó e síì nònù, Jìhóvà ólò láá tú pá vígà nvèèmà bá nèi.

10. Mósĩ́ deè ní eé láá nó nu dòòmà bá Hánà tṍó e nyíéi biilà ẹ?

¹⁰ Lóó Hánà beè palàge dĩ̀ìnà tṍó ea tãagã ló Jìhóvà vaá kọ́ bé e nu tọ́aẹ́ ló naa nèe. Olo é láá naa nagé vó, òé láá ‘tú dénè nu ea tãagẽ́ ni gbẹẹ́ bá Jìhóvà’ vaá agala boo kọ àé nveè bá nè ni. (1 Pít. 5:7) Ene kà vígà pábia e gbò zib beè fẹ́ a dóm kọ́ọ̀: “Nyíém beè palàge bììlà, vaá m beè dòòmà kọ ním é láá ié ná ẹ́ẹ́-ẹẹ̀ nyíe. Sõò Jìhóvà ólò naa kọ ḿ ié dĩ̀ìnè ló bùlà kọ̀láá tṍó em tãagã̀e ló, boo béè kọ à palàge vùlèm. Sìgà tṍó ním ólò nyimá nú em é kọ́ mm̀ nà tã̀àgã ló, sõò à ólò dã́ ból ló bé e nu tọ́a ḿ ló naa. Kọ̀láá tṍó e nyíém palàge bììlà, m̀ ólò bànìe kọ á nèm dĩ̀ìnè ló bùlà. Tṍó em náà vó, lóóm ólò dĩ̀ìnà.” Tṍó eo kọ́ọ̀ bé e nu tọ́a ní ló naa nè Jìhóvà, à ólò palàge tọáẹ́ ló vaá à ólò dã́ ból ló bé e nu tọ́a ní ló naa. Bã̀àna tṍó e tã̀àgã̀ eo di bá náa tá, Jìhóvà é láá nvèè ni nyíé gbàà vaá naa kọ ó ié dĩ̀ìnè ló bùlà. (Ps. 94:19; Fíl. 4:​6, 7) À ólò mòn kọ̀láá kà nú eo náà kọbé ò láá bọ́ló dẹ̀lẹ̀ nyíé boo nèe vaá àé tã́ànè ni dee bá.​—Híb. 11:6.

TṌÓ EO TÓÒ BOO BÉÈ KỌ NEN EO BEÈ DẸLẸ NYÍÉ BOO TÚ PỌ́LỌ́ BÁ SẸ̀Ẹ̀MÀ NI

11. Mókà tọa ló ní e Dévìd beè ié tṍó e gbò nen tú pọ́lọ́ bá sẹ̀ẹ̀màe ẽ́?

¹¹ Dévìd beè tení bá gã́bug tã̀àgã̀ ea beè naa kọ á tò. Gã́bug nen beè ọví Dévìd. Bã̀àna pá a tọ nè pá a kóò ea beè dẹlẹ nyíé boo beè tú pọ́lọ́ bá sẹ̀ẹ̀màe vaá gbĩ́ gè fẹ́ẹ. (1 Sám. 19:​10, 11; 2 Sám. 15:​10-14, 30) A beè emí kọọ̀: “Lóóm ọọ bá pyòlà túu; gĩ́i ea ààḿ dẽe ólò gyọọvẹ̀ nà vái buù deè bílá dee; Nà gĩ́i ólò mm-má boo nà kpòté.” Éé ní ea beè naa kọ nu á tọá ló Dévìd naa vó é? A beè kọọ̀ “Boo béè dénè gbò e bà gé nveè m tã̀àgã̀ ló.” (Ps. 6:​6, 7) Pọ́lọ́ bá e ba beè sẹ̀ẹ̀mà Dévìd beè palàge biilée nyíé naa ní ea tó.

