É kọọ̀ o beè láá tú ọ̀ẹ̀ dẽe bùgmà gbò Kpá Tọ Kùdẽe Ló e ba beè emí gbááí? Ẹ̀b be òé láá aalá gbò bíbví:

Mókà nu dòòmà bá ní e Jìhóvà beè zogè ea kil ló bá gè sẹ̀ẹ̀mà gbò bia ẹ́?

Náa ólò tú pọ́lọ́ bá sẹ̀ẹ̀mà gbò bia vaá tú lé bá sẹ̀ẹ̀mà gbò gbálà. Bàrì ólò pãane tṍ ló gbò bia, ẹ̀b bé e nu tọ́a vá ló naa, nè gbò tã̀àgã̀ e bà gé téní bá. À ólò dẹlẹ́ va nyíé boo kọ bà é sí tóm ea né va leevè.​—w24.01, 15-16 náásĩ́.

Mósĩ́ deè ní eé láá tú dùùlà bá deè tṍ ea di mm̀ kpá Ẹ́fẹsọ̀s 5:7 ea kọ́ọ̀: “Ó gá zọi gbò e bà dì belí vó naaai tọ́ọ̀ nu” siimá tóm ẽ́?

Neǹ tóm Pọ́ọ̀l beè ãanéi kọ é gá zọ̀ gbò e bà é náa kọọ̀ ge tõó boo gbò log Jìhóvà á tàvàlàí ló naaá nu. À bãàa mm̀ gbò e monmà dẽe e ólò zọ̀ naaá nu bií ló gbò e ólò zọ̀ loá bel boo íntanèt.​—w24.03, 22-23 náásĩ́.

Mókà gbò kyáá bel ní ea dú bíi kọ é palàge kpènà bẹẹ bá lọl ló é?

À dú bíi kọ é ié ọ̀ẹ̀ dẽe kilma ló gbò bel e pá vígà náa zẹ́ẹ́ gbĩ́ tẽ́ ló besĩ́ bà kálá lò, ní e bà lẹẹlà tenmá boo fóòn mái, àbèè kyáá bel ea aa gã́ gbò e ba beè dọ̀ aa nvéè nòòmànù Kráìst e bà sẹlẹ ló belí kọọ̀ bà íèi lèèmá m tṍó e gé kọ́ kpẹ̀a.​—w24.04, 12 náásĩ́.

Éé ní e nyímà, vaá éé ní e bè née nyímà ea kil ló bé e Jìhóvà é béélá bel ló Méné Sólomòn, gbò ea beè kyọ̀sĩ́ gbẹá Sọ́dòm nè Gòmórà nè gbò ea beè kyọ̀sĩ́ tṍó Tù Múúá ẽ́?

Née agàlà boo be Jìhóvà beè beeláfùl kọọ̀ àé kyọẹ̀ va sĩ́ dọ̀ọ̀mà dè-dè, vaá náa é kẽee nàè va lọl kemà ú. Sõò è nyímà kọ Jìhóvà nyímá kọ̀láá kà nú ea kil vá ló vaá à palàge ié sàn nyíe.​—w24.05, 3-4 náásĩ́.

Ge kọ bà tú Bàrì doolé ló “Dem” náa kọ é agala boo éé? (Dìt. 32:4)

Èé láá tú Jìhóvà naamá bẹẹ ketõ̀ò kpènà. À dú nen eé láá dẹlẹ nyíé boo, vaá à ólò mm-mè kọ̀láá kà nú ea beè zìgà. Náa ólò nyaaá, náa ólò nyaaná a láb àbèè nú ea noo gè naa.​—w24.06, 26-28 náásĩ́.

Éé ní ea é nveè bá nè ni tṍó eo kil dõona kà bõ̀ònatõ̀ò ẽ?

Dẹ̀ẹ̀a boo Jìhóvà, àé nveè bá nè ni belí bé ea beè nvèè bá nè pá a gyóòlo tṍó ea kil nvéeá naa. Ó gá tú gbò e bà di bõ̀onatõ̀ò eo beè zẹ́ẹ́ dìa doolé ló gbò e bà di o ãa bõ̀ònatõ̀ò. Tú lóó nè ge sí tóm mm̀ bõ̀ònatõ̀ò eo ã́àa kìla vaá ò bãàà ãa kóò.​—w24.07, 26-28 náásĩ́.

Éé ní eé láá nó lọl ló gbò bel dòòle ló ea di mm̀ kpá Máátìù 25 togó é?

Bel dòòle ló ea kil ló naanà ból nè kà bólá tẹ́lẹ bàlà kẽ bé ea palàge dú bíi kọ é bọ́ló dẹ̀lẹ̀ nyíé boo naa. Bel dòòle ló ea kil ló gbò nvín pá nyááá nóòmài kọ à palàge dú bíi kọ é kpoogá dee ló vaá di kpènà ló. Vaá bel dòòle ea kil ló bẹ̀lẹ̀ kpègèa kọ́ bé e gè sí tóm agẹlẹ bá palàge dú bíi naa.​—w24.09, 20-24 náásĩ́.

Ke kọ̀ọ̀lọ̀ ea beè di ló tọọ̀ káí e Sólomòn beè tìbva beè tõ̀ò gãboo vàẹ?

Mm̀ 2 Krónikòl 3:​4, sìgà Kpá Káí e ba beè tàb kọ́ọ̀ ke kọ̀ọ̀lọ̀ tọá beè toolá “120 cubit” naamá 53-mità (175 ft). Sõò dõona kà gbò émì nu e bàé láá dẹlẹ nyíé boo beè tàb kọ́ọ̀ a gãboo toolá “20 cubit,” naamá 9 mità (30 ft). Dẹ̀ẹ̀a boo bé e gbọọ̀ tọọ̀ káíá beè bọọ́ gbe naa, àé dú kọọ̀ gãboo ke kọ̀ọ̀lọ̀ ea beè di ló tọọ̀ káíá beè toolá 20 cubit.​—w24.10, 31 náásĩ́.

Éé ní e gè kọọ̀ neǹ nvèè bá sìtóm é “dú dóm tẽ̀ènè kà va” bã̀àa m ẽ́? (1 Tím. 3:12)

À tõó dọ̀ kọ àé ílí áá ene kà pábia vaá náa é kúná gã̀. Gbá ló vó, náa bọ́ló kọ á íe lèèmá mm̀ dõona kà pábia.​—w24.11, 19 náásĩ́.

Éé ní ea náa vaá èé láá kọọ̀ nú ea di mm̀ kpá Jọ́ọ̀n 6:53 náa gé loá bel nyòòmà sĩ́deè e Jíízọ̀s gbĩ́ kọ é sẹ̀ẹ̀mà Sẹ̀lẹ̀nù Dè Gyã́á Ló M̀m̀-neè Bẹẹ Tẹ̀ Íe é?

Kpá Jọ́ọ̀n 6:53 ló bel kilma ló gè bà nom̀ kpá ló nè ge ṍ miì Jíízọ̀s. Jíízọ̀s beè ló belá nè pá Júù e ba náa beè dẹlẹ́ẹ nyíé boo gbẹá Gálilì mm̀ gbáá 32 C.E. Sõò, enè gbáá aa ló tṍóá a beè nvèè Sẹ̀lẹ̀nù Dè Gyã́á Ló M̀m̀-neè Bẹẹ Tẹ̀ Íe kẽ gbẹá Jèrúsalẹ̀m, vaá áá gbò e bà é zọ́ẹ bẹ̀l gbẹá káála ní ea beè ló belá nèe.​—w24.12, 10-11 náásĩ́.