1. Tṍó e pábia gé bugi togó boo nen ea é íá, mókà gbò bíb ní ea bọ́ló kọ á bĩiná a bá ẹ́?

DÉNÈ nen ea di mm̀ bõ̀ònatõ̀ò di kèbá tùle Kráìst ea gbõoma. Sõò, tṍó e pábia ea gé nyoone nvéè Kráìst íá dóm, à ólò gbóó di kèbá tùle a dóm e náa gbõoma. Níí náa ólò bọọgẹ̀ valí. Vóà naa, tṍó ea gé bugi togó boo nen ea é íá, à bọ́ló kọ á bĩiná a bá kọọ̀: ‘Éé ní ea zógè kọọ̀ vígà págbálà em gbĩ́ gè iáí é dú lé tẹ̀ boo tọ ẹ́? É kọọ̀ à ólò tú gè fã̀ Jìhóvà gyààma sĩ́ mm̀ a dùm? Be náa ólò naa vó, éé ní ea náa kọ ḿ bugi togó kọọ̀ àé dú nen ea é nveè bá kọ é ié lé gbaa ló kilma ló Jìhóvà tṍó e ni ílá ẹ́?’ Nagé, à bọ́ló kọọ̀ pábia á bĩiná a bá kọọ̀: ‘Mókà gbò kpãa ea é nveè bá nè bẹẹ ílà dóm nè va ní e nda íè e? É kọọ̀ m̀ dúù nen em ólò láá ĩ̀ìmà nu vaá dõonu taalẹ bá? É kọọ̀ m̀ ié kà lé gbaa ló kilma ló Jìhóvà?’ (Ẹ̀klì. 4:9, 12) Be à gá náa vaá pábia à nè lé béèlafùl besĩ́ à kálá iá dóm, àé náa kọ a ílà dóm nè va á di mm̀ ẹ́ẹ́ nyíe vaá kilsĩ́ leevè.

2. Éé ní èé ló bel boo mm̀ nakà togó bel ge nòí ẽ́?

² Gã́bug gbò vígà pábia a zógè lé nu dòòmà bá mm̀ ge gbàn tṍ ló ba dóm. À bọ́ló gè lèèlà gbò vígà pábiaí! Nyíéi ẹẹ gè zọ̀ gbò vígà pábia e bà bọ́ló dẹ̀lẹ̀ nyíé booí fã̀ Jìhóvà! Mm̀ nakà togó bel ge nòí, èé ló bel boo ààlaà taà kà bíbví: (1) Mókà gbò nu ànà-ànà ní e gbò va é láá kpee sĩ́ ló é? (2) Éé ní ea náa à bọ́ló kọọ̀ va á béèlafùl ge gbàn tṍ ló a dóm ẽ́? (3) Éé ní e gbò dóm nè va e bà gé nyoone nvéè Kráìst é láá nó lọl ló kìlmà kpá ló kẽ e Jíízòs, Ábigẹẹ̀l, nè Mérì ea dú vaà Jósẹ̀f vaá du nagé kà Jíízọ̀s beè ié é?

3. Éé ní ea náa vaá tã̀àgã̀ ólò di mm̀ kọ̀láá kà ílà dóm nè va ẹ́?

³ Ílà dóm nè va dú dõ̀ònù ea gbõoma ea aa bá Bàrì, sõò gbò nen náa gbõoma. (1 Jọ́ọ̀n 1:8) Níà nú ea náa vaá Kpá Káí à ãane gbò e baa ni ílà kọọ̀ bàé tení bá gbò nu ànà-ànà ea kólíe “tã̀àgà” ẽ. (1 Kọ́r. 7:28) Èé ló bel boo sìgà gbò nu ànà-ànà e gbò va é láá tení bá.

4. Éé ní ea náa vaá àé láá tõó ló va belí kọọ̀ à lọàẹ̀ ka ló a bá be à tõonìè kè kẽè a dómé?