12. Dẹ̀ẹ̀a boo nú ea di mm̀ kpá Psalm 56:​8, éé ní e Dévìd beè agala boo é?

¹² Náa kal ló béè kọ Dévìd beè di kèbá tàvàlà dìtõ̀ò, a beè agala boo kọ Jìhóvà  vulèèe. A beè emí kọọ̀: “Jìhóvà é dã́ nà kpã́ tó.” (Ps. 6:8) Dõona tṍó e Dévìd beè kpeesĩ́ ló tàvàlà dìtõ̀ò, a beè emí nú ea di mm̀ kpá Psalm 56:8. (Bugi.) Gbò bel e Dévìd beè emí mm̀ dọ̀ Kpá Káíá náa kọ é dã́ ból ló bé e Jìhóvà vulèi vaá ẹ̀b nú ea kil ló bé e nu tọ́aí ló naa. Mm̀ dọ̀ Kpá Káíá, Dévìd beè emí kọọ̀ Jìhóvà gé tú a bẹ̀lẹ̀ kpá nom bẹẹmàè a gĩ́ì tó, vaá à gé émí mm̀ a kpá. Dévìd beè agala boo kọọ̀ níì áá nú ea gé ténìè bá ní e Jìhóvà nyímáé nì, sõò à nyímá nágé bé e nu tọ́àẹ̀ ẹ́ ló naa.

13. Éé ní ea bọ́ló kọ é kẽea boo tṍó e gbò nen kẹlẹ́i é? (Ẹ̀b nàgé fòtó.)

¹³ Nú eé láá nó lọl ló. É kọ nyíé ni gé biilà boo béè kọ nen eo beè dẹlẹ nyíé boo kẹlẹ́ ni àbèè kọ à tú pọ́lọ́ bá sẹ̀ẹ̀mà ni? Be à sẹlẹ, nen eo beè noo kọ òé ílai, àbèè o dóm àbèè o va sọ́ni bá gbẹẹ́ kẽ. Àé láá du nagé kọọ̀ nen eo beè vùlè ooà aa ló gè fã̀ Jìhóvà. Ene kà vígà págbálà ea va beè kuná gã̀ gbẹẹ́ẹ vaá ààẹ́ ló kọ́ọ̀: “Nú ea beè naaá ã́ beè palàge bọọ ḿ ló, a beè tõo ḿ ló kọ ḿ gé ló tọ́ọ̀ nu vaá nyíém beè palàge bììlà.” Be nen beè kẹlẹ́ ni àbèè ge tú pọ́lọ́ bá sẹ̀ẹ̀mà ni, ié agẹló vaá ò nyímá kọọ̀ Jìhóvà náa é sọ́ni bá gbẹẹ́ kẽ. Vígà págbálàa kọ́ọ̀: “M nyímá kọọ̀ gbò nen é láá kẹlẹ́i, sõò èé láá dẹ̀ẹ̀a boo Jìhóvà boo béè kọ náa é kẹlẹ́i tọ́ọ̀ dee. Kọ̀láá bé e nu meà naa, à ólò di kpènà ló gè nvèè bá nèi. Náa é sãanà bá ló pá a gbò e bà bọ́ló dẹ̀lẹ̀ nyíé boo.” (Ps. 37:28) Kẽ̀èà nàgé boo kọọ̀, Jìhóvà vulè ni èlmà bé e gbò nen vulè ni naa. Tṍó e gbò nen kẹlẹ́ ni, àé láá palàge zọ̀ ni, sõò láb gbò nen náa é láá nyaaná íb tọa ló e Jìhóvà íe kìlmà ní ló boo béè kọ à palàge nvèè ni ka ló. (Róm̀ 8:​38, 39) À bọ́ló kọ ó kẽ̀èa boo kọọ̀: Kọ̀láá bé e gbò nen tú pọ́lọ́ bá sẹ̀ẹ̀mà ni naa, Jìhóvà palàge vùlè ni.

14. Éé ní e kpá Psalm 34:18 náa kọ é agala boo é?

