Neǹ tóm Pọ́ọ̀l beè emí kpá má Tímotì ea dú nágé neǹ kànen mm̀ bõ̀ònatõ̀ò kọọ̀: “M̀ gé tú ni sẹlẹ́ kèsĩ́ Bàrì, nè kèsĩ́ Kráìst Jíízọ̀s, nè kèsĩ́ pá a gbò nyómá tóm ea beè sà, vaá palàge ãané ni kọ ó naa dénè gbò nuí, e bè nóó léé ló enè nen gbẹẹ enè nen, àbèè ge ẹ̀b sĩ́ fìnì dìbmà béle.”​—1 Tím. 5:21.

Kọbé è nyímá ló gbò e bà dú gbò nyómá tóm e Bàrì beè sàí, èé zẹ́ẹ́ ló bel boo gbò e bà náa dṹùnà gbò nyómá tómí. À dọa bàlà kẽ kọọ̀ 144,000 nená náa dṹùnà gbò nyómá tómí. Tṍó e Pọ́ọ̀l beè emí kpáá má Tímotì, tọ́ọ̀ kà gbò e bà dṹùnà gbò e Bàrì beè tṍ nóo ból gáà kẽ̀èà aa kemà ú kil káála. Gbò tóm nè dõona gbò e Bàrì beè tṍ nóo ból gáà beè du gbò nyómá naa ní e bà é zọ Jíízọ̀s bẹ̀l. Vóà naa, bà náa é láá dú ‘gbò nyómá tóm e Bàrì beè sà’ e Pọ́ọ̀l géè ló bel kilma lóá.​—1 Kọ́r. 15:​50-54; 1 Tẹ̀s. 4:​13-17; 1 Jọ́ọ̀n 3:2.

Gbá ló vó, gbò nyómá tóm e ba beè lọ̀l togó kèbá Bàrì tṍó Tù Múúá náa é láá dú ‘gbò nyómá tóm e Bàrì beè sàa.’ Gbò nyómá tómá beè nvèè sãa kúm Sétàn naa ní e bà dú gbò zọ, vaá dú gbò ọ́b Jíízọ̀s. (Jén. 6:2; Lúùk 8:​30, 31; 2 Pít. 2:4) Dì deèsĩ́ àla, Jíízọ̀s é beè toví va tẹlẹ mm̀ bànà ábìs vaá bà é tõó kĩá mm̀ 1000 gbáá. Tṍó e 1000 gbááá ni íná kùbmà, bà é gbóó kyọ̀ va sĩ́.​—Júùd 6; Kùùà 20:​1-3, 10.

‘Gbò nyómá tóm e Bàrì beè sà’ e Pọ́ọ̀l géè ló bel kilma lóá, é dú gbò nyómá tóm e bà di káála e bà bọ́ló dẹ̀lẹ̀ nyíé boo nè ‘Bàrì nè Kráìst Jíízọ̀s.’

À íe gã́bug gãà gbò nyómá tóm e bà bọ́ló dẹ̀lẹ̀ nyíé boo e bà di káála. (Híb. 12:​22, 23) À bélí kọ dénè gbò nyómá tóm náa ólò sí tẽ̀ènè íb tóm. (Kùùà 14:​17, 18) Dì belí nu dòòmà bá, áá ene kà nyómá tóm ní e Jìhóvà beè lẹ̀ẹ̀là kọ á fẹ́ 185,000 gbò bé pá Àsìríà ẹ. (2 Kíǹ. 19:35) Sõò àé láá dú kọọ̀ Bàrì beè íbá ló gã́bug gbò nyómá tóm kọ baala ní e bà é ‘kpoolà dénè nu ea kyọ gbò nen nè dénè gbò e bà ólò sí pọ́lọ́ lọl gbàà gbò e [Jíízọ̀s é] lẹẹlà bel ló’ é. (Máát. 13:​39-41) Aé láá ina gé bá ló sìgà ọ̀và kọ bàá ‘bõonè ló gbò e [Bàrì] beè sà lọl kọ̀láá ketõ̀ò ea di bàlà booí’ kilma káála. (Máát. 24:31) Vaá sìgà gbò nyómá tóm ólò ‘kpènài.’​—Ps. 91:11; Máát. 18:10; doolé ló Máátìù 4:11; Lúùk 22:43.

‘Gbò nyómá tóm e Bàrì beè sà’ e 1 Tímotì 5:21 ló bel kilma lóá é láá dú gbò nyómá tóm e Bàrì beè nè va kele íb tóm kọ bàá ẹ̀b nú ea kil ló pá a gyóòlo. Mm̀ gbò gã́bel ea di ló dọ̀ Kpá Káíá, Pọ́ọ̀l géè kọ́ bé e gbò kànen mm̀ bõ̀ònatõ̀ò é sí ba tóm naa, nè bé ea bọ́ló kọ bàá nvèè va ka ló naa. Pọ́ọ̀l beè kọ́ nè gbò kànen mm̀ bõ̀ònatõ̀ò kọ bàá gá naa nú ea “é léé ló enè nen gbẹẹ enè nen, àbèè ge ẹ̀b sĩ́ fìnì dìbmà béle” nè ge kọ bàá palàge bugi togó besĩ́ bà kálá nè béèlàfùl. Ene kà nú ea náa vaá à palàge dú bíi kọ bàá tú dùùlà bá deè tṍ e Pọ́ọ̀l né vaí dú kọọ̀ bà gé sí tóm gbẹá “kèsĩ́ Bàrì, nè kèsĩ́ Kráìst Jíízọ̀s, nè kèsĩ́ pá a gbò nyómá tóm ea beè sà.” Vóà naa, à dọa bàlà kẽ kọọ̀ Jìhóvà beè íbá ló sìgà gbò nyómá tóm kọ bàá ẹ̀b nú ea kil ló pá a gyóòlo, nvèè bá nè va tṍó e bà gé kọ́ kpẹ̀a, vaá kọẹ̀ neèe gbò nú ea gé nááá mm̀ bõ̀ònatõ̀ò.​—Máát. 18:10; Kùùà 14:6.