⁴ Sìgà tṍó àé láá tõó ló va belí kọọ̀ be à tõonìè kẽè a dóm, à lọàẹ̀ ka ló a bá boo béè bé e ba beè bumáe naa. Marisol ea ólò tõó dó United State kọ́ọ̀: “Gbẹá kiẽ́e ba beè bumá nda, bà ólò bọọgẹ̀ kọ́ nè gbò bia kọọ̀ bà zọ gbò gbálà kuna kpãa mm̀ kọ̀láá kà nu. Nda nyímà kọọ̀ Jìhóvà beè tú lẹ̀ẹ̀là bel nè gbò dóm vaá kọọ̀ gbò va á tõó va kè kẽ, sõò à bọ́ló kọ bàá fã̀ nàgé dẽe gbò va. Ge tõó kẽè lẹ̀ẹ̀là bel nà dóm náa bọọgẹ̀ valí ḿ ló boo beè kọọ̀ bé e gbò e bà dì ḿ kpàn ẹb gè tõó kẽè lẹ̀ẹ̀là bel naa dú kele.”

5. Mókà lọ̀ bug e bè náa gbááá ló Kpá Káí ní e sìgà gbò gbálà ólò ié kilma ló gbò bia ẹ́?

⁵ Nagé, pábia é láá iá dóm ea ólò ẹ̀b kọọ̀ náa bọ́ló gè nvèè ka ló gbò bia. Ene kà vígà pábia ea kọlà Ivon ea ólò tõó bálá sĩ́ South America kọ́ọ̀: “Gbẹá beélè bon, gbò gbálà ní e bà ólò zẹ́ẹ́ dé gyã́á besĩ́ gbò bia kálá dè e. Bà ólò ẹ̀bmà dẽe kọọ̀ gbò ńkem̀ nvín pábia ní e bà é bul nu vaá õ̀ònà ló kẽé, vaá nen ea é sí tóm vaá ẹ̀b nú ea kil ló gbò ńkem̀ nvín págbálà dú ba kà nè pá ba vígà pábia. Bà ólò kọ́ nè gbò nvín págbálà kọọ̀ baála ní e bà dú ‘méné boo ba tọ ẹ́.’ ” Ene kà vígà pábia ea kọlà Yingling, ea ólò tõó bálá sĩ́ Asia kọ́ọ̀: “À ié bel e bà ólò bọọgẹ̀ ló mm̀ ńdáà dem bel ea tõó dọ̀ kọọ̀, náa bọ́ló kọọ̀ gbò bia á nyimá kpá àbèè ge ié bá tóm. Ba tóm dú gè sí dénè tóm tọ, vaá bà náa ólò nèva deè kọ bàá kọ́ ba bùlà nè ba dóm.” Dóm e bè náa íe vulè vaá náa tú gbò nòòkúu ea di mm̀ Kpá Káí siimá tóm ólò naa kọ nu á tàvala ló a va. Náa ólò nó Jíízọ̀s, vaá náa ẹ́ẹ̀lẹ̀ nyíè Jìhóvà.—Ẹ́fẹ. 5:28, 29; 1 Pít. 3:7.

6. Éé ní ea bọ́ló kọọ̀ gbò va á naa kọbé bà láá agẹlẹ ló ba gbaa ló kilma ló Jìhóvà ẹ?

⁶ Dì belí bé e beè nó mm̀ ní ea égè 5 togó bel ge nò naaá, Jìhóvà gbĩ́ kọọ̀ gbò dóm e bà gé nyoone nvéè Kráìst á nvèè bá naa kọ pá ba tọ á ié kà lé gbaa ló kilma ló Jìhóvà, bàá vùlè va vaá ẹ̀b nú ea kil ló ba bíi. (1 Tím. 5:8) Sõò, à bọ́ló kọọ̀ gbò bia e baa ni íá dóm á noo tṍó buù dee nyòòmà ge bugi Moǹ Bel Bàrì, bugi togó boo nú e bà bugi, vaá tãàgã ló Jìhóvà lọa nyíe. Ge naa vó é láá tàvàlà. Gbò va ólò bọọgẹ̀ di mm̀ kíìli-kíìli, vó é láá naa kọọ̀ bàá tuumá kọọ̀ bà náa íèè tṍó àbèè kói gè naamá gbò nuí. Sõò à palàge dú bíi kọ bàá noo tṍó nyòòmà gbò nuí. Ló éé? À dú boo béè kọọ̀ Jìhóvà gbĩ́ kọọ̀ buù bẹ̀ì é kilsĩ́ gè ié kà lé gbaa ló kilmàè ló ẹlẹ.—Tóm 17:27.