¹⁴ Tṍó e gbò nen kẹlẹ́i, èé láá ié dĩ̀ìnè ló bùlà tení dú ló gè bugi nú e Dévìd beè emí mm̀ kpá Psalm 34:18. (Bugi.) Ene kà kpá ea ólò baatẽ́ Kpá Káí kọ́ọ̀ “gbò e lóó va ọọ” e dọ̀ Kpá Káíá kọ́ nú ea kil ló é láá loá nágé bel nyòòmà “gbò ea tõó vá ló kọ bà náa íèè ból dẽesĩ́.” Mósĩ́ deè ní e Jìhóvà ólò nvèè bá nè gbò e bà kẹlẹ́ va ẹ́? Jìhóvà “di kuló” dénè bẹ̀ì. À bélí kà ea gé kpá bá ló a nvín ea gé tó. Tṍó e gé mon tã̀àgã̀ boo béè kọ nen e beè vùlè kẹlẹ́i, à ólò zọ̀ Jìhóvà vaá à ólò nvèè bá nèi. À ólò nvèè nyíé gbàà gbò e nyíé va biilà vaá à tõó vá ló belí kọ bàá gé ló tọ́ọ̀ nu. À néi ból dẽesĩ́ ea náa kọ é láá ĩ̀ìmà gbò tã̀àgã̀ e di kèbá.​—Àìz. 65:17.

 TṌÓ EO TÓÒ BOO BÉÈ KỌ Ò GÉ MON TÃ̀ÀGÃ̀ BÁ AGẸBÁ ZỌ̀ LÓ

15. Mókà dìtõ̀ò ní ea beè naa kọ Hèzìkáíà á tò e?

¹⁵ Méné Hèzìkáíà beè mòn tã̀àgã̀ bá kà agẹbá zọ̀ ló tṍó ea ni tóólá 39 gbáá. Jìhóvà beè lẹ̀ẹ̀là neǹ kọ́ọ̀ bùlà Bàrì Àìzáíà kọ á kọ́ nè Hèzìkáíà kọ àé ú gbẹá kèbá zọ̀ lóá. (2 Kíǹ. 20:1) Tṍó e Méné Hèzìkáíà dã́ lẹ̀ẹ̀la tómá, nyíée beè bììlà naa ní ea palàge tò. Vó beè naa kọ á bàn Jìhóvà kọ á nveenìè bá neè ẽ.​—2 Kíǹ. 20:​2, 3.

16. Éé ní e Jìhóvà beè naa nè Hèzìkáíà ẹ?

¹⁶ Tṍó e Jìhóvà dã́ tã̀àgã ló Hèzìkáíà vaá mòn a gĩ́ì tó, a beè tọáẹ́ ló naa ní ea kọ́ nèe kọọ̀: “Ndaa dã́ o tã̀àgã ló. M mon o gĩ́ì tó. Nda é bó ni.” Tení dú ló neǹ kọ́ọ̀ bùlà Bàrì Àìzáíà, Jìhóvà beè zìgà nè Hèzìkáíà kọ àé kpáá tuè dee tẹlẹ ló deé ea é tõoma dùm, vaá àé duulàẹ Jèrúsalẹ̀m lọl bá gbò bé pá Àsìríà.​—2 Kíǹ. 20:​4-6.

17. Mósĩ́ deè ní e Jìhóvà ólò nvèè bá nèi tṍó e di kèbá agẹbá zọ̀ ló é? (Psalm 41:3) (Ẹ̀b nàgé fòtó.)

¹⁷ Nú eé láá nó lọl ló. Éé ní eo é láá naa be ò di kèbá kà agẹbá zọ̀ ló vaá à belí kọ nóo é láá ié bóa ẹ́? Kọ́ bé e nu tọ́a ní ló naa nè Jìhóvà, àé pãané ni tṍ ló bã̀àna tṍó eo gé tãagã̀e ló vaá ò tò. Kpá Káí kọ́ọ̀ Jìhóvà dú “Tẹ̀ ea íe sàn nyíe, Bàrì ea ólò nvèè bá nèi dénè tṍó.” (2 Kọ́r. 1:​3, 4) Née é láá ẹ̀b dẽesĩ́ kọ Jìhóvà é lọl kọ̀láá kà bẹẹ tã̀àgã̀, sõò è agàlà boo kọọ̀ àé nveè bá nèi. (Bugi Psalm 41:3.) Tení dú ló a nyómá káí, Jìhóvà ólò nèi kói, nyìmànù nè dĩ̀ìnè ló bùlà ea é náa kọ é láá ĩ̀ìmà gbò tã̀àgã̀ e kpeèsĩ́ ló. (Pró. 18:14; Fíl. 4:13) À ólò nvèè nài gé nyíé gbàà tení dú ló ból dẽesĩ́ ea néi kọ dì deèsĩ́ kpá ló tọ̀ọ̀ nen náa é zọ nà.​—Àìz. 33:24.