7. Éé ní ea é náa kọ á valí ló va gè tõó kẽè lẹ̀ẹ̀là bel a dóm ẽ́?

⁷ À dú kà kà kọọ̀ va é ié bíi ló gè siá kpóó ló kọbé à láá tõó kẽè lẹ̀ẹ̀là bel a dóm e náa gbõoma. Sõò, àé válié ló gè tõó kẽè a dóm be à zigà ge naa vó vaá dã́ ból ló nú ea náa vaá Kpá Káí à kọọ̀ á tõó kẽè a dóm.

8. Dẹ̀ẹ̀a boo nú ea di mm̀ kpá Ẹ́fẹsọ̀s 5:22-24, éé ní ea náa vaá va ea gé nyoone nvéè Kráìst ólò beeláfùl ge tõó kẽè a dóm ẽ́?

⁸ Va ea gé nyoone nvéè Kráìst ólò beeláfùl ge tõó kẽè a dóm boo béè kọọ̀ níà nú  e Jìhóvà gbĩ́ kọ á naa ẽ́. (Bugi Ẹ́fẹsọ̀s 5:22-24.) À dẹlẹ nyíé boo a Tẹ̀ ea di káála boo béè kọọ̀ à nyímá kọ à vulèèe, vaá áá nú ea é léèlìèé ló ní ea ólò kọ á naa ẽ́.—Dìt. 6:24; 1 Jọ́ọ̀n 5:3.

9. Éé ní ea ólò naaá tṍó e pábia fã dẽè lẹ̀ẹ̀là bel a dóm ẽ́?

⁹ Pá bàlà boo ólò siè kpóó ló gbò bia kọ bàá gá tõó boo gbò nòòkúù Jìhóvà vaá ẹ̀b ge tõó kẽè lẹ̀ẹ̀là bel dì belí gè lọ̀à ka ló ba bá. À dú kà kà kọọ̀ gbò e bà ólò nvèè sãa kúm nakà bugí dú gbò e bà náa nyímá ló bẹẹ Bàrì ea ié vulè. Jìhóvà náa é láá kọ́ nè pá a gbò nvín pábia ea palàge nvèè ka ló kọ bàá naa nú ea é lọl va ka ló. Pábia ea piìgà bé ea kpóó sim tùlà naa gè naa nú e Jìhóvà gbĩ́ kọ á naa mm̀ tọ ólò naa kọọ̀ fẹ́ẹ́-fẹẹ̀ ló á di mm̀ a tọ. (Ps. 119:165) Ge naa vó ólò dọ̀ bélè nè á dóm, ẹlẹ, nè pá a nvín.

10. Éé ní eé láá nó lọl ló bel e vígà Carol ló é?

¹⁰ Va ea tõó kẽè lẹ̀ẹ̀là bel a dóm e bè náa gbõomaá zógè kọọ̀ à vulèè vaá fãè dẽè Jìhóvà, ea dú nen ea beè nè lẹ̀ẹ̀là bel sìgà gbò. Carol ea ólò tõó bàlà sĩ́ South America kọ́ọ̀: “Nda nyímà kọọ̀ ńdáà dóm é láá lọ̀, m̀ nyímà nàgé kọọ̀ bé em lábvì láb naa tṍó ea lọ zógè bé em nveè ka ló nà gbaa ló kilma ló Jìhóvà naa. Vó ólò gbóó naa kọ ḿ gbĩ́ gè tõó kẽè nà dóm boo béè kọọ̀ m̀ gbĩ́ gè naa nú ea é léémá Jìhóvà.”

11. Éé ní ea beè nvèè bá nè vígà Aneese kọ á láá ia ló pọ́lọ́ ẹ́, vaá éé ní eé láá nó lọl ló gbò bel ea ló é?

¹¹ Àé láá tavala ló va gè fã̀ dẽe vaá tõó kẽè a dóm be à tõoé ló belí kọọ̀ a dóm náa ólò bugi togó boo bé e nú tọ́àẹ́ ló naa. Sõò nvèè kpíí ló nú e ene kà vígà pábia ea ni íá dóm ea kọlà Aneese beè naa tṍó e íb nuá beè naaáé ló. À kọ́ọ̀: “Ním ólò gbĩ́ gè bã̀ súng. M̀ ólò kẽ̀èa boo kọọ̀ dénè bẹ̀ì ólò lọ̀ nàgé. Nà nu sẹ̀ẹ̀a sĩ́ dú gè ia ló pọ́lọ́ belí Jìhóvà. Tṍó em ià ló pọ́lọ́, m̀ ólò gbóó kpáá ié dĩ̀ìnè ló bùlà.” (Ps. 86:5) Àé válí ló va ea ólò ia ló pọ́lọ́ gè láá tõó kẽè a dóm.

12. Mókà gbò nu dòòmà bá ní ea di mm̀ Kpá Káí é?

¹² Àé láá tõó ló sìgà gbò kọọ̀ nen ea tõó kẽè lẹ̀ẹ̀là bel dú nen ọ́ọ́-ọọ̀. Sõò nakà bug  togóá náa dú kà kà. Gã́bug nu dòòmà bá ea kil ló gbò e ba beè ié agẹ ló di mm̀ Kpá Káí. Bugi togó boo nú eé láá nó lọl ló Jíízọ̀s, Ábigẹẹ̀l, nè Mérì.

13. Éé ní ea náa vaá Jíízọ̀s ólò tõó kẽè lẹ̀ẹ̀là bel Jìhóvà ẹ? Baatẽ́.

¹³ Jíízọ̀s di kẽè lẹ̀ẹ̀là bel Jìhóvà, sõò níì boo beè kọọ̀ náa nyímá kpá àbèè kalì nì. Bé a nòòmànù beè õ̀òa tẽ́ vaá valí gè dã́tẽ́ ló naa zógè kọọ̀ a beè palàge nyimá nu. (Jọ́ọ̀n 7:45, 46) Jìhóvà palàge nyimá ló nú e Jíízọ̀s é láá naa, vó beè naa kọ á nèe deè kọ á zọẹ̀ẹ siá tóm tṍó ea géè dèm bàlà booí. (Pró. 8:30; Híb. 1:2-4) Tṍó e Jìhóvà ni kẽee Jíízọ̀s lọl kemà ú, a beè gbóó nèe ‘kpóó lẹ̀ẹ̀là bel ló dénè nú ea di káála nè boo kunukẽ̀í.’ (Máát. 28:18) Náa kal ló béè kọọ̀ Jíízọ̀s nyímá gã́bug nu, à ólò bĩiná tùle lọl bá Jìhóvà. Ló éé? À dú boo béè kọọ̀ à vulè a Tẹ̀.—Jọ́ọ̀n 14:31.

14. Éé ní e gbò dóm é láá nó lọl ló (a) bá e Jìhóvà ẹbmà gbò bia ẹ́? (b) nú ea di mm̀ kpá Próvẹẹ̀b 31 é?