18. Mókà dọ̀ Kpá Káí ní eo monì kọ àé láá nvèè ni nyíé gbàà tṍó eo kpeèsĩ́ ló tàvàlà dìtõ̀ò ẽ? (Ẹ̀b ńkpó ea kọ́ọ̀ “ Gbò Dọ̀ Kpá Káí Ea É Láá Nvèèi Nyíé Gbàà Tṍó E Nyíéi Biilà.”)

¹⁸ Bel e Jìhóvà beè kọ́ nè Hèzìkáíà beè palàge nvèèe nyíé gbàà. Ge bugi Kpá Káí é láá nvèè nàgé nyíé gbàà beele. Tṍó e di kèbá tã̀àgã̀, gbò bel e Jìhóvà kọ́ nèi ea di mm̀ Kpá Káí é láá naa kọ é ié dĩ̀ìnè ló bùlà. (Róm̀ 15:4) Tṍó e neǹ dóm biè beè kọ́ nè ene kà vígà pábia ea ólò tõó West Africa kọọ̀ kom ea kọlà cancer dìé ló, vígàa beè olòó tò. Vígà pábiaá kọ́ọ̀: “Nú ea di mm̀ kpá Àìzáíà 26:3 beè palàge nvèèm nyíé gbàà. À dú kà-kà kọ née ólò láá lẹ̀ẹ̀là bel ló tã̀àgã̀ e kpeèsĩ́ ló, sõò nú ea di mm̀ dọ̀ Kpá Káíá náa kọ ḿ agala boo kọọ̀ Jìhóvà é néi dĩ̀ìnè ló bùlà ea é náa kọ é lẹ̀ẹ̀là bel ló bé e lábvì láb naa tṍó e kpeèsĩ́ ló tàvàlà dìtõ̀ò.” É kọ à íe dọ̀ Kpá Káí eo ni mon kọ àé láá nvèè bá nè ni tṍó eo gé kpeesĩ́ ló tàvàlà dìtõ̀ò, vaá à belí kọ nóo íè nà ból dẽesĩ́?

19. Éé ní e gé ẹbmà dẽe ge ié dì deèsĩ́ ẽ́?

 ¹⁹ Ke kùbmà bàlà booí a dũuà iná kuló. Vóà naa, è ẹbmà dẽe kọ èé kpeesĩ́ ló gbò dìtõ̀ò ea é náa kọ nyíéi á bììlà. Sõò nu dòòmà bá Hánà, Dévìd nè Méné Hèzìkáíà e ni nó nú ea kil lóí náa kọ é nyimá kọọ̀ Jìhóvà ólò mòn tṍó e tóò, vaá à ólò palàge tọáẹ́ ló. À palàge vùlèi boo béè kọ è bọ́ọ̀ló dẹ̀lẹ̀ nyíé boo kèbá gbò dìtõ̀ò e kpeèsĩ́ ló, vaá àé kẽea boo bẹẹ gĩ́ì tó. Vóà naa tṍó e kpeèsĩ́ ló tàvàlà dìtõ̀ò, èé kọ́ bé e nu tọ́aí ló naa nè Jìhóvà mm̀ tã̀àgã ló. Náa dú bíi kọ é kpòòlà lóó lọl zẹ̀ẹ̀ pá vígà. Ge bugi nagé Kpá Káí é náa kọ é ié nvèè nyíé gbàà ea aa bá Jìhóvà. Èé láá agala boo kọ be è kilsĩ́ gè ĩ̀ìmà vaá bọ́ló dẹ̀lẹ̀ nyíé boo, Jìhóvà é néi kpẽ́. Ene kà nú ea é láá nvèèi nyíé gbàà dú zìgànù e Jìhóvà beè zìgà kọ àé fãanàè dénè bẹẹ gĩ́ì tó, vaá lọ̀l dénè nú ea ólò màn nyaa ló. (Kùùà 21:4) Tṍóá, èé gbóó vulí kpã́ zààvà.