¹⁴ Nú e gbò dóm é láá nò. Jìhóvà náa beè noo kọọ̀ gbò va á tõó kẽè ba dóm boo béè kọọ̀ À ẹbva kilma kẽ. Nú ea náa vaá è nyimá naa vó dú boo béè kọọ̀ Jìhóvà sa gbò bia nè gbò gbálà ko bàá zọ̀ Jíízòs bẹ̀l. (Gàl. 3:26-29) Jìhóvà beè zogè kọọ̀ à dẹlẹ̀ẹ̀ nyíé boo a Sã́áná tení dú ló gè nèe lẹ̀ẹ̀là bel. Nagé, dóm ea nyímá nu é láá kọ a va á lẹ̀ẹ̀là bel ló sìgà nu. Kpá Káí kọ́ọ̀ lé va é láá ẹ̀b nú ea kil ló gbò tóm ea gé síá mm̀ a tọ, zalí vaá oo kunukẽ̀, vaá ùlà ki. (Bugi Próvẹẹ̀b 31:15, 16, 18.) Ẹ̀ẹ̀ níì gyóòlo e náa íe nèà deè ge kọ́ a bùlà nì. Tãa vó, a dóm é dẹlẹ́ẹ nyíé boo vaá pãanée tṍ ló tṍó ea gé kọ́ a bùlà. (Bugi Próvẹẹ̀b 31:11, 26, 27.) Tṍó e págbálà tú íb bá fã̀ dẽeá sẹ̀ẹ̀ma a va, àé náa kọ á valí ló a va gè tõó kè kẽè a lẹ̀ẹ̀là bel.

15. Éé ní e gbò va é láá nó lọl ló nu dòòmà bá Jíízọ̀s e?

¹⁵ Nú e gbò va é láá nò. Náa kal ló béè kọọ̀ Jíízọ̀s beè naa gã́bug nu, náa beè ẹ̀b kọọ̀ ge tõonìè kẽè Jìhóvà dú gè ẹbvìè a bá tẹlẹ̀ẹ̀ kẽ. (1 Kọ́r. 15:28; Fíl. 2:5, 6) Mm̀ tẽ̀ènè sĩ́deèá, lé va ea gé nó nu dòòmà bá Jíízọ̀s náa é ẹ̀b kọọ̀ níà ge ẹbvìè a bá tẹlẹ̀ẹ̀ kẽ be à tõonìè kẽè a dóm. Àé nveè sãa kúm a dóm níì áá boo béè kọọ̀ à vulèè nì, sõò boo béè kọọ̀ à vulè vaá fã̀ dẽè Jìhóvà.

16. Dẹ̀ẹ̀a boo nú ea di mm̀ 1 Sámuẹ̀l 25:3, 23-28, mókà gbò ànà-ànà ní e Ábigẹẹ̀l beè kpee sĩ́ ló é? (Ẹ̀b fùtó ea di boo kóó kpáí.)

¹⁶ Ábigẹẹ̀l beè vaà Nábàl. Nábàl beè dú neǹ kùlù kúlù, neǹ dàlà kpá ló boo vaá náa beè ié dùm ṍà zaa. Sõò, Ábigẹẹ̀l náa beè gbĩ́ bé ea é náa vaá à aa ló a dóm. À gáẹ̀ beè láá pĩi gã́ vaá sọ̀tọ́ deè kọọ̀ Dévìd nè pá a gbò á fẹ́ a dóm. Sõò náa beè naa vó, tãa vó, a beè pììgà bé ea kpóó sim tùlà naa gè kpènà Nábàl bií ló pá a tọ. Bugi togó boo íb agẹló e Ábigẹẹ̀l beè ié gè láá elá sĩ́ 400 gbò bé vaá tú bá fã̀ dẽe loomá bel nè Dévìd. A beè dì nàgé kpènà ló gè tãàgã ló Dévìd ló pọ́lọ́ ea dóm beè sì. (Bugi 1 Sámuẹ̀l 25:3, 23-28.) Dévìd beè nyimá kọọ̀ Jìhóvà ní ea tú nakà nvín pábia ea íe agẹlóí siimá tóm mm̀ ge nèe dùùlà bá deè tṍ ea náa kọ á gá sí agẹbá pọ́lọ́ ẹ́.

17. Éé ní e gbò dóm é láá nó lọl ló nòòtẽ́ ea kil ló Dévìd nè Ábigẹẹ̀l ẹ?

¹⁷ Nú e gbò dóm é láá nó lọl ló. Ábigẹẹ̀l beè pábia ea nyímá nu. À dú nu e nyìmànù di mm̀ kọọ̀ Dévìd beè tú a dùùlà bá deè tṍ. Vó beè naa kọ á gá fẹ́ gbò sàn. Tẽ̀ènè sĩ́deèá, dóm ea nyímá nu ólò bugi togó boo lọ̀ọ̀gà bùlà a va besĩ́ à kálá nè agẹbá béèlàfùl. Be à sẹlẹ a lọ̀ọ̀gà bùlà é láá naa kọ á gá nè béèlàfùl e nyìmànù á gé m.

18. Éé ní e gbò va é láá nó lọl ló nu dòòmà bá Ábigẹẹ̀l ẹ?

 ¹⁸ Nú e gbò va é láá nó lọl ló. Va ea vulè vaá nvèè ka ló Jìhóvà é láá naa nú ea é dọ bélè nè pá a tọ, kọbèè a dóm náa ólò fã̀ Jìhóvà àbèè ge tõó boo gbò a nòòkúu. Náa é gbĩ́ bé ea é náa vaá ba ílà dóm nè va íná kùbmà. Tãa vó, à ólò fã̀ dẽe a dóm vaá gbànie tṍ ló vaá níí é láá naa kọ a dóm á gbĩ́ gè nó nu ea kil ló Jìhóvà. (1 Pít. 3:1, 2) Sõò kọbèè à gá náa vaá a dóm náa fã Jìhóvà, nyíè Jìhóvà é kilsĩ́ gè ẹẹ ló a va be à kilsĩ́ gè gbàn tṍ ló a dóm vaá bọ́ló dẹ̀lẹ̀ nyíé boo kilma ló Ẹlẹ.

19. Mó tṍó ní e bè náa bọ́ló kọ va á gbàn tṍ ló a dóm ẽ́?

¹⁹ Va ea gé nyoone nvéè Kráìst náa é gban tṍ ló a dóm be à gá náa à kọ á naa nú e bè náa gbááá ló gbò log àbèè nòòkúu ea di mm̀ Kpá Káí. Dì belí nu dòòmà bá, be a dóm e bè náa ólò nyoone nvéè Kráìst kọ́ nèe kọ á kpọ́ kyáá bel, zìb nu, àbèè ge naa nú e bè náa gbááá ló nú ea di mm̀ Kpá Káí. Dénè gbò e bà gé nyoone nvéè Kráìst, kọbèè gbò pábia e baa ni íá dóm é íè ge zẹ́ẹ́ gbàn tṍ ló Jìhóvà. Beè dóm e bè náa ólò nyoone nvéè Kráìst kọ́ nè a va ea gé nyoone nvéè Kráìst kọ á naa nú e bè náa gbááá ló gbò nòòkúu ea di mm̀ Kpá Káí, à bọ́ló kọ á tú gbọ́ọ́-gbọọ̀ ló bààmà tẽ́ nú ea náa vaá náa gé náanìè nú ea kọ́ á naa.—Tóm 5:29.

20. À náà è nyimá kọọ̀ Mérì beè ié kà lé gbaa ló kilma ló Jìhóvà ẹ?

²⁰ Mérì beè ié kà lé gbaa ló kilma ló Jìhóvà. A beè palàge nyimá gbò nú ea di mm̀ Kpá Káí. Tṍó ea géè zọ̀ Èlízabẹ̀t ea dú kà Jọ́ọ̀n neǹ dììlè nen múú loá bel, a beè kolí gbò nú ea aa mm̀ Kpá Káí e ba beè emí mm̀ dém bel Híbrù nú ea síga ló 20 tóm. (Lúùk 1:46-55) Bugi togó boo nakà gáí: Náa kal ló béè kọọ̀ Jósẹ̀f beè gbĩ́ gè ilí Mérì, nyómá tóm Jìhóvà náa beè zẹ́ẹ́ sila ló Jósẹ̀f. Túá Mérì ní e nyómá tómá beè zẹ́ẹ́ sí ló vaá kọ́ nèe kọ àé man nvín ea é dú Sã́áná Bàrì e. (Lúùk 1:26-33) Jìhóvà beè palàge nyimá ló Mérì vaá a beè àgala boo kọ àé vulè vaá ẹb nú ea kil ló a Sã́áná. Tọ́ọ̀ kà bàà-bàà bùlà á gé ló kọọ̀ Mérì beè kilsĩ́ gè ié kà lé gbaa ló kilma ló Jìhóvà  bã̀àna tṍó e Jíízọ̀s ni ú vaá kẽ̀èà kil káála.—Tóm 1:14.

21. Éé ní e gbò dóm é láá nó lọl ló nú e Kpá Káí kọ́ kilma ló Mérì e?

²¹ Nú e gbò dóm é láá nó lọl ló. Nyíè dóm ea nyímá nu ólò palàge ẹẹ tṍó ea va nyímá gbò nú ea di mm̀ Kpá Káí. Nyíée náa é biilà vaá náa é túúmá kọọ̀ à gbĩ́ gè dú togó boo tọ. À ólò nyimá kọọ̀ be a va palàge nyimá gbò nòòkúu ea di mm̀ Kpá Káí, àé láá nvèè bá nè pá a tọ. À dú kà kà kọọ̀ kọ̀bèè à gá náa vaá va à palàge nyimá kpá èl a dóm, dóm ní ea lela ló kọ á sẹlẹ fã̀ pá tọ nè dõòna kà gbò nu ea é síè kpóó ló ba gbaa ló kilma ló Jìhóvà ẹ.—Ẹ́fẹ. 6:4.

22. Éé ní e gbò va é láá nó lọl ló Mérì e?

²² Nú e gbò va é láá nó lọl ló. À bọ́ló kọọ̀ va á gbàn tṍ ló a dóm, sõò ẹlẹ ní ea é náa gbò nú ea é náa kọ á ié agẹ zìgà ẹ. (Gàl. 6:5) Vóà naa, àé bọ́ló kọ á noo tṍó nyòòmà ge nó Kpá Káí vaá bugi togó boo gbò nu ea nó. Ge naa vó é náa kọ á kilsĩ́ gè vùlè vaá nvèè ka ló Jìhóvà, àé náa kọ á ié nágé ẹ́ẹ́ nyíé mm̀ ge gbàn tṍ ló a dóm.

23. Mósĩ́ deè ní e gbò va e bà tõó kè kẽè lẹ̀ẹ̀là bel ba dóm ólò naa nú ea é dọ bélè nè ba bá, ba tọ, nè bõ̀ònatõ̀ò ẽ́?

²³ Gbò va e bà tõó kẽè lẹ̀ẹ̀là bel ba dóm boo béè kọọ̀ bà vulè Jìhóvà é ié ẹ́ẹ́ nyíé nè dĩ̀ìnè ló èl gbò e bà náa tõó boo nòònù Jìhóvà ea kil ló nen ea bọ́ló kọ́ á dú togó boo tọ. Bà zógè lé nú dòòmà bá e gbò nvín ãa gbálà nè bia é láá nó nu lọl ló. Vaá bà ólò naa kọọ̀ vulà nè fẹ́ẹ́-fẹẹ̀ ló á di mm̀ ba tọ nè mm̀ bõ̀ònatõ̀ò. (Táítọ̀s 2:3-5) Deè nieí, gã́bug gbò bia dṹùnà gbò e bà bọ́ló dẹ̀lẹ̀ nyíé boo nè Jìhóvà. (Ps. 68:11) Dénè bèì, kọbèè è dúù págbálà àbèè pábia, èé láá gbá náa kọọ̀ ẹ́ẹ́ nyíé á di mm̀ bõ̀ònatõ̀ò. Togó bel ge nò ea bẽene níí é ló bel boo bé e buù bèì é láá naa níí naa.